He Kohinga mai i te
Pukapuka o Mohi

1 Ko ngā kupu a te Atua, i kōrerotia atu e ia ki a Mohi i te wā i kahakina ake a Mohi ki runga i tētahi maunga tino tiketike rawa atu,

2 Ā, i kite ia i te Atua kanohi ki te kanohi, ā, i kōrero tahi ki a ia, ā, i runga te korōria o te Atua ki runga i a Mohi; nō reira i āhei ai i a Mohi te tū i tana aroaro.

3 Ā, ka kōrero atu te Atua ki a Mohi, e mea ana: Nana, ko au te Ariki te Atua Kaha Rawa, ā, ko te Mutunga Kore tōku ingoa; nā te mea kāore he tīmatanga o ōku rā, he mutunga rānei o ōku tau; ā, ehara rānei tēnei i te mutunga kore?

4 Ā, nana, ko koe taku tama; nā reira titiro, kātahi au ka whakaatu atu ki a koe te mahinga o aku ringaringa; engari kaua ko te katoa, nā te mea kāore he mutunga tō aku mahinga, me aku kupu anō hoki, nā te mea e kore hoki ērā e mutu.

5 Nā reira, kāore e taea ana e te tangata kotahi te kite atu i aku mahinga katoa, ki te kore ia e kite i tōku korōria katoa; ā, kāore e taea e te tangata kotahi te kite i tōku korōria katoa, kātahi ka noho tonu i runga i te whenua i te kikokiko whai muri iho.

6 Ā, he mahi tāku māu, e Mohi, e taku tama; ā, e rite ana koe ki taku Tama Kotahi Anake; ā, ko taku Tama Kotahi Anake, ā, ko ia te Kaiwhakaora, nā te mea kua kī ia i te aroha me te pono; engari kāore he Atua kē atu i kō atu i ahau, ā, kei ahau ngā mea katoa, nā te mea kei te mōhio ahau ki ngā mea katoa.

7 Ināianei ā, nana, e whakaatu atu ana ahau i tēnei mea kotahi ki a koe, e Mohi, e taku tama, nā te mea kei roto koe i te ao, ā, māku e whakaatu atu ki a koe ināianei.

8 Ā, i pahawa ake, nā, ka titiro a Mohi, kātahi ka kite i te ao i hangaia ai ia ki runga; ā, ka kite a Mohi i te ao me tōna mutunga o reira, me ngā tamariki katoa o te tangata e ora ana, me ngā mea kua oti te hanga; nā ka ohorere, ā, ka mīharo nui ia ki taua mea.

9 Ā, ka whakarērea te mauri o te Atua i a Mohi, nā konā kāore i runga i a Mohi tōna korōria; ā, kua whakarērea a Mohi ko ia anake. Ā, i a ia e noho ana ko ia anake, ka makere iho ia ki te whenua.

10 Ā, ka pahawa ake, nā, ka pau ngā hāora maha i mua i tā Mohi whiwhi i tōna kaha anō e rite ana ki tō te tangata; ā, ka kī ake ia ki a ia anō: Nā, nā konei mōhio nei au kua kore noa iho te tangata, kāore au i mōhio ki tēnei mea i mua.

11 Engari kua kite ināianei ōku karu i te Atua; engari kaua ko ōku ake karu, nā te mea kua kore i taea e ōku karu te kite atu; nā te mea e tika ana kua memenge iho, ā, kua mate au i tōna aroaro; engari i tau iho tōna korōria ki runga ki ahau; ā, ka kite au i tōna mata, i te mea i panonitia au i mua i a ia.

12 Ā, i pahawa ake, nā, i te wā i kōrerotia ēnei kupu e Mohi, nana, ka haere mai a Hātana e whakawai ana i a ia, e mea ana: E Mohi, e te tama a te tangata, me koropiko koe ki ahau.

13 Ā, i pahawa ake, nā, ka titiro atu a Mohi ki a Hātana kātahi ka kī: Ko wai koe? Nana rā, ko au te tama a te Atua, e rite ana ki te Tama Kotahi Anake; ā, kei hea tō korōria, e koropiko ai au ki a koe?

14 Nana rā, kīhai i taea e au te titiro atu ki te Atua, ki te kore e tau mai tōna korōria ki runga i ahau, e panonitia ana au i mua i a ia. Engari ka taea te titiro ki runga ki a koe i tōku āhua māori. Kāore rānei i te pēnei?

15 Kia whakapaingia te ingoa o tōku Atua, nā te mea kāore anō au kia whakarērea katoatia e tōna Wairua, arā, kei hea rānei tō korōria, nā te mea he pōuritanga ki ahau? Ā, e taea ana te whiriwhiri i waenganui i a koe me te Atua; nā te mea i kī mai te Atua ki ahau: Koropikotia te Atua, nā te mea ka mahi koe ki a ia anake.

16 Haere atu, e Hātana; kaua e tinihanga i ahau; nā te mea kua mea mai te Atua ki ahau: E rite ana koe ki aku Tama Kotahi Anake.

17 Ā, i homai hoki e ia ngā whakahaunga i te wā i karangatia au e ia mai i tētahi puihi e muramura ana, e mea ana: Karangatia te ingoa o te Atua i runga i te ingoa o taku Tama Kotahi Anake, ā, koropikotia ahau.

18 Hei āpiti anō ka kī ake a Mohi: E kore e mutu taku karanga atu ki te Atua, he mea anō āku hei uinga atu māku ki a ia, nā reira ka taea te whiriwhiri i waenganui i a ia, ia a koe. Haere atu, e Hātana.

19 Ināianei ā, i te kōrerotanga a Mohi i ēnei kupu, ka hamama atu a Hātana i runga i te reo kaha, ā, ngahae ana i runga i te whenua, e whakahau ana, e mea ana: Ko au te Tama Kotahi Anake, koropikotia ahau.

20 Ā, i pahawa ake, nā, ka tīmata te wehi nui o Mohi; ā, i a ia e tīmata ana kia wehi, ka kite ia i te kawa o te ao rēwera. Hei aha koa, nā te karanga ake ki te Atua, ka whiwhi kaha ia, ā, ka whakahau ia, e mea ana: Haere atu i a au, e Hātana, nā te mea ka koropiko au ki tēnei Atua kotahi anake, koia te Atua o te korōria.

21 Ināianei ā, ka tīmata a Hātana te wiri, ā, ka ngāueue te whenua; ā, ka whiwhi kaha a Mohi, kātahi ka karangatia te Atua, e mea ana: I runga i te ingoa o te Tama Kotahi Anake, haere atu, e Hātana.

22 Ā, i pahawa ake, nā, ka hamama ake a Hātana i runga i te reo kaha, e tangi ana, e auē ana, ā, e tetē ana ngā niho; kātahi ka haere atu ia i reira, mai i te aroaro pū anō o Mohi, nā konā kāore ia i kite atu ai i a ia.

23 Ināianei ā, ka whakaaturia tēnei mea e Mohi; engari nā te whakarihariha kāore tērā i waenganui i ngā tamariki a te tangata.

24 Ā, i pahawa ake, nā, i te wā i wehe atu a Hātana i te aroaro o Mohi, nā, ka ara ake ngā karu o Mohi ki te rangi, e kikī ana i te Wairua Tapu, e whakaatu ana e pā ana ki te Matua me te Tama;

25 Ā, ka karanga ake ki te ingoa o te Atua, ka kite atu anō i tōna korōria anō, nā te mea kei runga i a ia; ā, ka rongo i tōna reo, e mea ana: Ku manaakitia koe, e Mohi, nā te mea nāku, nā te Mea Kaha Rawa, koe i whiriwhiri, ā, ka whakakahangia ake koe i ngā wai maha; nā te mea ka whakarongo ērā ki tāu whakahau me te mea nei ko koe te Atua.

26 Ā, titiro, kei tō taha ahau, tae atu pū anō ki te mutunga o ō rā; nā te mea māu taku iwi e whakaputa i te heretanga, arā, ko Iharaira tāku mea kōwhiria.

27 Ā, i pahawa ake, i te reo e kōrero tonu ana, ka whiua e Mohi ōna karu kātahi ka kite atu i te whenua, āe rā, ko te katoa pū anō; ā, kāore i reira tētahi pito kīhai ia i kite atu; he mea kite atu nā runga i te Wairua o te Atua.

28 Ā, i kite atu anō ia i ngā tāngata noho o reira, ā, kāore rawa he wairua kīhai ia i kite atu; he mea kite atu nā runga i te Wairua o te Atua; ā, he rahi tō rātou tokomaha, he mea tē taea te tatau anō nei ko ngā onepū o te tahatai.

29 Ā, ka kite ia i ngā whenua maha; ā, i karangatia ia whenua ko te whenua, ā, i reira ngā tāngata e noho ana ki runga rā.

30 Ā, i pahawa ake, nā, ka karanga ake a Mohi ki te Atua, e mea ana: Kōrerotia mai, tāku e inoi nei, he aha e pēnei ai ēnei mea, ā, nā te aha i hangaia ai ēnei mea e koe?

31 Ā, nana, i runga te korōria o te Ariki i runga i a Mohi, nā konā tū ai a Mohi i te aroaro o te Atua, ā, ka kōrero kanohi ki te kanohi ki a ia. Ā, ka kī ake te Ariki te Atua ki a Mohi: Kua hangaia ēnei mea e au mō tāku ake take. Anei te mātauranga, ā, e noho mai ana i roto i ahau.

32 Ā, mā te kupu o tōku mana, nāku ērā mea i hanga, koia ko taku Tama Kotahi Anake, e kikī ana i te aroha me te pono.

33 Ā, tē taea te tatau i ngā ao kua hangaia nei e au; ā, nāku anō ērā mō tāku ake take; ā, he mea hanga hoki nā te Tama, koia tāku Tama Kotahi Anake.

34 Ā, kua huaina te tangata tuatahi o ngā tāngata katoa ko Arama, he tokomaha.

35 Engari ka hoatu tētahi tuhinga mō tēnei ao anake, me ngā tāngata o reira, ki a koutou. Nana rā, he maha ngā ao kua pahemo noa atu nā runga i te kupu o tōku mana. Ā, he maha anō ngā mea e tū tonu ana, ā, kāore e taea te tatau e te tangata; engari kua tatauria ngā mea katoa e au, nā te mea nāku ērā, ā, e mōhio ana au ki a rātou.

36 Ā, i pahawa ake, nā, ka kōrero atu a Mohi ki te Ariki, e mea ana: Kia aroha mai ki tāu pononga, E te Atua, ā, kōrerohia mai e pā ana ki tēnei ao, me ngā tāngata o reira, me ngā rangi anō hoki, kātahi ka tau te ngākau o tō pononga.

37 Ā, ka kōrero atu te Ariki te Atua ki a Mohi, e mea ana: Ko ngā rangi, he maha, ā, tē taea te tatau e te tangata; engari e mōhio ana au ki ngā tatauranga; nā te mea nāku ērā.

38 Ā, i te mea ka pahemo atu tētahi whenua, me ngā rangi o reira, ka pērā anō te putanga mai o tētahi atu; ā, kāore he mutunga tō aku mahinga, o aku kupu rānei.

39 Nana rā, koinei taku mahi me tōku korōria—kia whakaputaina mai te mate kore me te oranga tonutanga o te tangata.

40 Ināianei ā, e Mohi, e taku tama, ka kōrero atu au ki a koe e pā ana ki tēnei whenua e tū nei koe; ā, māu e tuhituhi ngā mea e kōrerotia nei e au.

41 Ā, hei taua rā ina whakaarohia nuitia aku kupu e ngā tamariki a te tangata hei mea kore noa me te tango atu i aua mea maha i te pukapuka e tuhia ai e koe, nana, māku tētahi atu e mairanga ake e rite ana ki a koe; ā, ka whakahokia mai anō aua kupu ki waenganui i ngā tamariki a te tangata—kei waenganui i te hunga katoa e whakapono ai.

42 (I kōrerotia ēnei kupu ki a Mohi i runga i te maunga, e kore e mōhiotia tōna ingoa i waenganui i ngā tamariki a te tangata. Ināianei ā, kua kōrerotia ki a koe. Kaua e huraina atu ki tētahi atu ki te kore rātou e whakapono. Koia anō. Āmine.)