1 Ā, nāku, nā te Ariki te Atua, i kōrero ki a Mohi, e mea ana: Ko taua Hātana, nāu nei i whakahau i runga i te ingoa o taku Tama Kotahi Anake, taua mea anō i reira mai i te tīmatanga, ā, ka haere mai ia ki mua i ahau, e mea ana—Nana, kei konei au, tukua au, māku hei tama māu, ā, māku te tangata e hoko, kia kore ai tētahi wairua e ngaro, ā, kāore e kore ka tutuki tēnei i ahau; nā reira homai tō hōnore ki ahau.

2 Engari, nana, ka kī mai taku Tama Aroha, koia taku Mea Arohaina me taku Mea Kōwhiria mai i te tīmatanga—E te Matua, ka meatia tāu e pai ai, ā, mōu te korōria āke tonu atu.

3 Nā reira, i te mea i haututū mai a Hātana ki ahau, me te rapu kia whakangaromia te mana kōwhiringa o te tangata, nāku, nā te Ariki te Atua, i hoatu ai ki a ia, waihoki, kia hoatu e au tōku ake mana ki a ia; he mea nā te mana o taku Tama Kotahi Anake, nāku i mea kia makaia iho ia ki raro;

4 Kātahi ka meinga ia ko Hātana, āe rā, ko te rēwera pū anō, te matua o ngā teka katoa, hei tinihanga, ā, hei whakakāpō i te tangata, me te ārahi atu i a rātou ki te hereheretanga kia rite ki tāna e pai ai, āe rā, te hunga katoa kīhai i whakarongo mai ki tōku reo.

5 Ināianei ā, he nui kē ake te tinihanga o te nākahi i tētahi kararehe o te pārae kua hangaia mai nei e au, e te Ariki te Atua.

6 Ā, nā Hātana i whakatō ki roto i te ngākau o te nākahi, (nā te mea he tokomaha i kumea atu ai e ia,) ā, i whai ia kia tinihangatia hoki a Iwi, nā te mea kāore ia i mōhio ki ngā whakaaro o te Atua, nā reira i whai ia ki te whakangaro i te ao.

7 Ā, ka kī atu ia ki te wahine: Āe rā, kua kī mai te Atua—Kia kaua kōrua e kai i ngā rākau katoa o te kāri? (Ā, i kōrero ia mā roto i te māngai o te nākahi.)

8 Ā, ka mea atu te wahine ki te nākahi: E whakaae ana kia kai māua i ngā rākau o te kāri;

9 Engari ko ngā hua o te rākau e kite nei koe i waenganui i te kāri, kua mea mai te Atua—Kaua kōrua e kai, kaua rānei e pā atu, kei mate kōrua.

10 Ā, ka kī atu te nākahi ki te wahine: E kore kōrua e mate rawa;

11 I te mea e mōhio ana te Atua, i te rā e kai ai kōrua i reira, ka whakatūwheratia ō kōrua karu, ā, ka rite kōrua ki ngā atua, e mōhio ana ki te pai me te kino.

12 Ā, i te wā i kite atu te wahine he pai te rākau rā mō te kai, ā, e āhuareka ana ki te karu, ā, he rākau hoki e hiahiatia ana hei mea i a ia kia mātau, ka tangohia e ia te hua o reira, ā, ka kai, ā, ka hoatu hoki ki tana hoa tāne i tōna taha, ā, ka kai ia.

13 Ā, i whakatūwheratia ngā karu o te tokorua, ā, i mōhio rāua kua tahanga rāua. Ā, ka tuia ngā rau piki kia meatia he rāpaki mō rāua.

14 Ā, i rongo rātou i te reo o te Ariki te Atua, i a rāua e hīkoi ana i te kāri, i te mātao o te rā; kātahi ka haere a Arama rāua ko tana hoa wahine ki te huna i a rāua anō i te aroaro o te Ariki te Atua i roto i ngā rākau o te kāri.

15 Ā, nāku, nā te Ariki te Atua, a Arama i karanga, ā, ka kī atu ki a ia: E haere ana koe ki hea?

16 Ā, ka kī mai ia: I rongo au i tō reo i te kāri, ka wehi au, he tahanga nōku, kātahi ka huna i ahau anō.

17 Ā, nāku, nā te Ariki te Atua, i kī atu ki a Arama: Nā wai koe i kī he tahanga koe? Kua kai rānei koe i ngā hua o te rākau i whakahaua rā koe e au kia kaua e kaingia, ki te pērā ka mate rawa koe?

18 Ā, ka mea te tangata: Nā te wahine i homai nei e koe ki ahau, ā, i whakahaua mai ki piri tonu ki ahau, nāna te hua o te rākau i homai ki ahau, ā, ka kai au.

19 Ā, nāku, nā te Ariki te Atua, ka mea atu ki te wahine: He aha tēnei mea kua meatia nei e koe? Ā, ka kī ake te wahine: Nā te nākahi au i māminga, ā, ka kai au.

20 Ā, nāku, nā te Ariki te Atua, i kī atu ki te nākahi: I te mea kua pēneitia e koe ka nui ake tō kanga i tō te kau, i tō ngā kararehe katoa o te pārae; kei runga i tō puku koe e haere ai, ā, ka kai puehu koe i ngā rā katoa o tō oranga;

21 Ā, ka whakatupuria ake e ahau he mauāhara kei waenganui i a koe me te wahine, kei waenganui i ōu uri me ōna uri; ā, ka marū ia i tō māhunga, ā, ka ka marū koe i tōna rekereke.

22 Ki te wahine, nāku, nā te Ariki te Atua i kī: Ka tino whakanui au i tō pōuritanga me tō hapūtanga. Ka whakawhānauhia mai ngā tamariki i runga i te pōuritanga, ā, ka hiahia koe ki tō tahu, ā, māna hei rangatira mōu.

23 Ā, ki a Arama, nāku, nā te Ariki te Atua i kī:I te mea kua aro atu koe ki te reo o tō hoa wahine, ā, kua kai i te hua o te rākau i whakahaua koe e au e mea ana—Kaua koe e kai i ōna hua, ka kangaia te whenua mōu te take; ka kai koe i ōna hua i runga i te pōuri i ngā rā katoa o tō oranga.

24 Ka whakaputaina ake e ia ngā tātaramoa, ngā tūmatakuru ki a koe, ā, ka kai koe i ngā taru o te pārae.

25 Mā te wera o tō rae e kai ai koe i te paraoa, tae noa ki te wā e hoki ai koe ki te whenua—nā te mea kāore e kore ka mate rawa koe—nā te mea i tangohia mai ai koe i reira: nō te puehu koe, ā, ka hoki anō koe ki te puehu.

26 Ā, ka karanga atu a Arama ki tana hoa wahine ko Iwi tōna ingoa, i te mea ko ia te whaea o ngā mea ora katoa; nā te mea pēnei nāku, nā te Ariki te Atua, i hua ai te wahine tuatahi o ngā wāhine katoa, he tokomaha.

27 Ki a Arama, ki tana hoa wahine anō hoki, nāku, nā te Ariki te Atua, ngā koti hiako i hanga, ā, ka whakakākahuria rāua.

28 Ā, nāku, nā te Ariki te Atua, i kī ake ki taku Tama Kotahi Anake: Nana, kua rite nei te tangata ki a tāua kia mōhio ai ki te pai me te kino; ināianei ā kei toro atu tana ringa me te kai hoki i te rākau o te ora, ā, ka kai, ka ora tonu mō āke tonu atu,

29 Nō reira māku, mā te Ariki te Atua, e tuku atu ai i a ia ki waho i te Kāri o Erene, kia ngakia te whenua mai i te wāhi i tangohia mai ia i reira;

30 I te mea e ora ana au, te Ariki te Atua, e kore rawa e mana kore aku kupu, nā te mea i ngā kupu e puta ake ana i tōku māngai e tika ana kia whakatutukihia.

31 Nō konā i peia atu ai e au te tangata, ā, ka whakanoho atu au ki te taha rāwhiti o te Kāri o Erene te hoari mura, he mea piupiu tonu ki tētahi taha, ki tētahi taha kia tiakina ai te huarahi ki te rākau o te ora.

32 (Ā, koinei ngā kupu i kōrerotia ai ki taku pononga a Mohi, ā, he pono ērā e rite ana ki tāku e pai ai; ā, kua kōrerotia atu ērā e au ki a koe. Kaua e huraina atu ki tētahi atu tangata, tae noa ki taku whakahau, hāunga te hunga e whakapono ana. Āmine.)