1 Pēnei oti ai te rangi me te whenua, me ngā tāngata katoa o roto.

2 Ā, i te rā tuawhitu, nāku, nā te Atua, i whakamutu aku mahi, me ngā mea katoanāku i hanga; ā, ka whakatā au i te rā tuawhitu i aku mahi katoa, ā, kua oti ngā mea katoa nāku i hanga, ā, nāku, nā te Atua i kite atu he pai ērā mea katoa;

3 Ā, nāku, nā te Atua, te rā tuawhitu i manaaki, ā, i whakatapu; nā te mea i whakatā au i aku mahinga katoa nāku, nā te Atua, i hanga.

4 Ināianei ā, nana, ko taku kupu tēnei ki a koe, nā, koinei ngā whakatipuranga o te rangi me te whenua, i te wā i hangaia ai ērā, i te rā nāku, nā te Ariki te Atua, i hangaia ai te rangi me te whenua,

5 Ā, ko ngā tipu katoa i mua i tana pihi ake i te whenua, me ngā taru katoa o te whīra i mua i tana whanaketanga. Nā te mea nāku, nā te Ariki te Atua, ngā wairua o ngā mea katoa i hanga, ngā mea kua kōrerotia ake nei e au, i mua i te whakatipunga ake i ruinga i te mata o te whenua. Nā te mea nāku, nā te Ariki te Atua, kīhai i mea kia heke iho te ua ki rungai te mata o te whenua. Ā, nāku, nā te Ariki te Atua, ngā tamariki katoa o te tangata i hanga; ā, kāore anō he tangata hei ngaki i te whenua; nā te mea i hangaia rātou e au i te rangi; ā, kāore anō kia tau iho tētahi kikokiko i runga i te whenua, kāore he wai, he hau rānei;

6 Engari nāku, nā te Ariki te Atua, i kōrero, kātahi ka rewa ake tētahi kohu i te whenua, ā, ka whakamākūkūtia te mata katoa o te whenua.

7 Ā, nāku, nā te Ariki te Atua, te tangata i whakaahua mai i te puehu o te whenua, ā, i whakaueuehā ki roto i tōna ihu te hā o te ora; ā, kātahi ka meinga te tangata hei wairua ora, te kikokiko tuatahi i runga i te whenua, te tangata tuatahi anō hoki; hei aha koa, i hangaia ngā mea katoa i mua; engari i hangaia wairuatia ai, ā, e rite ana ki taku kupu.

8 Ā, nāku, nā te Ariki te Atua, tētahi kāri i whakatō ki te taha rāwhiti o Erene, ā, i reira whakanoho iho au i te tangata nāku noa nei i hanga.

9 Ā, mai i te whenua i hanga ai au, te Ariki te Atua, kia whakatipuria ngā rākau katoa, e tipu māori ai, e āhuareka ana ki tā te tangata titiro; ā, i taea e te tangata te kite atu. Ā, ka meinga hoki hei wairua ora. Nā te mea he mea wairua ia i te wā i hangaia ai e au; nā te mea e noho tonu anu i roto i te ao i hangaia ai e ahau, e te Atua, āe rā, ko ngā mea katoa pū anō nāku noa nei i hanga hei painga mō te tangata; ā, ka kite te tangata he pai tēnā hei kai. Ā, nāku, nā te Ariki te Atua, te rākau o te ora i whakatō iho ki roto i te pokapū o te kāri, me te rākau hoki o te mātauranga o te pai me te kino.

10 Ā, nāku, nā te Ariki te Atua, tētahi awa i mea kia rere atu i Erene ki te whakamākūkū i te kāri; ā, mai i reira ka wehea, ā, ka meinga kia whā ngā mātāpuna.

11 Ā, nāku, nā te Ariki te Atua, te tuatahi i huaina ko Pihona, ā, taiāwhio noa ana tēnā te whenua o Hāwira, i reira hangaia ai e ahau, e te Ariki te Atua, ngā kōura maha;

12 Ā, he pai te kōura o te whenua, ā, i reira te riuma me te kōhatu onika.

13 Ā, ko te ingoa o te awa tuarua ko Kihona; ko taua mea anō e taiāwhio noa ana te whenua katoa o Etiopia.

14 Ā, ko te ingoa o te awa tuatoru ko Hirekere; tērā e rere atu ana ki te taha rāwhiti o Ahiria. Ā, ko te awa tuawhā ko Uwhereti.

15 Ā, nāku, nā te Ariki te Atua, te tangata i hari, ā, ka whakanoho atu ki roto i te Kāri o Erene, hei whakakākahu, ā, hei tiaki.

16 Ā, nāku, nā te Ariki te Atua, te tangata i whakahau, e mea ana: Kaingia noatia ngā hua o ngā rākau katoa o te kāri,

17 Engari ko te rākau o te mātauranga o te pai me te kino, kaua e kai i ōna hua, hei aha koa, kei a koe te tikanga kia kōwhiri mōu ake, nā te mea kua hoatu ki a koe; engari, kia mahara kua rāhuitia tēnā, nā, hei te rā e kai ai koe i ōna hua ka mate rawa koe.

18 Ā, nāku, nā te Ariki te Atua, i kī atu ki taku Tama Kotahi Anake, nā, kāore e pai ana kia noho takakau te tangata; nā reira, māku tētahi hoa e hanga mōna.

19 Ā, mai i te whenua, nāku, nā te Ariki te Atua, i whakaahua mai ngā kararehe katoa o te pārae, me ngā manu katoa o te rangi; ā, i whakahaua kia haere mai ai ki a Arama, kia kite ai he aha tana ingoa mō rātou; ā, he wairua ora anō rātou; nā te mea nāku, nā te Atua, i whakaueuehā te manawaora ki roto i a rātou, ā, i whakahau hoki ahakoa he aha tā Arama ingoa mō ia mea ora, koinā tōna ingoa.

20 Ā, ka tapa a Arama ngā ingoa ki te kau, me te manu o te rangi, me ngā kararehe o te pārae; engari ki te taha ki a Arama, kāore i kitea tētahi hoa mōna.

21 Ā, nāku, nā te Ariki te Atua, i mea kia au te moe o Arama; ā, ka moe ia, ā, nāku tētahi o ōna rara i tango, ā, tūtakina atu ana te kikokiko hei whakakapi mō reira;

22 Ā, ko te rara i tangohia atu e au, e te Ariki te Atua, mai i te tangata, ka hangaia tētahi wahine, ā, ka haria mai ki te tangata.

23 Ā, ka kī ake a Arama: E mōhio ana ahau ki tēnei, ko te wheua o ōku wheua, ā, ko te kiko o ōku kiko; ka huaina ia ko Wahine, nā te mea he mea tango mai i te tāne.

24 Nō reira te tāne e wehe atu ai i tōna matua rāua ko tōna whaea, ā, ka piri ki tana hoa wahine; ā, hei kikokiko kotahi.

25 Ā, i te tū tahanga rāua, te tāne me tana hoa wahine, ā, kāore ō rāua whakamā.