1 Ā, i whakarongo atu a Arama ki te reo o te Atua, ā, ka karanga atu ki ana tama kia rīpenetā.

2 Ā, i mōhio anō a Arama ki tana hoa wahine, ā, ka whānau mai he tama, ā, ka huaina e ia ki te ingoa ko Heta. Ā, ka whakakorōriatia e Arama te ingoa o te Atua; nā te mea ka kī ake ia: Kua homai e te Atua he uri anō, atu i a Apera, te mea i patua e Kaina.

3 Ā, ka whakakite te Atua i a ia anō ki a Heta, ā, kāore ia i haututū, engari he pai tana whakahere nāna nei i tāpae iho, pērā i tana tuakana a Apera. Ā, ka whānau mai i tāna tētahi tama anō hoki, ā, ka huaina e ia ki te ingoa ko Īnohi.

4 Kātahi ka tīmata ēnei tāngata ki te karanga ake ki te Ariki, ā, ka manaakitia rātou e te Ariki;

5 Ā, ka puritia tētahi pukapuka whakamaharatanga, nā, ka tuhituhia ki te reo o Arama, nā te mea he mea hoatu ki te hunga katoa i karanga ake ai ki te Atua kia tuhituhi i runga i te wairua o te whakaweawenga;

6 Ā, nā aua mea ākona ai ā rātou tamariki me pēhea te pānui me te tuhituhi, i a rātou tētahi reo nanu kore, ā, hē kore.

7 Nā, ko tēnei Tohungatanga pū anō, koia i reira i te tīmatanga, ka toitū tonu hei te mutunga o te ao anō hoki.

8 Nā, i kōrerotia ake tēnei poropititanga e Arama, i a ia e pāngia ana e te Wairua Tapu, ā, ka puritia tētahi whakapapa o ngā tamariki a te Atua. Ā, koinei te pukapuka o ngā whakatipuranga o Arama, e mea ana: I te rā i hanga te Atua i te tangata, i runga i te ritenga o te Atua i hangaia ai ia e ia;

9 I runga i te ritenga o tōna ake tinana, tāne mai, wahine mai, i hangaia ai rāua e ia, ā, ka manaakitia rāua, ā, ka huaina rāua ki te ingoa o Arama, i te rā i hangaia ai rāua, ā, ka meinga hei wairua ora i te whenua i runga i te tūrangawaewae o te Atua.

10 Ā, i ora a Arama kotahi rau e toru tekau ngā tau, kātahi ka whānau mai anō he tama e rite ana ki tōna āhua, i tōna ake ritenga anō, ā, ka huaina ki te ingoa ko Heta.

11 Ā, ko ngā rā katoa o Arama, whai muri iho i te whānautanga mai o Heta, arā, ko te waru rau tau, ā, he tokomaha āna tama me āna tamāhine i puta;

12 Ā, kua eke ngā rā katoa i ora ai a Arama ki te iwa rau toru tekau ngā tau, kātahi ka mate ia.

13 Ka eke ake ngā tau o Heta ki te kotahi rau mā rima, kātahi ka whānau mai a Īnohi, ā, ka pau ōna rā ki te poropiti, ā, ka whakaakona tana tama a Īnohi ki ngā huarahi o te Atua; nā reira ka poropiti anō a Īnohi anō hoki.

14 Ā, ka eke ngā tau i ora ai a Heta, whai muri iho i te whānautanga mai o Īnohi, arā, ko te waru rau mā whitu ngā tau, ā, he tokomaha āna tama me āna tamāhine.

15 Ā, kua tini ngā tamariki a te tangata i runga i te mata o te whenua. Ā, i aua rā he nui te rangatiratanga o Hātana i rungai te tangata, ā, ka warowaro i roto i ō rātou ngākau; ā, nō taua wā tonu puta ai ngā pakanga me te hekenga toto; ā, tū atu te ringa o te tangata ki tōna ake teina, i runga i te whakamate, he mea nō ngā mahinga huna, e rapu mana ana.

16 Ka eke ake ngā rā katoa o Heta ki te iwa rau tekau mā rua ngā tau, kātahi ka mate ia.

17 Ā, ka iwa tekau tau a Īnohi, kātahi ka whānau mai a Kainana. Ā, ka puta mai a Īnohi me ngā morehu o te iwi o te Atua i te whenua i huaina ko Hurona, ā, ka noho i te whenua o te kupu whakaari, i huaina ki te inghoa o tana tama ake, ko Kainana tōna ingoa.

18 Ā, i ora a Īnohi, whai muri iho i te whānautanga mai o Kainana, arā, ka waru rau tekau mā rima ngā tau, ā, he tokomaha āna tama me āna tamāhine. Ā, ka eke ake ngā tau katoa o Īnohi ki te iwa rau mā rima ngā tau, kātahi ka mate ia.

19 Ā, ka pau ngā tau whitu tekau o Kainana, kātahi ka whānau mai a Mahararere; ā, ka eke ake ngā tau o Kainana ki te waru rau whā tekau ngā tau whai muri iho i te whānautanga mai o Mahararere, ā, he tokomaha āna tama me āna tamāhine. Ā, ko ngā tau katoa i ora ai a Kainana, arā, ko te iwa rau tekau ngā tau, kātahi ka mate ia.

20 Ā, ka ona tekau mā rima a Mahararere, kātahi ka whānau mai ia Iarere; ā, ka ora a Mahararere, whai muri iho i te whānautanga mai o Iarere, arā, ka eke ki te waru rau toru tekau ngā tau, ā, he tokomaha āna tama me āna tamāhine. Ā, ko ngā rā katoa i ora ai a Mahararere, arā, ko te waru rau iwa tekau mā rima ngā tau, kātahi ka mate ia.

21 Ā, ka ora a Iarere mō ngā tau kotahi rau e ono tekau mā rua, kātahi ka whānau mai a Enoka; ā, ka ora a Iarere, whai muri iho i te whānautanga mai a Enoka, arā, ko te waru rau tau, ā, ka tokomaha āna tama me āna tamāhine. Ā, ka whakaakona e Iarere ki a Enoka ngā huarahi o te Atua.

22 Ā, koinei te whakapapa o ngā tama a Arama, ko ia te tama a te Atua, i kōrero ngātahi ki te Atua ake anō.

23 Ā, he kaikauhau rātou i te tika, ā, i kōrerotia, ā, i poropititia, ā, ka karangahia ngā tāngata katoa, kei ngā wāhi katoa, kia rīpenetā; ā, ka whakaakona ki ngā tamariki a te tangata kia whakapono.

24 Ā, i pahawa ake, nā, ko ngā rā katoa o Iarere, arā, ko te iwa rau ono tekau mā rua ngā tau, kātahi ka mate ia.

25 Ā, kaora a Enoka mō te ono tekau mā rima tau, kātahi ka whānau mai a Matutaera.

26 Ā, i pahawa ake, nā, ka hāereere atu a Enoka i te whenua, ki waenganui i te iwi; ā, i a ia e hāereere ana, ka heke iho te Wairua o te Atua i te rangi, ā, ka tau ki runga ki a ia.

27 Ā, ka rongo ia i tētahi reo i te rangi, e mea ana: E Enoka, e taku tama, pororpititia ki tēnei iwi, ā, ka mea atu ki a rātou—Kia rīpenetā, nā te mea pēnei tā te Ariki: Kei te riri au ki tēnei iwi, ā, e āritearita ana taku riri ki a rātou; i te mea kua pakeke ō rātou ngākau, ā, kua turi ō rātou tāringa, ā, kāore e tawhiti ana te titiro o ō rātou karu;

28 Ā, mō ēnei whakatipuranga maha, mai i te rā i hangaia rātou e au, kua kōtiti rātou, ā, kua whakaparahakongia au, ā, kua aro kē ki ā rātou ake rūnanga i te pōuritanga; ā, i roto i ō rātou mōrikarika whakamaheretia kia kohuru, ā, kīhai i pupuri i ngā whakahaunga, kua hoatu nei e au ki tō rātou matua, ki a Arama.

29 Nā reira, kua oatitia rātou e rātou anō, ā, nā ō rātou oati, kua tō mai ki runga ki a rātou anō te matenga; ā, kua whakaritea e au tētahi ao rēwera mō rātou, ki te kore rātou e rīpenetā;

30 Ā, he ture tēnei, kua tono atu e au i te tīmatanga o te ao, atu i tōku ake māngai, mai i te tūāpapa o reira, ā, nā ngā māngai o aku pononga, ō koutou tūpuna, nāku i whakature, pērā pū anō i tana tononga atu i te ao, ki ngā tōpito o reira.

31 Ā, i te rongonga o Enoka i ēnei kupu, ka tuohu iho ia i a ia anō ki te whenua, i mua i te Ariki, ā, ka kōrero i te aroaro o te Ariki, e mea ana: He aha au i whai painga ai i tō tirohanga, ā, he tama noa ahau, ā, e mauāharatia ana ahau e ngā tāngata katoa; nā te mea he pōturi taku reo; nā reira ko au tō pononga?

32 Ā, ka mea atu te Ariki ki a Enoka: Haere atu me te mahi i ngā mea kua whakahaua koe e ahau, ā, kua kore tētahi tangata e wero ki a koe. Huakina tō māngai, kātahi ka whakakīa, ā, māku ō kupu e hoatu ki a koe, nā te mea kei ōku ringaringa ngā kikokiko katoa, ā, ka meatia e au tāku e pai ai.

33 Mea atu ki tēnei iwi: Kōwhiria e koe i tēnei rā, kia mahi ki te Ariki te Atua nāna nei koe i hanga.

34 Nana, kei runga taku Wairua i a koe nā reira māku ō kupu katoa e whakamana; ā, ka tahuti atu ngā maunga i tō aroaro, ā, ka huri kē ngā awa; ā, ka noho mai i roto i ahau, ā, ko au ki roto i a koe; nō reira hīkoi mai me au.

35 Ā, ka kōrero te Ariki ki a Enoka, ā, ka kī atu ki a ia: Whakawahia ō karu ki te uku, ā, horoia, kātahi koe ka kite. Ā, ka pērā ia.

36 Ā, i kite ia i ngā wairua i hangaia ai e te Atua; ā, i kite anō hoki ia i ngā mea kāore e kitea e te karu māori; ā, mai i reira puta ai te kōrero i runga i te whenua: Kua mairangatia ake tētahi matakite e te Ariki ki tana iwi.

37 Ā, i pahawa ake, nā, ka haere atu a Enoka i te whenua, ki waenganui i ngā tāngata, e tū ana ki runga i ngā hiwi me ngā wāhi tiketike, ā, ka karanga atu i runga i te reo kaha, e whakaatu atu ana ki te iwi e pā ana ki ā rātou mahinga; ā, i riri ngā tāngata katoa ki a ia.

38 Ā, i haere mai rātou ki te whakarongo ki a ia, ki runga i ngā wāhi tiketike, e mea atu ana ki ngā kaitiaki tēneti: E noho mai koutou ki konei kia tiakina ai ngā tēneti, i a mātou e haere atu ana ki reira kia kitea te matakite, nā te mea kei te poropiti ia, ā, he mea rerekē i te whenua; ā, kua haere mai tētahi tangata mohoao i waenganui i a tātou.

39 Ā, i pahawa ake, i tā rātou rongo atu i a ia, kāore tētahi i whakapā atu i ōna ringaringa ki runga ki a ia; nā te mea ka wehi rātou katoa te hunga i whakarongo ai ki a ia; i te mea i hīkoi tahi ia me te Atua.

40 Ā, ka haere mai tētahi tangata ki a ia, ko Mahita tana ingoa, ā, ka mea atu ki a ia: Kōrerotia mai ki a mātou kia mārama ko wai koe, ā, i haere mai hoki koe i hea?

41 Ā, ka mea atu ia ki a rātou: I haere mai au i te whenua o Kainana, te whenua o ōku tūpuna, he whenua o te tika tae noa mai ki tēnei wā. Ā, nā tōku matua au i ako ki ngā huarahi o te Atua.

42 Ā, i pahawa ake, i ahau e haere ana i te whenua o Kainana, mā te moana rāwhiti, i kite au i tētahi kitenga; ā, nana, i kite au i ngā rangi, ā, ka kōrero tahi māua ko te Ariki, ā, ka homai tētahi whakahaunga; nā reira, mō tēnei take, kia puritia ai te whakahau, e kōrerotia atu nei e au ēnei kupu.

43 Ā, ka haere tonu te kōrero a Enoka, e mea ana: Ko te Ariki i kōrero mai ki ahau, ko ia hoki te Atua o te rangi, ā, ko ia tōku Atua, ā, tō koutou Atua, ā, ko koutou ōku huānga, ā, he aha koutou e rūnanaga ai i a koutou anō, me te whakakore i te Atua o te rangi?

44 Nāna ngā rangi i hanga; ko te whenua tana tūrangawaewae; ā, nōna hoki te tūāpapa o reira. Nana, nāna i whakatakoto, nāna hoki te mano tini tāngata i whakatō iho ki reira.

45 Ā, kua tau iho te mate ki runga i ō tātou tūpuna; hei aha koa e mōhio ana tātou ki a rātou, ā, tē taea te karo, ā, e mōhio pū anō tātou ki te tuatahi, arā, ki a Arama.

46 Nā te mea kua tuhia tētahi pukapuka whakamaharatanga ki waenganui i a tātou, e rite ana ki te tauira i homai ai e te matikara o te Atua; ā, kua homai i tō tātou ake reo.

47 Ā, i a Enoka e kōrero ana i ēnei kupu a te Atua, ka wiriwiri te iwi, ā, tē taea te tū ki tōna aroaro.

48 Ā, ka mea atu ia ki a rātou: Nā te mea i taka ai a Arama, kua puta tātou; ā, nā tana takanga puta mai ai te mate; ā, nā konā kua meinga tātou hei kaiwhiwhi nō te pōuritanga me te auētanga.

49 Nana, kua uru mai a Hātana ki roto i ngā tamariki a te tangata, ā, e whakawai ana i a rātou kia koropiko ki a ia; ā, kua meinga te tangata hei mea hiahia ki te kino, hei mea tūkari, ā, hei mea rēwera, ā, kua aukatia atu i te aroaro o te Atua.

50 Engari kua whakamōhiotia ō tātou tūpuna e te Atua me rīpenetā ngā tāngata katoa.

51 Ā, i karangatia ake tō tātou tūpuna a Arama ki tōna ake reo, e mea ana: ko au te Atua; nāku te ao i hanga me ngā tāngata i mua i tō rātou i te kikokiko.

52 Ā, i kī atu anō hoki ia ki a rātou: Ki te tahuri mai koutou ki ahau, me te whakarongo ki tōku reo, me te whakapono, me te rīpenetā i ō koutou hara katoa, ā, kia rumakina, ki te wai pū anō, i runga i te ingoa o taku Tama Kotahi Anake, e kikī ana i te aroha me te pono, koia a Ihu Karaiti, te ingoa anake e homai ana i raro i te rangi mā konā puta mai ai te whakaoranga ki ngā tamariki a te tangata, ka whiwhi koutou i te takoha a te Wairua Tapu, e inoihia ana ngā mea katoa i runga i tōku ingoa, ā, ahakoa he aha tāu e inoi nei, ka hoatu ki a koutou.

53 Ā, i kōrero tō tātou tupuna a Arama ki te Ariki, ā, ka mea: He aha ia e tika ana kia rīpenetā te tangata, ā, kia rumakina i te wai? Ā, ka mea atu te Ariki ki a Arama: Nana, kua murua e au ō hara i te Kāri o Erene.

54 Nā konā puta mai ai te kōrero huri noa i roto i te iwi, nā, i whakamārietia e te Tama a te Atua te hara tuatahi, mā konā tē taea te utu i ngā hara o ngā mātua ki runga ki ngā māhunga o ngā tamariki, nā te mea kua hara kore rātou mai i te tūāpapa o te ao.

55 Ā, ka kōrero te Ariki ki a Arama, e mea ana: I te mea kua whānau mai ō tamariki i te hara, nā, ina tīmata tā rātou pakeke haere, ka puta ake te hara i ō rātou ngākau, ā, kātahi ka ronga rātou i te kawa, kia mōhio ai rātou kia tiakina te mea pai.

56 Ā, kua hoatu ki a rātou kia mōhio ai ki te pai i te kino; nā reira kua waiho ki a rātou anō, ā, kua hoatu anō e au ki a koutou tētahi atu ture me tētahi atu whakahau.

57 Nā reira whakakona ki ō tamariki, kia rīpenetā ngā tāngata katoa, kei ngā tōpito katoa, ki te kore e kore rawa e taea te whiwhi ki te kīngitanga o te Atua, nā te mea kāore e taea kia noho atu tētahi mea poke ki reira, kia noho rānei ki tōna aroaro; nā te mea, i roto i te reo o Arama, ko Tangata Tapu tōna ingoa, ā, ko te ingoa o tana Tama Kotahi Anake, arā, ko te Tama a te Tangata, ko Ihu Karaiti pū anō, tētahi Kaiwhakawā tika, e haere mai ai hei te waenganuitanga o ngā wā.

58 Nō reira hoatu ai e au tētahi whakahaunga ki a koutou, kia whakaakona noatia ēnei mea ki ō koutou tamariki, e mea ana:

59 He mea nā te hara i puta mai ai te takanga, nā taua takanga puta mai ai te matenga, ā, ki te mea ka whānau mai koutou ki roto ki tēnei ao he mea nā te wai, nā te toto, nā te wairua, kua hangaia nei e au, ā, he mea nā te puehu i hangaia ai tētahi wairua ora he pērā pū anō me whānau mai anō koutou ki roto i te kīngitanga o te rangi, o te wai, ā, o te Wairua hoki, ā, kia horoia ki te toto, ko te toto pū anō o taku Mea Kotahi Anake; kia whakatapua koutou i ngā hara katoa, ā, kia āhuareka ki ngā kupu o te oranga tonutanga i tēnei ao me te oranga tonutanga i te ao e puta mai ai, arā, ko te korōria mutunga kore pū anō.

60 Nā te mea, mā te wai e pupuri ai koutou i te whakahaunga; mā te Wairua e tika ai koutou, ā, mā te toto whakatapua ai koutou;

61 Nō reira kua hoatu kia ū ki roto i a koutou; te whakaaturanga o te rangi; te Kaiwhakaāio; ngā mea rangimārie o te korōria mutunga kore; te pono i roto i ngā mea katoa; ērā mea e whakaohongia ai ngā mea katoa, nāna ngā mea katoa e whakaora; ērā mea e mōhio ana ki ngā mea katoa, ā, kei a ia te kaha katoa e hāngai ana ki te mātauranga, te aroha, te pono, te tika me te whakawākanga.

62 Ināianei ā, nana, ko taku kupu tēnei ki a koutou: Koinei te mahere o te whakaoranga ki ngā tāngata katoa, mā roto i te toto o taku Mea Kotahi Anake, e haere mai ai i te waenganuitanga o ngā wā.

63 Ā nana, he rite tō ngā mea katoa, ā, kua hangaia ngā mea katoa kia whakaaturia mōku, ngā mea matemate, me ngā mea wairua; ngā mea kei ngā rangi i runga me ngā mea kei runga i te whenua, me ngā mea kei roto i te whenua, me ngā mea kei raro i te whenua, ngā mea i runga me ngā mea i raro: e whakaatu ana ngā mea katoa mōku.

64 Ā, i pahawa ake, i te wā i kōrero atu te Ariki ki a Arama, tō tātou tupuna, ko taua Arama nāna nei i karanga ake ki te Ariki, ā, ka kahakina ake ia e te Wairua o te Ariki, ā, i kahakina iho ki roto ki ngā wai, ā, i whakatakotoria iho ki raro i te wai, kātahi ka kumea ake anō i te wai.

65 Ā, pēnei tana rumakanga, ā, ka heke iho te Wairua o te Atua ki runga ki a ia, ā, pēnei tana whānautanga mai i roto i te Wairua, ā, ka meinga tōna iho hei mea whakaohokia.

66 Ā, ka rongo ia i tētahi reo e ahu mai ana i te rangi, e mea ana: Kua rumakina koe ki te ahi, ā, ki te Wairua Tapu anō hoki. Koinei te whakaaturanga a te Matua, me te Tama, atu ināianei, āke tonu atu;

67 Ā, i ahu mai koe i te ritenga o te mea kāore he tīmatanga o ōna rā, he mutunga rānei o ōna tau, mai i te mau tonu katoa ki te mau tonu katoa.

68 Nana, kotahi tonu koe i roto i ahau, he tama nā te Atua; ā, pēnei e āhei ana te katoa kia meinga hei tama māku. Āmine.