1 Ā, i pahawa ake, nā, ka kōrero te Ariki ki a Mohi, e mea ana: Nana, e huraina atu ana e au ki a koe e pā ana ki tēnei rangi, me tēnei whenua; tuhia ngā kupu e kōrerotiua nei e au. Ko au te tīmatanga me te whakamutunga, te Atua Kaha Rawa; nā taku Tama Kotahi Anake au i hanga ai i ēnei mea; āe rā, i te tīmatanga i hanga au i te rangi me te whenua e tū nei koe.

2 Ā, kāore he āhua, he tikanga tō te whenua; ā, nāku i mea kia tau te pōuritanga ki runga i te mata o te rire; ā, ka haere taku Wairua i runga i te mata o te wai; nā te mea ko au te Atua.

3 Ā, nāku, nā te Atua, i kī: Tukuna kia mārama; kātahi ka mārama.

4 Ā, nāku, nā te Atua, i kite atu ai i te māramatanga; ā, he pai te māramatanga. Ā, nāku, nā te Atua, i wehe te māramatanga i te pōuritanga.

5 Ā, nāku, nā te Atua, i huaina ai te māramatanga ko te Awatea; me te pōuritanga, i huaina ai ko te Pō; ā, pēnei tāku i mea ai i runga i te kupu o tōku mana, ā, ka meatia pērā i tāku i kōrero ai; ā, ko te ahiahi me te ata te rā tuatahi.

6 Hei āpiti anō, ka kī te Atua: Tukuna kia whai kikorangi hei waenganui i te wai, ā, ka pērāhia, pērā i tāku i kōrero ai; kātahi au ka kī: Tukua kia wehea ngā wai i ngā wai; kātahi ka meatia;

7 Ā, nāku, nā te Atua, i hanga te kikorangi, ā, i wehe ngā wai, āe rā, ngā wai nunui i raro i te kikorangi i ngā wai o runga i te kikorangi, ā, i pērāhia e rite ana ki tāku i kōrero ai.

8 Ā, nāku, nā te Atua, i huaina ai te kikorangi ko te Rangi; ā, ko te ahiahi me te ata te rā tuarua.

9 Ā, nāku, nā te Atua, i kī: Tukua kia whakatōpu i ngā wai i raro i te rangi ki te wāhi kotahi, ā, ka pērāhia; ā, nāku, nā te Atua, i kī: Tukua kia puta ake he whenua maroke; ā, ka pērāhia.

10 Ā, nāku, nā te Atua, i huaina ai ki te whenua maroke ko te Whenua; ā, ko te whakatōputanga o ngā wai, i huaina ai ko te Moana; ā, nāku, nā te Atua, i kite atu kua pai ngā mea katoa nāku i hanga.

11 Ā, nāku, nā te Atua, i kī: Tukua kia whakaputa te whenua i te pātītī, te tarutaru whakaputa kākano, te rākau hua e whakaputa hua ana, e rite ana ki tōna momo, me te rākau e whakaputa hua ana, ko ōna kākano anō i runga i te whenua, ā, ka pērāhia e rite ana ki tāku i kōrero ai.

12 Ā, ka whakaputa te whenua i te pātītī, me ngā tarutaru whakaputa kākano katoa o ia āhua, me te rākau whakaputa hua, ko tōna kākano e rite ai ki tōna ake momo; ā, nāku, nā te Atua, i kite atu ai he pai ngā mea katoa nāku i hanga;

13 Ā, ko te ahiahi me te ata te rā tuatoru.

14 Ā, nāku, nā te Atua, i kī: Tukua he māramatanga i roto i te kikorangi o te rangi, e wehe ai te awatea i te pō, ā, tukua ērā hei tohu, ā, mō ngā kaupeka, ā, mō ngā rā, ā, mō ngā tau;

15 Ā, tukua ērā hei māramatanga i te kikorangi o te rangi hei whakamāramarama mō te whenua; ā, ka pērāhia.

16 Ā, nāku, nā te Atua, i hanga ngā māramatanga e rua; te māramatanga nui ake mō te awatea, ā, te māramatanga iti iho mō te pō, ā, ko te māramatanga nui ake te rā, ā, ko te māramatanga iti iho ko te marama; ā, i hangaia hoki ngā whetū e rite ana ki taku kupu.

17 Ā, nāku, nā te Atua, ērā i whakanoho atu i te kikorangi o te rangi hei whakamāramarama i te whenua,

18 Ā, ko te rā i te awatea, me te marama mō te pō, ā, e wehe ai te māramatanga i te pōuritanga; ā, nāku, nā te Atua, i kite ai he pai ngā mea katoa nāku i hanga;

19 Ā, ko te ahiahi me te ata te rā tuawhā.

20 Ā, nāku, nā te Atua, i kī: Tukua kia ngahue ake i roto i ngā wai te mea ora e ngōki ana, me ngā manu e rere ai i runga i te whenua i te kikorangi o te rangi.

21 Ā, nāku, nā te Atua, ngā tohorā i hanga, me ngā mea ora katoa e ngōki ana, i ngahue mai ai i ngā wai, e rite ana ki tōna ake momo, me ngā manu whai parirau katoa e rite ana ki tōna ake momo; ā, nāku, nā te Atua, i kite ai he pai ngā mea katoa nāku i hanga.

22 Ā, nāku, nā te Atua, ērā i manaaki, e mea ana: Kia whai hua, kia tini, kia kapi hoki ngā wai o te moana; ā, tukua te manu kia tini mi runga i te whenua;

23 Ā, ko te ahiahi me te ata te rā tuarima.

24 Ā, nāku, nā te Atua, i kī: Tukua te whenua kia whakaputaina ake ngā kararehe o ia momo, te kau me ngā mea ngōki, me ngā tūmomo kararehe katoa o te whenua, ā, ka pērāhia;

25 Ā, nāku, nā te Atua, ngā tūmomo kararehe o te whenua i hanga, me ngā kau e rite ana ki tōna momo anō, me ngā mea katoa e ngōki ana i runga i te whenua e rite ana ki tōna momo anō; ā, nāku, nā te Atua, i kite atu, he pai katoa ngā mea nāku i hanga.

26 Ā, nāku, nā te Atua, i kī atu ki taku Tama Kotahi Anake, te mea i tōku taha mai i te tīmatanga: Tukua kia hangaia e tāua te tangata e rite ana ki tō tāua āhua; ā, ka pērāhia. Ā, nāku, nā te Atua, i kī: Tukua ki a rātou te rangatiratanga i runga i nga ika o te moana, i runga hoki i ngā manu o te rangi, i runga hoki i ngā kau, i runga hoki i te whenua katoa, ā, i runga i ngā mea ngōki katoa e ngōki nei i runga i te whenua.

27 Ā, nāku, nā te Atua, te āhua o te tangata i hanga kia rite ki tōku āhua, i te āhua o taku Tama Kotahi Anake nāku ia i hanga; tāne mai, wahine mai i hangaia ai rātou e au.

28 Ā, nāku, nā te Atua, rātou i manaaki, ā, ka kī atu ki a rāua: Kia whai hua, kia tini, ā, kia kapi te whenua, ā, whai mana ki runga rā, ā, kia mau te rangatiratanga ki runga i ngā ika o te moana, i runga hoki i ngā manu o te rangi, ā, i runga i ngā mea ora katoa e ngōki ana i runga i te whenua.

29 Ā, nāku, nā te Atua, i kī atu ki te tangata: Nana, kua hoatu e au ki a koutou ngā taru whakaputa kākano katoa, kei runga nei i te mata o te whenua katoa, me ia rākau mā konā puta ai ngā kākano whakaputa rākau; hei mea kai mā koutou.

30 Ā, ki ngā kararehe katoa hoki o te whenua, ā, ki ngā manu katoa hoki o te rangi, ā, ki ngā mea katoa e ngōki ana i runga i te whenua, kua hoatu e au te oranga, ka hoatu ngā tarutaru urutapu katoa hei kai; ā, ka pērāhia, e rite ana ki tāku i kōrero ai.

31 Ā, nāku, nā te Atua, i kite atu i ngā mea katoa nāku i hanga, ā, nana, he tino pai ngā mea katoa nāku i hanga; ā, ko te ahiahi me te ata te rā tuaono.