Hōhepa Mete—Matiu

1 Nā, ka mea atu au ki a koutou, nā, e kore koutou e kite i ahau a muri ake nei, ā, kia mōhio koutou ko au tēnā kua tuhia nei e ngā poropiti, tae noa ki te wā e kīa ake e koutou: Kua manaakitia te tangata e haere mai nei i runga i te ingoa o te Ariki, i roto i ngā kapua o te rangi, me ngā anahera tapu katoa i tōna taha. Kātahi ka mārama ana apataki ka haere mai anō ia ki te whenua, whai muri i tērā ka whakakorōriatia, ā, ka karaunatia ia ki te ringa matau o te Atua.

2 Ā, ka puta atu a Ihu, ā, i wehe atu i te temepara; ā, ka haere mai ana apataki ki a ia, kia whakarongo ai ki a ia, e mea ana: E te Māhita, whakaaturia mai e pā ana ki ngā mea hanga o te temepara, pērā me tāu i kī ake ai—Ka makaia iho ērā ki raro, ā, kua waiho iho ki a koutou kia tū kau noa.

3 Ā, ka mea atu a Ihu ki a rātou: Kāore rānei koutou i te kite i ēnei mea, ā, kāore rānei koutou e mārama ana ki ērā mea? He pono tāku e mea atu nei ki a koutou, e kore rawa e mahue i konei i runga i tēnei temepara tētahi kohatu ki runga i tētahi atu, engari ka whakahoroa iho.

4 Ā, ka mahue rātou i a Ihu, ā, ka haere ake ki runga i te Maunga Oriwa. Ā, i a ia e noho ana ki runga i te Maunga Oriwa, ka haere puku mai ngā apataki ki a ia, e mea ana: Kōrerohia mai hei āhea puta mai ai ēnei mea i kōrerohia mai e koe e pā ana ki te whakangaromanga o te temepara, me ngā Hūrai; ā, he aha hoki te tohu mō tō haerenga mai, me te mutunga o te ao, te whakangaromanga rānei o te hunga whakarihariha, koia ko te mutunga o te ao?

5 Ā, ka whakahoki a Ihu, ā, ka mea atu ki a rātou: Kia tūpato kei māmingatia koutou e te tangata;

6 Nā te mea ka haere mai ngā mea tokomaha i runga i tōku ingoa, e mea ana—Ko au te Karaiti—ā, ka māmingatia te hunga tokomaha;

7 Kātahi ka tukuna koutou e rātou kia whakamamaetia, ā, ka whakamatea koutou, ā, ka mauāharatia koutou e ngā iwi katoa, mō tōku ingoa te take;

8 Kātahi ka riri te tokomaha, ā, ka tinihanga tētahi i tētahi, ā, ka mauāhara tētahi i tētahi;

9 Ā, ka tū ake ngā poropiti teka tokomaha, ā, ka māmingatia e rātou te hunga tokomaha;

10 Ā, i te mea ka huhua te kino, ka mātao haere te aroha i roto i te tangata;

11 Engari ko te tangata e ū tonu, ā, te tangata kāore e taea ana e tētahi atu, koia te mea ka whakaorangia.

12 Nō reira, ina kite koe i te mōrikarika o te whakangaromanga, i kōrerotia ai e Rāniera te poropiti, e pā ana ki te whakangaromanga o Hiruharama, kātahi koutou ka tū i te wāhi tapu; tukuna te tangata e pānui ana kia mārama.

13 Kātahi ka tukuna rātou te hunga i Huria kia tahuti atu ki ngā maunga;

14 Tukuna te tangata kei runga i te tuanui o te whare kia tahuti atu, ā, kia kaua e hoki ki te tiki i tētahi mea mai i tōna whare;

15 Kaua rānei e tukuna te tangata e mahi nei i te māra kia hoki atu ki te tiki i ōna kākahu;

16 Auē te mate mō te hunga e hapū ana, ā, me te hunga e whāngai ū ana i aua rā;

17 Nō reira, kia inoi ki te Ariki, kei rokohanga koutou e te whati i te hōtoke, i te Hāpati rānei;

18 Nā te mea i reira, i aua rā, ka nui ngā taumahatanga ki runga i ngā Hurai, i runga hoki i ngā tāngata e noho ana ki Hiruharama, he mea kāore anō ōna rite i tonoa ai ki runga o Iharaira, e te Atua, mai i te tīmatanga o tō rātou kīngitanga tae noa mai ki tēnei wā; e kore, e kore rawa e tonoa anōtia ki runga o Iharaira.

19 Ko ngā mea katoa kua pā mai ki a rātou, he tīmatanga noa o ngā pōuritanga e tau iho ai ki runga ki a rātou.

20 Ā, ki te kore aua rā e whakapotongia, kāore tētahi o ō rātou kikokiko e whakaorangia; engari mō te hunga kōwhiria te take, e rite ana ki te kawenata, ka whakapotongia aua rā.

21 Nana, koinei mea kua kōrerotia ake nei e au ki a koutou e pā ana ki ngā Hurai; waihoki, whai muri iho i ngā taumahatanga o aua rā e tau iho ai ki runga o Hiruharama, ki te kōrero atu tētahi tangata ki a koutou, titiro, anei te Karaiti, kei korā rānei, kaua e whakapono ki tāna;

22 Nā te mea hei aua rā ka tū mai ngā Karaiti teka, me ngā poropiti teka, ā, ka whakaatu atu i ngā tohu nunui me ngā mea whakamāharo nui, nā konā, me e taea ana, ka māminga rātou i te hunga kōwhiria, ko rātou te hunga kōwhiria i runga i tā te kawenata.

23 Nana, kei te kōrero au i ēnei mea ki a koutou mō te hunga kōwhiria te take; ā, ka rongo anō hoki koutou i ngā pakanga, i ngā rongo pakanga; tirohia kia kaua koutou e raru, nā te mea ka pahawa ake ngā mea katoa kua kōrerohia atu nei ki a koutou; engari kāore anō kia tae mai te mutunga.

24 Nana, kua kōrero atu ki a koutou i mua;

25 Nā reira, ki te kī atu rātou ki a koutou: Nana, kei te koraha ia; kaua e haere atu: Nana, kei roto ia i ngā ruma huna; kaua e whakapono;

26 Nā te mea ka rite ki te māramatanga o te ata e puta mai ana i te rāwhiti, ā, e whiti atu ana ki te uru, ā, e kapi ana te whenua katoa, ka pērā hoki te haerenga mai a te Tama o te Tangata.

27 Ināianei ā, ka whakaatu atu au i tētahi pakitairite ki a koutou. Nana, ko te wāhi kei reira te tūpāpaku, ko reira huihui tahi ai ngā kāhu; ka pērāhia ōku hunga kōwhiria mai i ngā tōpito katoa o te ao.

28 Ā, ka rongo rātou i ngā pakanga, me ngā rongo pakanga.

29 Nana e kōrero nei au mō tōku hunga kōwhiria te take; nā te mea ka tū atu tētahi iwi ki tētahi atu iwi, ā, kīngitanga ki tētahi kīngitanga; ka ai he matekai, he urutā, he rū whenua, kei ngā wāhi maha.

30 Hei āpiti, nā te mea ka huhua te kino, ka mātao haere te aroha o te tangata; engari ko te tangata kāore e taea e tētahi atu, ka whakaorangia ia.

31 Hei āpiti, ka kauhautiua tēnei Rongopai o te Kīngitanga ki te ao katoa, hei whakaaturanga ki ngā iwi katoa, kātahi ka puta mai te mutunga, te whakangaromanga rānei o te hunga whakarihariha;

32 Hei āpiti hoki ko te mōrikarika o te whakangaromanga, ka tutuki tā Rāniera te poropiti i kōrero ai.

33 Ā, whai muri rawa iho i te taumahatanga o aua rā, ka maru te rā, ā, kāore te marama e tiaho mai ai i tōna māramatanga, ā, ka taka iho ngā whetū i te rangi, ā, ka whakangāueuetia ngā mana o te rangi.

34 He pono tāku e mea atu nei ki a koutou, tēnei whakatipuranga, mā konā whakaaturia mai ai ēnei mea, e kore e pahemo atu tae noa ki te wā ka tutuki ngā mea katoa kua kōrerotia atu nei ki a koutou.

35 Ahakoa rā, ka tae mai ngā rā, e pahemo atu ai te rangi me te whenua; heoi e kore aku kupu e pahemo atu, engari ka tutuki te katoa.

36 Ā, pērā me tāku i mua, whai muri iho i te taumahatanga o aua rā, me te whakangāueuetanga o ngā mana o ngā rangi, i reira puta ai te tohu o te Tama o te Tangata i te rangi, kātahi ka tangi ngā iwi katoa o te whenua; ā, ka kite rātou i te Tama o te Tangata e haere mai ana i ngā kapua o te rangi, i runga i te mana me te korōria nui;

37 Ā, e kore te tangata e tiakina ai taku kupu e māmingatia, nā te mea ka haere mai te Tama o te Tangata, ā, ka tonoa e ia ana anahera ki mua i a ia i rungai te reo kaha o tētahi tetere, ā, ka whakahuihui rātou i te toenga atu o ana mea kōwhiria mai i ngā hau e whā, mai i tētahi pito o te rangi ki tētahi atu.

38 Ināianei kai akona e pā ana ki te pakitairite o te rākau piki—I te wā e ngāwari noa ana ōna manga, ā, i tīmata ai te pihinga mai o ngā rau, e mōhio ana koe kua tae mai te raumata;

39 Nō reira ka pērā anō ōku mea kōwhiria, ina kite rātou i ēnei mea katoa, ka mōhio rātou kua tata mai ia, kei ngā tatau pū anō;

40 Engari, kāore tētahi e mōhio ana ki taua rā, ki te hāora hoki; e kao, kāore ngā anahera o te Atua i te rangi, engari ki tōku Matua anake.

41 Engari ka rite ki ngā rā o Noa, ka pērā anō hei te haerenga mai a te Tama o te Tangata;

42 Nā te mea ka rite hoki ki a rātou, pērā me ngā rā i mua i te waipuke; nā te mea tae noa ki te rā i kuhu atu a Noa ki roto i te āka i te kai, i te inu rātou, e mārena ana, ā, e tukuna atu ana kia mārenatia;

43 Ā, kāore au i mōhio tae noa ki te pupunga ake o te waipuke, kātahi ka kahakina atu rātou; ka pērā hoki te haerenga mai a te Tama o te Tangata.

44 Ko reira tutuki ai ngā mea kua tuhia, nā, hei ngā rā whakamutunga, kei roto tētahi tokorua i te māra, ka kahakina atu tētahi, ā, ka mahue tētahi;

45 Ka huri tētahi tokorua i te mīra, ka kahakina atu tētahi, ā, ka mahue tētahi;

46 Ā, ko tāku ki tētahi, ko tāku anō ki ngā tāngata katoa; nō reira, kia mataara, nā te mea kāore koutou e mōhio ana ki te hāora e haere mai ai tō koutou Ariki.

47 Engari kia mōhio ki tēnei, mehemea i mōhio te tangata pai ki te wā e haere mai ai te tangata tāhae, kua mataara ia, ā, kua kore e tukuna kia pokaia tōna whare, engari kua noho rite.

48 Nō reira kia noho rite anō koutou, nā te mea hei te hāora kāore koutou e whakaaro ana, tae mai ai te Tama o te Tangata.

49 Ko wai tēnā, ko te pononga pono, te pononga mātau, kua meatia ia e tōna Ariki hei kaiwhakahaere i runga i tōna whare, kia hoatu i ngā kai i te wā e tika ana?

50 Kua manaakitia taua pononga nā tōna ariki, ina tae mai ia e pērā ana; ā, he pono tāku e mea atu nei ki a koutou, ka meatia ia hei kaiwhakahaere i runga i ōna rawa katoa.

51 Engari ki te kī ake taua pononga kino i roto i tōna ngākau: Kei te whakaroa tōku ariki i tana haerenga mai,

52 Ā, ka tīmata tana patu i ōna hoa-pononga, me te kai me te inu me te hunga haurangi,

53 Ka haere mai te ariki o taua pononga i tētahi rā kāore ia e mataara ana mōna, ā, i tētahi hāora kāore ia e mōhio ana,

54 Ā, ka tapahia pūtia ia i waenga, ā, ka whakaritea he wāhi mōna i roto i te hunga arero rua; ka ai he tangihanga, ā, he tetēatanga o ngā niho.

55 Ā, pēnei puta mai ai te mutunga o te hunga whakarihariha, e ai ki te poropititanga a Mohi, e mea ana: Ka hātepea atu rātou i te iwi; engari kāore anō kia tae mai te mutunga o te ao, engari ā taihoa ake.