1 Futsi onkhe emalanga a-Enoki aba ngemakhulu lamane nemashumi lamatsatfu eminyaka.

2 Futsi kwenteka kutsi Methusela, indvodzana ya-Enoki, akatsatfwanga, kute tivumelwano teNkhosi tigcwaliseke, latenta ku-Enoki; ngoba ngempela wavumelana na-Enoki kutsi Nowa kufanele abe yintalo yesisu sakhe.

3 Futsi kwenteka kutsi Methusela waphrofetha kutsi elukhalweni lwakhe kufanele kuphume yonkhe imibuso yemhlaba (ngaNowa), watiphakamisa.

4 Kwaba khona indlala lenkhulu eveni, iNkhosi yalicalekisa lelo live ngesicalekiso lesibuhlungu, futsi labaningi bantfu balapho bafa.

5 Futsi kwenteka kutsi Methusala waphila iminyaka lelikhulu nemashumu lasiphohlongo nesikhombisa, watalaLameki;

6 Methusela waphila, iminyaka lengemakhulu lasikhombisa nemashumui lasiphohlongo nakubili emvakwekutala Lameki, watala nemadvodzana nemadvodzakati;

7 Onkhe emalanga aMethusela aba yiminyaka lengemakhulu layimfica nemashumi lasitfupha nemfica, wase uyafa.

8 Lameki waphila iminyaka lelikhulu nemashumi lasiphohlongo nakubili, watala indvodzana,

9 Wayetsa libito watsi nguNowa, watsi: Lendvodzana lena itawusidvudvuta ngalokuphatselene nemsebenti wetfu nasekukhatsatekeni kwetandla tetfu, ngenca yemhlabatsi iNkhosi lewucalekisile.

10 Lameki waphila, iminyaka lengemakhulu lasihlanu nemashumi layimfica nesihlanu emvakwekutala Nowa, watala nemadvodzana nemadvodzakati;

11 Onkhe emalanga aLameki aba yiminyaka lengemakhulu lasikhombisa nemashumi lasikhombisa nesikhombisa, wase uyafa.

12 Nowa bekaneminyaka lengemakhulu lamane nemashumi lasihlanu budzala, watala Jafethi; kwatsi emvakweminyaka lengemashumi lamane nakubili budzala watala Shemi kulobekangunina waJafethi, kwatsi asaneminyaka lengemakhulu lasihlanu budzala watala Hhamu.

13 Nowa nemadvodzana akhe bayilalela iNkhosi, bayinaka, babitwa ngemadvodzana aNkulunkulu.

14 Kwatsi lapho lamadvodza sekacala kwandza emhlabeni, sekatala emadvodzakati, emadvodzana ebantfu abona kutsi lawo madvodzakati bekamahle, bawenta bafati babo, njengekukhetsa kwabo.

15 INkhosi yatsi kuNowa: Emadvodzakati emadvodzana akho atitsengisile; ngoba buka lulaka lwami lokhelekile ngekumelana nemadvodzana ebantfu, ngoba abalilaleli livi lami.

16 Futsi kwenteka kutsi Nowa waphrofetha, wafundzisa ngetintfo taNkulunkulu, njengoba tatinjalo ekucaleni.

17 INkhosi yatsi kuNowa: Moya wami angeke asebente njalo kumuntfu, ngoba uyawukwati kutsi yonkhe inyama iyawukufa; noko emalanga akhe asayawuba yiminyaka lelikhulu namashumi lamabili; futsi uma bantfu bangaphendvuki, ngitawutfumela tikhukhula kubo.

18 Ngalawo malanga bekukhona tichwaga emhlabeni, futsi betifuna kubulala Nowa; kodvwa iNkhosi beyinaNowa, nemandla eNkhosi asetikwakhe.

19 INkhosi yambeka Nowa ngeluhlelo lwayo lucobo, yamyaleta kutsi kufanele ahambe amemetele liVangeli layo kubantfwana bebantfu, njengoba kwakuniketiwe ku-Enoki.

20 Futsi kwenteka kutsi Nowa wababita bantfwana bebantfu kutsi baphendvuke ; kodvwa abawalalelanga emavi akhe;

21 Ngetulu kwaloko, emvakwekutsi sebamvile, bakhuphukela kuye, batsi: Buka, singemadvodzana aNkulunkulu; asikawatsatsi yini emadvodzakati ebantfu kutsi abe bafati betfu na? Ngabe asidli futsi asinatsi, asishadi siphindze sendzise na? Bafati betfu basitalela bantfwana, nabo ngemadvodza langemachawe, lanjengemadvodza asemandvulo, emadvodza eludvumo lolukhulu. Futsi abawalalelanga emavi aNowa.

22 Nkulunkulu wabona kutsi bubi bebantfu bese bubukhulu emhlabeni; wonkhe umuntfu bekatiphakamisile ekuzindleni kwemicabango yenhlitiyo yakhe, imibi ngaso sonkhe sikhatsi.

23 Futsi kwenteka kutsi Nowa wachubela nekushumayela kwakhe kubantfu, watsi: Lalelani, futsi wanakeni lamavi ami;

24 Kholwani niphindze niphendvuke etonweni tenu nibhajatiswe egameni laJesu Khristu, iNdvodzana yaNkulunkulu, njengabokhokho betfu, niyawutfola Moya loNgcwele, kute nembulelwe tonkhe tintfo; futsi uma ningakwenti loku, tikhukhula titawuta kini; noko abalalelanga.

25 Watisola Nowa, inhlitiyo yakhe yaba buhlungu kutsi iNkhosi yadala bantfu emhlabeni, wadzabuka enhlitiyweni yakhe.

26 INkhosi yatsi: Ngitawubabhubhisa labantfu lengibadalile, emhlabeni, bantfu netilwane, nalokuhamba ngesisu, netinyoni letindiza emoyeni; ngoba uyatisola Nowa kutsi ngibadalile, nekutsi ngibentile; ungibitile, ngoba bafune imphilo yakhe.

27 Ngaleyo ndlela Nowa watfola umusa emehlweni eNkhosi; ngoba Nowa bekangumuntfu lolungile, amsulwa esitukulwaneni sakhe; futsi bekahamba naNkulunkulu, kanjalo nemadvodzana akhe lamatsatfu, Shemi, Hhamu, naJafethi.

28 Umhlaba bese wonakele phambi kwaNkulunkulu, sewugcwele ludlame.

29 Nkulunkulu wabuka umhlaba, futsi, buka, besewonakele, ngoba bonkhe bantfu bebatiphetse ngemonakalo emhlabeni.

30 Futsi Nkulunkulu watsi kuNowa: Siphetfo sabo bonkhe bantfu sesifikile phambi kwami, ngoba umhlaba sewugcwele ludlame, futsi buka ngitawubabhubhisa bonkhe bantfu basuke emhlabeni.