Imibhalo Lengcwele
Sendvulelo

Sendvulelo

Ligugu leLinani leliKhulu ngulokukhetsiwe kwelikhetselo lemibhalo letsintsa imininingwane lebalulekile yenkholo nemfundziso yeliBandla laJesu Khristu lalabaNgcwele beTinsuku Tekugcina. Leti tintfo tahunyushwa futsi tavetwa ngumPhrofethi Joseph Smith, futsi letinyenti takhishwa kumaphephandzaba eliBandla etikhatsini takhe.

Inhlanganisela yekucala yemibhalo lenesihloko lesitsi Ligugu leLinani leliKhulu yentiwa ngemnyaka we-1851 nguMbonisi Franklin D. Richards, ngaleso sikhatsi lobekalilunga leMkhandlu walabaliShumi nakuBili nemengameli weMishini yaseBrithani. Inhloso yayo bekukwenta kutfolakale melula letinye timfundziso letibalulekile lebetingakasabalali ngesikhatsi saJoseph Smith. Ngekwandza kwemalunga eliBandla kuwo onkhe emavekati aseYurophu naseMelika, kwaba nesidzingo sekwenta lemibhalo itfolakale. Ligugu leLinani leliKhulu latfola kusetjentiswa lokukhulu futsi emvakwaloko laba ngumbhalo lowemukelekile weliBandla ngelusito lebuMengameli bekuCala nemhlangano lomkhulu lowseSalt Lake City mhlaka 10 ngeMphala ngemnyaka we-1880.

Sekwentiwe kubuyeketwa lokuningana kulokucuketfwe ngulombhalo ngekwetidzingo teliBandla. Ngemnyaka we-1878 tincenye tencwadzi yaMosi lebetingekho encwadzini leyakhishwa kucala tengetwa. Ngemnyaka we-1902 tincenye letitsite teLigugu leLinani leliKhulu letatiphindzaphindza umbhalo lobesewukhishiwe nakuMfundziso neTivumelwano tashiywa. Kuhlelwa kwalombhalo kutsi ube tehluko nemavesi, lonemibhalo lengaphansi kwelikhasi, kwentiwa ngemnyaka we-1902. Incwadzi yekucala lebeyinemakhasi laneluhla lolubili, lolunetinkhomba, kwentiwa ngemnyaka we-1921. Kute lolunye lushintjo lolwentiwa kwate kwaba nguMabasa ngemnyaka we-1976, lapho khona imibhalo lemibili yetembulo yengetwa. Ngemnyaka we-1979 lena mibhalo lemibili yesuswa kuLigugu leLinani leliKhulu yafakwa kuMfundziso neTivumelwano, lapho lemibhalo seyivela khona manje njengetigaba 137 kanye na 138. Kuloluhlelo lolukhishwe nyalo letinye tingucuko tentiwe kute umbhalo uvumelane nemibhalo yangaphambilini.

Loku lokulandzelako sendvulelo lesifishane salokucuketfwe kwanyalo:

  1. Lokukhetsiwe lokutsatfwe eNcwadzini yaMosi. Lena yincenye yemavi latsatfwa encwadzini yaGenesisi lekuhunyushwa kweliBhayibheli lokwentiwa nguJoseph Smith, lakucala ngeNhlaba ngemnyaka we-1830.

  2. INcwadzi ya-Abrahama. Loku kuhunyushwa lokwentiwa ngekuphefumulelwa nguMoya loNgcwele kwemibhalo ya-Abrahama. Joseph Smith wakucala loku kuhunyushwa ngemnyaka we-1835 emvakwekutfola iphaphiri lelalinemibhalo yaseGibhithe. Loku kuhunyushwa kwakhishwa ngekulandzelana ephepheni iTimes and seasons kusuka mhlaka 1 ngeNdlovulenkhulu, ngemnyaka we-1842, eNauvoo, e-Illinois.

  3. Joseph Smith—Matewu. Lena yincenye letsatfwe ebufakazini baMatewu ekuhunyushweni kweliBhayibheli lokwentiwa nguJoseph Smith (buka iMfundziso neTivumelwano 45:60–61 ngalokuphatselene nemyaleto waNkulunkulu wekutsi kucalwe kuhunyushwa kweliThestamente leLisha).

  4. Joseph Smith—uMlandvo. Leti ticaphuno letitsatfwe ebufakazini nasemlandvweni losemtsetfweni waJoseph Smith, latilungisa nabomabhalane bakhe ngemnyaka we-1838 kuya kuwe-1839 futsi letakhishwa ngekulandzelana ephephandzabeni iTimes and Seasons eNauvoo, e-Illinois, kusuka mhlaka 15 ngeNdlovulenkhulu, ngemnyaka we-1842.

  5. ImiBhalo yeluKholo yeliBandla laJesu Khristu lalabaNgcwele beTinsuku Tekugcina. Loku kulandzisa lokwabhalwa nguJoseph Smith lokwakhishwa ephephandzabeni iTimes and Seasons mhlaka 1 ngeNdlovulenkhulu ngemnyaka we-1842, kuphekeletelwa ngumlandvo lomfishane weliBandla lobewatiwa ngekutsi yiNcwadzi yaWentworth.