Joseph Smith—Matewu

1 Ngoba ngitsi kini, ningeke ningibone kusukela manje futsi yatini kutsi nginguye lokwabhalwa ngaye baphrofethi, nite nitsi: Ubusisiwe lotako egameni leNkhosi, ngemafu asezulwini, nato tonkhe tingilosi letingcwele letikanye naye. Emvakwaloko base bayacondza bafundzi bakhe kutsi kufanele aphindze abuye emhlabeni, emvakwaloko wakhatimuliswa futsi watfweswa umchele ngasesandleni sekudla saNkulunkulu.

2 Jesu waphuma, wahamba walishiya lithempeli; bafundzi bakhe beta kuye, kutawumlalela, batsi: Mfundzisi, sikhombise mayelana netakhiwo telithempeli, njengoba wawutse—Tiyawubhujiswa, tisale tingenamuntfu.

3 Jesu watsi kubo: Anitiboni yini tonkhe leti tintfo, futsi aniticondzi yini? Ngicinisile ngitsi kini, kute ngisho nalinye, etikwalelithempeli, litje leliyawusala lihleti etikwalelinye lelingayudzilitelwa phansi.

4 Jesu wase uyabashiya, waya eNtsabeni yeMincumo. Asehleti eNtsabeni yeMincumo, bafundzi bakhe beta kuye ngasense, batsi: Sitjele kutsi tiyawukwenteka nini letintfo lesewutishito letimayelana nekubhujiswa kwelithempeli, nemaJuda; futsi ngusiphi sibonakaliso sekubuya kwakho, nesekuphela kwemhlaba, noma kubhujiswa kwalababi, lokukuphela kwemhlaba na?

5 Jesu waphendvula, watsi kubo: Caphelani kutsi kubete umuntfu lonidukisako;

6 Ngoba labaningi bayawuta ngelibito lami, batsi—NginguKhristu—badukise labaningi;

7 Emvakwaloko bayawuninikela etinhlungwini, banibulale, futsi niyawutondvwa tive tonkhe, ngenca yelibito lami;

8 Futsi emvakwaloko baningi labayawukhubeka, baphindze batsengisane bodvwana, batondzane;

9 Kuyawuvela baphrofethi bemanga labaningi, badukise labaningi;

10 Ngenca yekutsi bubi buyawukwandza, lutsandvo lwalabaningi luyawuphela;

11 Kodvwa loyo loyawubambelela aphindze angancotjwa, nguye loyawusindziswa.

12 Ngako-ke nanibona incitsakalo yesinengiso, njengoba asho Danyela umPhrofethi, ngalokuphatselene nekubhujiswa kweJerusalema, ngaleso sikhatsi niboma endzaweni lengcwele; loyo lofundzako akacondze.

13 Labo labaseJudiya ababalekele etintsabeni;

14 Loyo losetikwendlu akabaleke, angabe asabuya kutawutsatsa noma yini endlini yakhe;

15 Naloyo losensimini akangabuyeli emuva kuyawutsatsa kwembatsa kwakhe;

16 Kodvwa maye kulabo labayawube batetfwele, nakulabo labayawube bamunyisa ngaleto tikhatsi;

17 Ngako-ke, thandazani eNkhosini kutsi kubaleka kwenu kungabi sebusika, noma ngelilanga leSabatha;

18 Ngoba ngaleso sikhatsi, kulawo malanga, kuyawuba kukhulu kuhlupheka kumaJuda, nakubantfu baseJerusalema, lokungatange sekube khona ngaphambilini ku-Israyeli, lokuvela kuNkulunkulu, kusukela ekucaleni kwembuso wabo kute kube ngulamuhla; cha, futsi, akusuyuphindze kutfunyelwe futsi ku-Israyeli.

19 Tonkhe tintfo letibehlelako tisicalo selusizi loluyawuta kubo.

20 Ngaphandle lawo malanga afinyetwe, kute namunye wabo loyawusindziswa; kodvwa ngenca yalabakhetsiwe, ngekwesivumelwano, lawo malanga ayawufinyetwa.

21 Bukani, leti tintfo ngitikhulume kini ngalokuphatselene nemaJuda; ngetulu kwaloko, emvakwenhlupheko yalawo malanga leyawukwehlela iJerusalema, uma kukhona loyawutsi kini, Bukani, nangu Khristu, noma nanguya, ningamkholwa;

22 Ngoba kulawo malanga kuyawuvela boKhristu bemanga, nebaphrofethi bemanga, futsi bayawunikhombisa tibonakaliso letinkhulu naletimangalisako, kangangoba, loko, uma kungenteka, bayawudukisa labakhetsiwe lucobo, labakhetsiwe ngekwesivumelwano.

23 Bukani, ngikhuluma kini leti tintfo ngenca yalabakhetsiwe; futsi niyawuphindze nive ngetimphi nangemahemuhemu etimphi; bukani kutsi anikhatsateki, ngoba konkhe lenginitjele kona kumele kwenteke; kodvwa siphetfo sisesengakafiki.

24 Bukani, nginitjelile phambilini;

25 Ngaloko-ke, uma batsi kini: Bukani usehlane; ningayi; Bukani, usemagunjini lafihlekile; ningakukholwa loko;

26 Ngoba njengekukhanya kwekusa kuphuma emphumalanga, kukhanyisa ngisho nasenshonalanga, kugcwalisa wonkhe umhlaba, kuyawuba njalo futsi nekubuya kweNdvodzana yeMuntfu.

27 Manje senginifundzisa ngemfanekiso. Bukani, noma ngukuphi lapho kusesidvumbu khona, kulapho emangce ayawubutsana khona; kanjalo-ke nalabakhetsiwe bami bayawugcogcwa besuka emagunjini lamane emhlaba.

28 Futsi bayawuva ngetimphi, nemahemuhemu etimphi.

29 Bukani ngikhuluma ngenca yalabakhetsiwe bami; ngoba sive siyawuvukela sive, umbuso uyawuvukela umbuso; kuyawuba khona indlala, mashayabhuce wetifo, nekutamatama kwemhlaba, etindzaweni letehlukene.

30 Ngetulu kwaloko, ngenca yekutsi bubi buyawukwandza, lutsandvo lwebantfu luyawuphela; kodvwa loyo longeke ancotjwe, nguye loyawusindziswa.

31 Ngetulu kwaloko, leli liVangeli leMbuso liyawushunyayelwa kuwo wonkhe umhlaba, libe bufakazi etiveni tonkhe, emvakwaloko siphetfo siyawufika, noma kubhujiswa kwalababi;

32 Ngetulu kwaloko incitsakalo yesinengiso, leyashiwo nguDanyela umphrofethi, iyawufezeka.

33 Futsi masinyane emvakwaletinhlupheko talawo malanga, lilanga liyawufiphala, nenyanga iyawubate kukhanya, netinkhanyeti tidzilike ezulwini, nemandla elizulu ayawunyakatiswa.

34 Ngicinisile, ngitsi kini, lesi situkulwane, lekuyawukhonjiswa kuso leti tintfo, angeke sendlule kute konkhe lenginitjele kona kufezeke.

35 Noma, emalanga ayawufika, lapho lizulu nemhlaba kuyawendlula; kodvwa emavi ami angeke endlule, kodvwa konkhe kuyawufezeka.

36 Futsi njengoba ngasho ngaphambilini, emvakwaletinhlupheko talawo malanga, emandla emazulu ayawunyakatiswa, emvakwaloko kuyawuvela sibonakaliso seNdvodzana yeMuntfu ezulwini, emvakwaloko tonkhe tive temhlaba tiyawukhala; futsi tiyawuyibona iNdvodana yeMuntfu ita ngemafu elizulu, ngemandla nangenkhatimulo lenkhulu;

37 Loyo logcina livi lami, angeke adukiswe, ngoba iNdvodzana yeMuntfu iyawuta, iyawutfumela tingilosi tayo phambi kwayo ngekukhala lokukhulu kwelicilongo, tibutse ndzawonye bonkhe labasala labakhetsiwe bayo emagumbini lamane emhlaba, kusukela emkhawulweni lomunye welizulu kuya kulomunye.

38 Manje fundzani ngemfanekiso wesihlahla semkhiwa—Uma emagala aso asetsambile, sesicala kukhipha emacembe, niyati kutsi lihlobo selidvutane;

39 Kanjalo-ke, labakhetsiwe bami, uma sebabona tonkhe leti tintfo, bayawukwati kutsi sewudvute, ngisho ngaseminyango;

40 Kodvwa lelo langa, nesikhatsi, kute losatiko; cha, ngisho netingilosi taNkulunkulu ezulwini, kodvwa nguBabe kuphela.

41 Kodvwa njengoba bekunjalo emalangeni aNowa, kuyawuba njalo nekufika kweNdvodzana yeMuntfu;

42 Ngoba kuyawubanjalo kubo, njengoba bekunjalo emalangeni labengaphambi kwazamcolo; ngoba kwate kwaba lilanga lapho Nowa angena khona emkhunjini bebadla futsi banatsa, batsatsana futsi bendziswa;

43 Abatange bati kwate kwefika zamcolo, wabatsatsa bonkhe; kuyawuba njalo nekufika kweNdvodzana yeMuntfu.

44 Ngaleso sikhatsi kuyawufezeka loko lokubhaliwe, kutsi ngemalanga ekugcina, lababili bayawuba sensimini, munye uyawutsatfwa, lomunye uyawusala;

45 Lababili bayawube basila etjeni, munye uyawutsatfwa, lomunye uyawusala;

46 Futsi lengikusho kumunye, ngikusho kubo bonkhe bantfu; ngako-ke, caphelani, ngoba anisati sikhatsi iNkhosi yenu leyawubuya ngaso.

47 Kodvwa yatini loku, uma umnikati wendlu abesati sikhatsi sekufika kwelisela, abeyawucaphela, bekangeke avumele indlu yakhe igcekezwe, kodvwa abeyawutilungiselela.

48 Ngako-ke nani futsi hlalani nilindzele, ngoba ngesikhatsi leningakasibheki, iNdvodzana yeMuntfu iyawuta.

49 Pho, ngubani loyinceku leyetsembekile nalehlakaniphile, lowentiwe yinkhosi yakhe waba ngumbusi etikwendlu yakhe, kutsi abanike kudla ngesikhatsi lesifanele?

50 Ibusisiwe leyo nceku inkhosi yayo, uma ifika, leyawukhandvwa yenta loko; futsi ngicinisile ngitsi kini, iyawuyenta ibe ngumbusi etikwayo yonkhe imphahla yayo.

51 Kodvwa uma leyo nceku lembi icabanga itsi enhlitiyweni yayo: Inkhosi yami isalibele,

52 Bese icala kushaya tinceku letikanye nayo, idle iphindze inatse naletinye tidzakwa,

53 Inkhosi yaleyo nceku iyawufika ngelilanga lapho ingakayibheki, nangesikhatsi leyingasati,

54 Iyawuyijezisa, iyinike indzawo yayo nebatentisi; lapho kuyawuba khona kukhala nekugedletela kwematinyo.

55 Futsi siyawuba kanjalo-ke siphetfo salababi, ngekwesiphrofetho saMosi, atsi: Bayawususwa emkhatsini webantfu; kodvwa siphetfo semhlaba sisengakefiki, kodvwa madvute.