ImiBhalo yeLukholo
yeLibandla laJesu Khristu lalabaNgcwele Betinsuku Tekugcina

1 Sikholelwa kuNkulunkulu, Babe waPhakadze, nakuyo iNdvodzana Yakhe, Jesu Khristu, nakuMoya loNgcwele.

2 Sikholelwa kutsi bantfu batawujeziswa ngetono tabo lucobo, hhayi ngesiphambeko sa-Adamu.

3 Sikholelwa kutsi ngeNhlawulo yaKhristu, bonkhe bantfu bangasindziswa, ngekulalela imitsetfo netimiso teliVangeli.

4 Sikholelwa kutsi imigomo netimiso tekucala teliVangeli nguleti: kwekucala, Lukholo eNkhosini Jesu Khristu; kwesibili, kuPhendvuka, kwesitsatfu, kuBhajatiswa ngekucwiliswa kute kutsetselelwe tono; kwesine kuBekwa tandla kute utfole sipho saMoya loNgwcele.

5 Sikholelwa kutsi umuntfu kufanele abitwe nguNkulunkulu, ngesiphrofetho, nangekubekwa tandla ngulabo labasegunyeni, kutsi ashumayele liVangeli futsi ente timiso talo.

6 Sikholelwa eluhlelweni lolufanako nalolo lolwalukhona eBandleni laseMandvulo, lokungulolu, baphostoli, baphrofethi, bashumayeli, bafundzisi, bavangeli, njalonjalo.

7 Sikholelwa esiphiweni setilimi, sekuphrofetha, sesembulo, semibono, sekuphilisa, sekuhumusha tilimi, njalonjalo.

8 Sikholelwa kutsi liBhayibheli lilivi laNkulunkulu kangangoba lihunyushwe ngalokungiko; siyakholelwa futsi kutsi iNcwadzi yaMormon ilivi laNkulunkulu.

9 Siyakukholwa konkhe loko Nkulunkulu lasakwembulile, konkhe loko Yena lakwembulako manje, futsi sikholwa kutsi Yena usetawukwembula tintfo letiningi letinkhulu naletibalulekile letiphatselene neMbuso waNkulunkulu.

10 Sikholelwa ekugcogcweni kwangempela kwa-Israyeli nasekubuyiselweni kweTive letiLishumi; kutsi iSiyoni (iJerusalema leNsha) itawukwakhiwa etikwelivekati laseMelika; kutsi Khristu utawubusa Yena lucobo emhlabeni; futsi, nekutsi umhlaba utawukwentiwa kabusha uphindze ube nenkhatimulo lefanako nepharadisi.

11 Sifuna lilungelo lekukhonta Nkulunkulu Somandla ngekutjelwa ngunembheza wetfu, futsi sivumela bonkhe bantfu kutsi babe nelilungelo lelifanako, bakhonte ngendlela labatsandza ngayo, nalapho batsandza khona, noma loko labakutsandzako.

12 Sikholelwa ekubeni ngaphansi kwemakhosi, bomengameli, babusi, nabomantji, ekutfobeleni, ekuhlonipheni, nasekusekeleni umtsetfo.

13 Sikholelwa ekubeni setsembeke, ekubeni neliciniso, ekubeni msulwa, ekubeni mnene, ekulungeni, nasekwenteni lokuhle kubo bonkhe banftu; impela, singasho kutsi silandzela secwayiso saPawula—Sikholwa tonkhe tintfo, setsemba tintfo tonkhe, sesibeketelele tintfo letiningi, futsi setsemba kutsi sitawukwati kubeketelela tonkhe tintfo. Uma kukhona noma yini lelungile, letsandzekako, noma lenebuntfu, noma lencomekako, sitama kutitfola leto tintfo.