1 Futsi kwenteka kutsi emvakwekube mine, iNkhosi Nkulunkulu, sengibacoshile, Adamu wacala kulima umhlabatsi, wabusa etikwato tonkhe tilwane tesiganga, watfola kudla kwakhe ngemjuluko welibunti lakhe, njengoba mine, iNkhosi ngangimyaletile. Eva naye, umkakhe, wasebenta naye.

2 Adamu wamati umkakhe, futsi umkakhe wamtalela emadvodzana nemadvodzakati, bacala bandza bagcwalisa umhlaba.

3 Futsi kusukela ngaleso sikhatsi, emadvodzana nemadvodzakati a-Adamu acala kuhlukana ngababili eveni, balima umhlabatsi, bafuya nemihlambi, nabo batala emadvodzana nemadvodzakati.

4 Adamu na-Eva, umkakhe, babita libito laNkulunkulu, beva livi leNkhosi lichamuka endleleni leya ngaseNsimini yase-Edeni, likhuluma nabo, kodvwa bangayiboni; ngoba bese behlukanisiwe nayo.

5 Yabanika imiyaleto, yekutsi kufanele bakhonte Nkulunkulu wabo, nekutsi kufanele banikele ngematubulo etimvu tabo, kute kube ngumnikelo kuNkulunkulu. Adamu wayitfobela imiyaleto yeNkhosi.

6 Emvakwemalanga lamaningi ingilosi yeNkhosi yavela ku-Adamu, yatsi: Unikelelani imihlatjelo eNkhosini na? Adamu watsi kuyo: Angati, ngaphandle kwekutsi iNkhosi ingiyaletile.

7 Ingilosi yakhuluma, yatsi: Loku kufana nemhlatjelo waLotelwe Yedvwa waBabe, logcwele umusa neliciniso.

8 Ngaloko-ke, uyawukwenta konkhe lokwentako egameni leNdvodzana, futsi uyawuphendvuka ubite Nkulunkulu egameni leNdvodzana ingunaphakadze.

9 Ngalelo langa Moya loNgcwele wehlela ku-Adamu, lowafakaza ngaBabe neNdvodzana, watsi: NginguLotelwe Yedvwa waBabe kusukela ekucaleni, kuyaphambili kanye naphakadze, nekutsi njengoba niwile ningahlengwa, futsi bonkhe bantfu, ngisho labaningi labayawufisa.

10 Ngalelo langa Adamu wambonga Nkulunkulu futsi wagcwaliswa ngaMoya loNgcwele, wacala kuphrofetha ngalokuphatselene nayo yonkhe imindeni yasemhlabeni, watsi: Libusisiwe libito laNkulunkulu, ngoba ngenca yesiphambeko sami emehlo ami avulekile, futsi kulemphilo ngiyawuba nekujabula, nasemnyameni ngitawuphindze ngimbone Nkulunkulu.

11 Eva, umkakhe, wativa tonkhe leti tintfo wajabula, watsi: Kube bekungasiko ngenca yesiphambeko setfu besingeke siyitfole intalelwane, futsi besingeke sati lokuhle nalokubi, nenjabulo yekuhlengwa kwetfu, nekuphila lokuphakadze Nkulunkulu lakunike bonkhe labalalelako.

12 Adamu na-Eva balidvumisa libito laNkulunkulu, batembula tonkhe tintfo kumadvodzana nakumadvodzakati abo.

13 Sathane weta emkhatsini wabo, watsi: Nami futsi ngiyindvodzana yaNkulunkulu; wabayaleta, watsi: Ningakukholwa; futsi bangakukholwa, bamtsandza kakhulu Sathane kunaNkulunkulu. Bantfu bacala kusukela ngaleso sikhatsi kunaka inyama, kutfokotisa imizwa, nekuba nebudeveli.

14 Futsi iNkhosi Nkulunkulu yababita bantfu ngaMoya loNgcwele yonkhe indzawo yabayaleta kutsi baphendvuke;

15 Bonkhe labo labakholwa kuNdvodzana, baphendvuka etonweni tabo, batawusindziswa; bese bonkhe labo labangakholwa baphindze bangaphendvuki, batawulahlwa; futsi lamavi aphuma emlonyeni waNkulunkulu ngemyalo locinile; ngaloko-ke kufanele agcwaliseke.

16 Adamu na-Eva, umkakhe, abayekelanga kubita Nkulunkulu. Adamu wamati Eva umkakhe, wakhulelwa watala Khayini, watsi: Ngitfole indvodza eNkhosini; ngaloko-ke akukafaneli iwalahle emavi ayo. Kodvwa buka, Khayini akalalelanga, watsi: Ingubani iNkhosi kutsi kufanele ngiyati na?

17 Waphindze wakhulelwa watala umnakabo Abela. Abela walilalela livi leNkhosi. Abela abengumelusi wetimvu, kodvwa Khayini bekangumlimi wemhlabatsi.

18 Khayini bekatsandza kakhulu Sathane kunaNkulunkulu. Sathane wamyaleta, watsi: Letsa umnikelo eNkhosini.

19 Ngekuhamba kwesikhatsi kwenteka kutsi Khayini waletsa titselo temhlabatsi taba ngumnikelo eNkhosini.

20 Abela, naye waletsa ematubulo etimvu takhe, letikhuluphele tawo. INkhosi yemukela Abela, nemnikelo wakhe;

21 Kodvwa Khayini, nemnikelo wakhe, ayitange iwemukele. Manje Sathane bekakwati loku, kwamtfokotisa. Khayini watfukutsela kakhulu, nebuso bakhe banyukubala.

22 INkhosi yatsi kuKhayini: Utfukutseleleni? Buso bakho bunyukubaleleni na?

23 Uma wenta lokulungile, uyawukwemukeleka. Futsi uma ungenti lokulungile, sono siyakucatsamela ngasemnyango, futsi Sathane ufuna wena; ngaphandle kwekutsi ulalele imiyaleto yami, ngitawukunikela, uyawuba nemandla etikwakho njengekwetifiso takhe. Wena uyawubusa etikwakhe;

24 Ngoba kusuka ngalesi sikhatsi uyawuba ngubabe wemanga, uyawucanjwa libito lelitsi unguKulahlwa; ngoba nawe bewukhona umhlaba usengakasekelwa.

25 Futsi kuyawutsiwa esikhatsini lesitako—Leti tinengiso tatfolwa kuKhayini; ngoba wasala seluleko lesikhulu lesasiphuma kuNkulunkulu; futsi lesi sicalekiso lengiyawusibeka etikwakho, ngaphandle uma uphendvuka.

26 Khayini watfukutsela kakhulu, wangaphindzi walilalela livi leNkhosi, noma Abela, umnakabo, lobekahamba ngebungcwele phambi kweNkhosi.

27 Adamu nemkakhe balila phambi kweNkhosi, ngenca yaKhayini nabomnakabo.

28 Futsi kwenteka kutsi Khayini watsatsa yinye yemadvodzakati abomnakabo wayenta umkakhe, futsi batsandza kakhulu Sathane kunaNkulunkulu.

29 Sathane watsi kuKhayini: Funga kimi ngemphimbo wakho, uma ukuveta loku utawukufa; fungisa nabomnakenu ngetinhloko tabo, nangaNkulunkulu lophilako, kutsi angeke bakuvete loku, ngoba uma bakuveta, bayawukufa nekufa; futsi kute uyihlo angakwati loku; ngalelilanga ngitawumletsa umnakenu Abela etandleni takho.

30 Sathane wafunga kuKhayini kutsi utawukwenta ngekwemiyaleto yakhe. Tonkhe leti tintfo tentiwa ngasense.

31 Khayini watsi: Ngempela nginguMahani, indvuna yalemfihlo lenkhulu, yekutsi ngingabulala bese ngitfola inzuzo. Ngaloko-ke Khayini wabitwa ngeNdvuna Mahani, futsi watichayisa ebubini bakhe.

32 Khayini waya etsafeni, wakhuluma na-Abela, umnakabo. Futsi kwenteka kutsi ngesikhatsi basetsafeni, Khayini wahlasela Abela, umnakabo, wambulala.

33 Khayini watichayisa ngaloko labekakwentile, watsi: Sengikhululekile, noma kanjani imihlambi yemnaketfu iwela etandleni tami.

34 INkhosi yatsi kuKhayini: Uphi Abela, umnakenu na? Watsi: Angimati. Ngingumlindzi wemnaketfu yini mine?

35 INKhosi yatsi: Wenteni? Livi lengati yemnakenu liyakhala kimi lisemhlabatsini.

36 Manje uyawucalekiswa emhlabatsini lekunguwona ukhamise umlomo wawo kwemukela ingati yemnakenu esandleni sakho.

37 Nawulima umhlabatsi kusukela manje ngeke usakunika emandla awo ekukunika sivuno sawo lesihle. Sewuyawuba ngumhambuma neluzulane emhlabeni.

38 Khayini watsi eNkhosini: Sathane ungilingile ngenca yemihlambi yemnaketfu. Ngaphindze ngatfukutsela; ngoba wawemukela umnikelo wakhe hhayi wami; sijeziso sami singetulu kwemandla ami.

39 Buka lamuhla ungicoshile ebukhoneni beNkhosi, futsi ebukhoneni bakho ngiyawubhaciswa; ngiyawuba ngumhambuma neluzulane emhlabeni; futsi kuyawukwenteka, kutsi lohlangana nami utawungibulala, ngenca yebubi bami lobukhulu, ngoba leti tintfo atikafihlwa eNkhosini.

40 Mine iNkhosi ngatsi kuye: Noma ngubani lokubulalako, kuyawuphindziselwa kuye kute kube kasikhombisa. Futsi mine iNkhosi ngabeka luphawu kuKhayini, funa lomtfolako ambulale.

41 Khayini wase uyesuswa ebukhoneni beNkhosi, umkakhe nabomnakabo labaningi bahlala eveni laseNodi, ngasemphumalanga yase-Edeni.

42 Khayini wamati umkakhe, wakhulelwa watala Enoki, waphindze watala emadvodzana nemadvodzakati lamaningi. Wakha lidolobha, waletsa ngendvodzana yakhe Enoki.

43 Ku-Enoki kwatalwa Iradi, nalamanye emadvodzana nemadvodzakati. Iradi watala Mehujayeli, nalamanye emadvodzana nemadvodzakati. Mehujayeli watala Methushayeli, nalamanye emadvodzana nemadvodzakati. Methushayeli watala Lameki.

44 Lameki watsatsa bafati lababili; libito lalomunye bekungu-Ada, libito lalolomunye, kunguSila.

45 Ada watala Jabale; waba nguyise walabo bebahlala emathendeni, bebabafuyi betinkhomo; libito lemnakabo bekunguJubale, lobekanguyise wabo bonkhe labebadlala lugitali nemntjingozi.

46 Sila, naye watala Thubali Khayini, lobekangumfundzisi walabo labakha emathulusi ngelitfusi nensimbi. DzadzewaboThubali Khayini bekunguNama.

47 Lameki watsi kubafati bakhe, Ada naSila: Lalelani livi lami, nine bafati baLameki, lalelani lengitakusho; indvodza nayingilimata ngitawuyibulala, nelijaha nalingilimata ngitawulibulala.

48 Nangabe Khayini ayawuphindziselwa emahlandla kasikhombisa, impela Lameki kuyawuba ngemashumi lasikhombisa nesikhombisa.

49 Ngoba Lameki abesangene esivumelwaneni naSathane, ngendlela yaKhayini, ngaso waba yiNdvuna Mahani, indvuna yaleyo mfihlo lenkhulu leyaniketwa Khayini nguSathane; Iradi, indvodzana ya-Enoki, yati ngemfihlo yabo, yacala kuyembula kumadvodzana a-Adamu;

50 Ngaloko-ke Lameki, atfukutsele, wambulala, hhayi ngetizatfu letinjengetaKhayini, kumnakabo Abela, kute azuze, kodvwa wambulala ngenca yesifungo.

51 Ngoba, kusukela ngetikhatsi taKhayini, kwaba nelicembu leliyimfihlo, imisebenti yabo beyiyebumnyama, futsi wonkhe umuntfu amati umuntfu wakubo.

52 Ngaloko-ke iNkhosi yamcalekisa Lameki, nendlu yakhe, nabo bonkhe labo bebavumelene naSathane; ngoba abayigcinanga imiyaleto yaNkulunkulu, loko akumtfokotisanga Nkulunkulu, futsi akabasebentelanga, nemisebenti yabo beyitinengiso, yacala yandza emkhatsini wawo onkhe amadvodzana ebantfu. Futsi lelicembu leliyimfihlo laba semkhatsini wemadvodzana ebantfu.

53 Emkhatsini wemadvodzakati ebantfu leti tintfo betingakhulunywa, ngoba Lameki bekakhulume ngalemfihlo kubafati bakhe, bamvukela, batimemetela leti tintfo khashane, futsi bete luvelo.

54 Ngaloko-ke Lameki wadzeleleka, wakhishelwa ngephandle, wangeti emkhatsini wemadvodzana ebantfu, ngekwesaba kutsi utawukufa.

55 Ngaleyo ndlela imisebenti yebumnyama yacala kubusa emkhatsini wawo onkhe emadvodzana ebantfu.

56 Nkulunkulu wawucalekisa umhlaba ngesicalekiso lesibuhlungu, wabatfukutselela lababi, nawo onkhe emadvodzana ebantfu labekawentile;

57 Ngoba bebangafuni kulilalela livi lakhe, noma bakholwe yiNdvodzana Letelwe Yodvwa yakhe, ngisho loyo lamemetela kutsi kufanele ete ekhatsi nesikhatsi, lobekalungiswe ngaphambi kwekusekelwa kwemhlaba.

58 Ngaleyo ndlela liVangeli lacala kushunyayelwa, kusukela ekucaleni, limenyetelwa tingilosi letingcwele letatitfunywe tisuka phambi kwaNkulunkulu, nangelivi lakhe lucobo, nangesipho saMoya loNgcwele.

59 Ngaleyo ndlela tonkhe tintfo tacinisekiswa ku-Adamu, ngesimiso lesingcwele, neliVangeli lashunyayelwa, nemyalo watfunyelwa, kutsi liVangeli kufanele libe semhlabeni, kute kube sekupheleni kwawo; kwabanjalo nje. Amen.