1 Futsi kwenteka kutsi Enoki wachubeka nenkhulumo yakhe, watsi: Bukani, babe wetfu Adamu watifundzisa leti tintfo, futsi labaningi bakholwa baba ngemadvodzana aNkulunkulu, labaningi abakholwanga, babhubha etonweni tabo, balindzele ngekwesaba, basebuhlungwini, intfukutselo levutsako yelulaka lwaNkulunkulu kutsi itfululelwe etikwabo.

2 Futsi kusukela ngaleso sikhatsi Enoki wacala kuphrofetha, watsi kubantfu: Ngesikhatsi ngisahamba, ngime endzaweni iMahuja, ngikhala eNkhoisini, kwavela livi ezulwini, litsi—Jika, wenyukele entsabeni iSimeyoni.

3 Futsi kwenteka kutsi ngajika ngenyukela kuleyo ntsaba; ngisemile kuleyo ntsaba, ngabona emazulu avuleka, ngembatsiswa ngenkhatimulo;

4 Ngabona iNkhosi, beyime phambi kwebuso bami, yakhuluma nami, njengemuntfu akhuluma nalomunye, buso nebuso; yatsi kimi: Buka, ngitawukukhombisa umhlaba kute kube setitukulwaneni letiningi.

5 Futsi kwenteka kutsi ngabona esigodzini saseShumi, buka, bantfu labaningi labebahlala emathendeni, labekubantfu baseShumi.

6 Ngetulu kwaloko iNkhosi yatsi kimi: Buka; ngabuka ngasenyakatfo, ngabona bantfu baseKhenani, labebahlala emathendeni.

7 INkhosi yatsi kimi: Phrofetha; ngaphrofetha, ngatsi: Bukani bantfu baseKhenani, labaningi, batawukuya emphini lehlelekile balwe nebantfu baseShumi, futsi bayawubabulala kangangoba bayawubabhubhisa baphele nya; bantfu baseKhenani bayawutehlukanisa kulelive, lelive liyawuba lihlane liphindze lingaveti lutfo, kute nalabanye bantfu labayawuhlala lapho ngaphandle kwebantfu baseKhenani;

8 Ngoba bukani, iNkhosi iyawulicalekisa lelive ngekushisa lokukhulu, nekuba lihlane kwalo kuyawuchubeka ingunaphakadze; futsi kwabakhona bumnyama lobeta kubantfwana baseKhenani, kangangoba badzeleleka emkhatsini wabo bonkhe bantfu.

9 Futsi kwenteka kutsi iNkhosi yatsi kimi: Buka; ngabuka, ngabona live laseSharoni, nelive laka-Enoki, nelive lase-Omineri, nelive laseHeni, nelive laseShemi, nelive laseHena, nelive laseHananiha, nabo bonkhe bantfu bakhona;

10 INkhosi yatsi kimi: Hamba uye kulabantfu, utsi kubo—Phendvukani, funa ngiphume ngibashaye ngesicalekiso, bafe.

11 Futsi wanginika umyaleto wekutsi kufanele ngibabhabhatise egameni laBabe, neleNdvodzana, legcwele umusa neliciniso, nelaMoya loNgcwele, lofakaza ngaBabe nangeNdvodzana.

12 Futsi kwenteka kutsi Enoki wachubeka nekubita bonkhe bantfu, ngaphandle kwebantfu baseKhenani, kutsi baphendvuke;

13 Lwaba lukhulu lukholo lwa-Enoki kangangoba wabahola bantfu baNkulunkulu, netitsa tabo teta kutawukulwa nabo; wakhuluma livi leNkhosi, umhlaba watamatama, netintsaba tesuka, ngisho nangekwemyaleto wakhe; nemifula yemanti yashintja tindlela tayo; nekubhodla kwemabhubesi kwevakala kuphuma ehlane; netive tonkhe tesaba kakhulu, belinemandla kakhulu livi la-Enoki, futsi nemandla alolo lulwimi aba makhulu kakhulu Nkulunkulu bekamnikete lona.

14 Kwaphindze kwavela live ngaphansi ekujuleni kwelwandle, kwaba kukhulu kwesaba kwetitsa tebantfu baNkulunkulu, kangangoba babaleka bema khashane futsi bahamba etikwalelo live lebeliphume ekujuleni kwelwandle.

15 Netichwaga talelive, nato, tamela khashane; kwaba nesicalekiso kubo bonkhe bantfu labalwa naNkulunkulu;

16 Kusukela ngaleso sikhatsi kwaba netimphi nekucitseka kwengati emkhatsini wabo; kodvwa iNkhosi yeta kutawuhlala nebantfu bayo, bahlala ngekulunga.

17 Kwesaba iNkhosi kwaba setikwato tonkhe tive, yaba yinkhulu kakhulu inkhatimulo yeNkhosi, lebeyikubantfu bayo. Futsi iNkhosi yalibusisa lelive, babusiswa etikwetintsaba, nasetikwetindzawo letiphakeme, baphumelela.

18 INkhosi yabita bantfu bayo ngeSIYONI, ngoba beba nhlitiyo yinye baphindze bamcomdvo munye, bahlala ngekulunga, futsi bekute lomphofu emkhatsini wabo.

19 Enoki wachubeka nekushumayela kwakhe ngekulunga kubantfu baNkulunkulu. Futsi kwenteka kutsi ngemalanga akhe, wakha lidolobha lelalibitwa ngekutsi Lidolobha lebuNgcwele, ngisho iSIYONI.

20 Futsi kwenteka kutsi Enoki wakhuluma neNkhosi; watsi eNkhosini: Impela iSiyoni iyawuhlala ngekuphepha ingunaphakadze. Kodvwa iNkhosi yatsi ku-Enoki: ISiyoni ngiyibusisile, kodvwa bantfu labasele bayo ngibacalekisile.

21 Futsi kwenteka kutsi iNkhosi yakhombisa Enoki bonkhe bantfu basemhlabeni; wabuka, wabona, iSiyoni, ngekuhamba kwesikhatsi, yatsatfwa yayiswa ezulwini. INkhosi yatsi ku-Enoki: Buka lapho ngihlala khona ingunaphakadze.

22 Enoki waphindze wabona labantfu labebasele labebangemadvodzana a-Adamu; bebayinhlanganisela yayo yonkhe intalelwane ya-Adamu ngaphandle kwentalelwane yaKhayini, ngoba intalelwane yaKhayini beyimnyama, futsi beyite indzawo emkhatsini wabo.

23 Emvakwekutsi iSiyoni seyitsetfwe yayiswa ezulwini, Enoki wabona, buka, tonkhe tive temhlaba bese tisembikwakhe;

24 Futsi kwendlula titukulwane ngetitukulwane; na-Enoki bekasetulu sekaphakanyisiwe, asasesifubeni saBabe, neseNdvodzana yeMuntfu; buka, emandla aSathane bekasetikwawo wonkhe umhlaba.

25 Wabona tingilosi tehla tiphuma ezulwini; weva livi lelikhuli litsi: Maye, maye kubantfu basemhlabeni.

26 Waphindze wabona Sathane; aneluketane lolukhulu esandleni sakhe, lugubhetele wonkhe umhlaba ngebumnyama; wabuka etulu wahleka, netingilosi takhe tajabula.

27 Enoki waphindze wabona tingilosi tehla tiphuma ezulwini, tifakaza ngaBabe neNdvodzana; Moya loNgcwele wehlela kulabaningi, bahlwitfwa ngemandla asezulwini bayiswa eSiyoni.

28 Futsi kwenteka kutsi Nkulunkulu wasezulwini wabuka bantfu labebasele, wakhala; Enoki wafakaza ngaloko, watsi: Kwenteka kanjani kutsi emazulu akhale, ehlise tinyembeti tawo njengemvula etikwetintsaba na?

29 Enoki watsi eNkhosini: Kwenteka kanjani kutsi ukhale, ngoba ungcwele, kusukela phakadze kute kube phakadze na?

30 Futsi kube bekungenteka kutsi umuntfu abale tincenye tonkhe temhlaba, yebo, tigidzi temihlaba letinjengalona, bekungeke kube sicalo enanini lendalo yakho; futsi emakhethini akho aseluliwe namanje, nanome kunjalo usesekhona, nesifuba sakho siseselapho, futsi ulungile, unesihawu nemusa ingunaphakadze

31 Uyitsetse neSiyoni wayiyisa esifubeni sakho, wayehlukanisa nayo yonkhe indalo yakho, kusukela phakadze kute kube phakadze; futsi kute lutfo ngaphandle kwekuthula, kulunga, neliciniso lapho kuhlala khona sihlalo sakho sebukhosi; umusa uyawuhamba phambi kwebuso bakho ungabi nesiphetfo; kwenteka kanjani kutsi ungakhala na?

32 INkhosi yatsi ku-Enoki: Buka laba bomnakenu; bangumsebenti wetandla tami lucobo, futsi ngabanika lwati lwabo, ngelusuku lengabadala ngalo; naseNsimini yase-Edeni, ngamnika umuntfu lilungelo lakhe lekutikhetsela;

33 Futsi kubomnakenu ngitsite, ngaphindze ngabanika umyaleto, wekutsi abatsandzane, nekutsi bakhetse mine, uYise; kodvwa buka, bete lutsandvo, bazonda ingati yabo lucobo;

34 Nemlilo welulaka lwami wokhelekile ngekumelana nabo; ekutfukutseleni kwami ngitawutfumela tikhukhula etikwabo, ngoba intfukutselo yami lenkhulu yokhelekile ngekumelana nabo.

35 Buka, nginguNkulunkulu; iNdvodza yebuNgcwele libito lami; iNdvodza yeSeluleko libito lami; longenaSiphetfo nalongunaPhakadze libito lami, futsi.

36 Ngaloko-ke, ngingatelula tandla tami ngiyibambe yonkhe indalo lengiyentile; ngetulu kwaloko neliso lami lingayibuka ngalokujulile, futsi emkhatsini wayo yonkhe imisebenti yetandla tami akukate kube khona bubi lobungaka njengalobu lobusemkhatsini wabomnakenu.

37 Kodvwa buka, tono tabo tiyawuba setikwetinhloko tabokhokho babo; Sathane uyawuba nguyise, siphetfo sabo kuyawuba lusizi; emazulu onkhe ayawubakhalela, ngisho wonkhe umsebenti wetandla tami; ngaloko-ke akukafaneli yini emazulu akhale, ngekubona kutsi laba batawuhlupheka na?

38 Kodvwa buka, laba emehlo akho lababukako bayawukufa ngetikhukhula; buka, ngitawubavalela, ngibalungisele lijele.

39 Futsi loyo lengimkhetsile uncusile phambi kwebuso bami. Ngaloko-ke, ufela tono tabo; nangabe bayawuphendvuka ngelilanga lapho Lokhetsiwe wami ayawubuyela kimi, kute kube ngulolo suku bayawuba sebuhlungwini lobukhulu;

40 Ngaloko-ke, ngenca yaloko emazulu ayawukhala, yebo, nawo wonkhe umsebenti wetandla tami.

41 Futsi kwenteka kutsi iNkhosi yakhuluma ku-Enoki, yatjela Enoki tonkhe tento tebantfwana bebantfu; ngaloko-ke Enoki bekati, futsi wabubuka bubi babo, nelusizi lwabo, wakhala welula imikhono yakhe, nenhlitiyo yakhe yakhukhumuka yababanti njengeliphakadze; netibilini takhe tagcwala sihawu; futsi lonkhe liphakadze latfutfumela.

42 Enoki waphindze wabona Nowa, nemndeni wakhe; kutsi situkulwane semadvodzana onkhe aNowa kufanele sisindziswe ngesindziso yesikhashana.

43 Ngaloko-ke Enoki wabona kutsi Nowa wakha umkhumbi; nekutsi iNkhosi yakutfokotela loko, yawuvikela ngesandla sayo lucobo; kodvwa kulababi labebasele tikhukhula teta tabagwinya.

44 Ngesikhatsi Enoki akubona loku, waba nebuhlungu bemphefumulo, wabakhalela bomnakabo, watsi emazulwini: ngitawukwala kudvudvuteka; kodvwa iNkhosi yatsi ku-Enoki: Phakamisa inhlitiyo yakho, ujabule; ubuke.

45 Futsi kwenteka kutsi Enoki wabuka; kusuka kuNowa, wabona yonkhe imindeni yemhlaba; wakhala eNkhosini, watsi: Liyawufika nini lilanga leNkhosi na? Ngabe ingati yaLolungile iyawucitfwa nini, kute bonkhe labalilako bagcweliswe baphindze batfole kuphila lokuphakadze na?

46 INkhosi yatsi: Kuyawuba sekhatsi nesikhatsi, emalangeni ebubi nemphindziselo.

47 Futsi buka, Enoki walibona lilanga lekubuya kweNdvodzana yeMuntfu, ngisho enyameni; nemphefumulo wakhe watfokota, watsi: Lolungile uphakanyisiwe, neliWundlu libulewe kusukela ekusekelweni kwemhlaba; futsi ngelukholo ngisesifubeni saBabe; buka, iSiyoni inami.

48 Futsi kwenteka kutsi Enoki wabuka emhlabeni; weva livi lisuka etibilinini tawo, litsi: Maye, maye kimi, unina webantfu; ngiva buhlungu, ngikhatsele, ngenca yebubi bebantfwana bami. Ngiyawuphumula nini, ngihlanjululwe kuko kungcola losekuphume kimi na? Umdali wami utawungingcwelisa nini, kute ngiphumule, nekulunga kuhlale sikhashana ebusweni bami na?

49 Ngesikhatsi Enoki eva umhlaba ulila, wakhala, wancusa eNkhosini, watsi: O Nkhosi, Angeke uwuvele umhlaba na? Angeke ubabusise bantfwana baNowa na?

50 Futsi kwenteka kutsi Enoki wachubeka nekuncusa eNkhosini, watsi: Ngiyakucela, O Nkhosi, egameni laLotelwe Yedvwa wakho, ngisho Jesu Khristu, kutsi ube nemusa kuNowa nentalelwane yakhe, kute umhlaba ungaphindzi umbonywe tikhukhula.

51 INkhosi ayikhonanga kwala; yenta sivumelwano na-Enoki, yafunga kuye ngesifungo, kutsi beyitawutivimbela tikhukhula; nekutsi beyitawukhuluma nebantfwana baNowa;

52 Yatfumela umyalo longagucuki, kutsi insali yentalelwane yakhe kufanele itfolakale emkhatsini wato tonkhe tive njalo, umhlaba usemile;

53 INkhosi yatsi: Ubusisiwe loyo loyawufika ngentalelwane yakhe Mesiya; ngoba watsi—NginguMesiya, iNkhosi yaseSiyoni, Lidvwala laseZulwini, lelibanti njengeliphakadze; noma ngubani longena ngelisango akhuphukele etulu ngami akayuze awe; ngaloko-ke, babusisiwe labo lesengikhulume ngabo, ngoba bayawuta ngemaculo enjabulo yaphakadze.

54 Futsi kwenteka kutsi Enoki wancusa eNkhosini, watsi: Ngesikhatsi iNdvodzana yeMuntfu seyibuya enyameni, ngabe umhlaba uyawuphumula na? Ngiyakucela, ngikhombise leti tintfo.

55 INkhosi yatsi ku-Enoki: Buka, wabuka wabona iNdvodzana yeMuntfu iphakanyiselwa esiphambanweni, ngendlela yebantfu;

56 Weva livi lelikhulu; nemazulu ambonyiwe; nendalo yonkhe yaNkulunkulu yalila; nemhlaba wabubula; nemadvwala achekeka, nalabangcwele bavuka, batfweswa umchele ngasesandleni sekudla seNdvodzana yeMuntfu, ngemichele yenkhatimulo.

57 Futsi yonkhe imimoya lebeyisejele yaphuma, yema ngasesandleni sangesekudla saNkulunkulu; labasele bagcinwa etinketaneni tebumnyama kwate kwaba kwehlulelwa kwelilanga lelikhulu.

58 Ngetulu kwaloko Enoke wakhala wancusa eNkhosini, watsi: Ngabe umhlaba uyawuphumula nini na?

59 Enoki wabona iNdvodzana yeMuntfu yenyukela kuBabe; wancusa eNkhosini, watsi: Angeke yini uphindze ubuye emhlabeni na? Ngekubona kutsi unguNkulunkulu, futsi ngiyakwati, ufungile kimi, wangiyaleta kutsi ngicele egameni laLotelwe Yedvwa wakho; ungentile, wanginika nelilungelo lekuya esihlalweni sakho sebukhosi, hhayi ngekwami; kodvwa ngemusa wakho; ngaloko-ke, ngiyakubuta kutsi angeke yini uphindze ubuye emhlabeni?

60 INkhosi yatsi ku-Enoki: Njengoba ngiphila, kanjalo-ke ngitawubuya ngemalanga ekugcina, ngemalanga ebubi nemphindziselo, kutawugcwalisa sifungo lengisentile kuwe ngalokuphatselene nebantfwana baNowa;

61 Futsi lilanga liyeta lapho umhlaba uyawuphumula khona, kodvwa ngaphambi kwalelo langa emazulu ayawufiphala, indvwangu yebumnyama iyawumbonya umhlaba; nemazulu uyawutamatama, kanjalo nemhlaba; netinhlupheko letinkhulu tiyawuba semkhatsini webantfwana bebantfu, kodvwa bantfu bami ngiyawubagcina;

62 Kulunga ngitawukutfumela phansi kusuka ezulwini; neliciniso ngitawulitfumela lisuka emhlabeni, kute lifakaze ngaLotelwe Yedvwa wami; kuvuka kwakhe kulabafile; yebo, nekuvuka kwabo bonkhe bantfu; kulunga neliciniso ngiyawukwenta kushanyele umhlaba njengesikhukhula, kute kugcogce labakhetsiwe bami kuwo omane emagumbi emhlaba, endzaweni lengitawuyilungisa, Lidolobha leliNgcwele, kute bantfu bami babophe tinkhalo tabo, balindzele sikhatsi sekubuya kwami; ngoba liyawuba lapho lithende lami, futsi liyawubitwa ngeSiyoni, iJerusalema leNsha.

63 Futsi iNkhosi yatsi ku-Enoki: Ngaleso sikhatsi wena nalo lonkhe lidolobha lakho niyawuhlangana nabo khona, futsi siyawubemukela etifubeni tetfu, bayawusibona; siyawubagaca, nabo bayawusigaca, futsi siyawukwangana;

64 Futsi lapho kuyawuba yindzawo yami lengihlala kuyo, kuyawuba yiSiyoni, leyawuvela kuyo yonkhe indalo lengiyentile; esikhatsini seminyaka letinkhulungwane umhlaba uyawuphumula.

65 Futsi kwenteka kutsi Enoki walibona lilanga lekubuya kweNdvodzana yeMuntfu, emalangeni ekugcina, kutawuhlala emhlabeni ngekulunga sikhatsi senkhulungwane yeminyaka.

66 Kodvwa ngaphambi kwalelo langa wabona tinhlupheko letinkhulu emkhatsini walababi; wabona nelwandle, kutsi lwatanyatanyiswa, netinhlitiyo tebantfu tiphela emandla, babuka ngekwesaba tehlulelo taNkulunkulu Somandla, lokufanele kwehlele lababi.

67 INkhosi yamkhombisa Enoki tonkhe letintfo, kwate kwaba sekupheleni kwemhlaba; futsi walibona nelilanga lalabalungile, sikhatsi sekuhlengwa kwabo, futsi batfola injabulo lephelele.

68 Futsi onkhe emalanga eSiyoni, ngemalanga a-Enoki, aba ngemakhulu lamatsatfu nemashumi lasitfupha nesihlanu eminyaka.

69 Futsi Enoki nabo bonkhe bantfu bakhe bahamba naNkulunkulu, wahlala emkhatsini weSiyoni; futsi kwenteka kutsi iSiyoni beyingasekho, ngoba Nkulunkulu wayemukela esifubeni sakhe; kusukela ngaleso sikhatsi kwandza inkhulumo letsi, ISIYONI YAHAMBA.