1 Ngako-ke lizulu nemhlaba kwapheleliswa, kanye nendalo yako konkhe.

2 Ngelilanga lesikhombisa mine, Nkulunkulu, ngawucedza umsebenti wami, nato tonkhe tintfo lebesengitentile; ngaphumula ngelilanga lesikhombisa kuwo wonkhe umsebenti wami, futsi tonkhe tintfo lebesengitentile tasetiphelelisiwe, mine, Nkulunkulu, ngabona kutsi betitinhle;

3 Futsi mine, Nkulunkulu, ngalibusisa lelilanga lesikhombisa, futsi ngalingcwelisa; ngoba ngalo ngaphumula emsebentini wami wonkhe mine, Nkulunkulu, lebengiwudalile ngaphindze ngawenta.

4 Manje, buka, ngitsi kuwe, leti tincenye telizulu nemhlaba, ngesikhatsi tidalwa, ngelilanga mine, iNkhosi Nkulunkulu, ngenta lizulu nemhlaba.

5 Futsi bekusete nakunye lokutitjalo tesiganga, nato tonkhe tibhidvo tesiganga ngaphambi kwekutsi tikhule. Ngoba mine, iNkhosi Nkulunkulu, ngatidala tonkhe tintfo, lesengikhulume ngato, ngamoya, ngaphambi kwekutsi tibe khona ngekwemvelo emhlabeni. Ngoba mine, iNkhosi Nkulunkulu bengisengakayinisi imvula emhlabeni. Futsi mine, iNkhosi Nkulunkulu, besengibadalile bonkhe bantfwana bebantfu; bekute umuntfu lobekadaliwe lobekatawulima lomhlabatsi; ngoba ezulwini ngabadala; futsi bekusete lokuphilako emhlabeni, noma emantini, noma emoyeni.

6 Kodvwa mine, iNkhosi Nkulunkulu, ngakhuluma, kwase kwenyuka inkhungu, iphuma emhlabeni, yanisela wonkhe umhlabatsi.

7 Mine, iNkhosi Nkulunkulu, ngabumba umuntfu ngelutfuli lwemhlabatsi, ngaphefumulela umoya wekuphila emakhaleni akhe; umuntfu wase uba ngumuntfu lophilako, sidalwa sekucala emhlabeni, umuntfu wekucala futsi; noko, tonkhe tintfo betidalwe ngaphambilini, kodvwa ngamoya betidaliwe tiphindze tentiwe ngekwelivi lami.

8 Mine, iNkhosi Nkulunkulu, ngahlanyela insimi yase-Edeni ngasemphumalanga; ngabeka khona lomuntfu lebesengimentile.

9 Emhlabatsini ngenta mine, iNkhosi Nkulunkulu, kutsi kumile tonkhe tihlahla, ngekwemvelo, letibukekako emehlweni emuntfu; umuntfu lebekangatibona. Nato taba tihlahla letiphilako. Ngoba betingamoya ngelilanga lengatidala ngalo; ngoba betihlala kuleyondzawo lapho mine, Nkulunkulu, lebengitidalele khona, yebo, ngisho tonkhe tintfo lebengitilungiselele kusetjentiswa ngumuntfu; futsi umuntfu wabona kutsi betilungele kutsi tingaba kudla. Futsi mine, iNkhosi Nkulunkulu, ngahlanyela sihlahla sekuphila ekhatsi nensimi, kanye nesihlahla sekwati lokuhle nalokubi.

10 Mine, iNkhosi Nkulunkulu, ngenta kutsi kube khona umfula ugelete e-Edeni unisele insimi; kusuka lapho wahlukana, waba yimifula lemine.

11 Mine, iNkhosi Nkulunkulu, ngawubita lowekucala ngelibito lelitsi yiPhishoni, wawutungeleta lonkhe live laseHavila, lapho mine, iNkhosi Nkulunkulu, ngadala khona ligolide leliningi.

12 Ligolide lalelo live belilihle lakhulu, futsi bekukhona inhlaka yebhedola kanye nelitje isholamu.

13 Libito lemfula wesibili bekuyiGihoni, ngiwo lobewutungeleta lonkhe live laseKushe.

14 Libito lemfula wesitsatfu bekuyiHidekheli; lobewugeleta ngasemphumalanga ye-Asiriya. Umfula wesine bekuyiYufrathe.

15 Mine, Nkulunkulu, ngamtsatsa lomuntfu, ngambeka eNsimini yase-Edeni, kutsi ayilime, aphindze ayilindze.

16 Mine, iNkhosi Nkulunkulu, ngamyaleta lomuntfu, ngatsi: Ungadla ngekutsandza kwakho tonkhe titselo letilapha ensimini,

17 Kodvwa esihlahleni sekwati lokuhle nalokubi, ungadli kuso, noko, ungatikhetsela, ngoba kunikiwe kuwe; kodvwa, khumbula kutsi angikuvumeli loko, ngoba ngelilanga loyawukudla ngalo kuso uyawukufa nekufa.

18 Mine, iNkhosi Nkulunkulu, ngatsi kuLotelwe Yedvwa wami, akukuhle kutsi umuntfu ahlale yedvwa; ngaloko-ke, ngitawumentela umsiti lolungele yena.

19 Ngemhlabatsi mine, iNkhosi Nkulunkulu, ngabumba tonkhe tilwane tesiganga, netinyoni letindiza emoyeni; ngayaleta kutsi tiye ku-Adamu, abone kutsi utetsa njani; nato taba tidalwa letiphilako; ngoba mine, Nkulunkulu, ngaphefumulela kuto umoya wekuphila, ngayaleta kutsi noma nguliphi libito Adamu latibita ngalo, lelo kube libito lato.

20 Adamu watetsa emabito tonkhe timfuyo, netinyoni letindiza emoyeni, nato tonkhe tilwane tesiganga; kodvwa yena Adamu, abengakatfolelwa umsiti labelungele yena.

21 Mine, iNkhosi Nkulunkulu, ngehlisela butfongo lobukhulu ku-Adamu; walala, ngase ngikhipha lunye lwetimbambo takhe ngagcwalisa sikhala ngenyama sikhundleni salo;

22 Ngelubhambo mine, iNkhosi Nkulunkulu, lebengilukhiphe kulomdvuna, ngabumba lomsikati, ngase ngimyisa endvodzeni.

23 Adamu watsi: Lona ngiyati manje kutsi sewulitsambo lematsambo ami, nenyama yenyama yami; uyawubitwa ngekutsi weSifazane ngoba utsetfwe endvodzeni.

24 Ngako-ke indvodza iyawushiya uyise nenina, inamatsele kumfati wayo; bese baba nyamanye.

25 Bebahamba ngcunu bobabili, lendvodza nemkayo, bate emahloni.