Lokukhetsiwe lokutsatfwe
eNcwadzini yaMosi
Incenye letsetfwe ekuhunyushweni kweliBhayibheli njengoba yembulwa kuJoseph Smith umPhrofethi, ngeNhlaba 1830–iNdlovana 1831.
Sehluko 1
(INhlaba 1830)
Nkulunkulu utembula kuMosi—Mosi uyaguculwa—Ubhekana naSathane—Mosi ubona imihlaba leminingi lekunebantfu kuyo—Imihlaba lengabaleki yadalwa yiNdvodzana—Umsebenti nenkhatimulo yaNkulunkulu kukufeza kungafi nekuphila lokuphakadze kumuntfu.
1 Emavi aNkulunkulu, lawakhuluma kuMosi ngesikhatsi Mosi enyuselwa entsabeni lephakeme kakhulu,
2 Futsi wabonana Nkulunkulu buso nebuso, waphindze wakhuluma naye, nenkhatimulo yaNkulunkulu yaba kuMosi; ngako-ke Mosi wakwati kumelana nebukhona bakhe.
3 Futsi Nkulunkulu wakhuluma kuMosi, watsi: Buka ngiyiNkhosi Nkulunkulu Somandla, futsi libito lami nginguLongenasiphetfo; ngoba anginasicalo semalanga noma siphetfo seminyaka; ngabe akusiko yini loku kungabi nasiphetfo na?
4 Buka, uyindvodzana yami; ngaloko-ke buka, ngitawukukhombisa umsebenti wetandla tami; kodvwa hhayi wonkhe, ngoba imisebenti yami ayinasiphetfo, ngalokunjalo nemavi ami, ngoba awapheli.
5 Ngaloko-ke, kute umuntfu longabona yonkhe imisebenti yami, ngaphandle kwekutsi abone yonkhe inkhatimulo yami; futsi kute umuntfu longabona yonkhe inkhatimulo yami, emvakwaloko ahlale asenyameni emhlabeni.
6 Futsi nginemsebenti lengitakunika wona, Mosi, ndvodzana yami; wena ufana naLotelwe Yedvwa wami; futsi Lotelwe Yedvwa wami unguye futsi uyawuba nguMsindzisi, ngoba ugcwele umusa neliciniso; kodvwa kute Nkulunkulu ngaphandle kwami, netintfo tonkhe tiphambi kwami, ngoba ngitati tonkhe.
7 Manje, buka, loku lokukodvwa ngikukhombisa kona, Mosi, ndvodzana yami, ngoba usemhlabeni, manje ngikukhombisa kona.
8 Futsi kwenteka kutsi Mosi wabuka, wabona umhlaba ladalelwa kuwo; waphindze Mosi wabona umhlaba nemikhawulo yawo, nabo bonkhe bantfwana bebantfu labakhona, nalabebadaliwe, ngaloko wamangala kakhulu wababata.
9 Nenkhatimulo yaNkulunkulu yesuka kuMosi, kangangoba inkhatimulo yakhe yayingasekho kuMosi; futsi Mosi wasala yedvwa. Futsi ngesikhatsi asele yedvwa, wawela phansi.
10 Futsi kwenteka kutsi kwaba sikhatsi lesingemahora lamaningi ngaphambi kwekutsi Mosi aphindze atfole emandla akhe emvelo njengewemuntfu; watsi kuye: Manje, ngenca yaloku sengiyati kutsi umuntfu akasilutfo, lokuyintfo lebengingakate ngiyicabange.
11 Kodvwa manje emehlo ami abone Nkulunkulu; kodvwa hhayi enyama, kodvwa emehlo ami akamoya, ngoba emehlo ami enyama abengeke akwati kubona; ngoba bekufanele ngibune ngiphindze ngife enkhatimulweni yakhe; kodvwa inkhatimulo yakhe beyisetikwami; futsi ngabona buso bakhe, ngoba ngaguculwa phambi kwakhe.
12 Futsi kwenteka kutsi ngesikhatsi Mosi sekawashito lamavi, buka, Sathane weta kutawumlinga, watsi: Mosi, ndvodzana yemuntfu, ngikhonte.
13 Futsi kwenteka kutsi Mosi wabuka Sathane watsi: Ungubani wena na? Ngoba buka, ngiyiNdvodzana yaNkulunkulu, lefana naLotelwe Yedvwa wakhe; iphi inkhatimulo yakho, kute ngikukhonte na?
14 Ngoba buka, angikwatanga kubuka kuNkululunkulu, ngaphandle kwekutsi inkhatimulo yakhe ite etikwami, futsi ngaguculwa phambi kwakhe. Kodvwa ngingakubuka wena ngemehlo ami emvelo. Ngabe akunjalo, ngempela na?
15 Alibongwe libito laNkulunkulu wami, ngoba Moya wakhe awusukanga wonkhe kimi, kungenjalo ikuphi inkhatimulo yakho na, ngoba bumnyama kimi? Futsi ngingahlukanisa emkhatsini wakho naNkulunkulu; ngoba Nkulunkulu utsite kimi: Khonta Nkulunkulu, ngoba nguye yedvwa loyawumsebentela.
16 Suka lapha, Sathane; ungangikhohlisi; ngoba Nkulunkulu utse kimi: Ufana naLotelwe Yedvwa wami.
17 Futsi waphindze wanginika imiyaleto ngesikhatsi angibitela esihlahleni lesivutsako, watsi: Bita Nkulunkulu egameni laLotelwe Yedvwa wami, futsi ungikhonte.
18 Ngetulu kwaloko Mosi watsi: Angeke ngiyekele kubita Nkulunkulu, nginaletinye tintfo lengifuna kutibuta kuye: ngoba inkhatimulo yakhe beyisetikwami, ngaloko-ke ngingehlukanisa emkhatsini wakhe nawe. Suka lapha, Sathane.
19 Manje, ngesikhatsi Mosi sekawashito lamavi, Sathane wakhala ngelivi lelikhulu, waklabalaza emhlabeni, wayaleta, watsi: NginguLotelwe Yedvwa, ngikhonte.
20 Futsi kwenteka kutsi Mosi wacala kwesaba kakhulu; futsi ngesikhatsi asacale kwesaba, wabona bumunyu besihogo. Noko, ngekubita Nkulunkulu, watfola emandla, wayaleta, watsi: Suka kimi, Sathane, ngoba nguloNkulunkulu loyedvwa kuphela lengitawumkhonta, lokunguNkulunkulu wenkhatimulo.
21 Manje Sathane wacala kuchachatela, nemhlaba watamatama; Mosi watfola emandla, wabita Nkulunkulu, watsi: Egameni laLotelwe Yedvwa, suka lapha, Sathane.
22 Futsi kwenteka kutsi Sathane wakhala ngelivi lelikhulu, ngekulila, nekukhala, nekugedletela kwematinyo; wasuka lapho, ngisho naphambi kwaMosi, kangangoba akatange asambona.
23 Manje Mosi wafakaza ngaloku; kodvwa ngenca yebubi akwatiwa emkhatsini webantfwana bebantfu.
24 Futsi kwenteka kutsi ngesikhatsi Sathane sekasukile phambi kwaMosi, Mosi waphakamisela emehlo akhe ezulwini, agcwaliswe ngaMoya loNgcwele, lofakaza ngaBabe neNdvodzana;
25 Abita libito laNkulunkulu, waphindze wabona inkhatimulo yakhe, ngoba beyisetikwakhe; futsi weva livi, litsi: Ubusisiwe, Mosi, ngoba mine, Somandla, ngikukhetsile, futsi uyawukwentiwa ube nemandla kunemanti lamaningi; ngoba ayawuhlonipha umyaleto wakho kube shangatsi unguNkulunkulu.
26 Futsi buka, nginawe, kute kube sekugcineni kwemalanga akho; ngoba uyawukhulula bantfu bami ebugcilini, ngisho Israyeli lokhetsiwe wami.
27 Futsi kwenteka, ngesikhatsi livi lisakhuluma, Mosi waphonsa emehlo akhe wabona umhlaba, yebo, ngisho wonkhe, futsi bekute nalokuncane kwawo langakubonanga, awuhlukanisa ngaMoya waNkulunkulu.
28 Waphindze wabona nebantfu labahlala kuwo, futsi bekute namunye umuntfu langambonanga; bekabehlukanisa ngaMoya waNkulunkulu; futsi sibalo sabo sasisikhulu, bangabaleki njengesihlabatsi saselwandle.
29 Wabona netindzawo letiningi; futsi indzawo ngayinye beyibitwa ngelive, kuphindze kukhona bantfu belive ngalinye.
30 Futsi kwenteka kutsi Mosi wabita Nkulunkulu, watsi: Ngitjele, ngiyakuncenga, kungani letintfo tinjena, watenta ngani na?
31 Buka, inkhatimulo yeNkhosi beyisetikwaMosi, kangangoba Mosi wema phambi kwaNkulunkulu, wakhuluma naye buso nebuso. INkhosi Nkulunkulu yatsi kuMosi: Kute ngifeze inhloso yami ngente letintfo. Naku kuhlakanipha futsi kuhleti kimi.
32 Futsi ngelivi lemandla ami, ngitidalile, lokuyiNdvodzana yami Letelwe Yodvwa, legcwele umusa neliciniso.
33 Imihlaba lengabaleki ngiyidalile; nayo ngalokunjalo ngiyidalele inhloso yami; futsi ngeNdvodzana yami ngiyidalile, lokunguLotelwe Yedvwa wami.
34 Futsi umuntfu wekucala kubantfu ngambita nga-Adamu, lokusho kutsi labaningi.
35 Kodvwa yindzaba yalomhlaba kuphela, nebantfu bawo, lengikunika yona. Ngoba buka, miningi imihlaba leseyendlulile ngelivi lemandla ami. Futsi miningi lemile namanje, futsi ayibaleki kumuntfu; kodvwa tonkhe tintfo tibaliwe kimi, ngoba ngetami futsi ngiyatati.
36 Futsi kwenteka kutsi Mosi wakhuluma neNkhosi, watsi: Bani nemusa encekwini yakho O Nkulunkulu, ungitjele ngalokuphatselene nalomhlaba, nebantfu bawo, nangemazulu, emvakwaloko inceku yakho itawugculiseka.
37 INkhosi Nkulunkulu yabese iyakhuluma kuMosi, itsi: Emazulu, maningi, futsi angeke abaleke kumuntfu; kodvwa ayabaleka kimi, ngoba ngewami.
38 Futsi njengoba umhlaba munye uyawendlula, nemazulu awo kanjalo-ke nalomunye uyawukuta; futsi kute siphetfo emisebentini yami, nasemavini ami.
39 Ngoba buka, loku kungumsebenti wami nenkhatimulo yami—kufeza kungabhubhi nekuphila lokuphakadze kwemuntfu.
40 Manje, Mosi, ndvodzana yami, ngitawukhuluma nawe ngalokuphatselene nalomhlaba lome etikwawo; futsi bhala letintfo lengitawutikhuluma.
41 Futsi ngelilanga lapho bantfwana bebantfu bayawulibuka livi lami njengelite basuse lamaningi awo encwadzini loyawuyibhala, buka, ngiyawukhetsa lomunye lofana nawe; futsi ayawuphindze abekhona emkhatsini webantfwana bebantfu—emkhatsini wabo bonkhe labayawukholwa.
42 (Lawa mavi akhulunywa kuMosi entsabeni, ligama layo lelingeke latiwe emkhatsini webantfwana bebantfu. Manje sekakhulunywa kuwe. Ungawakhombisi muntfu ngaphandle kwalabo labakholwako. Kunjalo nje. Amen.)