1 Futsi mine, iNkhosi Nkulunkulu, ngakhuluma naMosi, ngatsi: Loyo Sathane, lomyaletile ngelibito laLotelwe Yedvwa wami, kusenguye lobekasekucaleni, futsi weta phambi kwami, watsi—Buka, nangu mine, ngitfume, ngitawuba yindvodzana yakho, ngiphindze ngihlenge bonkhe bantfu, kute kungalahleki namunye umphefumulo, futsi noma kanjani ngitawukwenta loko; ngaloko-ke nginike ludvumo lwakho.

2 Kodvwa, buka, iNdvodzana yami leTsandzekako, lebeyinguLotsandziwe naLokhetsiwe wami kwasekucaleni, yatsi kimi—Babe, intsandvo yakho ayentiwe, inkhatimulo ibe ngeyakho phakadze.

3 Ngaloko-ke, ngoba loyo Sathane wangivukela, wafuna kucedza lilungelo lekutikhetsela lemuntfu, mine, iNkhosi Nkulunkulu, lebengimnikete lona, kanye nekutsi, kufanele ngimnike emandla ami lucobo; ngemandla aLotelwe Yedvwa wami, ngenta kutsi aphonselwe phansi;

4 Waba nguSathane, yebo, ngisho develi, uyise wawo onkhe emanga, kukhohlisa nekuphumphutsekisa bantfu, futsi abaholele ekutfunjweni ngekwentsandvo yakhe, ngisho bonkhe labo labangeke balilalele livi lami.

5 Manje inyoka yayinebucili kwendlula tonkhe tilwane tesiganga mine, iNkhosi Nkulunkulu, lebengitentile.

6 Futsi Sathane wakufaka enhlitiyweni yenyoka, (ngoba besekadvonse labaningi beta kuye,) wafuna nekukhohlisa Eva, ngoba bekangatati tinhloso taNkulunkulu, ngaloko-ke bekafuna kubhubhisa umhlaba.

7 Watsi kuwesifazane: Yebo, ngabe ushito yini Nkulunkulu kutsi—Ningadli nome ngusinye nje sitselo setihlahla letisensimini? (Futsi wakhuluma ngemlomo wenyoka.)

8 Wesifazane waphendvula inyoka watsi: Singatidla titselo tetihlahla letisensimini;

9 Kodvwa sitselo sesihlahla losibonako lesisekhatsi nensimi, Nkulunkulu utsite—Ningadli kuso, noma nisitsintse, funa nife.

10 Inyoka yatsi kuwesifazane: Ningeke nife:

11 Ngoba Nkulunkulu uyati utsi mhlazana nisidla, emehlo enu ayawuvuleka, bese nifanana nabonkulunkulu, nikwati lokuhle nalokubi.

12 Watsi wesifazane kube abone kutsi lesihlahla sasifanele kudliwa, nekutsi sasibukeka sisihle emehlweni, nekutsi lesihlahla sasifanele kumenta ahlakaniphe, wasikha sitselo saso, wadla. Wase unika nendvodza yakhe lebeyinaye, nayo yadla.

13 Emehlo abo bobabili ase ayavuleka, batibona kutsi bangcunu. Base batfungela emacembe emkhiwa ndzawonye batentela i-apron.

14 Beva livi leNkhosi Nkulunkulu, basahamba ensimini, ekupholeni kwelilanga; futsi Adamu nemkakhe bahamba bayawubhacela Nkulunkulu emkhatsini wetihlahla tensimi.

15 Mine, iNkhosi Nkulunkulu, ngambita Adamu, ngatsi kuye: Ukuphi na?

16 Waphendvula watsi: Ngive livi lakho ensimini, ngase ngiyesaba, ngoba ngibone kutsi ngihamba ngcunu, ngabhaca.

17 Mine, iNkhosi Nkulunkulu, ngatsi ku-Adamu: Ngubani losakutjele kutsi uhamba ngcunu na? Ngabe sewudlile yini esihlahleni lengikuyalete kutsi ungadli kuso, uma kunjalo uyawukufa nekufa na?

18 Indvodza yatsi: Lowesifazane lowanginika yena, wayaleta kutsi ahlale nami, unginike lesitselo salesihlahla ngase ngiyasidla.

19 Mine, iNkhosi Nkulunkulu, ngatsi kulowesifazane: Yini lena lose uyentile? Lowesifazane watsi kimi: Inyoka ingikhohlisile, ngase ngiyadla.

20 Mine, iNkhosi Nkulunkulu, ngatsi enyokeni: Njengoba sewente loku sewucalekisiwe ngetulu kwayo yonkhe imfuyo, nangetulu kwato tonkhe tilwane tesiganga; sewuyawuhamba ngesisu sakho futsi uyawudla lutfuli lwemhlabatsi emalanga onkhe ekuphila kwakho.

21 Ngitawubeka butsa emkhatsini wakho newesifazane, nasemkhatsini wentalelwane yakho nentalelwane yakhe; yona iyawufihlita inhloko yakho, wena uyawuluma sitsendze sayo.

22 Kuwesifazane, mine, iNkhosi Nkulunkulu, ngatsi: Ngitawukwadzisa kakhulu buhlungu ekukhulelweni kwakho. Uyawutala bantfwana kabuhlungu, futsi kufisa kwakho kuyawubasendvodzeni yakho, yona iyawukubusa.

23 Ku-Adamu, mine, iNkhosi Nkulunkulu, ngatsi: Njengoba ulalele livi lemfati wakho, wasidla sitselo salesihlahla lengakuyaleta ngaso, ngatsi—Ungasidli, umhlabatsi uyawucalekiswa ngenca yakho; uyawukudla kuwo kamatima onkhe emalanga ekuphila kwakho.

24 Emanyeva, nelukhula uyawukuvetela kona, futsi uyawukudla imibhidvo yasesigangeni.

25 Ngemjuluko webuso bakho uyawukudla kudla kwakho, udzimate ubuyele emhlabatsini—ngoba uyawukufa nekufa—ngoba vele watsatfwa kuwo: ngoba wawulutfuli, futsi uyawubuyela elutfulini.

26 Adamu wametsa umkakhe watsi ngu-Eva, ngoba waba ngunina wabo bonkhe labaphilako; njengoba sekushiwo mine, iNkhosi Nkulunkulu, ngametsa wekucala wabo bonkhe besifazane, lokungulabaningi.

27 Ku-Adamu, nemkakhe, mine, iNkhosi Nkulunkulu, ngabentela kwekwembatsa kwetikhumba, ngabembatsisa.

28 Mine, iNkhosi Nkulunkulu, ngatsi kuLotelwe Yedvwa wami: Buka, lowesilisa sewunjengatsi sewuyakwati lokuhle nalokubi; manje funa elule sandla sakhe adle kulesihlahla sekuphila, adle bese uphila kute kube phakadze,

29 Ngako-ke mine, iNkhosi Nkulunkulu, ngitawumcosha ensimini yase-Edeni, kutsi ayawulima umhlabatsi latsatfwe kuwo;

30 Ngoba njengoba mine, iNkhosi Nkulunkulu, ngiphila, kanjalo-ke nemavi ami angeke abuye angakagcwaliseki, ngoba njengoba aphuma emlonyeni wami kufanele afezeke.

31 Ngako-ke ngayikhipha indvodza, ngabeka ngasemphumalanga yeNsimi yase-Edeni, likherubhi kanye nenkemba lenelilangabi, lephendvuphendvukako kuvikela indlela leya esihlahleni sekuphila.

32 (Lawa ngewavi lengawakhuluma encekwini yami Mosi, futsi aliciniso ngisho njengoba ngitsandza; sengiwakhulumile kuwe. Bona kutsi awuwakhombisi muntfu, ngite ngikuyalete, ngaphandle kwalabo labakholwako. Amen)