1 Futsi kwenteka kutsi iNkhosi yakhuluma kuMosi, yatsi: Buka, ngembula kuwe ngalokuphatselene nalelizulu, nangalomhlaba; wabhale lamavi lengiwakhulumako. NgiSicalo neSiphetfo, Nkulunkulu Somandla; ngaLotelwe Yedvwa wami ngadala leti tintfo; yebo, ekucaleni ngadala lizulu, nemhlaba lome kuwo.

2 Futsi umhlaba bewulihlane, ungenalutfo; ngenta bumnyama baba ngetulu kwemanti lamaningi; Moya wami abehla enyuka ahambahamba etikwemanti; ngoba nginguNkulunkulu.

3 Futsi mine, Nkulunkulu, ngatsi: Akube khona kukhanya; kwaba khona kukhanya.

4 Mine, Nkulunkulu, ngakubona kukhanya, nekutsi kukhanya bekukuhle. Mine, Nkulunkulu, ngahlukanisa kukhanya nebumnyama.

5 Mine, Nkulunkulu, ngakwetsa kukhanya ngatsi Yimini; bumnyama ngabetsa kutsi Busuku; loku ngakwenta ngelivi lemandla ami, futsi kwenteka ngesikhatsi ngikhuluma; kuhlwa nekusa kwaba lilanga lekucala.

6 Ngetulu kwaloko, mine, Nkulunkulu, ngatsi: Akube khona umkhatsi emkhatsini wemanti, kwase kuba njalo, ngisho njengoba ngakhuluma; ngaphindze ngatsi: Awehlukanise emanti nemanti; futsi kwenteka.

7 Mine, Nkulunkulu, ngenta umkhatsi wehlukanisa emanti, yebo, emanti lamakhulu angephansi kwemkhatsi emantini labekangetulu kwemkhatsi, kwase kuba njalo ngisho njengoba ngakhuluma.

8 Mine, Nkulunkulu, ngawetsa lomkhatsi ngatsi Lizulu; futsi kuhlwa nekusa kwaba lilanga lesibili.

9 Mine, Nkulunkulu, ngatsi: Emanti langephansi kwelizulu akabutsane ndzawonye endzaweni yinye, kwaba njalo; futsi mine, Nkulunkulu, ngatsi: Akube khona umhlaba lowomile; kwaphindze kwaba njalo.

10 Mine, Nkulunkulu, ngetsa umhlaba lowomile ngeMhlaba; kubutsana ndzawonye kwemanti, ngakwetsa ngatsi Lwandle; Mine, Nkulunkulu, ngabona kutsi tonkhe tintfo bengitentile betitinhle.

11 Mine, Nkulunkulu, ngatsi: Umhlaba awuvete tjani, emakhambi latsela inhlanyelo, tihlahla tetitselo letitsela titselo, ngetinhlobo tato, netihlahla letitsela titselo, inhlanyelo yato lekufanele ibe kuto kuwo wonkhe umhlaba, kwase kuba njalo ngisho njengoba ngakhuluma.

12 Umhlaba waveta tjani, onkhe emakhambi aveta tinhlanyelo talo lonkhe luhlobo, netihlahla letitsela titselo, tinhlanyelo tato lekufanele tibe kuto, ngetinhlobo tato; mine, Nkulunkulu, ngabona kutsi tonkhe tintfo lebengitentile betitinhle;

13 Futsi kuhlwa nekusa kwaba lilanga lesitsatfu.

14 Mine, Nkulunkulu, ngatsi: Akube khona tibane emkhatsini wesibhakabhaka selizulu, kwehlukanise imini nebusuku, atibe tibonakaliso, tetikhatsi, netemalanga, neteminyaka;

15 Atibe tibane temkhatsi wesibhakabhaka selizulu kute tikhanyisele umhlaba; kwase kuba njalo.

16 Mine, Nkulunkulu, ngenta tibani letinkhulu letimbili; sibane lesikhulu kutsi sibuse imini, bese kutsi sibane lesincane sibuse busuku, sibane lesikhulu kwaba lilanga, sibane lesincane kwaba yinyanga; netinkhanyeti nato tentiwa njengekusho kwelivi lami.

17 Mine, Nkulunkulu, ngatibeka emkhatsini wesibhakabhaka selizulu kutsi tikhanyisele umhlaba,

18 Lilanga kutsi libuse imini, inyanga ibuse busuku, futsi kwehlukanise kukhanya nebumnyama; mine, Nkulunkulu, ngabona kutsi tonkhe tintfo lebengitentile betitinhle;

19 Futsi kuhlwa nekusa kwaba lilanga lesine.

20 Mine, Nkulunkulu, ngatsi: Emanti akagcwale tonkhe tinhlobo tetilwane letiphilako, netinyoni letindizako etikwemhlaba emkhatsini wesibhakabhaka selizulu lesivulekile.

21 Mine, Nkulunkulu, ngadala imikhoma lemikhulu, nato tonkhe tinhlobo tetilwane letiphilako letihambako, emanti lativeta ngebuningi, ngetinhlobo tato, nato tonkhe tinhlobo tetinyoni letinetimphiko; Mine, Nkulunkulu, ngabona kutsi tonkhe tintfo lebengitidalile betitinhle.

22 Mine, Nkulunkulu, ngatibusisa, ngatsi: Talanani, nandze, nigcwalise emanti laselwandle; netinyoni tandze emhlabeni;

23 Futsi kuhlwa nekusa kwaba lilanga lesihlanu.

24 Mine, Nkulunkulu, ngatsi: Umhlaba awuvete tonkhe tinhlobo tetilwane letiphilako, imfuyo, netilwane letihamba ngesisu, netilo temhlaba ngetinhlobo tato, kwase kuba njalo;

25 Mine, Nkulunkulu, ngenta tilo temhlaba talo lonkhe luhlobo, nemfuyo yalo lonkhe luhlobo, nato tonkhe tilwane letihamba ngesisu emhlabeni talo lonkhe luhlobo; mine, Nkulunkulu, ngabona kutsi tonkhe leti tintfo betitinhle.

26 Mine, Nkulunkulu, ngatsi kuLotelwe Yedvwa wami, lobekanami kusukela ekucaleni: Asente bantfu babe ngumfanekiso wetfu, bafane natsi; futsi kwaba njalo, Mine, Nkulunkulu, ngatsi: ababuse etikwetinhlanti taselwandle, nasetikwetinyoni tasemoyeni, nasetikwemfuyo, nasetikwemhlaba wonkhe, nasetikwato tonkhe tilwane letihamba ngesisu letinyakata emhlabeni.

27 Mine, Nkulunkulu, ngadala umuntfu waba ngumfanekiso wami lucobo, ngamdala waba ngumfanekiso waLotelwe Yedvwa wami; ngabadala lomdvuna nalomsikati.

28 Mine, Nkulunkulu, ngababusisa ngatsi kubo: Talanani, nandze, nigcwalise umhlaba, niwuncobe, nibuse etikwetinhlanti taselwandle, nasetikwetinyoni tasemoyeni, nasetikwato tonkhe tilwane letihamba emhlabeni.

29 Mine, Nkulunkulu, ngatsi kubantfu: Bukani, ngininika tonkhe tilimo letiveta inhlanyelo, letisemhlabeni wonkhe, nato tonkhe tihlahla letinenhlanyelo etitselweni tato, kutsi kube kudla kwenu.

30 Futsi kuto tonkhe tilwane temhlaba, nakuto tonkhe tinyoni tasemoyeni, nako konkhe lokuhamba ngesisu emhlabeni, lengikupha imphilo, kuyawuniketwa tonkhe tilimo letifanele kutsi kube kudla kwako; kwase kuba njalo, ngisho njengoba ngakhuluma.

31 Mine, Nkulunkulu, ngakubona konkhe lebesengikwentile, futsi buka, tonkhe tintfo lebesengitentile betitinhle kakhulu, kuhlwa nekusa kwaba lilanga lesitfupha.