1 Futsi Adamu walilalela livi laNkulunkulu, wabita emadvodzana akhe kutsi aphendvuke.

2 Adamu waphindze wamati umkakhe, watala indvodzana, wayetsa libito watsi nguSethi. Adamu walidvumisa libito laNkulunkulu; ngoba watsi: Nkulunkulu sewungiphe lenye indvodzana, esikhundleni sa-Abela, lowabulawa nguKhayini.

3 Nkulunkulu watembula kuSethi, wangahlubuki, kodvwa wanikela ngemhlatjelo lowemukelekako, njengemnakabo Abela. Nakuye kwatalwa indvodzana, layetsa libito watsi ngu-Enoshi.

4 Lamadvodza ngaleso sikhatsi acala kubita libito leNkhosi, neNkhosi yababusisa;

5 Incwadzi yesikhumbuto yagcinwa, lokwakubhalwe kuyo, ngelulwimi lwa-Adamu, ngoba kwanikwa kubo bonkhe labebabite Nkulunkulu kutsi babhale ngamoya wekuphefumulelwa.

6 Futsi ngabo bantfwana babo bafundziswa kufundza nekubhala, banelulwimi lolwalumsulwa nalolungakangcoliswa.

7 Manje lobu buPhristi, lobabukhona ekucaleni, buyawuba khona nasekupheleni kwemhlaba futsi.

8 Manje lesi siphrofetho Adamu wasikhuluma, njengoba bekaholwa nguMoya loNgcwele, futsi umlandvo wesitukulwane sebantfwana baNkulunkulu wagcinwa. Futsi lena bekuyincwadzi yetitukulwane ta-Adamu, letsi: Ngelilanga Nkulunkulu ladala ngalo umuntfu, ngemfanekiso waNkulunkulu wamenta;

9 Ngemfanekiso wemtimba wakhe lucobo, wesilisa newesifazane, wabadala, waphindze wababusisa, wabetsa libito watsi ngu-Adamu, ngelilanga labadala ngalo futsi baba bantfu labaphilako eveni lelisenabelo setinyawo taNkulunkulu.

10 Adamu waphila iminyaka lelikhulu nemashumi lamatsatfu, watala indvodzana leyamfuta, yafanana naye, wayetsa libito watsi nguSethi.

11 Emalanga a-Adamu, emvakwekutalwa kwaSethi, aba yiminyaka lengemakhulu lasiphohlongo, watala emadvodzana nemadvodzakati lamaningi;

12 Onkhe emalanga Adamu lawaphila aba ngemakhulu layimfica nemashumi lamatsatfu eminyaka, wase uyafa,

13 Sethi waphila iminyaka lelikhulu nesihlanu, watala Enoshi, waphrofetha emalangeni akhe onkhe, wafundzisa indvodzana yakhe Enoshi ngetindlela taNkulunkulu; ngaloko-ke Enoshi naye waphrofetha.

14 Emvakwekutala Enoshi, Sethi waphila iminyaka lengemakhulu lasiphohlongo nesikhombisa, watala emadvodzana nemadvodzakati lamaningi.

15 Futsi bantfwana bebantfu bebabaningi eveni. Kulawo malanga Sathane wabusa kakhulu emkhatsini webantfu, wasusa lutfutfuva etinhlitiyweni tabo; kusukela ngaleso sikhatsi kwabakhona timphi nekucitseka kwengati; sandla semuntfu sasimelene nemnakabo, ekubulaleni, ngenca yemisebenti leyimfihlo, bafuna emandla.

16 Onkhe emalanga aSethi aba yiminyaka lengemakhulu layimfica nelishumi nakubili, wase uyafa.

17 Enoshi yena waphila iminyaka lengemashumi layimfica, watala Khenani. Enoshi nalebebasele bebantfu baNkulunkulu baphuma eveni lebelibitwa ngekutsi yiShuloni, bahlala eveni lesetsembiso, lalibita ngelibito lendvodzana yakhe, lebekayetse kutsi nguKhenani.

18 Emvakwekutala Khenani, Enoshi waphila iminyaka lengemakhulu lasiphohlongo nelishumi nesihlanu, watala emadvodzana nemadvodzakati lamaningi. Onkhe emalanga a-Enoshi aba yiminyaka lengemakhulu layimfica nesihlanu, wase uyafa.

19 Khenani waphila iminyaka lengemashumi lasikhombisa, watala Mahalaleli; Khenani waphila iminyaka lengemakhulu lasiphohlongo nemashumi lamane emvakwekutala Mahalaleli, futsi watala emadvodzana nemadvodakati. Onkhe emalanga aKhenani aba yiminyaka lengemakhulu layimfica nelishumi, wase uyafa.

20 Mahalaleli waphila iminyaka lengemashumi lasitfupha nesihlanu, watala Jaredi; Mahalaleli waphila, iminyaka lengemakhulu lasiphohlongo nemashumi lamatsatfu emvakwekutala Jaredi, watala emadvodzana nemadvodzakati. Onkhe emalanga aMahalaleli aba yiminyaka lengemakhulu lasiphohlongo nemashumi layimfica nesihlanu, wase uyafa.

21 Jaredi waphila iminyaka lelikhulu nemashumi lasitfupha nakubili, watala Enoki; Jaredi waphila, iminyaka lengemakhulu lasiphohlongo emvakwekutala Enoki, waphindze watala emadvodzana nemadvodzakati. Jaredi wafundzisa Enoki tonkhe tindlela taNkulunkulu.

22 Lona ngumlandvo wesitukulwane semadvodzana a-Adamu, lobekayindvodzana yaNkulunkulu, Nkulunkulu, lucobo lwakhe, bekakhuluma naye.

23 Futsi bebabashumayeli bekulunga, bakhuluma baphindze baphrofetha, babita bonkhe bantfu, yonkhe indzawo, kutsi baphendvuke; futsi lukholo lwafundziswa kubantfwana bebantfu.

24 Futsi kwenteka kutsi onkhe emalanga aJaredi aba yiminyaka lengemakhulu layimfica nemashumi lasitfupha nakubili, wase uyafa.

25 Enoki waphila iminyaka lengemashumi lasitfupha nesihlanu, watala Methusela.

26 Futsi kwenteka kutsi Enoki wahamba eveni, emkhatsini webantfu; asahamba, Moya waNkulunkulu wehla uphuma ezulwini, wahlala kuye.

27 Weva livi livela ezulwini, litsi: Enoki, ndvodzana yami, phrofetha kulaba bantfu, utsi kubo—Phendvukani, ngoba naku lokushiwo yiNkhosi: Ngibatfukutselele labantfu, futsi intfukutselo yami lenkhulu yokhelekile ngekumelana nabo; ngoba tinhlitiyo tabo tiye taba lukhuni, netindlebe tabo tiva kamatima, nemehlo abo akakhoni kubona khashane;

28 Futsi kuleti titukulwane letiningi, kusukela ngelilanga lengabadala ngalo, badukile, bangiphika, bafuna netabo teluleko ebumnyameni; futsi etinengisweni tabo bente emacebo ekubulala, bangayigcini nemiyaleto, lengayinika uyise, Adamu.

29 Ngaloko-ke, batifungele, futsi, ngetifungo tabo, batiletsele kufa kubo, nesihogo ngibalungiselele, uma bangaphendvuki;

30 Futsi lona ngumyalo, lengiwutfumele ekucaleni kwemhlaba, lophuma kuwami umlomo, kusuka esisekelweni sawo, nangemilomo yetinceku tami, boyihlo, ngiwumisile, njengoba uyawutfunyelwa emhlabeni, kute kube semikhawulweni yawo.

31 Ngesikhatsi Enoki sekawevile lamavi, wakhotsama, phambi kweNkhosi, wakhuluma phambi kweNkhosi, watsi: Kungani ngitfole kutsandvwa emehlweni akho, futsi ngisengumfana, nebantfu bonkhe bayangitondza; ngoba nginemalimi; ngaloko-ke ngabe ngiyinceku yakho na?

32 INkhosi yatsi ku-Enoki; Hamba wente njengoba ngikuyaletile, futsi kute umuntfu loyawukuhlaba. Vula umlomo wakho, futsi uyawugcwaliswa, ngitawukunika lotawukusho, ngoba bonkhe bantfu basetandleni tami, ngitawukwenta njengekutsandza kwami.

33 Tsani kulaba bantfu: Khetsani lamuhla, kusebentela iNkhosi Nkulunkulu leyanidala.

34 Buka Moya wami ukuwe, ngaloko-ke onkhe emavi akho ngitawakhombisa kutsi alungile, netintsaba tiyawukubalekela, nemifula iyawushintja tindlela tayo, uyawuhlala kimi, nami kuwe; ngako-ke hamba nami.

35 INkhosi yakhuluma ku-Enoki, yatsi kuye: Gcobisa emehlo akho ngelubumba, bese uyawageza, utawubona. Futsi wenta njalo.

36 Wase ubona imimoya leyayidalwe nguNkulunkulu; waphindze wabona netintfo lebetingabonakali ngemehlo enyama; kusukela ngaleso sikhatsi kwandza umbiko dzawo tonkhe lowawutsi: INkhosi ibavusele umboni bantfu bayo.

37 Futsi kwenteka kutsi Enoki wahamba kulelive, emkhatsini webantfu, wema etikwemagcuma nasetindzaweni letiphakeme, wamemeta ngelivi lelikhulu, afakaza ngekumelana nemisebenti yabo; futsi bonkhe bantfu bacansuka ngenca yakhe.

38 Base bayeta kutawumlalela, etindzaweni letiphakeme, batsi kubagcinimathende: Salani lapha nigadze lamathende, ngesikhatsi sisaya ngale kuyawubona umboni, ngoba uyaphrofetha, futsi kukhona lokungajwayeleki kulelive; indvodza lehlanyako ite emkhatsini wetfu.

39 Futsi kwenteka kutsi ngesikhatsi bamuva, kute namunye umuntfu lowambeka sandla, ngoba kwesaba kwabefikela bonkhe labamuvako; ngoba bekahamba naNkulunkulu.

40 Kwasondzela umuntfu kuye, libito lakhe bekunguMahija, watsi kuye: Sitjele ngalokucacile ungubani, futsi uphumaphi na?

41 Watsi kubo: Ngiphuma eveni laseKhenani, live labobabe, live lekulunga kute kube ngumanje. Futsi babe wangifundzisa ngato tonkhe tindlela taNkulunkulu.

42 Futsi kwenteka kutsi, ngesikhatsi ngisahamba eveni laseKhenani, ngasemphumalanga yelwandle, ngabona umbono; buka, ngabona emazulu, neNkhosi yakhuluma nami, yanginika imiyaleto, ngaloko-ke, ngalesi sizatfu, kute ngigcine lemiyaleto, ngikhuluma lamavi.

43 Enoki wayichuba inkhulumo yakhe, watsi: INkhosi leyakhuluma nami, ngiyo futsi lenguNkulunkulu wasezulwini, futsi inguNkulunkulu wami, naNkulunkulu wenu, nani nibomnaketfu, kungani nifuna tenu teluleko, nimphika naNkulunkulu wasezulwini na?

44 Emazulu wawenta; nemhlaba usenabelo setinyawo takhe; nesisekelo sawo ngesakhe. Bukani, wasimisa, sicuku sebantfu wasiletsa kuwo.

45 Nekufa kwefikela kubobabe betfu; noko siyabati, futsi angeke siphike kutsi siyabati, ngisho wekucala kunabo siyamati, ngisho Adamu.

46 Ngoba incwadzi yesikhumbuto siyibhalile emkhatsini wetfu, ngekwendlela lesiyiniketwe ngumunwe waNkulunkulu; futsi iniketwe ngelulwini lwetfu.

47 Enoki asakhuluma emavi aNkulunkulu, bantfu batfutfumela, bangakhoni nekuma phambi kwakhe.

48 Wase utsi kubo: Ngenca yekutsi Adamu wawa, sikhona; futsi ngekuwa kwakhe kweta kufa; futsi sentiwa bahlanganyeli bekuhlupheka nelusizi.

49 Buka Sathane ute emkhatsini webantfwana bebantfu, wabalinga kutsi bamkhonte; bantfu sebanake inyama, kutfokotisa imizwa, nekuba nebudeveli, basusiwe nasebukhoneni baNkulunkulu.

50 Kodvwa Nkulunkulu ubatisile bobabe betfu kutsi bonkhe bantfu kufanele baphendvuke.

51 Wabita babe Adamu ngelivi lakhe, watsi: NginguNkulunkulu; ngenta umhlaba, nebantfu ngaphambi kwekutsi babe senyameni.

52 Waphindze watsi kuye; Uma ungaphendvukela kimi, ulalele livi lami, ukholwe, futsi uphendvuke kuto tonkhe tiphambeko takho, ubhajatiswe, ngisho emantini, egameni leNdvodzana yami Letelwe Yodvwa, legcwele umusa neliciniso, lenguJesu Khristu, lokungulona bito kuphela leliniketiwe ngaphansi kwelizulu, insindziso leyawukuta ngalo kubantfwana bebantfu, uyawutfola sipho saMoya loNgcwele, ucele tonkhe tintfo egameni lakhe, futsi noma yini loyicelako, uyawuniketwa yona.

53 Babe Adamu wakhuluma neNkhosi, watsi: Kungani bantfu kufanele baphendvuke baphindze babhajatiswe emantini na? INkhosi yatsi ku-Adamu: Buka ngikucolele siphambeko sakho eNsimini yase-Edeni.

54 Kungako kwandza umbiko dzawo tonkhe emkhatsini webantfu, kutsi iNdvodzana yaNkulunkulu seyihlawulele sono sekucala, lapho tono tebatali tingeke tatfwalwa etinhloko tebantfwaba, ngoba bamsulwa kusukela ekusekelweni kwemhlaba.

55 INkhosi yakhuluma ku-Adamu, yatsi: Kangangoba bantfwana bakho batalelwa esonweni, kanjalo-ke uma sebacala kukhula, sono sicala kuba khona etinhlitiyweni tabo, beva buhlungu, kute bakwati kwatisa lokuhle.

56 Futsi kuniketiwe kubo kwati lokuhle nalokubi; ngaloko-ke bayakwati kutikhetsela, futsi ngikunikete lomunye umtsetfo nemiyaleto.

57 Ngaloko-ke kufundzise ebantfwaneni bakho, kutsi bonkhe bantfu, yonkhe ndzawo, kufanele baphendvuke, nakungenjalo angeke balidle lifa lembuso waNkulunkulu, ngoba kute lokungcolile lokungahlala lapho, noma kuhlale ebukhoneni bakhe; ngoba, ngelulwini lwa-Adamu, yiNdvoda yebuNgcwele libito lakhe, futsi libito laLotelwe Yedvwa wakhe yiNdvodzana yeMuntfu, ngisho Jesu Khristu, uMehluleli lolungile, loyawubuya ekhatsi nesikhatsi

58 Ngako-ke ngikuniketa umyaleto, kutsi utifundzise leti tintfo ngekukhululeka kubantfwana bebantfu, utsi:

59 Ngenca yesiphambeko kweta kuwa, loko kuwa lokwaletsa kufa, futsi kangangoba watalwa emhlabeni ngemanti, nengati, namoya, lengikwentile, ngaleyo ndlela waba ngumuntfu lophilako usuka elutfulini, kanjalo-ke kufanele utalwe kabusha embusweni wasezulwini, ngemanti, nangaMoya, uhlantwe ngengati, ngisho ngengati yaLotelwe Yedvwa wami; kute ungcweliswe etonweni tonkhe, utfokotele emavi ekuphila lokuphakadze kulomhlaba, nekuphila lokuphakadze emhlabeni lotako, ngisho nenkhatimulo yesimo sekungabhubhi;

60 Ngoba ngemanti ugcina umyaleto; ngaMoya awunacala, futsi ngengati uyangcweliswa;

61 Ngako-ke kuniketiwe kutsi kuhlale kini; bufakazi basezulwini; uMdvudvuti; tintfo tekuthula tenkhatimulo yesimo sekungabhubhi; liciniso lato tonkhe tintfo; loko lokuphilisa tonkhe tintfo, lokwenta tonkhe tintfo tiphile; loko lokwati tonkhe tintfo, nalokunawo onkhe emandla ngekuhlakanipha, ngemusa, ngeliciniso, ngekulunga, nangekwehlulela.

62 Manje, buka, ngitsi kuwe: Leli lisu lensindziso kubantfu bonkhe, ngengati yaLotelwe Yedvwa wami, loyawubuya ekhatsi nesikhatsi.

63 Futsi buka, tonkhe tintfo tinesifananiso sato, futsi tonkhe tintfo tadalwa taphindze tentiwa kutsi tifakaze ngami, tintfo letitemvelo, netintfo tamoya; tintfo letisetulu ezulwini, netintfo letisemhlabeni, netintfo letisekhatsi emhlabeni, netintfo letingephansi kwemhlaba, ngetulu nangephansi; tonkhe tintfo tifakaza ngami.

64 Futsi kwenteka, ngesikhatsi iNkhosi seyikhulumile na-Adamu, babe wetfu, kutsi Adamu wakhala eNkhosini, wahlwitfwa nguMoya weNkhosi, wayiswa phansi emantini, wacwiliswa kuwo emanti, waphindze wakhishwa emantini.

65 Ngaleyo ndlela wabhajatiswa, naMoya waNkulunkulu wehlela kuye, ngaleyo ndlela watalwa ngaMoya, waphindze waphiliswa kumuntfu wangekhatsi.

66 Futsi weva livi livela ezulwini, litsi: Sewubhajatisiwe ngemlilo, nangaMoya loNgcwele. Lobu bufakazi baBabe, neNdvodzana, kusukela manje naphakadze.

67 Futsi ungekweluhlelo lwakhe lobekangenasicalo semalanga noma siphetfo seminyaka, kusukela phakadze kute kube phakadze.

68 Buka, umunye nami, indvodzana yaNkulunkulu; futsi ngaleyo ndlela bonkhe bangaba ngemadvodzana ami. Amen.