အခန်းကြီး ၆
(နိုဝင်ဘာ–ဒီဇင်ဘာ ၁၈၃၀)
အာဒံ၏အမျိုးအနွယ်တို့သည် အောက်မေ့ဖွယ်ရာ စာအုပ်ကို ရေးကြ၏—သူ၏ ဖြောင့်မတ်သော သားစဉ်မြေးဆက်တို့သည် နောင်တရခြင်းကို ဟောပြောကြ၏—ဘုရားသခင်သည် ဧနောက်ကို ကိုယ်ထင်ပြတော်မူ၏—ဧနောက်သည် ဧဝံဂေလိတရားတော်ကို ဟောပြော၏—ကယ်တင်ခြင်းအစီအစဉ်ကို အာဒံသို့ ဖော်ပြ၏—သူသည် ဗတ္တိဇံနှင့် ယဇ်ပုရောဟိတ်အခွင့်ကို လက်ခံရရှိ၏။
၁ အာဒံသည် ဘုရားသခင်၏အသံကို စေ့စေ့နားထောင်၏၊ သူ၏သားတို့ကိုလည်း နောင်တရရန် တောင်းပန်၏။
၂ အာဒံသည် သူ့ဇနီးကို တစ်ဖန် ဆက်ဆံသဖြင့်၊ သားကို ဖွားမြင်၍ ရှေသဟု အမည်မှည့်၏။ အာဒံသည် ဘုရားသခင်၏ နာမတော်ကို ချီးမွမ်း၏။ အကြောင်းမူကား၊ သူဆိုသည်မှာ ကာဣနကွပ်မျက်ခဲ့သည့် အာဗေလအစား၊ ဘုရားသခင်သည် ငါ့အား တခြားသောအမျိုးအနွယ်ကို ပေးအပ်တော်မူလေပြီ။
၃ ဘုရားသခင်သည် ရှေသသို့ ကိုယ်ထင်ပြ၏၊ သူလည်း ပုန်ကန်ခြင်းမပြုဘဲ၊ အစ်ကို အာဗေလကဲ့သို့ပင် နှစ်သက်ဖွယ်သောယဇ်ကို ပူဇော်၏။ သူအဖို့လည်း သားတစ်ယောက်ကို ဖွားမြင်၍၊ ဧနုတ်ဟု အမည်မှည့်၏။
၄ ဤလူတို့သည်လည်း ကိုယ်တော်ရှင်၏နာမတော်အား ပတ္ထနာပြုစပြုကြ၏၊ ကိုယ်တော်ရှင်ကလည်း သူတို့ကို ကောင်းချီးပေးတော်မူ၏။
၅ အောက်မေ့ဖွယ်ရာစာအုပ်တစ်အုပ်ကို ရေးခဲ့ကြ၏၊ ထိုစာအုပ်၌၊ အာဒံ၏ ဘာသာစကားဖြင့် မှတ်တမ်းတင်ထား၏၊ အကြောင်းမူကား၊ လမ်းပြလှုံ့ဆော်ခြင်းဝိညာဉ်အားဖြင့် ရေးခြင်းငှာ ဘုရားသခင်အား ပတ္ထနာပြုသူမှန်သမျှအား ပေးထားလေ၏။
၆ သူတို့အားဖြင့် သူတို့၏သားသမီးများသည် ရေးတတ်ဖတ်တတ်ရန် သွန်သင်ခံကြရ၏၊ စင်ကြယ်၍ မညစ်ညူးသောဘာသာစကားကိုလည်း ရရှိခဲ့ကြ၏။
၇ ယခုတွင် ရှေးဦးစွာ၌ ရှိလေသည့်၊ ဤတူသော ယဇ်ပုရောဟိတ်အခွင့်သည်၊ ကမ္ဘာကုန်သည့် အခါ၌လည်း ရှိလိမ့်မည်။
၈ ယခုတွင် ဤပရောဖက်ပြုဟောချက်ကို အာဒံသည်၊ သန့်ရှင်းသောဝိညာဉ်တော်အားဖြင့် တိုက်တွန်းတော်မူခြင်းကို ခံရသည့်အတိုင်း ဟောပြောခဲ့၏၊ ဘုရားသခင်၏သားသမီးတို့အကြောင်း ဆွေစဉ်မျိုးဆက်မှတ်တမ်းကိုလည်း ရေးထား၏။ ဤအရာသည် အာဒံ၏မျိုးဆက်တို့အကြောင်း စာအုပ်ဖြစ်၍၊ ဆိုလေသည်ကား၊ လူသားကို ဘုရားသခင်ဖန်ဆင်းတော်မူသည့်နေ့၌၊ ဘုရားသခင်၏ ပုံသဏ္ဌာန်အတိုင်း ဖန်ဆင်းတော်မူခဲ့၏။
၉ သူကိုယ်တိုင်၏ကိုယ်ခန္ဓာပုံသဏ္ဌာန်အတိုင်း၊ ယောက်ျားနှင့် မိန်းမကို၊ သူတို့ကို သူဖန်ဆင်းတော်မူခဲ့၏၊ သူတို့ကို ကောင်းချီးပေး၍၊ အမည်ကို အာဒံဟု ခေါ်၏၊ သူတို့ကို ဖန်ဆင်းလေသည့် နေ့၌ ဘုရားသခင်၏ ခြေတင်ရာခုံရှိသည့် ပြည်တွင် သက်ရှိလူများ ဖြစ်လာခဲ့၏။
၁၀ အာဒံသည် တစ်ရာ့သုံးဆယ်နှစ် နေပြီးသော်၊ မိမိပုံသဏ္ဌာန်နှင့် တညီတစ်သဏ္ဌာန်တည်းသော သားကို ဖွားမြင်စေ၍ အမည်ကို ရှေသဟုမှည့်၏။
၁၁ အာဒံ၏အသက်မှာ၊ ရှေသကို သူဖွားမြင်စေပြီးနောက်၊ အနှစ်ရှစ်ရာ ဖြစ်လေ၏၊ သူသည် များစွာသော သားများနှင့်သမီးများကို ဖွားမြင်စေ၏။
၁၂ အာဒံနေသည့်အသက်မှာ နှစ်ပေါင်းမှာ ကိုးရာ့သုံးဆယ်ဖြစ်၏၊ ထို့နောက် သေ၏။
၁၃ ရှေသသည် တစ်ရာ့ငါးနှစ်နေပြီးသော် ဧနုတ်ကို ဖွားမြင်စေ၏။ သူ့အသက်တာ တစ်လျှောက်လုံးတွင် ပရောဖက်ပြု၍ ဟောခဲ့၏၊ သူ့သားဧနုတ်ကိုလည်း ဘုရားသခင်၏ လမ်းအတိုင်း သွန်သင်ခဲ့၏။ သို့ဖြစ်၍၊ ဧနုတ်လည်း ပရောဖက်ပြု၍ဟောခဲ့၏။
၁၄ ရှေသသည် ဧနုတ်ကို ဖွားမြင်စေပြီးနောက်၊ အနှစ်ရှစ်ရာ့ခုနစ်နှစ် နေ၍၊ များစွာသော သားများနှင့်သမီးများကို ဖွားမြင်စေ၏။
၁၅ လူသားတို့သည် ထိုပြည်၏ မျက်နှာပြင် တစ်ခုလုံးပေါ်၌ အမြောက်အမြားရှိလေ၏။ ထိုကာလ၌ စာတန်သည် လူသားတို့၌ ကြီးစွာသောအစိုးရခြင်းရှိ၏၊ သူတို့၏စိတ်နှလုံးကိုလည်း လှုပ်ရှားထကြွစေ၏။ ထိုအချိန်မှစ၍၊ စစ်တိုက်ခြင်းများနှင့် အသွေးသွန်းလောင်းခြင်းများ ကျရောက်လာ၏။ လျှို့ဝှက်သောအမှုများနှင့် အာဏာကို ရှာခြင်းတို့ကြောင့်၊ လူတစ်ဦး၏လက်သည် သေခြင်းကို စီမံဆောင်ရွက်ရာ၌ မိမိညီအစ်ကို၏တစ်ဖက်၌ ရှိ၏။
၁၆ ရှေသသည် အသက်နှစ်ပေါင်း ကိုးရာတစ်ဆယ့်နှစ်နှစ်စေ့သော် သေလေ၏။
၁၇ ဧနုတ်သည် အသက်ကိုးဆယ်ရှိသော်၊ ကာဣနန်ကို ဖွားမြင်စေ၏။ ဧနုတ်နှင့်၊ ဘုရားသခင်၏ ကျန်ကြွင်းသော လူမျိုးတို့သည် ရှူလုန်ဟုခေါ်သောပြည်မှ ထွက်လာခဲ့ကြပြီး၊ ကာဣနန်ဟု သူအမည်မှည့်ခဲ့လေသည့် သူ့သား၏အမည်အတိုင်းခေါ်သည့် ကတိတော်မြေ၌ နေထိုင်ကြ၏။
၁၈ ဧနုတ်သည် ကာဣနန်ကို ဖွားမြင်စေပြီးနောက် အနှစ်ရှစ်ရာတစ်ဆယ့်ငါးနှစ်အသက်ရှင်၍၊ များစွာသောသားများနှင့် သမီးများကို ဖွားမြင်စေ၏။ ဧနုတ်သည် နှစ်ပေါင်းကိုးရာ့ငါးနှစ်စေ့သော် သေလေ၏။
၁၉ ကာဣနန်သည် အသက်ခုနစ်ဆယ်ရှိသော်၊ မဟာလေလကို ဖွားမြင်စေ၏။ ကာဣနန်သည် မဟာလေလကို ဖွားမြင်စေပြီးနောက်၊ အနှစ်ရှစ်ရာ့လေးဆယ် အသက်ရှင်၍ သားများနှင့် သမီးများကို ဖွားမြင်စေ၏။ ကာဣနန်သည် နှစ်ပေါင်း ကိုးရာတစ်ဆယ့်နှစ်စေ့သော် သေလေ၏။
၂၀ မဟာလေလသည် အသက် ခြောက်ဆယ့်ငါးနှစ်ရှိသော် ယာရက်ကို ဖွားမြင်စေ၏။ မဟာလေလသည် ယာရက်ကို ဖွားမြင်စေပြီးနောက်၊ အနှစ်ရှစ်ရာ့သုံးဆယ် အသက်ရှင်၍၊ သားများနှင့် သမီးများကို ဖွားမြင်စေ၏။ မဟာလေလသည် နှစ်ပေါင်း ရှစ်ရာကိုးဆယ့်ငါးနှစ်စေ့သော် သေလေ၏။
၂၁ ယာရက်သည် အသက်ခြောက်ဆယ့်နှစ်နှစ်ရှိသော်၊ ဧနောက်ကို ဖွားမြင်စေ၏။ ယာရက်သည် ဧနောက်ကို ဖွားမြင်စေပြီးနောက်၊ အနှစ်ရှစ်ရာ အသက်ရှင်၍၊ သားများနှင့် သမီးများကို ဖွားမြင်စေ၏။ ယာရက်သည် ဧနောက်အား ဘုရားသခင်၏ခပ်သိမ်းသောလမ်းတို့အတိုင်း သွန်သင်ခဲ့၏။
၂၂ ဤအရာသည်ကား၊ ဘုရားသခင်ကိုယ်တိုင် စကားဆိုခဲ့သူ၊ ဘုရားသခင်၏သားဖြစ်လေသူ အာဒံ၏သားမြေးတို့၏ ဆွေစဉ်မျိုးဆက်စာရင်းဖြစ်၏။
၂၃ သူတို့သည် ဖြောင့်မတ်ခြင်းအကြောင်း ဟောပြောသူများ ဖြစ်လေပြီး၊ နေရာတိုင်းရှိ၊ ခပ်သိမ်းသောလူသားတို့အား၊ နောင်တရရန် မြွက်ဆို၍၊ ပရောဖက်ပြုဟော၍၊ တောင်းပန်ခဲ့ကြ၏။ ယုံကြည်ခြင်းကိုလည်း လူသားတို့အား သွန်သင်ခဲ့ကြ၏။
၂၄ ဤသို့အားဖြင့် အချိန်တန်လာသောအခါ၊ ယာရက်သည် နှစ်ပေါင်း ကိုးရာခြောက်ဆယ့်နှစ်နှစ်စေ့သော် သေလေ၏။
၂၅ ဧနောက်သည် ခြောက်ဆယ့်ငါးနှစ်နေပြီးသော်၊ မသုရှလကို ဖွားမြင်စေ၏။
၂၆ ဤသို့အားဖြင့် အချိန်တန်လာသောအခါ ဧနောက်သည် ထိုပြည်တွင်၊ လူတို့၌ ခရီးသွားခဲ့၏။ ခရီးသွားစဉ်တွင်၊ ဘုရားသခင်၏ဝိညာဉ်တော်သည် ကောင်းကင်ဘုံမှ ဆင်းသက်၍၊ သူ့အပေါ်မှာ နားတော်မူ၏။
၂၇ သူသည်လည်း ကောင်းကင်ဘုံမှ အသံကို ကြား၏၊ ဆိုလေသည်ကား၊ ဧနောက်၊ ငါ့သား၊ လူတို့ကို ပရောဖက်ပြု၍ ဟောလော့၊ သူတို့ကို—နောင်တရကြလော့၊ အကြောင်းမူကား၊ ကိုယ်တော်ရှင် မိန့်တော်မူ၏ဟု ဆိုလော့။ ငါသည် ဤလူမျိုးတို့ကို အမျက်ထွက်တော်မူ၏၊ ငါ၏ ပြင်းစွာသော အမျက်သည် သူတို့တစ်ဖက်၌ ထွက်လေပြီ။ အကြောင်းမူကား၊ သူတို့၏စိတ်နှလုံးသည် မာကျော လာကြလေပြီ၊ နားများသည်လည်း ကောင်းကောင်းမကြားကြ၊ မျက်စိများသည်လည်း ဝေးဝေးမမြင်နိုင်ကြ။
၂၈ သူတို့ကို ငါဖန်ဆင်းတော်မူခဲ့သည့် နေ့ကတည်းက၊ ဤများစွာသောမျိုးဆက်တို့ကြာအောင်၊ သူတို့သည် လမ်းလွဲ၍ ငါ့ကို ငြင်းဆိုကြလေပြီ၊ မှောင်မိုက်ထဲ၌ သူတို့ကိုယ်တိုင်၏အကြံများကို ရှာကြလေပြီ။ သူတို့ကိုယ်တိုင်၏ စက်ဆုပ်ရွံရှာဖွယ်အမှုများ၌ လူ့အသက်သတ်ခြင်းကို ကြံစည်ကြလေပြီ၊ သူ့တို့အဘ အာဒံကို ငါပေးခဲ့သည့် ပညတ်တော်များကိုလည်း မစောင့်ထိန်းကြ။
၂၉ သို့ဖြစ်၍၊ သူတို့ကိုယ်သူတို့ မဟုတ်မမှန် ကျိန်ဆို၍၊ သူတို့၏ ကျိန်ဆိုခြင်းတို့ကြောင့် သူတို့ကိုယ်ပေါ်သို့ သေခြင်းကိုရောက်စေကြ၏။ သူတို့နောင်တရခြင်းမရှိကြလျှင်၊ ငရဲကို သူတို့အဖို့ ငါပြင်ဆင်ထားလေပြီ။
၃၀ ဤအရာသည်ကား၊ ကမ္ဘာဦး၌၊ ငါ၏နှုတ်မှ၊ ကမ္ဘာဦးကတည်းက ငါစေလွှတ်ခဲ့သည့် ငါ၏စီရင်ချက်ဖြစ်၏၊ ငါ့ကျွန်များဖြစ်သည့်၊ သင်တို့ဘိုးဘေးတို့၏နှုတ်အားဖြင့်လည်း၊ ငါစီရင်၍၊ ကမ္ဘာထဲသို့၊ အစွန်းသို့တိုင်အောင်ပင် စေလွှတ်လိမ့်မည်။
၃၁ ဧနောက်သည်လည်း ဤနှုတ်ကပတ်တော်တို့ကို ကြားရသောအခါ၊ ကိုယ်တော်ရှင်ရှေ့၌ မြေကြီးသို့ ဦးညွှတ်ပျပ်ဝပ်၍၊ ကိုယ်တော်ရှင်ရှေ့၌ဆို၍၊ အကျွန်ုပ်သည် အဘယ်အတွက် ကိုယ်တော်၏ အမြင်၌ နှစ်သက်ခြင်းကို ခံရပါသနည်း၊ သူငယ်တစ်ယောက်သာဖြစ်၍၊ ခပ်သိမ်းသောလူတို့က ကျွန်ုပ်ကို မုန်းကြပါ၏။ အကြောင်းမူကား၊ အကျွန်ုပ်သည် စကားလေးပါ၏။ သို့ဖြစ်၍ အကျွန်ုပ်သည် ကိုယ်တော်၏ကျွန် ဖြစ်ပါသလောဟု လျှောက်လျှင်၊
၃၂ ကိုယ်တော်ရှင်ကလည်း ဧနောက်ကို မိန့်တော်မူလေသည်ကား၊ ထွက်သွား၍၊ သင့်ကို ငါမိန့်တော်မူလေသည့်အတိုင်း လုပ်ဆောင်လော့၊ အဘယ်သူမျှ သင့်ကို မထိုးဖောက်ရ။ သင်၏နှုတ်ကို ဖွင့်လော့၊ ပြည့်လိမ့်မည်၊ ငါသည် သင့်အား ဟောပြောခြင်းအခွင့်ကို ပေးတော်မူမည်၊ အကြောင်းမူကား၊ ခပ်သိမ်းသော လူတို့သည် ငါ၏ လက်ထဲ၌ ရှိ၏။ ငါသည် ကောင်းမြတ်သည်ဟု မှတ်ယူသည့်အတိုင်း ပြုတော်မူမည်။
၃၃ သင်တို့ကို ဖန်ဆင်းတော်မူခဲ့သည့် ကိုယ်တော်ရှင်ဘုရားသခင်ကို အစေခံရန် ဤနေ့၌ သင်တို့ရွေးချယ်ကြလော့ဟု ဤလူမျိုးတို့ကို ဆိုလော့။
၃၄ ရှုလော့၊ ငါ၏ ဝိညာဉ်တော်သည် သင့်အပေါ်၌ ရှိ၏၊ သို့ဖြစ်၍ သင်၏ ခပ်သိမ်းသော စကားတို့ကို ငါလွှတ်မည်။ တောင်တို့သည် သင့်ရှေ့မှ ထွက်ပြေးလိမ့်မည်၊ မြစ်တို့သည်လည်း မိမိတို့ စီးရာရေကြောင်းကို ပြောင်းလိမ့်မည်။ သင်သည် ငါ၌ တည်၍၊ ငါသည်လည်း သင်၌ တည်မည်။ ထို့ကြောင့် ငါနှင့်အတူလျှောက်လော့။
၃၅ ကိုယ်တော်ရှင်သည် ဧနောက်ကို မြွက်ဆို၍၊ သင်၏မျက်စိတို့ကို ရွှံ့နှင့်လူး၍ ဆေးပစ်လော့၊ မြင်ရလိမ့်မည်ဟု မိန့်တော်မူ၏။ သူသည်လည်း မိန့်တော်မူသည့်အတိုင်း လုပ်ဆောင်၏။
၃၆ ဘုရားသခင်ဖန်ဆင်းတော်မူခဲ့လေသည့် ဝိညာဉ်တို့ကိုလည်း မြင်ရ၏။ ပကတိမျက်စိဖြင့် မမြင်နိုင်သောအရာတို့ကိုလည်း မြင်ရ၏။ ထိုအချိန်မှစ၍ သတင်းစကားသည်လည်း ထိုပြည်၌ ပျံ့နှံ့၏။ မြင်သောသူတစ်ဦးကို ကိုယ်တော်ရှင်သည် ဤလူမျိုးတို့အဖို့ ပေါ်ထွန်းစေတော်မူလေပြီ။
၃၇ ဤသို့အားဖြင့် အချိန်တန်လာသောအခါ၊ ဧနောက်သည် ထိုပြည်၌ ထွက်သွားပြီး၊ လူမျိုးတို့တွင် တောင်ကုန်းများပေါ်၌လည်းကောင်း၊ မြင့်သောနေရာများ၌လည်းကောင်း ရပ်လျက်၊ ကျယ်သောအသံနှင့် ဟစ်ကြွေး၍၊ သူတို့အကျင့်များ တစ်ဖက်၌ သက်သေခံလျက်ရှိ၏။ ခပ်သိမ်းသော လူသားတို့သည်လည်း သူ့ကြောင့် စိတ်ပျက်ကြလေ၏။
၃၈ သူ့အသံကို ကြားနာကြရန် မြင့်သောနေရာတို့၌ ထွက်လာကြ၍၊ တဲစောင့်တို့ကို ဆိုလေသည်ကား၊ မြင်သောသူကို ကြည့်ရန် ထိုနေရာသို့ ငါတို့သွားကြစဉ် ဤနေရာ၌နေ၍ တဲများကို သင်တို့စောင့်ကြလော့၊ အကြောင်းမူကား ထိုသူသည် ပရောဖက်ပြု၍ ဟော၏၊ ဤပြည်၌ ထူးဆန်းသောအရာလည်းရှိ၏။ ငါတို့၌ သူရူးတစ်ယောက် ရောက်လာပြီ။
၃၉ ဤသို့အားဖြင့် အချိန်တန်လာသောအခါ၊ သူ့ကို ကြားနာကြလျှင်၊ အဘယ်သူမျှ မဖမ်းဆီးကြ။ အကြောင်းမူကား၊ သူ့ကို ကြားနာသူခပ်သိမ်းတို့အပေါ် ကြောက်ရွံ့ခြင်းသည် ကျရောက်လာ၏။ အကြောင်းမူကား၊ သူသည် ဘုရားသခင်နှင့်အတူ လျှောက်၏။
၄၀ မဟိယဟု အမည်ရှိသူတစ်ဦး သူ့ထံရောက်လာပြီး၊ သင် အဘယ်သူဖြစ်ကြောင်း ကျွန်ုပ်တို့ကို ပြောပြပါလော့၊ အဘယ်အရပ်မှ လာပါသနည်းဟု မေးလျှင်၊
၄၁ ငါသည် ကာဣနန်ပြည်၊ ငါ့ဘိုးဘေးတို့၏ပြည်၊ ဤနေ့အထိ ဖြောင့်မတ်ခြင်းပြည်ဖြစ်သည့် ပြည်မှ ထွက်လာခဲ့၏။ ငါ၏အဘသည် ငါ့ကို ဘုရားသခင်၏ ခပ်သိမ်းသော လမ်းတို့အတိုင်း သွန်သင်ခဲ့၏ဟု သူတို့ကို ဖြေ၏။
၄၂ ဤသို့အားဖြင့်အချိန်တန်လာသောအခါ၊ ငါသည် ကာဣနန်ပြည်မှ၊ အရှေ့ပင်လယ်အနီး၌ ခရီးသွားစဉ်တွင် ရူပါရုံတစ်ခုကို မြင်ရ၏။ ကြည့်ဦးလော့၊ ကောင်းကင်ဘုံကို ငါမြင်ရ၏၊ ကိုယ်တော်ရှင်သည်လည်း ငါနှင့် စကားမြွက်ဆို၍၊ ငါ့အား ပညတ်တော်ကို ပေး၏။ သို့ဖြစ်၍၊ ဤအကြောင်းကြောင့်၊ ပညတ်တော်ကို စောင့်ထိန်းရန်၊ ငါသည် ဤစကားတို့ကို ကြေညာ၏။
၄၃ ဧနောက်သည် မိမိစကားကို ဆက်၍၊ ဆိုလေသည်ကား၊ ငါနှင့် စကားမြွက်ဆိုသည့် ကိုယ်တော်ရှင်မှာ၊ ကောင်းကင်ဘုံ၏ ဘုရားသခင်နှင့် အတူတူဖြစ်၏၊ သူသည် ငါ၏ဘုရားသခင်ဖြစ်၏၊ သင်တို့၏ဘုရားသခင်လည်းဖြစ်၏၊ သင်တို့သည် ငါ၏ညီအစ်ကိုများ ဖြစ်ကြ၏၊ အဘယ်ကြောင့် သင်တို့ကိုယ်သင်တို့ တိုင်ပင်၍၊ ကောင်းကင်ဘုံ၏ ဘုရားသခင်ကို ငြင်းဆိုကြသနည်း။
၄၄ ကောင်းကင်ကို သူဖန်ဆင်းတော်မူခဲ့၏။ မြေကြီးသည် သူ၏ခြေတင်ရာခုံဖြစ်၏။ ထိုမြေကြီး၏အုတ်မြစ်သည်လည်း သူ၏အရာဖြစ်၏။ ရှုလော့၊ သူသည် ထိုအုတ်မြစ်ကို ချခဲ့၏။ လူအလုံးအရင်းကို ထိုမြေကြီးမျက်နှာပြင်ပေါ်သို့ ဆောင်ယူတော်မူခဲ့၏။
၄၅ သေခြင်းသည်လည်း ငါ့တို့ဘိုးဘေးတို့အပေါ် ကျရောက်လာခဲ့ပြီ။ သို့သော်လည်း ငါတို့သည် သူတို့ကို သိ၏၊ မငြင်းဆိုနိုင်ကြ၊ အကယ်စင်စစ်၊ ခပ်သိမ်းသောသူတို့အထဲမှ ပထမဦးဆုံးဖြစ်သည့် အာဒံကိုပင် ငါတို့သိကြ၏။
၄၆ အကြောင်းမူကား၊ အောက်မေ့ဖွယ်ရာစာအုပ်တစ်အုပ်ကို ဘုရားသခင်၏ လက်ချောင်းတော်ဖြင့် ပေးထားသည့် ပုံစံအတိုင်း ငါတို့၌ ရေးထားလေပြီ။ ငါတို့ကိုယ်တိုင်၏ ဘာသာစကားဖြင့် ပေးထား၏။
၄၇ ဧနောက်က ဘုရားသခင်၏ နှုတ်ကပတ်တော်တို့ကို ကြေညာစဉ်တွင် လူတို့သည် တုန်လှုပ်ကြ၏၊ သူ့မျက်မှောက်၌ မရပ်နိုင်ကြ။
၄၈ သူတို့ကို ဆိုလေသည်ကား၊ အာဒံလဲကျသောကြောင့်၊ ငါတို့ရှိကြ၏။ သူ၏လဲကျခြင်းအားဖြင့် သေခြင်းကျရောက်ခဲ့၏။ ငါတို့ကိုလည်း ဝမ်းနည်းပူဆွေးမှုနှင့် အမင်္ဂလာကို သုံးဆောင်သူများ ဖြစ်စေခဲ့၏။
၄၉ ရှုလော့၊ စာတန်သည် လူသားတို့၌ လာ၍၊ သူ့ကို ကိုးကွယ်စေရန် သွေးဆောင်ဖြားယောင်း၏။ လူသားတို့သည်လည်း ကာမဂုဏ်သဘော၊ ရာဂစိတ်ဖြင့်စွဲလန်းခြင်းနှင့် နတ်ဆိုးကဲ့သို့ ဖြစ်လာကြပြီး၊ ဘုရားသခင်၏ မျက်မှောက်တော်မှ ပိတ်ပင်ခံကြရ၏။
၅၀ သို့ရာတွင် ဘုရားသခင်သည် ငါတို့၏ဘိုးဘေးတို့အား ခပ်သိမ်းသော လူသားတို့ နောင်တရကြရမည့်အကြောင်းကို ဖော်ပြတော်မူခဲ့လေ၏။
၅၁ သူသည် ငါတို့၏အဘ အာဒံအား သူ့အသံဖြင့် တောင်းဆို၍ မိန့်တော်မူလေသည်ကား၊ ငါသည် ဘုရားသခင်ဖြစ်၏။ ငါသည် ကမ္ဘာကို ဖန်ဆင်းတော်မူခဲ့၏၊ လူသားတို့ကိုလည်း ဇာတိကိုယ်ခန္ဓာဖြင့် မရှိမီက ဖန်ဆင်းတော်မူခဲ့၏။
၅၂ သင်သည် ငါ့ထံသို့ ပြန်လာ၍၊ ငါ၏အသံကို စေ့စေ့နားထောင်၍၊ ယုံကြည်၍၊ သင်၏ခပ်သိမ်းသော လွန်ကျူးခြင်းတို့မှ နောင်တရ၍၊ ကျေးဇူးတော်၊ သမ္မာတရားတို့နှင့် ပြည့်စုံသည့်သူတည်းဟူသော ငါ၏တစ်ပါးတည်းသော သားတော်၊ ယေရှုခရစ်တော်၏ နာမတော်ဖြင့်၊ လူသားတို့ထံ ကယ်တင်ခြင်း ရောက်လာနိုင်ရာ ကောင်းကင်အောက်၌ ပေးလိမ့်မည့် တစ်ခုတည်းသောနာမတော်ဖြင့်၊ ရေထဲ၌ပင်၊ ဗတ္တိဇံကို ခံလျှင်၊ သန့်ရှင်းသောဝိညာဉ်တော်၏ ဆုကျေးဇူးကို ရရှိလိမ့်မည်။ ခပ်သိမ်းသော အရာတို့ကိုလည်း သူ၏နာမတော်ဖြင့် တောင်းလော့၊ တောင်းမည့်အရာမှန်သမျှကို ပေးလိမ့်မည်ဟုလည်း သူ့ကို မိန့်တော်မူ၏။
၅၃ ငါတို့၏အဘအာဒံသည်လည်း လူသားတို့သည် အဘယ်ကြောင့် နောင်တရ၍ ရေထဲ၌ ဗတ္တိဇံခံရကြမည်နည်းဟု ကိုယ်တော်ရှင်ကို လျှောက်လျှင်၊ ကိုယ်တော်ရှင်က အာဒံကို၊ ရှုလော့၊ ငါသည် ဧဒင်ဥယျာဉ်ထဲ၌ သင်၏လွန်ကျူးခြင်းကို ခွင့်လွှတ်လေပြီဟု မိန့်တော်မူ၏။
၅၄ ဤနေရာမှစ၍၊ သတင်းစကားသည် လူမျိုးတို့၌ ပျံ့နှံ့သဖြင့်၊ ဘုရားသခင်၏ သားတော်သည် မူရင်းအပြစ်ရောက်ခြင်းအတွက် အပြစ်ဖြေတော်မူလေ၏၊ ထိုနည်းအားဖြင့်၊ မိဘတို့၏အပြစ်များကို သားသမီးတို့၏ ဦးခေါင်းပေါ်သို့ မကျရောက်ရစေနိုင်၊ အကြောင်းမူကား၊ သူတို့သည် ကမ္ဘာတည်ကတည်းက စင်ကြယ်ကြ၏။
၅၅ ကိုယ်တော်ရှင်ကလည်း အာဒံကို မြွက်ဆို၍ မိန့်တော်မူလေသည်ကား၊ သင်၏ သားသမီးတို့သည် အပြစ်၌ ပဋိသန္ဓေတည်ကြသမျှ၊ ထိုကဲ့သို့ပင် သူတို့ကြီးပြင်းစပြုကြသောအခါ၊ အပြစ်သည် သူတို့စိတ်နှလုံး၌ ပဋိသန္ဓေတည်သဖြင့်၊ သူတို့သည် ကောင်းမြတ်ခြင်းကို တန်ဖိုးထားနိုင်ကြစေခြင်းငှာ အခါးကို မြည်းစမ်းကြ၏။
၅၆ အကောင်းနှင့် အဆိုးကို ခွဲခြား၍သိစေရန် ပေးထား၏။ သို့ဖြစ်၍၊ သူတို့သည် သူတို့သဘောနှင့်သူတို့ ပြုနိုင်သောသူများ ဖြစ်ကြ၏၊ ငါသည်လည်း သင့်အား တခြားသောဥပဒေနှင့် ပညတ်တော်ကို ပေးလေပြီ။
၅၇ သို့ဖြစ်၍၊ နေရာတိုင်း၌ရှိသည့် ခပ်သိမ်းသောလူသားတို့၊ နောင်တရကြရမည့်အကြောင်း သင်၏ သားသမီးတို့ကို သွန်သင်လော့၊ သို့မဟုတ်လျှင်၊ သူတို့သည် ဘုရားသခင်၏နိုင်ငံတော်ကို အလျှင်းအမွေမခံရနိုင်၊ အကြောင်းမူကား၊ အဘယ်မသန့်ရှင်းသောအရာမျှ ထိုနေရာ၊ သို့မဟုတ် မျက်မှောက်တော်၌ မနေထိုင်နိုင်။ အကြောင်းမူကား အာဒံ၏ ဘာသာစကား၌၊ သန့်ရှင်းခြင်း ယောက်ျားဟူသည်ကား၊ သူ၏နာမတော်ဖြစ်၏။ သူ၏တစ်ပါးတည်းသော သားတော်၏ နာမတော်မှာ လူသားတော်၊ အထွတ်အထိပ်ကာလ၌ ကြွလာလိမ့်မည့်သူတည်းဟူသော၊ ယေရှုခရစ်တော်ပင်ဖြစ်သည့်၊ ဖြောင့်မတ်သောတရားသူကြီးဖြစ်၏။
၅၈ ထို့ကြောင့်၊ ငါသည် သင့်အား ဤအရာတို့ကို သင်၏သားသမီးတို့ကို လွတ်လပ်စွာ သွန်သင်ပေးစေရန် ပညတ်တော်ကိုပေး၍၊ ဆိုလေသည်ကား၊
၅၉ လွန်ကျူးခြင်းကြောင့် လဲကျခြင်းရောက်လာ၏၊ ထိုလဲကျခြင်းက သေခြင်းကို ရောက်စေ၏၊ သင်သည် ငါဖန်ဆင်းတော်မူလေသည့် ရေ၊ ထို့အတူ အသွေး၊ ထို့အတူ ဝိညာဉ်ဖြင့် လောကထဲသို့ မွေးခြင်းကို ခံရလေသမျှ၊ မြေမှုန့်မှနေ၍ သက်ရှိလူဖြစ်လာခဲ့၏၊ ထိုကဲ့သို့ပင် သင်သည် ရေဖြင့်၊ ထို့အတူ ဝိညာဉ်တော်ဖြင့် ကောင်းကင်နိုင်ငံတော်ထဲသို့ တစ်ဖန်မွေးခြင်းကို ခံရမည်၊ အသွေးတော်အားဖြင့်၊ ငါ၏ တစ်ပါးတည်းသော သားတော်၏ အသွေးတော်အားဖြင့်ပင် သန့်ရှင်းစေရမည်။ ခပ်သိမ်းသော အပြစ်မှ သန့်ရှင်းစင်ကြယ်စေနိုင်ခြင်းငှာ၊ ဤလောကထဲ၌ ထာဝရအသက် နှုတ်ကပတ်တော်တို့နှင့်၊ ထို့အတူ လာမည့်လောက၌ ထာဝရအသက်၊ သေခြင်းမရှိသော ဘုန်းအသရေနှင့်ပင် ပျော်မွေ့နိုင်စေခြင်းငှာပေတည်း။
၆၀ အကြောင်းမူကား၊ ရေအားဖြင့် သင်သည် ပညတ်တော်ကို စောင့်ထိန်း၏။ ဝိညာဉ်တော်အားဖြင့် သင့်ကို အပြစ်ကင်းစေ၏၊ အသွေးတော်အားဖြင့် သင့်ကို သန့်ရှင်းစင်ကြယ်စေ၏။
၆၁ ထို့ကြောင့်၊ သင်၌ တည်စေရန်၊ ကောင်ကင်ဘုံ၏မှတ်တမ်း၊ နှစ်သိမ့်ရှင်၊ သေခြင်းမရှိသော ဘုန်းအသရေ၏ ငြိမ်းချမ်းသောအရာများ၊ ခပ်သိမ်းသောအရာတို့၏ သမ္မာတရား၊ ခပ်သိမ်းသော အရာတို့ကို အသက်ရှင်ခြင်းသို့ ရောက်စေသည့်အရာတည်းဟူသော၊ ခပ်သိမ်းသောအရာတို့ကို ရှင်သန်စေသောအရာများ၊ ခပ်သိမ်းသောအရာတို့ကို သိသောအရာများကို ပေးထား၏။ ဉာဏ်ပညာ၊ ကရုဏာ၊ သမ္မာတရား၊ ဖြောင့်မှန်ခြင်းတို့အတိုင်း အလုံးစုံသောတန်ခိုး၊ ထို့အတူ တရားစီရင်တော်မူခြင်းလည်း ရှိ၏။
၆၂ ယခုမူကား၊ ရှုလော့၊ သင့်ကို ငါဆိုသည်ကား၊ ဤအရာသည် အထွတ်အထိပ်ကာလ၌ ကြွရောက်လာမည့်သူတည်းဟူသော၊ ငါ၏တစ်ပါးတည်းသော သားတော်၏ အသွေးတော်အားဖြင့် ခပ်သိမ်းသောလူသားတို့အဖို့ ကယ်တင်ခြင်း အစီအစဉ်ဖြစ်၏။
၆၃ ရှုဦးလော့၊ ခပ်သိမ်းသောအရာတို့သည် မိမိတို့၏ပုံသဏ္ဌာန်ရှိကြ၏၊ ငါ့အကြောင်းကို သက်သေခံစေရန်၊ ခပ်သိမ်းသောအရာတို့ကို၊ ဇာတိပကတိအရာများနှင့် ဝိညာဉ်ပကတိ အရာများ နှစ်မျိုးစလုံးကို ဖန်ဆင်း၍၊ ပြုထား၏။ အထက်ကောင်းကင်၌ ရှိသောအရာများ၊ ထို့အတူ မြေကြီးပေါ်၌ရှိသောအရာများ၊ ထို့အတူ မြေကြီးထဲ၌ ရှိသောအရာများ၊ ထို့အတူ မြေကြီးအောက်၌ရှိသောအရာများ၊ အထက်နှင့် အောက်အရပ်နှစ်မျိုးစလုံး၌ရှိသည့် ခပ်သိမ်းသောအရာတို့သည် ငါ့အကြောင်းကို သက်သေခံကြ၏။
၆၄ ဤသို့အားဖြင့် အချိန်တန်လာသောအခါ၊ ကိုယ်တော်ရှင်က ငါတို့၏အဘ အာဒံကို ဟောပြောလေသည့် အချိန်တွင်၊ အာဒံသည် ကိုယ်တော်ရှင်ကို တောင်းလျှောက်၍၊ ကိုယ်တော်ရှင်၏ ဝိညာဉ်တော်အားဖြင့် ဆောင်ယူတော်မူခြင်းကို ခံရ၏၊ ရေထဲသို့လည်း ဆောင်ယူခံရ၏၊ ရေအောက်၌ ချထားသည်ကိုလည်း ခံရ၏၊ ရေထဲမှ ဆောင်ယူသည်ကိုလည်း ခံရ၏။
၆၅ ထိုကဲ့သို့အားဖြင့်၊ သူသည် ဗတ္တိဇံကို ခံရ၏၊ ဘုရားသခင်၏ ဝိညာဉ်တော်သည်လည်း သူ့အပေါ် ဆင်းသက်၍၊ ထိုကဲ့သို့အားဖြင့် သူသည် ဝိညာဉ်တော်အားဖြင့် ဖြစ်ဖွားစေ၏၊ အတွင်းလူအဖြစ်လည်း ရှင်သန်လာစေခဲ့၏။
၆၆ ကောင်းကင်ဘုံမှ အသံကိုလည်း ကြားရ၏၊ မိန့်တော်မူလေသည်ကား၊ သင်သည် မီးဖြင့်၊ ထို့အတူ သန့်ရှင်းသော ဝိညာဉ်တော်ဖြင့် ဗတ္တိဇံခံရ၏။ ဤအရာသည် ခမည်းတော်နှင့် သားတော်၏ ယခုမှစ၍ ကာလအစဉ်အဆက် သက်သေဖြစ်၏။
၆၇ သင်သည် ထာဝရကာလတစ်ခုလုံးမှ ထာဝရကာလတစ်ခုလုံးသို့တိုင်အောင်၊ အချိန်ကာလ အစအဆုံး မရှိလေသည့်သူ၏ အသင်းအတိုင်းရှိ၏။
၆၈ ရှုလော့၊ သင်သည် ဘရားသခင်၏ သားတစ်ယောက်အဖြစ်၊ ငါ့၌တစ်လုံးတစ်ဝတည်းဖြစ်၏။ ထိုကဲ့သို့အားဖြင့်၊ ခပ်သိမ်းသောသူတို့သည် ငါ၏သားများ ဖြစ်နိုင်ကြပေ၏။ အာမင်။