ဂျိုးဇက်စမစ်—သမိုင်း

ပရောဖက်ဂျိုးဇက်စမစ်၏ သမိုင်းမှ ကောက်နုတ်ချက်များ။

အခန်းကြီး ၁

ဂျိုးဇက်စမစ်သည် သူ၏ ဘိုးဘေး၊ မိသားစုဝင်များနှင့် သူတို့၏ အစောပိုင်းနေရာတို့အကြောင်းကို ပြောပြ၏—ဘာသာရေးနှင့်စပ်လျဉ်း၍ ထူးခြားသော နှိုးကြားမှုသည် နယူးယောက်အနောက်ပိုင်း၌ ပျံ့နှံ့၏—သူသည် ယာကုပ်လမ်းညွှန်သည့်အတိုင်း ဉာဏ်ပညာကို ရှာရန်သန္နိဋ္ဌာန်ချ၏—ခမည်းတော်နှင့် သားတော်ပေါ်လာတော်မူပြီး၊ ဂျိုးဇက်သည် သူ၏ပရောဖက်ဆိုင်ရာအမှုတော်ဆောင်ခြင်းအတွက် ခေါ်သွင်းခံရ၏။ (အခန်းငယ် ၁–၂၀။)

၁ ထင်ပေါ် တိုးတက်လာသော ယေရှုခရစ်တော်၏ နောက်ပိုင်းကာလသန့်ရှင်းသူများအသင်းတော်အကြောင်း မကောင်းမှု၌ စိတ်ညွတ်၍ကြံစည်ကြသော လူတို့အားဖြင့် ပျံ့နှံ့လေသည့်၊ များစွာသော မှတ်တမ်းများ၊ ထိုမှတ်တမ်းများမှာလည်း စာရေးသူတို့က အသင်းတော်၏ဂုဏ်သိက္ခာနှင့် လောကထဲ၌ တိုးတက်မှုတို့ကို ဆန့်ကျင်တိုက်ခိုက်ရန် ကြံစည်ထားလေသောကြောင့်၊ ကျွန်ုပ် တိုက်တွန်းခံရလေသည်ကား၊ ဤသမိုင်းကို ရေးရန်၊ လူထု၏အစွဲကို ချွတ်ပေးရန် တိုက်တွန်းခံရလေ၏၊ အကြောင်းအရာအမှန်တို့ကို ၎င်းတို့ဖြစ်ပျက်ခဲ့လေသည့်အတိုင်း၊ ကျွန်ုပ်ကိုယ်တိုင်နှင့် အသင်းတော်တို့အကြောင်း၊ ထိုအကြောင်းအရာတို့ကို ကျွန်ုပ်သိလေသမျှအတိုင်း၊ ရှာသောသူတို့ သတိပြုမိကြစေခြင်းငှာလည်းဖြစ်၏။

၂ ဤသမိုင်း၌ ကျွန်ုပ်သည် ဤအသင်းတော်အကြောင်း အမျိုးမျိုးသော အဖြစ်အပျက်များကို၊ ၎င်းတို့ဖြစ်ပျက်ခဲ့သည့်အတိုင်း၊ သို့မဟုတ် မျက်မှောက်၌ရှိသည့်အတိုင်း၊ ဖော်ပြပါ အသင်းတော်ကို ဖွဲ့စည်းကတည်းက ရှစ်နှစ်ကြာ၍ ယခု ၁၈၃၈ ခုအထိ ရှိသည့်အတိုင်း မှန်ကန်စွာနှင့် ဖြောင့်မတ်စွာ ဖော်ပြမည်။

၃ ကျွန်ုပ်တို့ကိုယ်တော်ရှင်၏ တစ်ထောင့်ရှစ်ရာနှင့် ငါးခုနှစ်၊ ဒီဇင်ဘာ နှစ်ဆယ့်သုံးရက်တွင်၊ ဗားမောင့်ပြည်နယ်၊ ဝင်ဆာခရိုင်၊ ရှာရုန်မြို့၌၊ မွေးဖွားခဲ့၏။ ကျွန်ုပ်အဘ၊ ဂျိုးဇက်စမစ်အကြီးသည် ကျွန်ုပ်အသက် ဆယ်နှစ်၊ သို့မဟုတ် ထိုနှစ်အရွယ်ခန့်၌၊ ဗားမောင့်ပြည်နယ်မှ ထွက်ခွာ၍၊ ပယ်လမိုင်ရာ၊ အွန်တာရီရို (ယခု ဝိန်း) ခရိုင်၊ နယူးယောက်ပြည်နယ်သို့ ရွှေ့ပြောင်းခဲ့၏။ ကျွန်ုပ်အဘသည် ပယ်လမိုင်ရာသို့ ရောက်ပြီး၊ လေးနှစ်လောက်အကြာတွင်၊ ထိုအွန်တာရီရိုခရိုင်အတွင်းရှိ မန်ချက်စတာသို့ သူ့မိသားစုနှင့်အတူ ရွှေ့ပြောင်းခဲ့၏—

၄ သူ၏မိသားစုတွင် တစ်ဆယ့်တစ်ဦးရှိ၏၊ အမည်အားဖြင့်၊ ကျွန်ုပ်အဘဂျိုးဇက်စမစ်အကြီး၊ ကျွန်ုပ်အမိ၊ လူစီစမစ် (အိမ်ထောင်ဖက်မပြုမီက သူမအမည်မှာ၊ ဆောလမုန်မက်၏သမီး၊ လူစီမက် ဖြစ်၏)၊ ကျွန်ုပ်အစ်ကို အယ်လဗင် (၁၈၂၃ ခု၊ နိုဝင်ဘာ ၁၉၊ အသက် ၂၆နှစ်အရွယ်၌ သေသူ)၊ ဟီရမ်၊ ကျွန်ုပ်ကိုယ်တိုင်၊ ဆင်မြူရယ်လ်ဟာရီဆင်၊ ဝီလျံ၊ ဒွန်ကားလို့စ်၊ ကျွန်ုပ်ညီမများဖြစ်သည့် ဆိုဖရုန်နီယာ၊ ကက်သရင်းနှင့် လူစီတို့ဖြစ်ကြ၏။

၅ မန်ချက်စတာသို့ ကျွန်ုပ်တို့ရွှေ့ပြောင်းပြီးနောက် ဒုတိယနှစ်တွင်၊ ကျွန်ုပ်တို့နေသည့် နေရာ၌ ဘာသာရေးအကြောင်း ထူးခြားသောနိုးကြားမှုရှိလေ၏။ မက်သဒစ်တို့မှ အစပြု၍၊ မကြာမြင့်မီတွင် ထိုခရိုင်ဒေသတွင်းရှိ ခပ်သိမ်းသောဂိုဏ်းများ၌ ပျံ့နှံ့၍ လာခဲ့၏။ အမှန်စင်စစ်၊ ခရိုင်နယ်မြေတစ်ခုလုံးကို သက်ရောက်ဟန်ရှိ၍၊ ကြီးစွာသောလူအစုအဝေးသည် ခြားနားသောဘာသာရေးအုပ်စုများအဖြစ် သူတို့ကိုယ်သူတို့ စုစည်းကြ၍၊ ထိုအမှုက လူတို့၌ မငယ်သောလှုပ်ရှားမှုနှင့် ကွဲပြားမှုကိုဖြစ်စေ၏၊ အချို့က “သည်မှာ ကြည့်ပါ”၊ အခြားသူများကလည်း “ဟိုမှာ ကြည့်ပါ”ဟု အော်ဟစ်ကြ၏။ အချို့က မက်သဒစ် ယုံကြည်ခြင်းဘက်မှ၊ အချို့က ပရက်စ်ဘိုက်တေရီယန်ဘက်မှ၊ အချို့က ဗတ္တိဇံဘက်မှ တိုက်ခိုက်နေကြ၏။

၆ အကြောင်းမူကား၊ ဤခြားနားသောယုံကြည်ခြင်းများသို့ ပြောင်းလဲသူများ၊ သူတို့၏ ပြောင်းလဲရာကာလ၌ ဖော်ပြသည့် ကြီးစွာသောချစ်ခြင်း၊ ထို့အတူ လူတိုင်းကို ပြောင်းလဲရစေခြင်းငှာ၊ မိမိတို့အသုံးပြုရန် နှစ်သက်သည့်အတိုင်း၊ ဤသာမန်ထက်သာလွန်သော ဘာသာရေးခံစားမှု မြင်ကွင်းကို နှိုးဆော်အားပေးခြင်း၌ တက်ကြွသူ အမှုတော်ဆောင်ဘုန်းကြီးအသီးသီး၏ ထင်ရှားစွာပြသည့် ကြီးစွာသော စိတ်အားကြီးခြင်း ရှိကြသော်ငြားလည်း၊ ထိုလူတိုင်းအား သူတို့ နှစ်သက်ရာ ဂိုဏ်းသို့ဝင်ရန် အခွင့်ပေး၏။ သို့သော်လည်း၊ ပြောင်းလဲသူများ စွန့်ခွာစပြု၍၊ အချို့မှာ အုပ်စုတစ်ခုသို့၊ အချို့မှာ တခြားအုပ်စုတစ်ခုသို့ သွားကြသောအခါ၊ ယဇ်ပုရောဟိတ်နှင့် ပြောင်းလဲသူ နှစ်မျိုးစလုံး၏၊ အမြင်အားဖြင့် ကောင်းမြတ်သော ခံစားချက်များမှာ အစစ်အမှန်ထက် ပို၍ဟန်ဆောင်ထားသောအရာများ အဖြစ်မြင်ရလေ၏။ အကြောင်းမူကား၊ ကြီးစွာသောရှုပ်ထွေးခြင်းနှင့် မကောင်းသောခံစားမှု နောက်မှလိုက်၍ဖြစ်၏—ယဇ်ပုရောဟိတ်၊ ယဇ်ပုရောဟိတ်ချင်း ငြင်းခုံကြ၏၊ ပြောင်းလဲသူ၊ ပြောင်းလဲသူချင်း ငြင်းခုံကြ၏။ ထို့ကြောင့်၊ သူတို့၌ တစ်ဦးအပေါ် တစ်ဦးရှိခဲ့ဖူးလေသည့် ကောင်းမြတ်သောခံစားချက် ခပ်သိမ်းတို့မှာ စကားစစ်ထိုးခြင်းနှင့်၊ သဘောအယူအဆအကြောင်း ငြင်းခုံခြင်းတို့၌ လုံးဝပျောက်ဆုံးလေ၏။

၇ ကျွန်ုပ်သည် ဤအချိန်၌ အသက်တစ်ဆယ့်ငါးနှစ်သို့ ရောက်လေ၏။ ကျွန်ုပ်အဘ၏ မိသားစုမှာ ပရက်စ်ဘိုက်တေရီယန် ယုံကြည်ခြင်းသို့ ဘာသာပြောင်းခဲ့ကြလေ၏၊ သူတို့အထဲမှ လေးဦး၊ အမည်အားဖြင့်၊ ကျွန်ုပ်အမိ၊ လူစီ၊ ကျွန်ုပ်အစ်ကိုများဖြစ်သည့် ဟီရမ်နှင့် ဆင်မြူရယ်လ်ဟာရီဆင်၊ ထို့အတူ ကျွန်ုပ်ညီမ ဆိုဖရုံနီယာတို့သည် ထိုအသင်းတော်သို့ ဝင်ခဲ့ကြ၏။

၈ ဤကြီးစွာသောနိုးကြားမှုအချိန်အတွင်း၌ ကျွန်ုပ်၏စိတ်ကို အလေးအနက် တွေးတောစဉ်းစားခြင်းသို့ ရောက်စေ၍၊ ကြီးစွာမငြိမ်မသက် ဖြစ်ရ၏။ သို့ရာတွင်၊ ကျွန်ုပ်၏ ခံစားမှုများမှာ လေးနက်၍၊ အကြိမ်ကြိမ် ထိခိုက်နာကျင်သော်လည်း၊ ကျွန်ုပ်ကိုယ်ကျွန်ုပ် ဤအုပ်စုခပ်သိမ်းတို့နှင့် တသီးတခြားနေခဲ့၏၊ သို့သော်လည်း ကျွန်ုပ်သည် သူတို့၏အစည်းအဝေးအသီးသီးကို အခြေအနေ ပေးသမျှတက်ခဲ့၏။ ကာလစေ့သောအခါ ကျွန်ုပ်၏စိတ်သည် မက်သဒစ်ဂိုဏ်းဘက်သို့ အတော်အသင့် ရောက်ခဲ့၏၊ သူတို့နှင့် ပူးပေါင်းရန်လည်း ဆန္ဒအချို့ကို ခံစားခဲ့ရ၏။ သို့ရာတွင်၊ အလွန်ကြီးမားသည်ကား ခြားနားသောဂိုဏ်းခွဲတို့၌ ရှိလေသည့် ရှုပ်ထွေးခြင်းနှင့် ရန်တွေ့ခြင်းတို့ ဖြစ်လေ၍၊ ကျွန်ုပ်ကဲ့သို့ ငယ်ရွယ်သော၊ ထို့အတူ လူများ၊ အမှုများနှင့် အလွန်အကျွမ်းမဝင်သော လူတစ်ယောက် အတွက်၊ အဘယ်သူမှန်၍၊ အဘယ်သူမှားသည်ဟူသော သေချာသည့် ကောက်ချက်တစ်စုံတစ်ခုကို ချရန်မှာ မဖြစ်နိုင်ခဲ့ပေ။

၉ ကျွန်ုပ်စိတ်မှာ ထိုအချိန်၌ ကြီးစွာလှုပ်ရှားလေ၏၊ အကြောင်းမူကား၊ ဆူညံခြင်းနှင့် ရုန်းရင်းခတ်ခြင်းအမှုတို့မှာ အလွန်ကြီးမား၍ အတောမသတ်ရှိလေ၏။ ပရက်စ်ဘိုက်တေရီယန်တို့သည် ဗတ္တိဇံနှင့် မက်သဒစ်တို့တစ်ဖက်၌ ခေါင်းအမာဆုံးဖြစ်ကြ၏၊ သူတို့၏မှားယွင်းမှုများကို သက်သေပြရန်၊ သို့မဟုတ်၊ ယုတ်စွအဆုံး၊ သူတို့သည် မှားယွင်းမှု၌ ရှိကြလေကြောင်းကို လူတို့ထင်ကြစေရန် ယုတ္တိယုတ်တာနှင့် တစ်ပတ်ရိုက်ခြင်းနှစ်မျိုးစလုံးဖြင့် အစွမ်းကုန်ကြိုးစားကြ၏။ အခြားတစ်ဖက်၌၊ ဗတ္တိဇံနှင့် မက်သဒစ်တို့သည်လည်း သူတို့ဘက်၌ သူတို့ကိုယ်တိုင်၏အယူဝါဒကို တည်ဆောက်ရန်နှင့် အခြားသောသူ ခပ်သိမ်းတို့ကို မမှန်ကန်ကြောင်း သက်သေပြရန် အားထုတ်ခြင်း၌ အလားတူ စိတ်အားကြီးကြလေ၏။

၁၀ ဤစကားစစ်ထိုးခြင်းနှင့် ရုန်းရင်းခတ်ခြင်းသဘောတို့အလယ်၌၊ ကျွန်ုပ်သည်လည်း၊ အဘယ်အရာကို ပြုရမည်နည်း၊ ဤခပ်သိမ်းသော အုပ်စုတို့၌ အဘယ်သူသည် မှန်သနည်း၊ သို့မဟုတ်၊ သူတို့အားလုံးအတူ မှားကြလေသလော၊ သူတို့အထဲမှ အုပ်စုတစ်ခုခုက မှန်လျှင်၊ ထိုအုပ်စုမှာ အဘယ်အုပ်စုနည်း၊ အဘယ်နည်းဖြင့် အကျွန်ုပ်သိရမည်နည်းဟု အကြိမ်ကြိမ်တွေးမိ၏။

၁၁ ကျွန်ုပ်သည် ဤဘာသာရေးသမားအုပ်စုတို့၏ ငြင်းခုံခြင်းများကဖြစ်စေသည့် လွန်ကဲသော အခက်အခဲများကြောင့် စိတ်ပင်ပန်းလျက်၊ တစ်နေ့၌ ယာကုပ်ဩဝါဒစာကို ဖတ်နေစဉ်၊ ပထမအခန်းကြီး၊ ပဉ္စမအခန်းငယ်၌၊ သင်တို့တွင် တစ်စုံတစ်ယောက်သောသူသည် ဉာဏ်ပညာကို လိုလျှင်၊ ကဲ့ရဲ့ပြစ်တင်ခြင်းကို ပြုတော်မမူဘဲ၊ ခပ်သိမ်းသောသူတို့အား စေတနာစိတ်နှင့် ပေးသနားတော်မူသော ဘုရားသခင်ကို တောင်းစေ။ ထိုသူအား ပေးလိမ့်မည် ဟုတွေ့ရ၏။

၁၂ ဤအချိန်၌ ကျွန်ုပ်၏စိတ်နှလုံးသို့ ဤကျမ်းစာပိုဒ်က ဝင်ရောက်သည်ထက်၊ အဘယ်ကျမ်းစာပိုဒ်ကမျှ လူသား၏ စိတ်နှလုံးထဲသို့ သာ၍ကြီးသော တန်ခိုးဖြင့် မဝင်ရောက်စဖူးပေ။ ကျွန်ုပ်စိတ်နှလုံး၏ခံစားချက် မှန်သမျှထဲသို့ ကြီးစွာသောအားဖြင့် ဝင်ရောက်သည့်ပမာ ရှိလေ၏။ ကျွန်ုပ်သည် ထိုအကြောင်းကို ထပ်တလဲလဲတွေးတောခဲ့၏၊ အဘယ်သူဖြစ်စေ၊ ဘုရားသခင်ထံမှ ဉာဏ်ပညာကို အလိုရှိကြောင်းကို ကျွန်ုပ်သိ၍ တွေးတောခဲ့၏။ အကြောင်းမူကား၊ အဘယ်သို့ ပြုရမည်ကို ကျွန်ုပ်မသိ၊ ကျွန်ုပ်၌ ထိုအချိန်ကရှိခဲ့သည်ထက် ပိုသောဉာဏ်ပညာကို မရနိုင်ခဲ့လျှင် အဘယ်တော့မျှ သိရလိမ့်မည်မဟုတ်။ အကြောင်းမူကား၊ ခြားနားသောဂိုဏ်းများမှ ဘာသာရေးဆရာတို့သည် တူသောကျမ်းစာပိုဒ်များကို အလွန်ကွဲပြားစွာနားလည်ကြ၍၊ သမ္မာကျမ်းကို ရည်ညွှန်းလျက် မေးခွန်းကို ဖြေရှင်းရာ၌ စိတ်ချယုံကြည်ခြင်းမှန်သမျှကို ဖျက်ဆီးသည်အထိရှိကြ၏။

၁၃ အချိန်အတန်ကြာပြီးနောက်၊ ကျွန်ုပ်သည် မှောင်မိုက်ထဲ၌ ဆက်၍ နေရမည်လော၊ သို့မဟုတ်လျှင်၊ ဘုရားသခင်ထံမှ တောင်းလော့ဟု ယာကုပ်လမ်းညွှန်သည့်အတိုင်း ပြုရမည်လောဟူသော ကောက်ချက်ကို ချရမည့်အချိန်သို့ ရောက်လာခဲ့၏။ ကျွန်ုပ်သည် အချိန်အတန်ကြာပြီးနောက် “ဘုရားသခင်ထံမှ တောင်းရန်” သန္နိဋ္ဌာန်ချခဲ့၏၊ ဉာဏ်ပညာကို လိုသောသူတို့အား ဉာဏ်ပညာကို သူပေး၍၊ ကယ်ရဲ့ပြစ်တင်ခြင်းမပြုဘဲ၊ စေတနာစိတ်နှင့် ပေးတော်မူကြောင်းကို ကောက်ချက်ချလျက် ကျွန်ုပ်စွန့်စားနိုင်ပေ၏။

၁၄ ထို့ကြောင့်၊ ဘုရားသခင်ထံ တောင်းရန် ကျွန်ုပ်၏ ဤသန္နိဋ္ဌာန်အတိုင်း၊ ကျွန်ုပ်သည် ထိုအားထုတ်မှုကိုပြုရန် တောထဲသို့ ထွက်သွားခဲ့၏။ ထိုအချိန်မှာ၊ တစ်ထောင်ရှစ်ရာ့နှစ်ဆယ်ခုနှစ်၊ နွေဦးအစောပိုင်း၊ နေသာသောနေ့၊ သာယာသော နံနက်ခင်းအချိန်ဖြစ်၏။ ကျွန်ုပ်ဘဝ၌ ထိုကဲ့သို့သော အားထုတ်မှုကိုပြုရာ ပထမဦးဆုံးအကြိမ်လည်း ဖြစ်၏၊ အကြောင်းမူကား၊ ကျွန်ုပ်၏ ခပ်သိမ်းသော စိုးရိမ်ပူပန်မှုများ အလယ်၌၊ ကျွန်ုပ်သည် အသံထွက်၍ဆုတောင်းရန် ထိုကဲ့သို့သော အားထုတ်မှုကို အဘယ်တုန်းကမျှ မပြုခဲ့စဖူးပေ။

၁၅ ကျွန်ုပ်သည်သွားရန် ယခင်ကြံစည်ထားသည့် နေရာသို့ ထွက်သွားခဲ့လေပြီးနောက်၊ ကျွန်ုပ်ပတ်ဝန်းကျင်ကို ကြည့်၍၊ ကျွန်ုပ်တစ်ယောက်တည်းဖြစ်ကြောင်းကို သိရလျှင်၊ ဒူးထောက်၍၊ ကျွန်ုပ်စိတ်နှလုံး၏ အလိုဆန္ဒကို ဘုရားသခင်ထံသို့ ပူဇော်စပြုခဲ့၏။ ကျွန်ုပ်ကို လုံးဝအနိုင်ယူသည့်၊ ထို့အတူ စကား မပြောနိုင်လောက်အောင် ကျွန်ုပ်၏လျှာကို ထိန်းချုပ်ရန် ကျွန်ုပ်အပေါ် အံ့ဩဖွယ် လွှမ်းမိုးမှုရှိသည့် တန်ခိုးအချို့၏ ချုပ်ကိုင်မှုကို ရုတ်တရက်ခံရသောအခါ၌၊ ကျွန်ုပ်မှာ ပူဇော်စပြုပြီးရုံမျှသာရှိသေး၏။ ထူသောမှောင်မိုက်သည် ကျွန်ုပ်ပတ်လည်၌ စုဝေး၏၊ ကျွန်ုပ်မှာ အချိန်အတန်ကြာအောင် ရုတ်တရက်ဖျက်ဆီးခြင်းသို့ ကြမ္မာငင်လေသည့်အလား ရှိလေ၏။

၁၆ သို့ရာတွင်၊ ကျွန်ုပ်ကို ချုပ်ကိုင်ထားသည့် ဤရန်သူ၏တန်ခိုးမှ ကယ်လွှတ်ပေးစေခြင်းငှာ ဘုရားသခင်ကို ပတ္ထနာပြုရန် ကျွန်ုပ်၏စွမ်းအားရှိသမျှကို ထုတ်လျက်၊ ကျွန်ုပ်သည် စိတ်ပျက်ခြင်းသို့ နစ်မြုပ်ရန်နှင့် ကျွန်ုပ်ကိုယ်ကျွန်ုပ် ပျက်စီးခြင်း—စိတ်ကူးမျှသာဖြစ်သော ပျက်စီးခြင်းသို့ မဟုတ်ဘဲ၊ ကျွန်ုပ်ယခင်က အဘယ်သူ့တွင်မျှ မတွေ့ဖူးလေသည့်သူ အံ့ဩဖွယ်ကောင်းသော တန်ခိုးရှိသူဖြစ်သည့် မမြင်ရသောလောကမှ အစစ်အမှန် ရှိသောသူအချို့၏ တန်ခိုးသို့—စွန့်လွှတ်ရန် အသင့်ဖြစ်လေသည့် ထိုခဏ၌၊ ဤကြီးစွာသော နှိုးဆော်ခြင်းခဏ၌၊ ကျွန်ုပ်ဦးခေါင်း အထက်တည့်တည့်တွင် နေ၏တောက်ပခြင်းထက်သာသည့် အလင်းတန်းတစ်တန်းကို မြင်ရ၏၊ ထိုအလင်းတန်းသည် ကျွန်ုပ်အပေါ် ကျရောက်သည်အထိ တဖြည်းဖြည်းဆင်းသက်လာ၏။

၁၇ ထိုအလင်းတန်းပေါ်လာပြီး မကြာမီ၌၊ ကျွန်ုပ်ကို ချုပ်ကိုင်ထားသည့် ရန်သူထံမှ လွတ်မြောက်ခဲ့ကြောင်း ကျွန်ုပ်ကိုယ်ကျွန်ုပ် သတိထားမိ၏။ ထိုအလင်း ကျွန်ုပ်အပေါ် ကိန်းဝပ်သောအခါ၊ ဖော်ပြ၍ မရလောက်အောင်ရှိသော ရောင်ခြည်နှင့် ဘုန်းတော်အရှင် ပုဂ္ဂိုလ်နှစ်ပါးကို၊ ကျွန်ုပ်အထက်လေထဲ၌ ရပ်နေသည်ကို မြင်ရ၏။ သူတို့အထဲမှတစ်ပါးက ကျွန်ုပ်၏နာမည်ကိုခေါ်၍၊ အခြားတစ်ပါးကို ညွှန်ပြလျက်၊ ဤသူသည် ငါ၏ချစ်သားပေတည်း။ သူ့ကိုနားထောင်လော့ဟု မိန့်တော်မူ၍၊ ကျွန်ုပ်ကို မြွက်ဆို၏။

၁၈ ကိုယ်တော်ရှင်ကို မေးလျှောက်ရန်သွားခြင်း၌ ကျွန်ုပ်၏ရည်ရွယ်ချက်မှာ အဘယ်ဂိုဏ်းသို့ ကျွန်ုပ်ဝင်ရမည်ကို သိနိုင်ခြင်းငှာ၊ ခပ်သိမ်းသောဂိုဏ်းများထဲမှ အဘယ်အရာသည် မှန်ကြောင်းကို သိဖို့ဖြစ်၏။ ထို့ကြောင့်၊ မကြာမြင့်မီတွင်၊ ကျွန်ုပ်သည် စကားပြောနိုင်ရန် သတိပြန်လည်လာသောအခါ၊ ကျွန်ုပ်အထက် အလင်းထဲ၌ ရပ်နေသောပုဂ္ဂိုလ်တို့အား၊ ခပ်သိမ်းသောဂိုဏ်းများထဲမှ အဘယ်အရာသည် မှန်ကြောင်း (အကြောင်းမူကား၊ ဤအချိန်၌ ခပ်သိမ်းသောဂိုဏ်းများ မှားလေသည်ဟု ကျွန်ုပ်၏ စိတ်နှလုံးထဲသို့ မဝင်ရောက်စဖူးခဲ့ပေ) နှင့် အဘယ်ဂိုဏ်းသို့ ကျွန်ုပ်ဝင်ရမည့်အကြောင်းကို မေးလျှောက်၏။

၁၉ သူတို့အထဲမှ အဘယ်ဂိုဏ်းကိုမျှ မဝင်ရမည့်အကြောင်း ကျွန်ုပ်ကို အဖြေပေးခဲ့၏၊ အကြောင်းမူကား၊ သူတို့အားလုံးသည် မှားလေ၏။ သူတို့၏ ခပ်သိမ်းသော ဘာသာအယူဝါဒများသည် သူ့အမြင်၌ စက်ဆုပ်ရွံရှာဖွယ် ဖြစ်လေကြောင်း၊ ထိုဓမ္မဆရာတို့သည် အားလုံး ဖောက်ပြန်ကြလေကြောင်း၊ “သူတို့သည် နှုတ်ခမ်းနှင့် ငါ့ထံသို့ ချဉ်းကပ်ကြ၏၊ စိတ်နှလုံးမူကား၊ ငါနှင့် ဝေးကြလေပြီ၊ လူတို့၏ ပညတ်များကို ဩဝါဒများအဖြစ် သွန်သင်ကြ၏၊ ဘုရားဝတ်၌ မွေ့လျော်ခြင်း ပုံစံသာရှိ၍၊ ထိုမွေ့လျော်ခြင်းတန်ခိုးကို ငြင်းဆိုကြ”ကြောင်း ကျွန်ုပ်ကို ဟောပြောသည့် ပုဂ္ဂိုလ်က မိန့်တော်မူ၏။

၂၀ သူသည် ကျွန်ုပ်အား သူတို့အထဲမှ အဘယ်ဂိုဏ်းကိုမျှမဝင်ရရန် တစ်ဖန် တားမြစ်ပြန်၏။ များစွာသော အခြားအရာတို့ကိုလည်း သူသည် ကျွန်ုပ်ကို မိန့်တော်မူလေရာ၊ ထိုအရာတို့ကို ဤအချိန်၌ ကျွန်ုပ်မရေးနိုင်။ ကျွန်ုပ်သတိ ပြန်လည်လာသောအခါ၊ ကျွန်ုပ်မှာ ပက်လက်လန်လဲလျက်၊ ကောင်းကင်သို့ ကြည့်လျက်သားရှိသည်ကို သတိထားမိ၏။ အလင်းထွက်ခွာသွားလေသောအခါ ကျွန်ုပ်၌ ခွန်အားမရှိ။ သို့ရာတွင်၊ မကြာမြင့်မီ အတော်အသင့် ပြန်ပြည့်လာသဖြင့် အိမ်သို့ပြန်လာခဲ့၏။ ကျွန်ုပ်သည် မီးဖိုကို မှီ၍နေစဉ်၊ အမေက မည်သည့်အမှုဖြစ်လေကြောင်း မေး၏။ ကျွန်ုပ်ကလည်း “ကိစ္စမရှိဘူး၊ အားလုံးအဆင်ပြေတယ် ကျွန်တော်ကောင်းကောင်း နေကောင်းပါတယ်”ဟု ဖြေ၏။ ထို့နောက်တွင် ကျွန်ုပ်သည် အမေအား၊ “ပရက်စ်ဘိုက်တေရီယန်ဘာသာ မမှန်ကြောင်း ကျွန်တော်ကိုယ်တိုင်သိခဲ့ရပြီ” ဟုပြော၏။ ကျွန်ုပ်ဘဝ၏အလွန်စောသောကာလ၌၊ မာရ်နတ်သည် ကျွန်ုပ်မှာ သူ့နိုင်ငံအဖို့ နှောင့်ယှက်သူနှင့် ဒုက္ခပေးသူအဖြစ် သက်သေပြရန် စီမံခံထားရကြောင်းကို သတိပြုမိလေသည့်ပမာရှိ၏။ ထိုသို့မဟုတ်လျှင်၊ မှောင်မိုက်၏တန်ခိုးတို့သည် ကျွန်ုပ်တစ်ဖက်၌ အဘယ်ကြောင့် ပူးပေါင်းကြသနည်း။ ကျွန်ုပ်တစ်ဖက်၌ တက်လာသည့် ဆန့်ကျင်ခြင်းနှင့် ညှဉ်းဆဲခြင်းတို့သည် ကျွန်ုပ်ကလေးဘဝ၌ပင် အဘယ်ကြောင့် ရှိကြလေသနည်း။

အချို့သောဟောပြောသူများနှင့် အခြားသော ဘာသာရေးဓမ္မဆရာတို့သည် ပထမရူပါရုံအကြောင်း မှတ်တမ်းကို ငြင်းပယ်ကြ၏—ညှဉ်းဆဲခြင်းသည် ဂျိုးဇက်စမစ်အပေါ်စုပုံ၏—သူသည် ရူပါရုံ၏ အဖြစ်မှန်ကို သက်သေခံ၏။ (အခန်းငယ် ၂၁–၂၆။)

၂၁ ကျွန်ုပ်သည် ဤရူပါရုံကို ရရှိခဲ့ပြီးနောက် ရက်အနည်းငယ်၌၊ ယခင်ဖော်ပြပါ ဘာသာရေး နိုးကြားမှု၌ အလွန်တက်ကြွလေသူတစ်ဦးဖြစ်သည့် မက်သဒစ်ဟောပြောသူများထဲမှ တစ်ဦးနှင့် အမှတ်မထင်တွေ့မိ၍၊ ဘာသာရေးအကြောင်းအရာကို စကားပြောကြ၏၊ ကျွန်ုပ်သည် ရရှိခဲ့လေသည့် ရူပါရုံအကြောင်း သူ့ကိုဖော်ပြရန် ဤအခွင့်အရေးကို ယူခဲ့၏။ ကျွန်ုပ်သည် သူ၏အပြုအမူကို ကြီးစွာအံ့အားသင့်မိ၏။ သူသည် ကျွန်ုပ်စကားကို မထီမဲ့မြင်ပြုရုံမျှမက၊ ကြီးစွာသော မရိုသေမလေးစားခြင်းနှင့်ပင်၊ ဤကာလ၌ ရူပါရုံများ သို့မဟုတ် ဗျာဒိတ်တော်များကဲ့သို့သောအရာများ မရှိလေကြောင်း၊ ထိုခပ်သိမ်းသောအရာတို့မှာ နတ်ဆိုးထံမှဖြစ်ကြောင်း၊ ထိုကဲ့သို့သောအရာခပ်သိမ်းတို့သည် တမန်တော်များနှင့်အတူ ရပ်တန့်သွားခဲ့လေပြီဖြစ်ကြောင်း၊ ထိုအရာများကဲ့သို့ နောက်ထပ်အဘယ်တော့မျှ ရှိလိမ့်မည်မဟုတ်ကြောင်းတို့ကို ဆို၏။

၂၂ သို့သော်လည်း၊ ကျွန်ုပ်၏ရာဇဝင်ကို ပြောပြခြင်းက၊ ဘာသာရေးဓမ္မဆရာတို့၌ ကျွန်ုပ်ကိုဆန့်ကျင်၍၊ ကြီးစွာသော ဘက်လိုက်ခြင်းကို လှုံ့ဆော်ခဲ့လေကြောင်း၊ ဆက်၍တိုးပွားသည့် ကြီးစွာသောညှဉ်းဆဲခြင်း၏ အကြောင်းရင်းလည်း ဖြစ်လေကြောင်း၊ ကျွန်ုပ်သည် မကြာမြင့်မီ တွေ့ရှိခဲ့၏။ ကျွန်ုပ်မှာ အသက်တစ်ဆယ့်လေးနှင့် တစ်ဆယ့်ငါးနှစ်ကြားရှိ၊ မထင်ရှားသော လူငယ်လေးတစ်ယောက် ဖြစ်၍၊ ဘဝ၌ ကျွန်ုပ်၏အခြေအနေတို့မှာ လောကထဲ၌ အရေးမကြီးသော လူငယ်လေးတစ်ယောက်အဖြစ် ရှိသော်လည်း၊ အဆင့်အတန်းမြင့်သောလူတို့က ကျွန်ုပ်တစ်ဖက်၌ လူထု၏စိတ်ကိုလှုံ့ဆော်ရန် ကောင်းစွာသတိထားမိ၍၊ ခါးသည်းသောညှဉ်းဆဲခြင်းကို ဖန်တီးကြ၏။ ဤအရာမှာ ခပ်သိမ်းသောဂိုဏ်းတို့၌ အစဉ်အလာဖြစ်လေ၏—ခပ်သိမ်းသောသူတို့သည် ကျွန်ုပ်ကို ညှဉ်းဆဲရန် ပူးပေါင်းကြ၏။

၂၃ အသက်တစ်ဆယ့်လေးနှစ်ထက် အနည်းငယ်ကျော်သည့် မထင်ရှားသော လူငယ်လေးတစ်ယောက်၊ မိမိနေ့စဉ် အလုပ်ဖြင့် ချို့တဲ့စွာအသက်မွေးမှုကိုရရှိရန် ကြမ္မာငင်လေသည့်သူလည်းဖြစ်လေသည့် သူတစ်ယောက်အဖို့ အလွန်ထူးဆန်းသည်ကို ထိုအချိန်မှစ၍၊ ကျွန်ုပ်အား အကြိမ်ကြိမ် အလေးအနက် တွေးတောစဉ်းစားခြင်းသို့ ရောက်စေ၏၊ ထိုကာလ၌ အကျော်ကြားဆုံး ဂိုဏ်းများမှ ကြီးမြတ်သောသူများ၏ သတိမူခြင်းကို သူတို့အထဲ၌ အခါးဆုံး ညှဉ်းဆဲခြင်းနှင့် ကဲ့ရဲ့ပြောဆိုခြင်း စိတ်သဘောကို ဖန်တီးသည့်နည်းဖြင့် ဆွဲဆောင်ရန် အရေးကြီးလောက်သောသူတစ်ဦးအဖြစ် မှတ်ယူခံရစေ၏။ သို့ရာတွင်၊ ထူးဆန်းသည်ဖြစ်စေ၊ မထူးဆန်းသည်ဖြစ်စေ ထိုအမှုဖြစ်လေ၏၊ ကျွန်ုပ်ကိုယ်တိုင်အဖို့ ကြီးစွာသောဝမ်းနည်းခြင်း၏ အကြောင်းရင်းလည်း အကြိမ်ကြိမ်ဖြစ်လေ၏။

၂၄ သို့သော်လည်း၊ ထိုအမှုမှာ အဘယ်သို့ပင်ဖြစ်စေ ရူပါရုံတစ်ခုကို ကျွန်ုပ်မြင်ရသည့် အဖြစ်တစ်ခုပေတည်း။ အဂြိပ္ပမင်းကြီးရှေ့၌ ပေါလု သူ၏ချေပခြင်းကိုပြု၍၊ ထို့အတူ အလင်းကိုမြင်၍၊ အသံကိုကြားသည့်အချိန်က သူရရှိခဲ့လေသည့် ရူပါရုံအကြောင်းကို ပြန်လည်၍ ပြောပြစဉ်ကကဲ့သို့ပင် ကျွန်ုပ်ခံစားမိကြောင်းကို တွေးလျက်ရှိခဲ့၏။ သို့ရာတွင် သူ့ကိုယုံကြည်သောသူမှာ အနည်းငယ်သာ ရှိလေ၏။ အချို့သောသူများက သူသည် မရိုးသားဟု ဆိုကြ၏၊ အခြားသောသူများက သူသည် ရူး၏ဟု ဆိုကြ၏။ သူသည်လည်း လှောင်ပြောင်သရော်ခံရ၊ ကဲ့ရဲ့ပြောဆိုခံရ၏။ သို့ရာတွင် ခပ်သိမ်းသော ဤအရာတို့က သူ့ရူပါရုံ၏ အဖြစ်မှန်ကို မဖျက်ဆီးနိုင်။ သူသည် ရူပါရုံတစ်ခုကို မြင်ခဲ့ရလေ၏၊ ရရှိခဲ့ကြောင်းကို သူသိ၏၊ ကောင်းကင်အောက်ရှိ ခပ်သိမ်းသော ညှဉ်းဆဲခြင်းက ထိုအမှုကို တစ်မျိုးတစ်ဖုံ မဖြစ်စေနိုင်ခဲ့ပေ။ သူ့ကို သေခြင်းသို့တိုင်အောင် ညှဉ်းဆဲခဲ့ကြသော်လည်း၊ သူသိ၏၊ အလင်းတစ်ခုကို သူမြင်ခဲ့ရကြောင်းနှင့် သူ့ကိုစကားပြောနေသည့် အသံတစ်သံကို သူကြားခဲ့ရကြောင်း၊ နှစ်ခုစလုံးကို သူ၏နောက်ဆုံးထွက်သက်အထိပင် သိ၏၊ လောကတစ်ခုလုံးက သူ့အား တစ်မျိုးတစ်ဖုံ စဉ်းစားစေရန် သို့မဟုတ် ယုံကြည်စေရန် မပြုနိုင်ခဲ့ပေ။

၂၅ ကျွန်ုပ်မှာလည်း ထိုကဲ့သို့ပင်ဖြစ်လေ၏။ ကျွန်ုပ်သည် အလင်းတစ်ခုကို အမှန်မြင်ခဲ့ရ၏၊ ထိုအလင်း၏ အလယ်၌လည်း ပုဂ္ဂိုလ်နှစ်ဦးကို ကျွန်ုပ်မြင်ခဲ့ရ၏၊ သူတို့သည် အစစ်အမှန်ပြု၍ ကျွန်ုပ်ကို ဟောပြောခဲ့၏။ ကျွန်ုပ်သည် ရူပါရုံတစ်ခုကို မြင်ခဲ့ရကြောင်း ပြောဆိုခြင်းကြောင့် အမုန်းခံရ၊ ညှဉ်းဆဲခံရသော်လည်း၊ ထိုအမှုမှာ အမှန်ပင်ဖြစ်၏။ သူတို့က ကျွန်ုပ်အား ညှဉ်းဆဲလျက်၊ ကဲ့ရဲ့ပြောဆိုလျက်၊ ထိုသို့ဆိုခြင်းကြောင့် ကျွန်ုပ်တစ်ဖက်၌ မှားယွင်းစွာ အပြစ်တကာတင်လျက် ရှိစဉ်တွင်၊ အမှန်တရားကို ပြောပြခြင်းအတွက် ကျွန်ုပ်ကို အဘယ်ကြောင့် ညှဉ်းဆဲကြသနည်း၊ ကျွန်ုပ်သည် ရူပါရုံတစ်ခုကို အမှန်ပင်မြင်ခဲ့လေ၏။ ကျွန်ုပ်သည် အဘယ်သို့သောသူဖြစ်၍ ဘုရားသခင်ကို ဆီးတားနိုင်သနည်း။ လောကသည် ကျွန်ုပ်အမှန်ပင် မြင်ခဲ့လေသည့်အရာကို ကျွန်ုပ်ငြင်းဆိုစေရန် အဘယ်ကြောင့် ကြံစည်ကြသနည်း။ အကြောင်းမူကား၊ ကျွန်ုပ်သည် ရူပါရုံတစ်ခုကို မြင်ခဲ့လေပြီ။ ထိုရူပါရုံကို ကျွန်ုပ်သိ၏၊ ဘုရားသခင်သိတော်မူကြောင်းကိုလည်း ကျွန်ုပ်သိ၏၊ ကျွန်ုပ်မငြင်းဆိုနိုင်၊ ငြင်းလည်း မငြင်းဆိုဝံ့။ ထိုသို့ပြုခြင်းအားဖြင့်ပင် ကျွန်ုပ်သည် ဘုရားသခင်ကို စိတ်ပျက်စေလိမ့်မည်၊ ပြစ်ဒဏ်ချမှတ်ခြင်းသို့လည်း ရောက်လိမ့်မည်ဟု ကျွန်ုပ်စိတ်နှလုံးထဲ၌ တွေးမိ၏။

၂၆ ကျွန်ုပ်သည် ယခုတွင် ဂိုဏ်းဂဏလောကနှင့် စပ်လျဉ်း၍ စိတ်၌ ကျေနပ်၏—ထိုဂိုဏ်းတို့အထဲမှ တစ်စုံတစ်ခုနှင့် ပူးပေါင်းရန်မှာ ကျွန်ုပ်တာဝန်မဟုတ်၊ နောက်ထပ် လမ်းညွှန်ခံရသည်အထိ ဆက်၍ နေရုံသာရှိ၏။ ဉာဏ်ပညာကို လိုသောသူသည် ဘုရားသခင်ထံ တောင်းလျှင်၊ ရရှိ၏၊ ကဲ့ရဲ့ပြစ်တင်မခံရဟူသော—ယာကုပ်၏ သက်သေခံချက် မှန်ကန်ကြောင်းကို ကျွန်ုပ်တွေ့ခဲ့ရလေ၏။

မော်ရော်နိုင်းသည် ဂျိုးဇက်စမစ်ထံသို့ ပေါ်ထွက်လာ၏—ဂျိုးဇက်၏အမည်သည် ခပ်သိမ်းသော ပြည်သားတို့၌ အကောင်းအားဖြင့်လည်းကောင်း၊ အဆိုးအားဖြင့်လည်းကောင်း ထင်ရှားလိမ့်မည်—မော်ရော်နိုင်းသည် သူ့အား မော်မုန်ကျမ်းအကြောင်းနှင့် ကိုယ်တော်ရှင်၏ ကျရောက်လာမည့် တရား စီရင်တော်မူခြင်းများအကြောင်းကို ပြောပြ၏၊ များစွာသော ကျမ်းစာတို့ကိုလည်း ကိုးကားပြ၏—ရွှေပုရပိုက်ပြားများ ဖွက်ထားသည့်နေရာကို ဖော်ပြ၏—မော်ရော်နိုင်းသည် ပရောဖက်ကို ဆက်၍ သွန်သင်၏။ (အခန်းငယ် ၂၇–၅၄။)

၂၇ ကျွန်ုပ်သည် ဘဝ၌ ကျွန်ုပ်၏ပုံမှန်အလုပ်များကို တစ်ထောင်ရှစ်ရာနှစ်ဆယ့်ခုနစ်ခုနှစ်၊ စက်တင်ဘာလ၊ နှစ်ဆယ့်တစ်ရက်နေ့အထိဆက်၍ လုပ်ကိုင်ခဲ့၏၊ ရူပါရုံတစ်ခုကို ရရှိခဲ့လေကြောင်း ဆက်၍ အတည်ပြုခဲ့သဖြင့်၊ ဘာသာတရားရှိသောသူနှင့် ဘာသာတရားမရှိသောသူနှစ်မျိုးစလုံး၏ အမျိုးမျိုးသော လူတို့လက်၌ ပြင်းထန်သော ညှဉ်းဆဲခြင်းကို အချိန်ရှိသမျှ ခံစားခဲ့ရ၏။

၂၈ ကျွန်ုပ်ရူပါရုံကို ရခဲ့လေသည့် အချိန်နှင့် တစ်ထောင်ရှစ်ရာနှစ်ဆယ့်သုံးခုနှစ်ကြား၌ကျသည့် အချိန်ကာလအပိုင်းအခြားအတွင်း၌—ထိုကာလရှိ ဂိုဏ်းများထဲမှ အဘယ်တစ်ခုနှင့်မျှ မပူးပေါင်းရန် တားမြစ်ခံရလျက်၊ အလွန်နုနယ်သော နှစ်များလည်းဖြစ်၍၊ ကျွန်ုပ်၏ အဆွေခင်ပွန်းများလည်း ဖြစ်ဖူးသော၊ ကျွန်ုပ်ကို ကြင်နာစွာ ဆက်ဆံခဲ့ကြလေသော၊ ကျွန်ုပ်အလိမ်ခံရသည်ဟု သူတို့ထင်မှတ်လျှင်၊ ကျွန်ုပ်ကို ပြန်လည်ခေါ်ဆောင်ရန်၊ သင့်လျော်၍ ချစ်ခင်ကြင်နာသောနည်းဖြင့်၊ ကြိုးစားအားထုတ်ခဲ့သူတို့အားဖြင့် ညှဉ်းဆဲခြင်းကိုလည်း ခံရသဖြင့်—ကျွန်ုပ်သည် အမျိုးမျိုးသော သွေးဆောင် ဖြားယောင်းခြင်းတို့ အောက်၌ ရောက်လေ၏။ ထို့အတူ၊ အမျိုးမျိုးသော အဖွဲ့များနှင့်လည်း ရောနှောခဲ့၏၊ ကျွန်ုပ်သည် မိုက်မဲသည့် မှားယွင်းမှုများစွာထဲသို့ မကြာခဏလဲကျခဲ့၏၊ ငယ်ရွယ်သူတို့၏ အားနည်းချက်၊ ထို့အတူ လူသား၏ ချို့ယွင်းချက် သဘောကိုလည်း ဖော်ပြခဲ့၏။ ထိုအရာတို့မှာ၊ ကျွန်ုပ်ကို အထူးထူး အပြားပြားသော သွေးဆောင်ဖြားယောင်းခြင်းထဲသို့ ပို့ဆောင်ကြောင်း ကျွန်ုပ်ပြောရသည်ကို ဝမ်းနည်း၏၊ ဘုရားသခင်၏အမြင်၌ ဆိုးရွားပေ၏။ ဤအပြစ်များ ဝန်ခံခြင်းကို ပြုရာ၌၊ ကျွန်ုပ်ကို အဘယ်ကြီးစွာသော သို့မဟုတ် ထိခိုက်ပျက်စီးစေသော အပြစ်များကြောင့် အပြစ်ရောက်သည်ဟု အဘယ်သူမျှ မယုံကြည်ရ။ ထိုကဲ့သို့သောအပြစ်ကို ကျူးလွန်ဖို့ စိတ်ညွတ်ခြင်းမှာ ကျွန်ုပ်၏သဘော၌ အဘယ်တုန်းကမျှမရှိ။ သို့ရာတွင် ကျွန်ုပ်သည် စိတ်ပေါ့ခြင်းကြောင့် အပြစ်ရောက်၏၊ ကျွန်ုပ် ခေါ်သွင်းခံခဲ့ရသကဲ့သို့ပင်၊ ဘုရားသခင်၏ ခေါ်သွင်းခံရလေသူတစ်ဦး ထိန်းသိမ်းသင့်သည့် ဂုဏ်သိက္ခာနှင့်မညီသည့် ရွှင်မြူးသောအပေါင်းအဖော်၊ အစရှိသည်တို့နှင့် တစ်ခါတစ်ရံ၌ သင်းဖွဲ့ခဲ့၏။ သို့ရာတွင်၊ ဤအမှုမှာ ကျွန်ုပ်၏ ငယ်ရွယ်စဉ်ဘဝကို သတိရသည့်သူ၊ ထို့အတူ ကျွန်ုပ်၏ ပင်ကိုယ်မြူးကြွရွှင်ပြသောစိတ်နေသဘောထားနှင့် ကျွမ်းဝင်သည့်သူ အဘယ်သူ့အတွက်မဆို အလွန်ထူးဆန်းသည့်ဟန် ရှိမည်မဟုတ်ပေ။

၂၉ ဤအရာတို့၏ အကျိုးဆက်အဖြစ်၊ ကျွန်ုပ်သည် ကျွန်ုပ်၏အားနည်းချက်နှင့် မစုံလင်မှုများ အတွက် ပြစ်ဒဏ်ချမှတ်ခံရသည်ဟု အကြိမ်ကြိမ် ခံစားမိ၏။ အထက်ဖော်ပြပါ စက်တင်ဘာ နှစ်ဆယ့်တစ်ရက်နေ့ ညဉ့်ဦးအချိန်၌၊ ထိုညဉ့်အဖို့ အိပ်ရာဝင်ခဲ့လေပြီးနောက်၊ ကျွန်ုပ်၏ ခပ်သိမ်းသော အပြစ်များနှင့်မိုက်မဲခြင်းတို့အဖို့ ခွင့်လွှတ်ခြင်းအတွက်၊ ထို့အတူ ကျွန်ုပ်၏ အခြေအနေနှင့် ရှေ့တော်၌ ရပ်တည်မှုတို့ကို သိနိုင်ခြင်းငှာ၊ ကျွန်ုပ်ထံသို့ ထင်ရှားစွာပြခြင်း အတွက်လည်း အနန္တတန်ခိုးရှင် ဘုရားသခင်ထံသို့ ကျွန်ုပ်ကိုယ်တိုင် ဆုတောင်းခြင်းနှင့် ပတ္ထနာပြုခြင်းဖြင့် ဆက်ကပ်၏။ အကြောင်းမူကား၊ ကျွန်ုပ်သည် ယခင်ကရရှိခဲ့လေသည့်အတိုင်း၊ မြင့်မြတ်သော ထင်ရှားစွာပြခြင်းကိုရရှိမည်ဟု စိတ်ချယုံကြည်ခြင်း အပြည့်ရှိ၏။

၃၀ ကျွန်ုပ်သည် ဘုရားသခင်အား ထိုကဲ့သို့ ပတ္ထနာပြုလျက်ရှိစဉ်တွင်၊ ကျွန်ုပ်၏အခန်းအတွင်း၌ အလင်းရောင်တစ်ခု ထွက်ပေါ်လာသည်ကို တွေ့ရှိရ၏။ ထိုအလင်းရောင်သည် အခန်းကို မွန်းတည့်ချိန်မှာထက် သာ၍လင်းလေသည့်တိုင်အောင် ဆက်၍ဖြာထွက်၏။ ထို့နောက်တွင်၊ ကျွန်ုပ်၏အိပ်ရာဘေး၌ ပုဂ္ဂိုလ်တစ်ဦး ရုတ်တရက်ပေါ်ထွက်လာပြီး၊ လေထဲတွင်ရပ်နေ၏။ အကြောင်းမူကား၊ သူ၏ခြေထောက်များသည် ကြမ်းပြင်နှင့် မထိပေ။

၃၁ သူသည် အထူးကဲဆုံးအဖြူရောင်ဝတ်ရုံပွပွကို ဝတ်ဆင်ထား၏။ ထိုအရာသည် မြေကြီးပေါ်တွင် ကျွန်ုပ်မြင်ဖူးသမျှသောအရာများထက် သာလွန်သော အဖြူရောင်ဖြစ်၏။ မြေကြီးအရာတစ်စုံတစ်ခုကိုမျှ ထိုကဲ့သို့ အလွန်ဖြူပြီး တောက်ပလာစေခြင်းငှာ ပြုနိုင်မည်မဟုတ်သည်ကိုလည်း ကျွန်ုပ်ယုံကြည်ပါ၏။ သူ၏လက်နှင့် လက်ဖျံတို့သည်လည်း လက်ကောက်ဝတ်အပေါ်အထိ ဗလာကျင်းလျက်ရှိ၏။ သူ၏ခြေတို့သည်လည်း ခြေထောက်များကဲ့သို့ပင် ခြေချင်းဝတ်အထက်အနည်းငယ်အထိ ဗလာကျင်းလျက်ရှိ၏။ သူ၏ဦးခေါင်းနှင့် လည်ပင်းတို့သည်လည်း၊ ဖုံးအုပ်မထားဘဲရှိ၏။ သူ့တွင် ဤဝတ်ရုံမှတစ်ပါး အခြားအဝတ်မရှိသည်ကို ကျွန်ုပ်တွေ့ရ၏။ ထိုဝတ်ရုံမှာ ပွင့်လျက်ရှိသဖြင့် ကျွန်ုပ်သည် သူ၏ရင်အုပ်ကို မြင်နိုင်၏။

၃၂ သူ၏ဝတ်ရုံသည်သာလျှင် အလွန်ဖြူသည်မဟုတ်ဘဲ သူ၏တစ်ကိုယ်လုံးသည်လည်း မဖော်ပြနိုင်လောက်အောင် အသရေထင်ရှားပြီး၊ သူ၏မျက်နှာထားမှာ လျှပ်စီးလက်ခြင်းနှင့် အမှန်ပင်တူပေ၏။ အခန်းသည် အလွန်လင်းသော်လည်း သူ့ကိုယ်ခန္ဓာတစ်ဝိုက်တွင်မျှလောက် အလွန်မတောက်ပပေ။ ကျွန်ုပ်သည် သူ့ကို ကြည့်မြင်စက ကြောက်လန့်သော်လည်း၊ မကြာမြင့်မီတွင် ကြောက်ခြင်းသည် ကျွန်ုပ်ကို စွန့်ခွာသွား၏။

၃၃ ကျွန်ုပ်၏နာမည်ကိုခေါ်၍ ပြောကြားသည်မှာ သူသည် ဘုရားသခင်၏မျက်မှောက်တော်မှ ကျွန်ုပ်ထံသို့ စေလွှတ်တော်မူသည့် တမန်တော်တစ်ပါးဖြစ်ကြောင်း၊ သူ၏အမည်မှာ မော်ရော်နိုင်းဖြစ်ကြောင်း၊ ကျွန်ုပ်လုပ်ဆောင်စေဖို့ရာ အလုပ်တစ်ခု ဘုရားသခင်၌ ရှိတော်မူကြောင်း၊ ကျွန်ုပ်၏အမည်ကို ခပ်သိမ်းသောပြည်သား၊ ဆွေမျိုးစုနှင့် အသီးသီးဘာသာစကားကိုပြောသူတို့၌ အကောင်းအားဖြင့်လည်းကောင်း၊ အဆိုးအားဖြင့်လည်းကောင်း တွေးထင်ကြလိမ့်မည်ဖြစ်ကြောင်း၊ သို့မဟုတ်၊ ထိုအမည်ကို ခပ်သိမ်းသောလူမျိုးတို့၌ အကောင်းနှင့်အဆိုးနှစ်မျိုးစလုံး ပြောဆိုကြလိမ့်မည်ဖြစ်ကြောင်းပေတည်း။

၃၄ ရွှေပုရပိုက်ပြားများပေါ်တွင် ရေးထားပြီး၊ ဤတိုက်၌ ယခင်ကနေထိုင်ကြသောသူများနှင့် သူတို့ပေါက်ဖွားခဲ့ရာအရပ်တို့အကြောင်း မှတ်တမ်းပါဝင်လျက်ရှိသည့် မြှုပ်ထားသော ကျမ်းတစ်ကျမ်းရှိလေကြောင်း သူဆို၏။ ထို့အတူ သူဆိုလေသည်ကား၊ ကယ်တင်ရှင်မှ ရှေးကနေထိုင်သောသူများထံသို့ ပေးအပ်တော်မူသည့် ထာဝရတည်မြဲသော ဧဝံဂေလိတရားတော်အပြည့်အစုံ ထိုကျမ်း၌ပါဝင်ကြောင်းဖြစ်၏။

၃၅ ထို့အတူ၊ သူဆိုသည်ကား၊ ငွေကိုင်းများထဲ၌ ကျောက်နှစ်လုံး ရှိလေကြောင်း—ဤကျောက်တို့ကို ရင်အုပ်တန်ဆာ၌ချည်နှောင်ထားပြီး၊ ဥရိမ်နှင့် သုမိမ်ဟုခေါ်၍—ရွှေပုရပိုက်ပြားများနှင့်အတူ မြှုပ်ထားကြောင်း၊ ဤကျောက်များကို ပိုင်ဆိုင်၍ အသုံးပြုသောသူများကို ‘မြင်သောသူများ’ဟု ရှေးသို့မဟုတ် ယခင်အချိန်က ခေါ်ကြကြောင်း၊ ထိုကျမ်းကို ဘာသာပြန်ခြင်းတည်းဟူသော ရည်ရွယ်ချက်အတွက် ဤကျောက်တို့ကို ဘုရားသခင်ပြင်ဆင်ပေးထားတော်မူကြောင်းတို့ဖြစ်၏။ …

၃၆ ဤအရာတို့ကို ကျွန်ုပ်အား ပြောပြပြီးနောက်၊ သူသည် ဓမ္မဟောင်းကျမ်းမှ ပရောဖက်ပြု ဟောချက်များအား ကိုးကားခြင်းကို စတင်ခဲ့၏။ ပထမတွင် မာလခိတတိယအခန်းကြီးမှ အချို့ကို ကိုးကားခဲ့၏။ ကျွန်ုပ်တို့၏သမ္မာကျမ်းမှ ရေးထားပုံနှင့် အနည်းငယ်အပြောင်းအလဲ ရှိသော်လည်း၊ အလားတူပရောဖက်ပြုဟောချက်၏ စတုတ္ထ သို့မဟုတ် နောက်ဆုံးအခန်းကြီးကိုလည်း ကိုးကားခဲ့၏။ ကျွန်ုပ်တို့၏ ကျမ်းများ၌ ရေးထားသည့်အတိုင်း ပထမအခန်းငယ်ကို ကိုးကားခြင်းအစား၊ အောက်ပါကဲ့သို့ ကိုးကားခဲ့၏။

၃၇ အကြောင်းမူကား၊ ရှုလော့၊ မီးဖို၌ လောင်မြိုက်သကဲ့သို့ လောင်မြိုက်သောကာလ ကျရောက်လာလိမ့်မည်။ ထိုမှတစ်ပါး၊ မာနကြီးသောသူအပေါင်းနှင့် ဆိုးညစ်စွာပြုသောသူအပေါင်းတို့သည် ရိုးပြတ်ကဲ့သို့ လောက်မြိုက်ကြလိမ့်မည်။ အကြောင်းမူကား၊ ရောက်လာသည့် သူတို့သည် ထိုသူတို့ကို လောင်မြိုက်စေသဖြင့်၊ အရင်းအဖျားမျှ ချန်ထားလိမ့်မည်မဟုတ်ဟု ကောင်းကင်ဗိုလ်ခြေကိုယ်တော်ရှင် မိန့်တော်မူ၏။

၃၈ ထိုမှတစ်ဖန်၊ ပဉ္စမအခန်းငယ်ကို အောက်ပါကဲ့သို့ ကိုးကားခဲ့၏။ ရှုလော့၊ ကိုယ်တော်ရှင်၏ ကြီးစွာသော ကြောက်မက်ဖွယ်နေ့ မကျရောက်လာမီ၊ ငါသည် သင်တို့အား ယဇ်ပုရောဟိတ်အခွင့်ကို ပရောဖက်ဧလိယ၏ လက်အားဖြင့် ဖော်ပြမည်။

၃၉ နောက်အခန်းငယ်ကိုလည်း ကွဲပြားစွာ ကိုးကားခဲ့၏။ ဘိုးဘေးတို့ထံပြုထားသည့် ကတိတော်များကို သားမြေးတို့၏ စိတ်နှလုံး၌ သူစိုက်လိမ့်မည်။ သားမြေးတို့၏စိတ်နှလုံးသည် သူတို့၏ဘိုးဘေးတို့ထံ လှည့်လိမ့်မည်။ ထိုသို့မဟုတ်လျှင် မြေကြီးတစ်ခုလုံးသည် သူကြွလာတော်မူသည့်အခါ ရှင်းရှင်းဖျက်ဆီးခြင်းသို့ ရောက်လိမ့်မည်။

၄၀ ဤအရာများသို့ ထပ်လောင်း၍၊ ပြီးပြည့်စုံစေလုနီးပြီဖြစ်သည့် ဟေရှာယအခန်းကြီး တစ်ဆယ့်တစ်ကိုလည်း သူကိုးကားခဲ့၏။ တမန်တော်ဝတ္ထုတတိယအခန်းကြီး၊ အခန်းငယ် နှစ်ဆယ့်နှစ်နှင့် နှစ်ဆယ့်သုံးကိုလည်း၊ ကျွန်ုပ်တို့၏ ဓမ္မသစ်ကျမ်း၌ဆိုလေသည့်အတိုင်း အတိအကျ ကိုးကားခဲ့၏။ ထိုပရောဖက်မှာ ခရစ်တော်ဖြစ်ကြောင်း၊ သို့ရာတွင် “သူ့အသံကို မကြားလိုသည့်သူများ လူမျိုးတို့၌ ပယ်ရှင်းခံရမည့်နေ့ မကျရောက်လာသေး၊” သော်လည်း မကြာမြင့်မီ ကျရောက်လာမည့်အကြောင်း မိန့်တော်မူခဲ့၏။

၄၁ သူသည် ယောလ ဒုတိယအခန်းကြီး၊ အခန်းငယ် နှစ်ဆယ့်ရှစ်မှ နောက်ဆုံးအထိကိုလည်း ကိုးကားခဲ့၏။ ဤဟောပြောချက်မှာ ပြီးပြည့်စုံစေခြင်းမရှိသေးသော်လည်း၊ မကြာမြင့်မီ ပြီးပြည့်စုံ စေတော့မည့်အကြောင်းကိုလည်း ဟောပြောခဲ့၏။ တစ်ပါးအမျိုးသားတို့၏ပြည့်စုံခြင်း မကြာမြင့်မီ ဝင်ရောက်လာတော့မည့်အကြောင်းကိုလည်း နောက်ထပ်၍ဖော်ပြခဲ့၏။ ကျမ်းစာမှ အခြားကျမ်းပိုဒ် များစွာကို ကိုးကားခဲ့၏၊ ဤနေရာ၌ ဖော်ပြ၍မရနိုင်သည့် ရှင်းပြချက်များစွာကိုလည်း ပံ့ပိုးပေးခဲ့၏။

၄၂ ထိုမှတစ်ဖန်၊ ကျွန်ုပ်ကို သူပြောပြသည်မှာ ကျွန်ုပ်သည် သူပြောလေသည့် ထိုပုရပိုက်ပြားများကိုရလျှင်—ထိုအရာတို့ကို ရယူရမည့်အချိန်သည် ပြီးပြည့်စုံခြင်းသို့ မရောက်သေး၍—ထိုအရာတို့ကိုပြရဖို့ ကျွန်ုပ်ကို ကိုယ်တော်ရှင်မိန့်မှာတော်မူမည့်သူတို့မှတစ်ပါး အဘယ်သူ့ကိုမျှ မပြရမည့်အကြောင်း၊ ဥရိမ်နှင့် သုမိမ်တို့နှင့်အတူ၊ ရင်အုပ်တန်ဆာတို့ကိုလည်း မပြရမည့်အကြောင်း၊ ကျွန်ုပ်သည်ပြလျှင် ဖျက်ဆီးခံရမည့်အကြောင်းဖြစ်၏။ သူနှင့်ကျွန်ုပ် ထိုပုရပိုက်ပြားများအကြောင်းကို ပြောဆိုလျက်ရှိစဉ်တွင်၊ ရူပါရုံကို ကျွန်ုပ်၏စိတ်၌ဖွင့်ပေးသဖြင့်၊ ကျွန်ုပ်သည် ပုရပိုက်ပြားများ မြှုပ်ထားသော နေရာကိုမြင်နိုင်ပြီး၊ ထိုသို့မြင်ရခြင်းမှာ အလွန်ရှင်းလင်းပြတ်သားသဖြင့်၊ ကျွန်ုပ်သည် သွားရောက်သောအခါ ထိုနေရာကို တစ်ဖန်သိရ၏။

၄၃ ဤသို့စကားပြောဆိုပြီးနောက်တွင် အခန်းအတွင်းရှိအလင်းသည် ကျွန်ုပ်ကိုစကားပြောနေသောသူ၏ကိုယ်ခန္ဓာတစ်ဝိုက်တွင် စုဝေးစပြု၍၊ သူ၏ဘေးပတ်လည်၌မှတစ်ပါး အခန်းကို တစ်ဖန်မှောင်၍ကျန်ခဲ့သည့်တိုင်အောင် ဆက်၍စုဝေးသည်ကို ကျွန်ုပ်မြင်၏။ ထို့နောက်တွင်၊ ကျွန်ုပ်မြင်သောခဏ၌ ထိုအလင်းသည် ကောင်းကင်ဘုံတည့်တည့်သို့သွယ်တန်းသည့် ပြွန်ကဲ့သို့ဖြစ်၏၊ သူသည်လည်း လုံးဝကွယ်ပျောက်သွားသည့်တိုင်အောင် တက်သွား၏၊ အခန်းသည်လည်း ဤကောင်းကင်ဘုံရှင်အလင်း မရောက်မီကရှိလေသကဲ့သို့ပင် ကျန်ရစ်လေ၏။

၄၄ ကျွန်ုပ်သည် လဲလျောင်း၍ ထိုမြင်ကွင်း၏ထူးခြားဆန်းကြယ်မှုကို တွေးတောနေမိပြီး၊ ကျွန်ုပ်အား သာမန်ထက်သာလွန်သော ဤတမန်တော်ပြောပြသည့်အရာကို ကြီးစွာအံ့ဩလျက်ရှိ၏။ ထို့နောက်တွင်၊ ကျွန်ုပ်ဆင်ခြင်အောက်မေ့လျက်ရှိစဉ်တွင်၊ ကျွန်ုပ်၏အခန်းမှာ တစ်ဖန်ထွန်းလင်းစပြုလျက်ရှိသည်ကို ကျွန်ုပ်ရုတ်တရက် တွေ့ရှိရပြီး၊ ချက်ချင်းပင်၊ ကျွန်ုပ်၏အိပ်ရာဘေး၌ ထိုကောင်းကင်ဘုံရှင်တမန်တော် တစ်ဖန်ရောက်လာပြန်၏။

၄၅ သူသည် စတင်၍ဟောပြောလျက်၊ ပထမအကြိမ်အကြည့်အရှုကြွရောက်စဉ်က သူပြုခဲ့သည့် အလွန်ထပ်တူထပ်မျှဖြစ်သောအရာတို့ကို အနည်းငယ်မျှပင် အပြောင်းအလဲမရှိဘဲ တစ်ဖန်ပြန်လည်၍ပြောပြ၏။ သူသည် ထိုသို့ပြုပြီးလျှင်၊ ငတ်မွတ်ခေါင်းပါးခြင်းဘေး၊ ဓားဘေးနှင့် ကာလနာဘေးတို့အားဖြင့် ကြီးစွာသော လူဆိတ်ညံခြင်းတို့နှင့်အတူ မြေကြီးပေါ်သို့ ကျရောက်လာမည့် ကြီးစွာသောတရားစီရင်တော်မူခြင်းများအကြောင်း၊ ထို့အတူ ဤပြင်းထန်သောတရားစီရင်တော်မူခြင်းများသည် ယခုမျိုးဆက်၌ မြေကြီးပေါ်သို့ ကျရောက်မည်ဖြစ်ကြောင်း ကျွန်ုပ်ကို ပြောပြ၏။ သူသည် ဤအရာတို့ကို ပြန်လည်၍ ပြောပြလေပြီးနောက် ယခင်ပြုလေသကဲ့သို့ပင် တစ်ဖန်တက်သွားပြန်၏။

၄၆ ဤအချိန်တွင်၊ ကျွန်ုပ်၏စိတ်၌ ဖြစ်ပေါ်သည့် ထင်မြင်ချက်တို့မှာ အလွန်လေးနက်သဖြင့်၊ အိပ်ခြင်းသည် ကျွန်ုပ်၏မျက်စိတို့မှ ထွက်ပြေး၍၊ ကျွန်ုပ်သည် မြင်ရ၊ ကြားရလေသောအရာတို့၌ အံ့ဩမှုဖြင့်မွန်း၍၊ လဲလျောင်း၏။ သို့ရာတွင်၊ ကျွန်ုပ်သည် ထိုတစ်ပါးတည်းသောတမန်တော်ကို ကျွန်ုပ်အိပ်ရာဘေး၌ တစ်ဖန်မြင်တွေ့ရသောအခါ ကြီးစွာအံ့ဩ၏။ ကျွန်ုပ်အား ယခင်ကအတိုင်း ထိုတူသောအရာတို့ကိုပင် အကြိမ်ကြိမ်ထပ်ပြီး၊ ပြန်၍ပြောပြသည်ကိုလည်း ကြားနာရ၏။ (ကျွန်ုပ်အဘမိသားစု၏ ဆင်းရဲနွမ်းပါးသောအခြေအနေတို့၏ အကျိုးဆက်အဖြစ်) ကြွယ်ဝခြင်းငှာဟူသောရည်ရွယ်ချက်ဖြင့် ပုရပိုက်ပြားများကို ရယူစေရန်၊ စာတန်က ကျွန်ုပ်ကို သွေးဆောင်ဖြားယောင်းရန် ကြိုးစားလိမ့်မည့်အကြောင်း သူက ကျွန်ုပ်ကိုပြောပြလျက် ထပ်၍သတိပေး၏။ ဤသို့ပြုခြင်းမှ ကျွန်ုပ်ကို သူတားမြစ်ပြီး၊ ဆိုလေသည်မှာ၊ ကျွန်ုပ်သည် ပုရပိုက်ပြားများကို ရယူရာ၌ ဘုရားသခင်ကို ချီးမွမ်းရန်မှတစ်ပါး၊ အခြားအဘယ်ရည်ရွယ်ချက်မျှ မရှိရမည့်အကြောင်းနှင့် သူ၏နိုင်ငံတော်ကို တည်ဆောက်ခြင်းထက် အခြားသော အဘယ်အကြောင်းရင်း၏လွှမ်းမိုးမှုကိုမျှ မခံရမည့်အကြောင်း၊ သို့မဟုတ်လျှင်၊ ကျွန်ုပ်သည် ထိုအရာတို့ကို မရယူနိုင်မည့်အကြောင်းပေတည်း။

၄၇ ဤတတိယအကြိမ် အကြည့်အရှုကြွေရောက်ပြီးနောက်တွင်၊ သူသည် ယခင်ကကဲ့သို့ပင် ကောင်းကင်ဘုံသို့ တစ်ဖန်တက်သွားသဖြင့်၊ ကျွန်ုပ်သည်လည်းတွေ့ကြုံရသည့် ထူးဆန်းခြင်းကို တစ်ဖန်မှတ်ကျုံး၍၊ စဉ်းစားဆင်ခြင်လျက် ကျန်ရစ်၏။ ထို့နောက်တွင်၊ ကျွန်ုပ်ထံမှ ကောင်းကင်ဘုံရှင်တမန်တော် တတိယအကြိမ်တက်သွားပြီးလျှင်ပြီးချင်းပင် ကြက်တွန်၍၊ နေ့အချိန်နီးကပ်လာလေပြီဖြစ်ကြောင်းကို ကျွန်ုပ်တွေ့ရှိရ၏။ ထို့ကြောင့်၊ ကျွန်ုပ်တို့၏တွေ့ဆုံပြောဆိုခြင်းမှာ ထိုတစ်ညလုံးကြာမြင့်လေ၏။

၄၈ အချိန်အနည်းငယ်ကြာပြီးနောက်၊ ကျွန်ုပ်သည် အိပ်ရာမှထ၍ ပြုနေကျအတိုင်းပင် တစ်နေ့တာလုပ်ရမည့်အလုပ်များကို လုပ်ခြင်းငှာသွား၏။ သို့ရာတွင်၊ အခြားသောအချိန်များမှာကဲ့သို့ အလုပ်လုပ်ခြင်းငှာကြိုးစားရာ၌၊ ကျွန်ုပ်သည် ခွန်အားအလွန်ကုန်ခန်းသည်ကို တွေ့ရှိ၍ လုံးဝအလုပ်မလုပ်နိုင်ဘဲရှိလေ၏။ ကျွန်ုပ်နှင့်အတူတကွ အလုပ်လုပ်လျက်ရှိသည့် ကျွန်ုပ်၏အဘသည် ကျွန်ုပ်၌တစ်စုံတစ်ခု မှားယွင်းနေသည်ကို သတိထားမိပြီး၊ နေအိမ်သို့ပြန်ရန် ကျွန်ုပ်ကိုပြော၏။ ကျွန်ုပ်သည်လည်း အိမ်သို့ပြန်မည်ဟူသောရည်ရွယ်ချက်ဖြင့် ထွက်ခဲ့၏။ သို့ရာတွင်၊ ကျွန်ုပ်တို့ရှိနေသောလယ်ကွင်း၏ ခြံစည်းရိုးကို ဖြတ်ကျော်ရန်ကြိုးစားရာ၌ ကျွန်ုပ်၏ခွန်အားများလုံးဝကုန်ခန်းသွား၍၊ ဘာမျှမလုပ်နိုင်ဘဲမြေကြီးပေါ်သို့လဲကျသွားပြီး၊ အဘယ်အရာကိုမျှမသိဘဲ အချိန်အနည်းငယ် သတိလစ်သွား၏။

၄၉ ကျွန်ုပ်ပြန်လည်၍သတိရသည့် ပထမဆုံးသောအရာမှာ ကျွန်ုပ်၏နာမည်ကိုခေါ်လျက် ကျွန်ုပ်ကို စကားပြောနေသောအသံတစ်သံဖြစ်၏။ ကျွန်ုပ်မော့ကြည့်လျှင်၊ ယခင်ကကဲ့သို့ပင် အလင်း ဝန်းရံလျက်ရှိသည့် ထိုတစ်ပါးတည်းသောတမန်တော်ကို ကျွန်ုပ်ဦးခေါင်းအထက်၌ ရပ်လျက်ရှိသည်ကို မြင်ရ၏။ ထို့နောက်တွင်၊ သူသည် မနေ့ညကပြန်လည်၍ ပြောပြသောအရာအားလုံးတို့ကို ကျွန်ုပ်အား တစ်ဖန်ပြန်လည်၍ ပြောပြပြီး၊ ကျွန်ုပ်လက်ခံရရှိသည့် ရူပါရုံနှင့် မိန့်မှာချက်များအကြောင်းကို ကျွန်ုပ်၏အဘထံသို့သွား၍ပြောပြဖို့ မိန့်မှာ၏။

၅၀ ကျွန်ုပ်သည် နာခံ၍ လယ်ကွင်းထဲရှိ ကျွန်ုပ်အဘဆီသို့ ပြန်သွားပြီး၊ ထိုအမှုတစ်ခုလုံးကို ပြောပြ၏။ သူကလည်း ထိုအမှုသည် ဘုရားသခင်ထံမှဖြစ်ကြောင်း ကျွန်ုပ်ကို ပြန်ပြောလျက်၊ တမန်တော်မိန့်မှာသည့်အတိုင်း သွား၍ပြုရန် ကျွန်ုပ်ကို ပြော၏။ ကျွန်ုပ်သည် လယ်ကွင်းမှထွက်ခွာ၍၊ ပုရပိုက်ပြားများကို မြှုပ်ထားသည့်နေရာတည်းဟူသော၊ ကျွန်ုပ်ကို တမန်တော်ပြောပြလေသည့်နေရာသို့ သွား၏။ ထိုနေရာနှင့်စပ်လျဉ်း၍ ကျွန်ုပ်ရရှိသည့် ရူပါရုံ၏ပြတ်သားခြင်းကြောင့်၊ ကျွန်ုပ်သည် ထိုအရပ်သို့ရောက်သောအချိန်တွင် ထိုနေရာကို ချက်ချင်းသိ၏။

၅၁ နယူးယောက်ပြည်နယ်၊ အွန်တာရီရိုခရိုင်၊ မန်ချက်စတာရွာနှင့်အနီးတွင် အတော်ကြီးသည့် တောင်ကုန်းတစ်ခုရှိပြီး၊ ထိုအနီးအနားပတ်ဝန်းကျင်ရှိအရာအားလုံးတို့ထက် အမြင့်ဆုံးနေရာဖြစ်၏။ ထိုတောင်ကုန်း၏အနောက်ဘက်ပိုင်း၊ တောင်ထိပ်မှ မဝေးသည့်နေရာရှိ အတော်ကြီးသည့် ကျောက်တုံး၏အောက်တွင်၊ ပုရပိုက်ပြားများတည်ရှိပြီး၊ ကျောက်သေတ္တာထဲ၌ထည့်၍၊ မြှုပ်ထား၏။ ဤကျောက်တုံးသည် အပေါ်ပိုင်းတွင် အလယ်၌ ထူ၍လုံးဝန်းလျက်၊ အစွန်းပိုင်းများဆီသို့ ပါး၍သွား၏။ ထို့ကြောင့်၊ ကျောက်တုံး၏အလယ်ပိုင်းကို မြေကြီးပေါ်၌ မြင်ရသော်လည်း၊ ပတ်လည်ရှိအစွန်းပိုင်းတို့ကို မြေကြီးဖြင့်ဖုံးကွယ်ထား၏။

၅၂ ကျွန်ုပ်သည် မြေကြီးကိုဖယ်ရှားပြီးသောအခါ၊ ကုတ်တံတစ်ချောင်းကိုရှာ၍၊ ကျောက်တုံး၏အစွန်းအောက်သို့ ထိုးလျက် အနည်းငယ်အားစိုက်ပြီး မ၏။ အတွင်းသို့ ကျွန်ုပ်ကြည့်ရာ တမန်တော်ပြောသည့်အတိုင်းပင်၊ ပုရပိုက်ပြားများ၊ ဥရိမ်နှင့် သုမိမ်၊ ရင်အုပ်တန်ဆာတို့ကို အသေအချာမြင်ရ၏။ ထိုအရာတို့တည်ရှိနေသည့် သေတ္တာမှာ ကျောက်များကို အင်္ဂတေတစ်မျိုးနှင့်အတူစပ်၍ပြုလုပ်ထားခြင်းဖြစ်၏။ သေတ္တာ၏အောက်ခြေတွင်၊ ကျောက်တုံးနှစ်တုံးကို သေတ္တာ၏အလျားနှင့် ကန့်လန့်ဖြတ်ချထားပြီး၊ ဤကျောက်တုံးများပေါ်၌ ပုရပိုက်ပြားများကို အခြားပစ္စည်းများနှင့်အတူ ချထား၏။

၅၃ ကျွန်ုပ်သည် ထိုပုရပိုက်ပြားတို့ကို ထုတ်ယူခြင်းငှာ ကြိုးစားသော်လည်း၊ တမန်တော်၏တားမြစ်ခြင်းကိုခံရပြီး၊ ထိုအရာတို့ကို ထုတ်ယူဖို့အချိန်သည် မကျရောက်သေးကြောင်းနှင့် ထိုအချိန်မှစ၍ လေးနှစ်ကြာသည်အထိ ကျရောက်လိမ့်မည်မဟုတ်ကြောင်း တစ်ဖန်မိန့်ကြားခြင်းကို ခံရ၏။ သို့ရာတွင်၊ ကျွန်ုပ်ကို သူပြောပြသည်မှာ၊ ထိုအချိန်မှစ၍ တစ်နှစ်တိတိကြာလျှင်၊ ထိုနေရာသို့ ကျွန်ုပ်လာရမည့်အကြောင်း၊ သူသည်လည်း ထိုနေရာ၌ ကျွန်ုပ်နှင့်တွေ့ဆုံမည့်အကြောင်း၊ ပုရပိုက်ပြားများကို ရယူခြင်းအတွက် အချိန်ကျရောက်လာသည်အထိ ကျွန်ုပ်ထိုကဲ့သို့ ဆက်၍ပြုရမည့်အကြောင်းတို့ပေတည်း။

၅၄ ထို့ကြောင့်၊ မိန့်မှာထားသည်နှင့်အညီ၊ တစ်နှစ်ပြည့်သည့်အခါတိုင်းတွင် ကျွန်ုပ်သွား၍၊ သွားသည့်အခါတိုင်း ထိုတစ်ပါးတည်းသောတမန်တော်ကို ထိုနေရာ၌ တွေ့ရပြီး၊ ကိုယ်တော်ရှင်ပြုတော်မူမည့်အရာနှင့်စပ်လျဉ်း၍လည်းကောင်း၊ နောက်ဆုံးသောကာလ၌ သူ၏နိုင်ငံတော်ကို အဘယ်ပုံ အဘယ်နည်းဖြင့် စီမံဆောင်ရွက်ရမည်တို့နှင့်စပ်လျဉ်း၍လည်းကောင်း ကျွန်ုပ်တို့တွေ့ဆုံပြောဆိုသည့်အကြိမ်တိုင်းတွင် သူ့ထံမှ သွန်သင်ချက်နှင့် အသိဉာဏ်တို့ကို လက်ခံရရှိ၏။ …

ဂျိုးဇက်စမစ်သည် အီမာဟေးလ်နှင့် အိမ်ထောင်ဖက်ပြု၏—သူသည် မော်ရော်နိုင်းထံမှ ရွှေပုရပိုက်ပြားများကို ရရှိပြီး၊ စာလုံးအချို့ကို ဘာသာပြန်ခဲ့၏—မာတင်ဟဲရစ်သည် စာလုံးများနှင့် ဘာသာပြန်ခြင်းကို “တံဆိပ်ခတ်ထားသောကျမ်းကို ငါမဖတ်နိုင်”ဟု ဆိုသူ ပါမောက္ခအန်သုန်အား ပြခဲ့၏။” (အခန်းငယ် ၅၅–၆၅။)

၅၅ ကျွန်ုပ်အဘ၏စီးပွားရေးအခြေအနေမှာ အလွန်ကျပ်တည်းသဖြင့်၊ ကျွန်ုပ်တို့လက်များဖြင့် အလုပ်လုပ်ရခြင်း၊ အခွင့်ရသည့်အခါတိုင်း နေ့စားနှင့် အခြားအလုပ်၌ အငှားလိုက်ရခြင်းတို့ကို ပြုကြရ၏။ တစ်ခါတစ်ရံ၌ ကျွန်ုပ်တို့သည် အိမ်မှာနေကြရ၏၊ တစ်ခါတစ်ရံ၌ အဝေးသို့ ရောက်ကြ၏၊ အဆက်မပြတ်အလုပ်လုပ်ခြင်းအားဖြင့် လုံလောက်သောအသက်မွေးမှုကို ရရှိနိုင်စွမ်းရှိကြလေ၏။

၅၆ ၁၈၂၃ ခုနှစ်တွင် ကျွန်ုပ်အဘ၏မိသားစုသည် ကျွန်ုပ်၏ အစ်ကိုအကြီးဆုံး၊ အယ်လဗင် သေဆုံး၍၊ ကြီးစွာသော ဆင်းရဲဒုက္ခကို ခံစားကြရ၏။ ၁၈၂၅ ခုနှစ်၊ အောက်တိုဘာလ၌၊ ကျွန်ုပ်သည် ချနန်ဂိုခရိုင်၊ နယူးယောက်မြို့၌ နေထိုင်သူ ဂျိုစာရာစတောအမည်ရှိ လူကြီးလူကောင်း အဘိုးကြီး တစ်ဦးထံ အငှားလိုက်ရ၏။ သူသည် ဟာမိုနီ၊ စပန်နီယာ့၊ ဆပ်စကွပ်နာခရိုင်၊ ပန်ဆယ်လ်ဗေးနီးယား ပြည်နယ်၌ ပွင့်ခဲ့သည့် ငွေးတွင်းနှင့်စပ်လျဉ်း၍ တစ်စုံတစ်ခုကို ကြားခဲ့ရ၏။ သူ့ဆီ ကျွန်ုပ် အငှားမလိုက်မီက၊ ဖြစ်နိုင်လျှင်၊ တွင်းကို ရှာဖွေတွေ့ရှိခြင်းငှာ တူးလျက်ရှိခဲ့၏။ ကျွန်ုပ်သူနှင့် အတူနေထိုင်ရန် သွားခဲ့ပြီးနောက်တွင်၊ သူ့၌ကျန်ရှိသောအလုပ်သမားများနှင့်အတူ ငွေတွင်းကို တူးရန်အတွက် ကျွန်ုပ်ကို သူခေါ်ခဲ့၏၊ ထိုနေရာ၌ ကျွန်ုပ်သည် တစ်လနီးပါး အလုပ်လုပ်ခဲ့၏၊ ကျွန်ုပ်တို့၏ အားထုတ်မှု၌ အောင်မြင်မှု မရှိဘဲ၊ နောက်ဆုံးတွင် ကျွန်ုပ်သည် လူကြီးလူကောင်း အဘိုးကြီးအား ငွေတွင်းတူးခြင်းကို ရပ်တန့်ရန် ဖျောင်းဖျနိုင်ခဲ့၏။ ထိုအကြောင်းမှစ၍၊ အသပြာတူးသမားအဖြစ် ကျွန်ုပ်အကြောင်းမှာ ထင်ရှားလေ၏။

၅၇ ကျွန်ုပ်သည် ထိုကဲ့သို့ အလုပ်လုပ်စဉ်အတွင်း၊ ထိုနေရာရှိ၊ မစ္စတာ ဣဇာက်ဟေးလ်ထံ၌ တည်းခိုရ၏။ ထိုနေရာ၌ ကျွန်ုပ်ဇနီး (သူ၏သမီး) အီမာဟေးလ်ကို ကျွန်ုပ်တွေ့ခဲ့ရ၏။ ကျွန်ုပ်သည် မစ္စတာ စတောထံ၌ အလုပ်လုပ်နေစဉ်အတွင်း၊ ၁၈၂၇ ခုနှစ်၊ ဇန်နဝါရီလ ၁၈ ရက်နေ့တွင် ကျွန်ုပ်တို့ အိမ်ထောင်ဖက်ပြုခဲ့ကြ၏။

၅၈ ရူပါရုံတစ်ခုကို ကျွန်ုပ်မြင်ခဲ့ရလေကြောင်း ဆက်၍ အခိုင်အမာဆိုခြင်းကြောင့်၊ ညှဉ်းဆဲခြင်းသည် ကျွန်ုပ်နောက်က လိုက်နေသေး၍၊ ကျွန်ုပ်ဇနီး၏ အဘ၏မိသားစုသည် ကျွန်ုပ်တို့၏ အိမ်ထောင်ဖက်ပြုခြင်းကို အလွန်များစွာ ကန့်ကွက်ကြ၏။ ထို့ကြောင့်၊ ကျွန်ုပ်မှာ သူမကို အခြား တစ်နေရာသို့ ခေါ်ဆောင်သွားရန် လိုအပ်လေ၏။ ထို့ကြောင့် ကျွန်ုပ်တို့သည် ထွက်သွားပြီး တောင်ဘင်ဘရစ်၊ ချနန်ဂိုခရိုင်၊ နယူးယောက်ရှိ စကွိုင်းယား တာဘေးလ်၏ အိမ်၌ အိမ်ထောင်ဖက် ပြုခဲ့ကြ၏။ ကျွန်ုပ်၏ အိမ်ထောင်ဖက်ပြုခြင်းပြီးလျှင်ပြီးချင်း၊ မစ္စတာစတော၏အိမ်ကို စွန့်ခွာပြီး၊ ကျွန်ုပ်အဘ၏အိမ်သို့ သွားခဲ့၏၊ ထိုရာသီ၌ သူနှင့်အတူ စိုက်ပျိုးခဲ့၏။

၅၉ နှစ်များစွာကြာပြီးနောက်တွင်၊ ပုရပိုက်ပြားများ၊ ဥရိမ်နှင့် သုမိမ်၊ ရင်အုပ်တန်ဆာတို့ကို ရယူရမည့်အချိန်သည် ရောက်လာ၏။ နောက်ထပ်တစ်နှစ်ပြည့်သည့် တစ်ထောင်ရှစ်ရာနှစ်ဆယ့်ခုနစ်ခု၊ စက်တင်ဘာလနှစ်ဆယ့်နှစ်ရက်နေ့၌၊ ထိုပစ္စည်းများ မြှုပ်ထားသည့်နေရာသို့ သွားနေကျအတိုင်း သွားပြီးနောက်တွင်၊ ထိုတစ်ပါးတည်းသောကောင်းကင်ဘုံရှင်တမန်တော်သည် ကျွန်ုပ်အား ထိုပစ္စည်းများကို အမိန့်နှင့်အတူ ပေးအပ်၏။ သူမိန့်ကြားသည်မှာ၊ ထိုပစ္စည်းများအတွက် ကျွန်ုပ်မှာတာဝန်ရှိကြောင်း၊ ထိုပစ္စည်းများကို ကျွန်ုပ်ဂရုမစိုက်ဘဲ သို့မဟုတ် ကျွန်ုပ်၏လျစ်လျူရှုခြင်းတစ်စုံတစ်ခုအားဖြင့် ပျောက်သွားစေခဲ့သော် ကျွန်ုပ် ပယ်ရှင်းခံရမည်ဖြစ်ကြောင်းပေတည်း။ သို့ရာတွင်၊ ကျွန်ုပ်သည် ထိုပစ္စည်းများကို ထိုတမန်တော် ပြန်လည်တောင်းခံသည့်အချိန်အထိ ထိန်းသိမ်းစောင့်ရှောက်ရန် အစွမ်းရှိသမျှကြိုးစားအားထုတ်မည်ဆိုလျှင်၊ ထိုပစ္စည်းများကို ကာကွယ်ပေးလိမ့်မည်ဖြစ်ကြောင်းကိုလည်း သူမိန့်ကြား၏။

၆၀ ထိုပစ္စည်းများကို ဘေးကင်းစွာထိန်းသိမ်းစေရန် ထိုမျှတင်းကျပ်သောအမိန့်များကို ကျွန်ုပ်လက်ခံရရှိခြင်းနှင့် ကျွန်ုပ်လက်ထဲ၌ ဆောင်ရွက်ရန်လိုအပ်သောအရာကို ကျွန်ုပ်ပြုပြီးနောက်၊ ယင်းပစ္စည်းများကို ပြန်လည်တောင်းခံမည့်အကြောင်း၊ တမန်တော်မိန့်ကြားခြင်းတို့၏ အကြောင်းရင်းကို မကြာမြင့်မီ ကျွန်ုပ်တွေ့ရ၏။ အကြောင်းမူကား၊ ထိုပစ္စည်းများကို ကျွန်ုပ်ရရှိကြောင်း သိလျှင်သိချင်း ကျွန်ုပ်ထံမှ ယူခြင်းငှာ အစွမ်းကုန်ကြိုးစားအားထုတ်ကြ၏။ ကြံစည်၍ရနိုင်သမျှသော ဥပါယ်တံမျဉ်တို့ကို ထိုရည်ရွယ်ချက်အတွက် အသုံးပြုကြ၏။ ညှဉ်းဆဲခြင်းသည် ယခင်ကထက်ပို၍ ခါးသည်းပြီး ပြင်းထန်လာလျက်၊ လူအစုအဝေးတို့သည် ထိုပစ္စည်းများကို ဖြစ်နိုင်လျှင် ကျွန်ုပ်ထံမှရယူခြင်းငှာ အစဉ်မပြတ်စောင့်ကြည့်လျက်ရှိကြ၏။ သို့ရာတွင်၊ ဘုရားသခင်၏ဉာဏ်ပညာတော်အားဖြင့် ထိုပစ္စည်းများသည် ကျွန်ုပ်လက်ထဲ၌ လုံခြုံစွာဆက်၍ရှိနေသည်ကား၊ ကျွန်ုပ်လက်ထဲ၌ ဆောင်ရွက်ရန်လိုအပ်သောအရာကို ကျွန်ုပ်ပြီးမြောက်သည့်အချိန်အထိပင်ဖြစ်၏။ အစီအစဉ်များအတိုင်း၊ တမန်တော်က ထိုပစ္စည်းများကို တောင်းခံသောအခါ၊ ကျွန်ုပ်သည် သူ့ထံသို့ ပေးအပ်၏။ သူသည် ထိုပစ္စည်းများကို ယနေ့ တစ်ထောင်ရှစ်ရာသုံးဆယ့်ရှစ်ခုနှစ်၊ မေလနှစ်ရက်နေ့ တိုင်အောင် သူ၏ထိန်းသိမ်းစောင့်ရှောက်မှုအောက်၌ ထားရှိပေ၏။

၆၁ သို့သော်လည်း၊ နိုးကြားမှုသည် ဆက်၍ရှိမြဲရှိ၏၊ လျှာတစ်ထောင်နှင့် တစ်ဆင့်စကားသည်လည်း အချိန်ရှိသမျှ၌ ကျွန်ုပ်အဘ၏ မိသားစုအကြောင်း၊ ထို့အတူ ကျွန်ုပ်ကိုယ်တိုင်အကြောင်း မုသားများပျံ့နှံ့စေခြင်း၌ အလုပ်လုပ်လေ၏။ ကျွန်ုပ်သည် ၎င်းတို့၏ တစ်ထောင်ပုံတစ်ပုံကို ပြောပြရလျှင်ပင် စာတွဲများစွာရှိလိမ့်မည်။ သို့သော်လည်း၊ ညှဉ်းဆဲခြင်းမှာ အလွန်မခံမရပ်နိုင်အောင် ဖြစ်လာခဲ့သဖြင့်၊ ကျွန်ုပ်သည် မန်ချက်စတာမှ ထွက်ခွာရန်၊ ပန်ဆယ်လ်ဗေးနီးယား ပြည်နယ်ရှိ၊ ဆပ်စကွပ်ဟန်နာခရိုင်သို့ ကျွန်ုပ်ဇနီးနှင့် သွားရန် လိုအပ်လေ၏။ စတင်ရန်ပြင်ဆင်နေစဉ်တွင်၊ အလွန်ဆင်းရဲသဖြင့်၊ ကျွန်ုပ်တို့အပေါ်၌ ညှဉ်းဆဲခြင်းမှာလည်း အလွန် လေးလံသဖြင့်၊ ကျွန်ုပ်တို့ ထိုသို့မဆင်းရဲမည့် ဖြစ်နိုင်ခြေမရှိ၊ ဆင်းရဲဒုက္ခများအလယ်၌၊ ကျွန်ုပ်တို့ထံသို့ လာ၍၊ ကျွန်ုပ်တို့ခရီး၌ အကူအညီရစေရန် ကျွန်ုပ်အားဒေါ်လာငါးဆယ်ပေးခဲ့သူ၊ မာတင်ဟဲရစ်အမည်ရှိ လူကြီးလူကောင်းတစ်ဦးကို ကျွန်ုပ်တို့ တွေ့ခဲ့ကြ၏။ မစ္စတာဟဲရစ်သည် နယူးယောက်ပြည်နယ်ရှိ၊ ဝိန်းခရိုင်၊ ပယ်လမိုင်ရာမြို့နယ်၌ နေထိုင်သူတစ်ဦး၊ ထို့အတူ လေးစားထိုက်သော လယ်သမားတစ်ဦးဖြစ်၏။

၆၂ ဤအချိန်အခါသင့် အကူအညီအားဖြင့်၊ ကျွန်ုပ်သည် ပန်ဆယ်လ်ဗေးနီးယားရှိ ကျွန်ုပ်၏ ခရီးလမ်းဆုံးသို့ ရောက်နိုင်စွမ်းရှိခဲ့လေ၏။ ကျွန်ုပ်သည် ထိုနေရာသို့ ရောက်ပြီးလျှင်ပြီးချင်း ပုရပိုက်ပြားများပေါ်မှ စာလုံးများရေးကူးခြင်းကို စတင်ခဲ့၏။ ၎င်းတို့အထဲမှ အတော်များများကို ရေးကူးခဲ့ပြီး၊ ဥရိမ်နှင့် သုမိမ်တို့အားဖြင့် အချို့ကို ဘာသာပြန်ခဲ့၏၊ ထိုအမှုကို ကျွန်ုပ်ဇနီး၏ အဘအိမ်သို့ ကျွန်ုပ်ရောက်သည့်အချိန်၊ ဒီဇင်ဘာနှင့် နောက်လာသည့် ဖေဖော်ဝါရီလကြား၌ ပြုခဲ့၏။

၆၃ ဤဖေဖော်ဝါရီလ၏ အချိန်တစ်ခုတွင်၊ အထက်ဖော်ပြပါ မာတင်ဟဲရစ်သည် ကျွန်တို့၏ နေရာသို့ ရောက်လာခဲ့ပြီး၊ ပုရပိုက်ပြားများပေါ်မှ ကျွန်ုပ်ရေးကူးခဲ့သော စာလုံးများကို ယူ၍၊ ၎င်းတို့နှင့် အတူ နယူးယောက်မြို့သို့ သွားခဲ့၏။ သူနှင့်လည်းကောင်း၊ စာလုံးများနှင့်လည်းကောင်း စပ်လျဉ်း၍ ဖြစ်ပျက်ခဲ့သည့်အရာကို၊ သူပြန်လာပြီးနောက် ကျွန်ုပ်ကို ပြန်၍ပြောပြခဲ့သည့်အတိုင်း၊ အခြေအနေများအကြောင်း သူကိုယ်တိုင်၏မှတ်တမ်းမှ ကျွန်ုပ်ကိုးကား၏၊ အောက်ပါအတိုင်းဖြစ်လေ၏။

၆၄ “ကျွန်ုပ်သည် နယူးယောက်မြို့သို့ သွားခဲ့၏၊ ဘာသာပြန်ထားလေသော စာလုံးများကိုလည်း၊ ဘာသာပြန်နှင့်အတူ၊ စာပေကျမ်းဂန်အောင်မြင်မှုများကြောင့် ထင်ရှားသူ လူကြီးလူကောင်း ပါမောက္ခ ချားလ်စ်အန်သုန်အား ပြခဲ့၏။ ပါမောက္ခအန်သုန်က ဘာသာပြန်ခြင်းမှာ မှန်ကန်ကြောင်း၊ အဲဂုတ္တု ဘာသာစကားမှ ဘာသာပြန်ထားသည့် သူမြင်ဖူးသမျှသောအရာများထက် ပို၍မှန်ကန်ကြောင်း ဖော်ပြခဲ့၏။ ထို့နောက်တွင် ကျွန်ုပ်သည် ဘာသာမပြန်ရသေးသော အရာများကို သူ့အားပြခဲ့ရာ၊ သူကလည်း ၎င်းတို့မှာ အဲဂုတ္တုဘာသာစကား၊ ခါလဒဲဘာသာစကား၊ အာရှုရိဘာသာစကားနှင့် အာရပ်ဘာသာစကားများ ဖြစ်လေကြောင်း ဆို၏။ မှန်သောစာလုံးများဖြစ်ကြောင်းကိုလည်း ဆို၏။ ၎င်းတို့မှာ မှန်သောစာလုံးများ ဖြစ်ကြောင်း၊ ထို့အတူ ဘာသာပြန်ထားသော ထိုစာလုံးတို့၏ ဘာသာပြန်မှာလည်းမှန်ကြောင်း သူသည် ပယ်လမိုင်ရာရှိလူတို့ထံ သက်သေပြုလျက် ကျွန်ုပ်အား လက်မှတ်တစ်စောင်ကို ထုတ်ပေး၏။ ကျွန်ုပ်သည် လက်မှတ်ကိုယူ၍၊ ကျွန်ုပ်အိတ်ကပ်ထဲသို့ထည့်ပြီး၊ အိမ်မှ ထွက်ခွာခါနီးတွင်၊ မစ္စတာအန်သုန်က ကျွန်ုပ်ကိုပြန်ခေါ်၍၊ ထိုလူငယ် ရွှေပုရပိုက်ပြားများကို တွေ့သည့်နေရာ၌ အဘယ်သို့ တွေ့ရှိခဲ့ကြောင်းကို မေး၏။ ဘုရားသခင်၏ ကောင်းကင်တမန်တစ်ပါးက သူ့ကိုဖော်ပြခဲ့ကြောင်း ကျွန်ုပ်ဖြေခဲ့၏။

၆၅ “ထို့နောက်တွင် သူက ကျွန်ုပ်အား၊ ‘လက်မှတ်ကို ကြည့်ပါရစေ’ဟု ဆို၏။ ကျွန်ုပ်ကလည်း အိတ်ကပ်ထဲမှ ထုတ်၍ သူ့အားပေးလျှင်၊ သူသည် အစိတ်စိတ်အမြွှာမြွှာဆုတ်ဖြဲပစ်၍၊ ယခုအချိန်၌ ကောင်းကင်တမန်များ အမှုတော်ဆောင်ခြင်းကဲ့သို့သောအရာများ မရှိကြောင်း၊ ကျွန်ုပ်က သူ့ထံသို့ ပုရပိုက်ပြားများကို ယူလာလျှင် သူဘာသာပြန်လိုကြောင်းဆို၏။ ပုရပိုက်ပြားအချို့မှာ တံဆိပ်ခတ်ထားကြောင်း၊ ကျွန်ုပ်မှာလည်း ၎င်းတို့ကိုယူလာရန် တားမြစ်ထားခံရလေကြောင်း သူ့ကိုအသိပေးခဲ့၏။ သူကလည်း၊ ‘တံဆိပ်ခတ်ထားသော ကျမ်းကို ငါမဖတ်နိုင်’ဟု ပြန်ပြောခဲ့၏။ ကျွန်ုပ်သည် သူ့ကို စွန့်ခွာ၍၊ စာလုံးများနှင့် ဘာသာပြန်နှစ်ခုစလုံးနှင့် စပ်လျဉ်း၍ ပါမောက္ခအန်သုန်ပြောခဲ့သည့်အရာများကို အတည်ပြုပေးခဲ့သူ ဒေါက်တာမစ်ချဲလ်ထံသို့ သွားခဲ့၏။”

· · · · · · ·

အော်လီဗာကောင်ဒရီသည် မော်မုန်ကျမ်းဘာသာပြန်ခြင်း၌ စာရေးသူအဖြစ် ထမ်းဆောင်၏—ဂျိုးဇက်နှင့် အော်လီဗာသည် ဗတ္တိဇံဆရာယောဟန်ထံမှ အာရုန်ယဇ်ပုရောဟိတ်အခွင့်ကို ရရှိ၏—သူတို့သည် ဗတ္တိဇံခံ၏၊ ခန့်ထားခံရ၏၊ ပရောဖက်ပြုဟောသောဝိညာဉ်ကိုလည်း ရရှိကြ၏။ (အခန်းငယ် ၆၆–၇၅။)

၆၆ ၁၈၂၉ ခုနှစ်၊ ဧပြီလ ၅ ရက်နေ့တွင် အော်လီဗာကောင်ဒရီသည် ကျွန်ုပ်အိမ်သို့ လာခဲ့၏၊ ကျွန်ုပ်သည် ထိုအချိန်အထိ သူ့ကို မမြင်ရစဖူးခဲ့ပေ။ သူသည် ကျွန်ုပ်အဘနေထိုင်ရာ အနီးအနား ပတ်ဝန်းကျင်ရှိ ကျောင်းတစ်ကျောင်း၌ သွန်သင်လျက် ရှိလေကြောင်း၊ ကျွန်ုပ်အဘသည်လည်း ထိုကျောင်းသို့ ပို့သောသူများ၌ တစ်ယောက်ဖြစ်၍၊ သူ့အိမ်၌ ကာလအတန်အရာတည်းခိုခဲ့ကြောင်း၊ ထိုနေရာ၌ရှိစဉ်တွင် မိသားစုက သူ့အားပုရပိုက်ပြားများကို ကျွန်ုပ်ရရှိခြင်းအကြောင်း အခြေအနေများကို ပြန်၍ ပြောပြသဖြင့်၊ သူသည်လည်း ကျွန်ုပ်ထံမှမေးမြန်းရန် လာခဲ့လေကြောင်း ဖော်ပြခဲ့၏။

၆၇ မစ္စတာကောင်ဒရီရောက်ရှိပြီး နှစ်ရက်အကြာတွင် (ဧပြီလ ၇ ရက်နေ့တွင်) ကျွန်ုပ်သည် မော်မုန်ကျမ်း ဘာသာပြန်ခြင်းကို စတင်ခဲ့၏၊ သူသည်လည်း ကျွန်ုပ်အဖို့ ရေးစပြုခဲ့၏။

· · · · · · ·

၆၈ ကျွန်ုပ်တို့သည် ဘာသာပြန်ခြင်းအမှုကို ဆက်၍ပြုမြဲရှိခဲ့ကြ၏၊ နောက်လ (၁၈၂၉ ခုနှစ်၊ မေလ) ၌၊ ကျွန်ုပ်တို့သည် ပုရပိုက်ပြားများကို ဘာသာပြန်ခြင်း၌၊ ဖော်ပြထားသည့် တွေ့ရှိခဲ့သော အပြစ်များမှ လွှတ်ခြင်းအတွက် ဗတ္တိဇံနှင့်စပ်လျဉ်း၍၊ ကိုယ်တော်ရှင်ထံ ဆုတောင်း၍ မေးလျှောက်ရန် တစ်နေ့တွင်၊ တောထဲသို့ သွားခဲ့ကြ၏။ ကျွန်ုပ်တို့သည် ဆုတောင်းခြင်းနှင့် ကိုယ်တော်ရှင်ကို ပတ္ထနာပြုခြင်းတို့ဖြင့် ထိုကဲ့သို့ အလုပ်လုပ်နေစဉ်တွင်၊ ကောင်းကင်ဘုံမှ တမန်တော်တစ်ပါးသည် အလင်းတိမ်တိုက်ဖြင့် ဆင်းလာ၍၊ သူ့လက်များကိုလည်း ကျွန်ုပ်တို့အပေါ်၌တင်၍၊ ကျွန်ုပ်တို့ကို ခန့်ထား၍၊ မိန့်တော်မူလေသည်ကား၊

၆၉ ငါ၏အပေါင်းအဖော် ကျွန်များအပေါ်သို့၊ မေရှိယ၏ နာမတော်အားဖြင့်၊ ငါသည် ကောင်းကင်တမန်များ အမှုတော်ဆောင်ခြင်း၏၊ ထို့အတူ နောင်တရခြင်းအကြောင်း၊ အပြစ်များမှ လွှတ်ခြင်းအတွက် ရေနှစ်မြှုပ်ခြင်းအားဖြင့် ဗတ္တိဇံအကြောင်း ဧဝံဂေလိတရားတော်၏ သော့များကို ကိုင်ဆောင်သည့် အာရုန်ယဇ်ပုရောဟိတ်အခွင့်ကို အပ်နှင်း၏။ ဤအခွင့်ကိုလည်း လေဝိ၏သားများ ကိုယ်တော်ရှင်ထံသို့ ပူဇော်သက္ကာကို ဖြောင့်မတ်ခြင်းဖြင့် တစ်ဖန် ပူဇော်ကြသည်အထိ အဘယ်တော့မျှ မနုတ်ယူလတ္တံ့။

၇၀ အာရုန်ယဇ်ပုရောဟိတ်အခွင့်၌ သန့်ရှင်းသောဝိညာဉ်တော်ကို လက်ခံရရှိခြင်းအတွက် လက်တင်ခြင်းတန်ခိုးမရှိကြောင်း၊ သို့ရာတွင် ဤတန်ခိုးကို ကျွန်ုပ်တို့အပေါ်တွင် နောင်ကာလ၌ အပ်နှင်းလိမ့်မည်ဖြစ်ကြောင်းကို မိန့်တော်မူ၏။ သူသည် ကျွန်ုပ်တို့အားသွား၍၊ ဗတ္တိဇံခံရန်၊ ထို့အတူ ကျွန်ုပ်သည် အော်လီဗာကောင်ဒရီကို ဗတ္တိဇံပေးရမည့်အကြောင်း၊ ထို့နောက်တွင် ကျွန်ုပ်ကို သူဗတ္တိဇံပေးရမည့်အကြောင်းကိုလည်း မိန့်မှာ၏။

၇၁ သို့ဖြစ်၍၊ ကျွန်ုပ်တို့သည်သွား၍ ဗတ္တိဇံခံကြ၏။ ကျွန်ုပ်သည် သူ့ကို ပထမဦးစွာ ဗတ္တိဇံပေး၏၊ ထို့နောက်တွင် သူသည် ကျွန်ုပ်ကို ဗတ္တိဇံပေး၏—ထိုအမှု ပြီးသည့်နောက်တွင် ကျွန်ုပ်လက်များကို သူ့ဦးခေါင်းပေါ်တင်၍ သူ့အား အာရုန်ယဇ်ပုရောဟိတ်အခွင့်သို့ ခန့်ထား၏၊ ထို့နောက်တွင် သူ၏ လက်များကို ကျွန်ုပ်အပေါ်တင်၍ ကျွန်ုပ်အား ထိုတူသောယဇ်ပုရောဟိတ်အခွင့်သို့ ခန့်ထား၏—အကြောင်းမူကား၊ ကျွန်ုပ်တို့သည် ထိုကဲ့သို့ပင် မိန့်မှာခံရလေ၏။

၇၂ ဤအချိန်၌ ကျွန်ုပ်တို့ကို အကြည့်အရှုကြွရောက်ပြီး ကျွန်ုပ်တို့အား ယဇ်ပုရောဟိတ်အခွင့်ကို အပ်နှင်းသည့် တမန်တော်က သူ၏အမည်မှာ၊ ယောဟန်၊ ဓမ္မသစ်ကျမ်း၌ ဗတ္တိဇံဆရာယောဟန်ဟု ခေါ်သည့်သူပင် ဖြစ်ကြောင်း၊ သူသည် မေလခိဇေဒက် ယဇ်ပုရောဟိတ်အခွင့်ကို ကိုင်ဆောင်သည့် ပေတရု၊ ယာကုပ်နှင့် ယောဟန်တို့၏ လမ်းညွှန်မှုဖြင့် ဆောင်ရွက်ကြောင်း၊ သူမိန့်တော်မူသည့် ယဇ်ပုရောဟိတ်အခွင့်ကိုလည်း၊ ကာလအချိန်တန်သောအခါ၌ ကျွန်ုပ်တို့အပေါ် အပ်နှင်းလိမ့်မည်ဖြစ်ကြောင်း၊ ကျွန်ုပ်သည် အသင်းတော်၏ပထမအသင်းလူကြီးအဖြစ် အခေါ်ခံရလိမ့်မည်၊ သူ (အော်လီဗာကောင်ဒရီ)သည် ဒုတိယအသင်းလူကြီးအဖြစ် အခေါ်ခံရလိမ့်မည်ဖြစ်ကြောင်းတို့ကို မိန့်တော်မူခဲ့၏။ ထိုအမှုမှာ၊ ဤတမန်တော်၏ လက်အောက်၌ ကျွန်ုပ်တို့ခန့်ထားခံရ၊ ဗတ္တိဇံခံရသည့် ၁၈၂၉ ခုနှစ်၊ မေလ တစ်ဆယ့်ငါးရက်နေ့၌ဖြစ်လေ၏။

၇၃ ကျွန်ုပ်တို့သည် ဗတ္တိဇံခံပြီးနောက်၊ ရေထဲမှ ထ၍ ပြီးလျှင်ပြီးချင်း၊ ကျွန်ုပ်တို့၏ ကောင်းကင် ဘုံရှင် အဘထံမှ ကြီးမြတ်ပြီး အသရေထင်ရှားသည့် ကောင်းချီးမင်္ဂလာများကို တွေ့ကြုံခဲ့ကြ၏။ ကျွန်ုပ်သည် အော်လီဗာကောင်ဒရီကို ဗတ္တိဇံပေးပြီးမကြာမြင့်မီတွင်၊ သန့်ရှင်းသောဝိညာဉ်တော်သည် သူ့အပေါ် သက်ဆင်းတော်မူ၏၊ သူသည်လည်း ရပ်၍၊ မကြာမြင့်မီဖြစ်လာမည့် များစွာသောအရာတို့ကို ပရောဖက်ပြု၍ ဟော၏။ ထိုမှတစ်ဖန်၊ ကျွန်ုပ်သည်လည်း သူအားဖြင့် ဗတ္တိဇံခံပြီးလျှင် ပြီးချင်း၊ ပရောဖက်ပြုဟောသော ဝိညာဉ်ကို ရရှိခဲ့၏၊ ရပ်နေသော အချိန်တွင်၊ ဤအသင်းတော် ပေါ်ထွက်လာခြင်း၊ ထို့အတူ အသင်းတော်နှင့် ဆက်စပ်နေသည့် အခြားများစွာသောအရာများ၊ ထို့အတူ လူသားတို့၏ ဤမျိုးဆက်နှင့်စပ်လျဉ်း၍ ပရောဖက်ပြုဟောခဲ့၏။ ကျွန်ုပ်တို့သည် သန့်ရှင်းသောဝိညာဉ်တော်နှင့် ပြည့်ကြလေ၏၊ ကျွန်ုပ်တို့၏ ကယ်တင်ခြင်း၏ ဘုရားသခင်၌လည်း ရွှင်လန်းဝမ်းမြောက်ကြ၏။

၇၄ ကျွန်ုပ်တို့၏စိတ်များသည် အလင်းသို့ရောက်၍၊ ကျမ်းစာများမှာ ကျွန်ုပ်တို့၏ နားလည်ခြင်းသို့ ဖွင့်ပေးစပြုလေ၏၊ ၎င်းတို့၏ ပို၍နက်နဲသောကျမ်းပိုဒ်များ၏ မှန်သောအဓိပ္ပာယ်နှင့် ရည်ရွယ်ချက်ကို ကျွန်ုပ်တို့အား ယခင်က မရရှိခဲ့ဖူးသောနည်းမျိုးဖြင့်၊ ယခင်က မတွေးဖူးသောနည်းမျိုးဖြင့်လည်း ဖော်ပြခဲ့၏။ ထိုအချိန်အတွင်း၌၊ ကျွန်ုပ်တို့သည် ယဇ်ပုရောဟိတ်အခွင့်ကို ရရှိခြင်းနှင့် ကျွန်ုပ်တို့၏ ဗတ္တိဇံခံခြင်းအကြောင်း အခြေအနေများကို လျှို့ဝှက်ထားရလေ၏၊ အနီးအနားပတ်ဝန်းကျင်၌ ထင်ရှားစွာ ပြခဲ့လေပြီးဖြစ်သည့် ညှဉ်းဆဲခြင်းစိတ်ဝိညာဉ်ကြောင့်ပေတည်း။

၇၅ ကျွန်ုပ်တို့သည် လူဆိုးတိုက်ခိုက်ခံရခြင်းဖြင့်၊ အချိန်နှင့်အမျှ ခြိမ်းခြောက်ခံရလေ၏၊ ဤအမှုမှာလည်း ဘာသာရေး ဓမ္မဆရာတို့ကြောင့် ဖြစ်လေ၏။ ကျွန်ုပ်တို့အား လူဆိုးတိုက်ခိုက်စေခြင်းအတွက် သူတို့၏ရည်ရွယ်ချက်မှာ ကျွန်ုပ်နှင့်အလွန်ခင်မင်လာခဲ့လေသည့်၊ လူဆိုးတို့ကို ဆန့်ကျင်လေသည့်၊ ထို့အတူ ကျွန်ုပ်အား ဘာသာပြန်ခြင်းအမှုကို အနှောင့်အယှက်မရှိဘဲ ဆက်၍ပြုလုပ်ရန် အခွင့်ပေးရန် လိုလိုလားလားရှိကြသည့် ကျွန်ုပ်ဇနီး၏ အဘ၏မိသားစု၏လွှမ်းမိုးမှု (မြင့်မြတ်သော စောင့်ရှောက်ခြင်းအောက်၌) အားဖြင့် ချေဖျက်ခြင်းကိုသာ ခံရလေ၏။ ထို့ကြောင့်၊ ကျွန်ုပ်တို့အား မတရားသောလုပ်ဆောင်မှုခပ်သိမ်းတို့မှ သူတို့တတ်စွမ်းနိုင်သမျှ အကာအကွယ်ပေး၍ ကတိထားကြ၏။

အော်လီဗာကောင်ဒရီက ဤအဖြစ်အပျက်များကို ဖော်ပြလေသည်မှာ၊ “ဤအရာတို့သည်ကား အဘယ်တော့မျှမေ့မရသည့် နေ့များဖြစ်၏—ကောင်းကင်ဘုံ၏ လမ်းပြလှုံ့ဆော်ခြင်းအားဖြင့် ညွှန်ကြားသည့်၊ အကြီးဆုံးကျေးဇူးတင်ခြင်းရင်ကို နှိုးဆော်သည့် အသံ၏စကားကို နားထောင်ရန်ပေတည်း။ ဥရိမ်နှင့် သုမိမ်၊ သို့မဟုတ်၊ “အနက်ဖွင့်သောအရာများ”ဟု နီဖိုင်းအမျိုးသားတို့ ဆိုခဲ့သည့်အရာတို့အားဖြင့် သူဘာသာပြန်၍၊ သူ့နှုတ်မှထွက်သည့် သမိုင်းသို့မဟုတ် ‘မော်မုန်ကျမ်း’ ဟုခေါ်သည့်မှတ်တမ်းကို တစ်နေ့ပြီးတစ်နေ့ ကျွန်ုပ်သည် အနှောင့်အယှက်မရှိဘဲ ဆက်၍ရေးခဲ့၏။

“အနည်းငယ်သော စကားတို့ဖြင့်ပင် ဖော်ပြရန်၊ မော်မုန်နှင့် သူ၏သစ္စာရှိသောသား၊ မော်ရော်နိုင်းတို့ ရေးခဲ့သည့်၊ တစ်ချိန်က ကောင်းကင်ဘုံ၏ ချစ်ခြင်းနှင့် နှစ်သက်ခြင်းကို ခံခဲ့ရသည့် လူမျိုးတို့အကြောင်း စိတ်ဝင်စားဖွယ်မှတ်တမ်းသည် ကျွန်ုပ်၏မျက်မှောက် အကြံအစည်ထက် သာလွန်လိမ့်မည်။ ထို့ကြောင့် ကျွန်ုပ်သည် ဤအမှုကို အနာဂတ်ကာလသို့၊ ရွှေ့ဆိုင်းမည်၊ ထို့အတူ၊ နိဒါန်း၌ ကျွန်ုပ် ဆိုခဲ့လေသည့်အတိုင်း၊ အသင်းတော် ပေါ်ထွက်လာခြင်းနှင့် တိုက်ရိုက်ဆက်စပ်သည့် အနည်းငယ်သော ဖြစ်ရပ်အချို့ကိုသာ ရေးမည်၊ ထိုသို့ပြုခြင်းသည် ရှေ့သို့ ချီတက်လာသည့် ထောင်ပေါင်းများစွာသော သူအချို့အား နှစ်သက်စေနိုင်၏၊ တစ်ယူသန်တို့၏ မျက်မှောင်ကုတ်ခြင်းနှင့် သူတော်ကောင်းယောင်ဆောင်သောသူတို့၏ အလယ်မှာ ရှိနိုင်၏၊ ခရစ်တော်၏ ဧဝံဂေလိတရားတော်ကိုလည်း လှိုက်လှိုက်လှဲလှဲ လက်ခံနိုင်စေ၏။

“ကယ်တင်ရှင်၏အသင်းတော်ကို လူသားတို့တည်ထောင်ရာ တိကျသောနည်းလမ်း၊ နီဖိုင်း အမျိုးသားတို့အား သူ၏နှုတ်မှ ပေးတော်မူသည့် လမ်းညွှန်ချက်များကို၊ အထူးသဖြင့်၊ ပုပ်ပျက်ခြင်းက လူသားတို့၌ကျင့်သုံးသည့် ခပ်သိမ်းသောပုံစံများ၊ စနစ်များနှင့် စပ်လျဉ်းသည့် မသေချာမှုကို ပျံ့နှံ့စေသည့်အချိန်တွင်၊ ယေရှုခရစ်တော်၏ ရှင်ပြန်ထမြောက်ခြင်းအားဖြင့် ကြည်လင်သော အသိစိတ်ဖြင့် ဖြေကြားရန်၊ အရည်သင်္ချိုင်း၌ အမြှုပ်ခံခြင်းအားဖြင့် စိတ်နှလုံး၏ လိုလိုလားလားရှိမှုကိုပြခြင်း အထူးအခွင့်အရေးကို ရရှိလိုခြင်းမရှိဘဲ အဘယ်သူမျှ မိမိတို့သတိစိတ်ဖြင့်၊ ဘာသာပြန်၍ မရေးနိုင်။

“ဤတိုက်၌၊ ယာကုပ်အမျိုးအနွယ်၏ ကျန်ကြွင်းသောသူများသို့ ကယ်တင်ရှင်၏ အမှုတော်ဆောင်ခြင်းအကြောင်း မှတ်တမ်းကို ရေးပြီးနောက်၊ မှောင်မိုက်ခြင်းသည် မြေကြီးကို၊ ထို့အတူ ဆိုးရွားသော မှောင်မိုက်ခြင်းသည် လူတို့၏ စိတ်ကိုလွှမ်းမိုးလိမ့်မည်ဟု ပရောဖက်ဟောလေသည့်အတိုင်း မြင်ရရန် လွယ်ကူ၏။ နောက်ထပ်၍ တွေးတောလျှင်၊ ကြီးစွာသော ရန်တွေ့ခြင်းနှင့် ဘာသာရေးအကြောင်း အသံဗလံတို့ အလယ်၌၊ ဧဝံဂေလိတရားတော်၏ ဘိသိက်မင်္ဂလာများကို စီမံဆောင်ရွက်ရန် အဘယ်သူမျှ ဘုရားသခင်ထံမှ တန်ခိုးနှင့် အခွင့်အာဏာမရှိ။ အကြောင်းမူကား၊ ဗျာဒိတော်များကို ငြင်းဆိုသည့် လူတို့သည် ခရစ်တော်၏ နာမတော်ဖြင့် စီမံဆောင်ရွက်ရန် အခွင့်အာဏာ ရှိလေသလော၊ သူ၏ သက်သေခံချက်သည် ပရောဖက်ပြုဟောသောဝိညာဉ်ထက်သာ၍ မနည်း၊ သူ၏ဘာသာရေး အခြေခံမှာ၊ သူ့၌ မြေကြီးပေါ်တွင် ပရောဖက်တစ်ပါးရှိလေသည့် လောကကာလတစ်ခုလုံး၌ ကိုယ်တွေ့ ဗျာဒိတ်တော်များအားဖြင့် ထောက်မ၍ တည်ဆောက်ထားလေသလောဟူသည့် မေးခွန်းကို မေးကြ လိမ့်မည်။ ဤအချက်အလက်များကို မြှုပ်ထားလျှင်၊ ထို့အတူ လူသားတို့၏ မျက်နှာရှေ့၌ တောက်ပစေရန် တစ်ချိန်က အခွင့်ပေးထားလျှင် အန္တရာယ်ရောက်နိုင်ရာအမှုရှိသူတို့အားဖြင့် ဂရုတစိုက်ဖုံးကွယ်ထားလျှင်၊ ထိုအရာတို့မှာ ကျွန်ုပ်တို့အဖို့မဟုတ်တော့။ ကျွန်ုပ်တို့သည်လည်း ‘ထ၍ဗတ္တိဇံခံလော့’ဟူသော မိန့်မှာချက်ကို စောင့်မျှော်၍သာ နေကြ၏။

“ဤအရာကို နားမလည်မီ ကြာရှည်စွာ အလိုမရှိကြပေ။ ကိုယ်တော်ရှင်၊ ကရုဏာနှင့် ကြွယ်ဝသူသည်၊ နှိမ့်ချသောသူတို့၏ ပုံမှန်ဖြစ်သောဆုတောင်းခြင်းကို ဖြေရန် အစဉ်အမြဲ လိုလိုလားလားရှိတော်မူ၏၊ ကျွန်ုပ်တို့သူ့ကို အားကြီးစွာပတ္ထနာပြုကြလေပြီးနောက်တွင်၊ သူ၏အလိုတော်ကို ကျွန်ုပ်တို့အား ထင်ရှားစွာပြခြင်းငှာ လူတို့၏နေထိုင်ရာတို့မှ ခွာ၍၊ ကိုယ့်ကိုယ်ကို နှိမ့်ချတော်မူ၏။ ရုတ်တရက်တွင်၊ ထာဝရကာလ၏ အလယ်မှ ကဲ့သို့ပင်၊ ရွေးနုတ်ရှင်၏အသံက ကျွန်ုပ်တို့အား ငြိမ်းချမ်းခြင်းကို ဟောပြော၏၊ ကန့်လန့်ကာကွဲစဉ်တွင်၊ ဘုရားသခင်၏ ကောင်းကင်တမန်သည် ဘုန်းတော်ကို ဝတ်ဆင်၍ ဆင်းလာပြီး၊ ထက်သန်စွာ စောင့်မျှော်နေကြသည့် သတင်းစကားကို ဟော၍၊ နောင်တရခြင်းအကြောင်း ဧဝံဂေလိတရားတော်၏ သော့များကို ပေးတော်မူ၏။ ဝမ်းမြောက်ပေစွတကား။ အံ့ဩချီးမွမ်းဖွယ် ကောင်းပေစွတကား။ အံ့အားသင့်ပေစွတကား။ လောကသည် နှိပ်စက်ခံရ၍၊ စိတ်ရှုပ်ထွေးစဉ်တွင်—သန်းပေါင်းများစွာသောသူတို့သည် မျက်စိမမြင်သောသူများ တံတိုင်းကို စမ်းကြသကဲ့သို့ စမ်းလျက်ရှိကြစဉ်တွင်၊ ခပ်သိမ်းသောသူတို့သည် အလုံးအရင်းတစ်ခုကဲ့သို့ မသေချာမှုအပေါ်၌ ထိုင်လျက်ရှိကြစဉ်တွင်၊ ‘မီးလျှံနေ့မှာကဲ့သို့’ ကျွန်ုပ်တို့၏မျက်စိများ မြင်ကြ၏၊ ကျွန်ုပ်တို့၏နားများ ကြားကြ၏။ ဟုတ်ပေ၏၊ သာ၍များ၏—လောကဓာတ်၏ မျက်နှာပေါ်မှာ မိမိတောက်ပဝင်းလက်ခြင်းကို သွန်းလောင်းသည့် မေလနေရောင်ခြည်ထက်ပင် တဖိတ်ဖိတ်တောက်ပ၏။ ထို့နောက်တွင် သူ့အသံသည် ညင်သာသော်လည်း၊ အလယ်ဗဟိုကို ထိုးဖောက်၏၊ ‘ငါသည် သင်၏အပေါင်းအဖော်ကျွန်ဖြစ်၏’ ဟူသော သူ၏စကားတို့သည် ကြောက်ခြင်း မှန်သမျှကို လွင့်ပြယ်စေ၏။ ကျွန်ုပ်တို့ နားထောင်ကြ၏၊ ကျွန်ုပ်တို့ စူးစိုက်ကြည့်ကြ၏၊ ကျွန်ုပ်တို့လေးစားကြ၏။’ ထိုအရာမှာ ဘုန်းတော်ရှိရာ ကောင်းကင်တမန်၏အသံဖြစ်၏၊ ‘ထိုအရာမှာ အမြင့်ဆုံးသောဘုရားထံမှ သတင်းစကားဖြစ်၏။ ကျွန်ုပ်တို့သည်လည်း ကြားသည်နှင့်အမျှ ရွှင်လန်းဝမ်းမြောက်ကြ၏၊ ကျွန်ုပ်တို့၏ စိတ်ဝိညာဉ်များအပေါ်၌ သူ၏ချစ်ခြင်းထွန်းတောက်စဉ်တွင်၊ ကျွန်ုပ်တို့သည် အနန္တတန်ခိုးရှင်၏ ရူပါရုံဖြင့် အထုပ်ခံကြရ၏။ ယုံမှားသံသယအတွက် အဘယ်မှာ နေရာရှိသနည်း။ အဘယ်နေရာမျှမရှိ။ မသေချာမှုသည် ထွက်ပြေးသွား၏၊ ကြံစည်ချက်နှင့် လှည့်စားခြင်းထွက်ပြေးသွားစဉ်တွင် ယုံမှားသံသယသည် ထမလာနိုင်တော့အောင် နစ်မြုပ်သွား၏။

“သို့ရာတွင်၊ ချစ်သောညီအစ်ကို၊ စဉ်းစားလော့၊ နောက်ထပ်၍ ခဏမျှ စဉ်းစားလော့၊ ‘ငါ၏ အပေါင်းအဖော်ကျွန် သင်တို့အပေါ်၌၊ မေရှိယ၏နာမတော်အားဖြင့် ငါသည် မြေကြီးပေါ်၌ ဆက်၍တည်ရှိမည့် ဤယဇ်ပုရောဟိတ်အခွင့်နှင့် အခွင့်အာဏာကို အပ်နှင်းသဖြင့်၊ လေဝိ၏သားများ ကိုယ်တော်ရှင်ထံသို့ ပူဇော်သက္ကာကို ဖြောင့်မတ်ခြင်းဖြင့် ပူဇော်နိုင်ကြသေး၏’ဟု သူဆိုသည့်အတိုင်း၊ သူ၏ လက်အောက်၌ သန့်ရှင်းသောယဇ်ပုရောဟိတ်အခွင့်ကို ကျွန်ုပ်တို့ရရှိသောအခါ၊ ကျွန်ုပ်တို့စိတ်နှလုံးကို ပြည့်စေသည့် ဝမ်းမြောက်မှုပေတကား၊ ကျွန်ုပ်တို့ ဦးညွှတ်ရမည့် အံ့ဩမှုပေတကား၊ (အကြောင်းမူကား၊ ထိုကဲ့သို့သော ကောင်းချီးမင်္ဂလာအတွက် အဘယ်သူသည် ဦးညွှတ်လိုမည်နည်း)။

“ကျွန်ုပ်သည် ဤစိတ်နှလုံး၏ ခံစားချက်များကို၊ ထို့အတူ ဤအချိန်၌ ကျွန်ုပ်တို့ကို ဝန်းရံထားသည့် ခမ်းနားသော တင့်တယ်ခြင်းနှင့် ဘုန်းတော်တို့ကို သင်တို့အား ဆေးခြယ်ပြရန် အားထုတ်မည်မဟုတ်။ သို့ရာတွင်၊ မြေကြီးသည် လည်းကောင်း၊ စိတ်ကို ထိခိုက်ဆွဲဆောင်နိုင်သော အချိန်၌ရှိသူ လူသားတို့သည်လည်းကောင်း ဤသန့်ရှင်းသောပုဂ္ဂိုလ်ကဲ့သို့ ဘာသာစကားကို စိတ်ဝင်စားဖွယ် ခမ်းနားသောပုံစံဖြင့် တန်ဆာဆင်စ မပြုနိုင်။ မပြုနိုင်၊ ဤမြေကြီး၌ ဝမ်းမြောက်ခြင်းကို ပေးရန်၊ ငြိမ်းချမ်းခြင်းကို ပေးရန်၊ သို့မဟုတ် သန့်ရှင်းသောဝိညာဉ်တော်၏ တန်ခိုးအားဖြင့် ပြောလေသကဲ့သို့ ဝါကျတိုင်း၌ ပါဝင်သည့် ဉာဏ်ပညာကို နားလည်ရန် တန်ခိုးမရှိ။ လူသားသည် မိမိအပေါင်းအဖော်ကို လှည့်စားနိုင်၏၊ လှည့်စားခြင်းတစ်ခုပြီးတစ်ခု လာနိုင်၏၊ ဆိုးညစ်သောသူတို့၏ သားသမီးတို့သည် မိုက်မဲသောသူများနှင့် ပညာမဲ့သူများကို၊ သွေးဆောင်ရန် တန်ခိုးရှိနိုင်ကြ၏၊ ဘာမျှမဟုတ်သည်အထိပင် ကြံစည်ချက်နှင့် များစွာသောသူတို့ကို ကျွေး၏၊ မုသား၏ အကျိုးသည် မူးသောသူများကို မိမိ စီးကြောင်းဖြင့် သင်္ချိုင်းသို့ သယ်ဆောင်သွား၏။ သို့ရာတွင်၊ အကြင်သူသည် မိမိချစ်ခြင်း လက်ချောင်းဖြင့် တို့၍၊ ဟုတ်ပေ၏၊ အထက်လောကမှ ဘုန်းတော်ရောင်ခြည်၊ သို့မဟုတ် ကယ်တင်ရှင်၏ နှုတ်မှ၊ ထာဝရကာလ၏ရင်မှ နှုတ်ကပတ်တော်တစ်ခုဖြင့်၊ ထိုခပ်သိမ်းသော လှည့်စားခြင်းတို့ကို အသေးအမွှားဖြစ်သွားအောင် ထိခိုက်၏။ စိတ်မှလည်း ကာလအစဉ်အဆက် ပြေစေ၏။ ကျွန်ုပ်တို့သည် ကောင်းကင်တမန်၏ မျက်မှောက်၌ ရှိလေကြောင်း အာမခံချက်၊ ယေရှု၏ အသံကို ကျွန်ုပ်တို့ကြားခဲ့ကြောင်း ဧကန်ဖြစ်ခြင်း၊ ထို့အတူ ဘုရားသခင်၏ အလိုတော်အားဖြင့် ညွှန်ကြားထားသည့်၊ စင်ကြယ်သောပုဂ္ဂိုလ်ထံမှ စီးဆင်းလာသကဲ့သို့ရှိသည့် အစွန်းအထင်းမရှိသော သမ္မာတရားမှာ ကျွန်ုပ်အနေဖြင့် ဖော်ပြ၍ မရနိုင်အောင်ရှိ၏၊ ကျွန်ုပ်သည်လည်း ဆက်၍ နေရန်အခွင့်ပေးခံရစဉ်တွင် ကယ်တင်ရှင်၏ ကောင်းမြတ်ခြင်းအကြောင်း ဤဖော်ပြချက်ကို အံ့ဩခြင်းနှင့်၊ ကျေးဇူးတော်ချီးမွမ်းခြင်းနှင့် အစဉ်အမြဲမှတ်ယူပါမည်။ ထို့အတူ စုံလင်ခြင်းနေထိုင်ပြီး၊ အပြစ်အဘယ်တော့မျှမလာသည့် ထိုနေစရာအခန်းများ၌၊ အဘယ်တော့မျှ မရပ်တန့်မည့်ကာလ၌ ကျွန်ုပ် ကြည်ညိုရန်မျှော်လင့်၏။”—Messenger and Advocate (တမန်တော်နှင့် လျှောက်လဲသူ)၊ အတွဲ ၁ (၁၈၃၄ ခုနှစ် အောက်တိုဘာလ) စာမျက်နှာ ၁၄–၁၆။

ဘာသာပြန်နေဆဲဖြစ်ပါသည်