မောရှေကျမ်း

၁၈၃၀ ဇွန်–၁၈၃၁ ဖေဖော်ဝါရီ၌ ပရောဖက်ဂျိုးဇက်စမစ်သို့ ဖော်ပြသည့်အတိုင်းရှိသည့် သမ္မာကျမ်းဘာသာပြန်ခြင်းမှ ကောက်နုတ်ချက်။

အခန်းကြီး ၁

(ဇွန် ၁၈၃၀)

ဘုရားသခင်သည် မောရှေအား သူကိုယ်တိုင် ဖော်ပြတော်မူ၏—မောရှေသည် ပုံသဏ္ဌာန်ပြောင်းလဲ၏—သူသည် စာတန်နှင့် ရင်ဆိုင်တွေ့ရ၏—မောရှေသည် လူတို့နေထိုင်သည့် ကမ္ဘာများစွာကိုမြင်ရ၏—မရေတွက်နိုင်သည့် ကမ္ဘာများကို သားတော်အားဖြင့် ဖန်ဆင်းထား၏—ဘုရားသခင်၏ အမှုတော်နှင့် ဘုန်းတော်မှာ လူသား၏ သေခြင်းမရှိရာနှင့် ထာဝရအသက်ကို ဖြစ်ပေါ်စေရန်ဖြစ်၏။

၁ အလွန်မြင့်သည့်တောင်တစ်လုံးပေါ်သို့ မောရှေ ချီဆောင်ခံရသောအချိန်၌၊ မောရှေသို့ ဘုရားသခင်မြွက်ဆိုတော်မူသည့် သူ၏နှုတ်ကပတ်တော်များသည်ကား၊

၂ သူသည် ဘုရားသခင်ကို မျက်နှာချင်းဆိုင်၍ မြင်ရ၏၊ သူနှင့် စကားဆို၏၊ ဘုရားသခင်၏ ဘုန်းတော်သည်လည်း မောရှေအပေါ်၌ရှိလေ၏။ ထို့ကြောင့် မောရှေသည် သူ၏မျက်မှောက်တော်၌ ကြံ့ကြံ့ခံနိုင်ခဲ့၏။

၃ ဘုရားသခင်ကလည်း မောရှေကို မြွက်ဆို၍၊ မိန့်တော်မူလေသည်ကား၊ ရှုလော့၊ ငါသည် ကိုယ်တော်ရှင် ဘုရားသခင် အနန္တတန်ခိုးရှင် ဖြစ်၏၊ ထို့အတူ အဆုံးမရှိသူဟူသည်မှာ ငါ၏နာမတော် ဖြစ်၏။ အကြောင်းမူကား၊ ငါသည် ရက်များနေ့များ အစအဆုံးမရှိဘဲ ဖြစ်၏။ ဤအရာသည်လည်း အဆုံးမရှိ မဟုတ်သလော။

၄ ထို့အတူ၊ ရှုလော့၊ သင်သည် ငါ့သားဖြစ်၏။ သို့ဖြစ်၍၊ ကြည့်လော့၊ ငါသည်လည်း သင့်အား ငါ၏လက်နှင့် ဖန်ဆင်းထားတော်မူသော အရာကိုပြမည်၊ သို့ရာတွင် ခပ်သိမ်းသောအရာတို့ကို မပြ၊ အကြောင်းမူကား၊ ငါ၏အမှုတော်တို့သည် အဆုံးမရှိဘဲဖြစ်၏၊ ငါ၏ နှုတ်ကပတ်တော်တို့သည်လည်း ထိုနည်းတူ ဖြစ်၏၊ အကြောင်းမူကား၊ ၎င်းတို့သည် အဘယ်တော့မျှမရပ်တန့်။

၅ သို့ဖြစ်၍၊ ခပ်သိမ်းသော ငါ၏ဘုန်းတော်ကို မမြင်လျှင်၊ အဘယ်သူမျှ ငါ၏ခပ်သိမ်းသော အမှုတော်တို့ကို မမြင်နိုင်။ အဘယ်သူမျှလည်း ငါ၏ခပ်သိမ်းသောဘုန်းတော်ကို မမြင်နိုင်၍ ထို့နောက် မြေကြီးပေါ်၌ ဇာတိကိုယ်ခန္ဓာဖြင့် ဆက်၍ရှိ၏။

၆ ငါ့၌ သင့်အတွက် အမှုတစ်ခုရှိ၏၊ မောရှေ၊ ငါ့သား။ သင်သည်လည်း ငါ၏ တစ်ပါးတည်းသော သားတော်၏ ပုံဆောင်ခြင်းဖြစ်၏။ ငါ၏ တစ်ပါးတည်းသော သားတော်သည် ကယ်တင်ရှင်ဖြစ်၏၊ ဖြစ်လည်းဖြစ်လိမ့်မည်၊ အကြောင်းမူကား၊ သူသည် ကျေးဇူးတော်၊ သမ္မာတရားတို့နှင့် ပြည့်စုံ၏။ သို့ရာတွင် ငါမှတစ်ပါး ဘုရားသခင်မရှိ၊ ခပ်သိမ်းသော အရာတို့သည်လည်း ငါ့မျက်မှောက်၌ ရှိ၏၊ အကြောင်းမူကား ငါသည် ထိုအရာခပ်သိမ်းတို့ကို သိ၏။

၇ ယခုမူကား၊ ရှုလော့၊ ဤတစ်ခုသောအရာကို ငါသည် သင့်အားပြ၏၊ မောရှေ၊ ငါ့သား၊ အကြောင်းမူကား၊ သင်သည် ကမ္ဘာထဲ၌ရှိ၏၊ ယခုမူကား၊ ငါသည် ထိုအရာကို သင့်အားပြ၏။

၈ ဤသို့အားဖြင့်အချိန်တန်လာသောအခါ၊ မောရှေသည် ကြည့်၍၊ သူဖန်ဆင်းခံခဲ့ရသည့် ကမ္ဘာပေါ်၌ရှိသည်ကို မြင်ရ၏။ မောရှေသည် ကမ္ဘာနှင့် ၎င်း၏အဆုံးတို့ကို လည်းကောင်း၊ ဖန်ဆင်းထားသည့်၊ ထို့အတူ ဖန်ဆင်းထားခဲ့လေသည့် ခပ်သိမ်းသောလူသားတို့ကို လည်းကောင်းမြင်ရ၏။ ၎င်းတို့အကြောင်းကို သူသည် ကြီးစွာအံ့ဩ၍ အံ့မခန်းဖြစ်၏။

၉ ဘုရားသခင်၏မျက်မှောက်တော်ကို မောရှေထံမှ သိမ်းယူသဖြင့်၊ သူ၏ဘုန်းတော်သည် မောရှေအပေါ်၌ မရှိ။ မောရှေသည်လည်း သူကိုယ်တိုင်အဖြစ်သာ ကျန်ရှိ၏။ သူကိုယ်တိုင်အဖြစ်သာ ကျန်ရှိသောအခါ မြေကြီးသို့ လဲကျ၏။

၁၀ ဤသို့အားဖြင့် အချိန်တန်လာသောအခါ၊ မောရှေသည် လူသားတစ်ဦးကဲ့သို့ သူ၏ ဇာတိပကတိ ခွန်အားကို တစ်ဖန် မရရှိမီအထိ နာရီပေါင်းများစွာ ကြာလေ၏။ သူ့ကိုယ်သူ ဆိုသည်မှာ၊ ယခုတွင်၊ ဤအကြောင်းကြောင့်၊ လူသားသည် ဘာမျှမဟုတ်ကြောင်းကို ငါသိပြီ၊ ထိုအရာကို ငါဘယ်တုန်းကမျှ မတွေးလေခဲ့။

၁၁ သို့ရာတွင်၊ ယခု၌ ငါကိုယ်တိုင်၏ မျက်စိများက ဘုရားသခင်ကို မြင်လေပြီ။ သို့ရာတွင် ငါ၏ ဇာတိပကတိမဟုတ်၊ ငါ၏ဝိညာဉ်ပကတိ မျက်စိများသာ ဖြစ်၏၊ အကြောင်းမူကား၊ ငါ၏ ဇာတိပကတိ မျက်စိများက မမြင်နိုင်လေခဲ့။ အကြောင်းမူကား၊ ငါသည် သူ၏ မျက်မှောက်တော်၌ ညှိုးနွမ်း၍ သေသင့်ခဲ့လေပြီ။ သို့ရာတွင် သူ၏ဘုန်းတော်သည် ငါ့အပေါ်၌ ရှိခဲ့လေ၏။ ငါသည် သူ၏မျက်နှာကို မြင်ရ၏၊ အကြောင်းမူကား၊ ငါသည် သူ့ရှေ့၌ ပုံသဏ္ဌာန်ပြောင်းလဲခဲ့လေ၏။

၁၂ ဤသို့အားဖြင့်အချိန်တန်လာသောအခါ၊ မောရှေသည် ဤစကားတို့ကို ပြောလျှင်၊ ရှုလော့၊ စာတန်သည် သူ့ကို လာပြီးသွေးဆောင်ဖြားယောင်း၍ ဆိုလေသည်ကား၊ မောရှေ၊ လူသား၊ ငါ့ကို ကိုးကွယ်လော့။

၁၃ ဤသို့အားဖြင့်အချိန်တန်လာသောအခါ၊ မောရှေသည် စာတန်ကို ကြည့်၍ ဆိုလေသည်ကား၊ သင်သည် အဘယ်သူနည်း။ အကြောင်းမူကား၊ ရှုလော့၊ ငါသည် ဘုရားသခင်၏ သားတစ်ယောက် ဖြစ်၏၊ သူ၏ တစ်ပါးတည်းသော သားတော်၏ ပုံဆောင်ခြင်းဖြစ်၏။ သင့်ကို ငါကိုးကွယ် ရမည့်အကြောင်း၊ သင်၏ဘုန်းသည် အဘယ်မှာရှိသနည်း။

၁၄ အကြောင်းမူကား၊ ရှုလော့၊ ဘုရားသခင်၏ ဘုန်းတော်သည် ငါ့အပေါ်၌ မရှိလျှင်၊ ငါသည် သူ့ကို မကြည့်နိုင်၊ ငါသည် သူ့ရှေ့၌ ပုံသဏ္ဌာန်ပြောင်းလဲခဲ့၏။ သို့ရာတွင်၊ ငါသည် ဇာတိပကတိ လူသားအနေဖြင့် သင့်ကိုကြည့်နိုင်၏။ ထိုသို့ ဧကန်အမှန် မဟုတ်သလော။

၁၅ ငါ့ဘုရားသခင်၏ နာမတော်သည် မင်္ဂလာရှိပါစေသော်၊ အကြောင်းမူကား၊ သူ၏ဝိညာဉ်တော်ကို ငါ့ထံမှ လုံးဝမနုတ်ယူသေး၊ သို့မဟုတ်လျှင်၊ သင်၏ ဘုန်းသည် အဘယ်မှာရှိသနည်း၊ အကြောင်းမူကား၊ ထိုအရာသည် ငါ့အဖို့ မှောင်မိုက်ဖြစ်၏။ ထို့အတူ ငါသည် သင်နှင့် ဘုရားသခင်ကို ခွဲခြား၍ သိနိုင်၏။ အကြောင်းမူကား၊ ငါ့ကို ဘုရားသခင် မိန့်တော်မူခဲ့သည်မှာ၊ ဘုရားသခင်ကို ကိုးကွယ်လော့၊ အကြောင်းမူကား၊ သူ့ကိုသာ သင်အစေခံရမည်။

၁၆ သင် ဤနေရာမှ ထွက်သွားလော့၊ စာတန်၊ ငါ့ကို လှည့်စားခြင်းမပြုနှင့်။ အကြောင်းမူကား၊ ငါ့ကို ဘုရားသခင် မိန့်တော်မူခဲ့သည်မှာ၊ သင်သည် ငါ၏တစ်ပါးတည်းသော သားတော်၏ ပုံဆောင်ခြင်းအတိုင်းရှိ၏။

၁၇ သူသည် လောင်မြိုက်နေသော ချုံပုတ်ထဲမှနေ၍ ငါ့ကိုခေါ်ပြီး၊ ပညတ်တော်များကို ပေး၍ မိန့်တော်မူလေသည်ကား၊ ငါ၏ တစ်ပါးတည်းသော သားတော်၏ နာမတော်ဖြင့် ဘုရားသခင်ကို ပတ္ထနာပြုလော့၊ ထို့အတူ ငါ့ကို ကိုးကွယ်လော့။

၁၈ ထိုမှတစ်ဖန်၊ မောရှေဆိုလေသည်ကား၊ ငါသည် ဘုရားသခင်ကို ပတ္ထနာပြုရန် ရပ်တန့်မည် မဟုတ်၊ ငါ့၌ သူ့ကို မေးလျှောက်ရန် အခြားသောအရာများ ရှိ၏။ အကြောင်းမူကား၊ သူ၏ ဘုန်းတော်သည် ငါ့အပေါ်၌ ရှိလေပြီ၊ သို့ဖြစ်၍၊ ငါသည် သူနှင့် သင့်ကို ခွဲခြား၍ သိနိုင်၏။ ဤနေရာမှ ထွက်ခွာသွားလော့၊ စာတန်။

၁၉ ယခုမူကား၊ မောရှေက ဤစကားတို့ကို ဆိုသောအခါ၊ စာတန်သည် ကျယ်သောအသံနှင့် ဟစ်ကြွေး၍၊ မြေကြီးပေါ်၌ ဟိန်းဟောက်၍၊ မိန့်မှာ၍၊ ဆိုလေသည်ကား၊ ငါသည် တစ်ပါးတည်းသော သားတော် ဖြစ်၏၊ ငါ့ကို ကိုးကွယ်လော့။

၂၀ ဤသို့အားဖြင့်အချိန်တန်လာသောအခါ၊ မောရှေသည် လွန်စွာကြောက်ရွံ့စပြု၏။ သူသည် ကြောက်ရွံ့စပြုသည်နှင့် ငရဲ၏ခါးသည်းမှုကိုလည်း မြင်ရ၏။ သို့သော်လည်း၊ ဘုရားသခင်ကို ပတ္ထနာပြုလျက်၊ ခွန်အားကို ရရှိ၍၊ မိန့်မှာ၍၊ ဆိုလေသည်ကား၊ ငါ့ထံမှ ထွက်ခွာသွားလော့၊ စာတန်၊ အကြောင်းမူကား၊ ဘုန်းတော်ရှိသည့် ဘုရားသခင်ဖြစ်သည့် ဤတစ်ပါးတည်းသော ဘုရားသခင်ကိုသာ ငါကိုးကွယ်မည်။

၂၁ ယခုမူကား၊ စာတန်သည် တုန်စပြု၏၊ မြေကြီးသည်လည်း လှုပ်၏။ မောရှေသည်လည်း ခွန်အားကို ရရှိ၍၊ ဘုရားသခင်ကို ပတ္ထနာပြု၍၊ ဆိုလေသည်ကား၊ တစ်ပါးတည်းသော သားတော်၏ နာမတော်အားဖြင့်၊ ဤနေရာမှ ထွက်ခွာသွားလော့၊ စာတန်။

၂၂ ဤသို့အားဖြင့်အချိန်တန်လာသောအခါ၊ စာတန်သည် ကျယ်သောအသံနှင့်၊ ထို့အတူ ငိုကြွေးခြင်း၊ ထို့အတူ မြည်တမ်းခြင်း၊ ထို့အတူ အံသွားခဲကြိတ်ခြင်းတို့ဖြင့် ဟစ်ကြွေး၏။ ဤနေရာမှ၊ မောရှေ၏ မျက်မှောက်မှပင် ထွက်ခွာသွားသဖြင့် သူ့ကို မြင်ရခြင်းမရှိ။

၂၃ ယခုမူကား၊ ဤအရာအကြောင်းကို မောရှေသက်သေခံ၏။ သို့ရာတွင်၊ ဆိုးညစ်ခြင်းကြောင့်၊ ထိုသက်သေခံချက်မှာ လူသားတို့၌ မရှိ။

၂၄ ဤသို့အားဖြင့်အချိန်တန်လာသောအခါ၊ စာတန်သည် မောရှေ၏ မျက်မှောက်မှ ထွက်ခွာသွားလျှင်၊ မောရှေသည် ကောင်းကင်ကို မျှော်ကြည့်၍၊ ခမည်းတော်နှင့် သားတော် အကြောင်းကို သက်သေခံသည့် သန့်ရှင်းသော ဝိညာဉ်တော်နှင့် ပြည့်လျက်၊

၂၅ ဘုရားသခင်၏ နာမတော်ကို ပတ္ထနာပြုလျက်ရှိ၍၊ သူ၏ဘုန်းတော်ကို တစ်ဖန်မြင်ရ၏၊ အကြောင်းမူကား၊ ထိုဘုန်းတော်သည် သူ့အပေါ်၌ ရှိ၏။ အသံတစ်သံကိုလည်း ကြားရ၏၊ ဆိုလေသည်ကား၊ သင်သည် မင်္ဂလာရှိ၏၊ မောရှေ၊ အကြောင်းမူကား၊ ငါ၊ အနန္တတန်ခိုးရှင်သည်၊ သင့်ကို ရွေးကောက်လေပြီ၊ သင့်ကို များစွာသောရေတို့ထက် သာ၍အားကြီးစေမည်။ အကြောင်းမူကား၊ ၎င်းတို့သည် သင့်ကိုဘုရားသခင် ဖြစ်လေသည့်အလား သင်၏အမိန့်ကို နာခံကြလိမ့်မည်။

၂၆ ကြည့်ဦးလော့၊ ငါသည် သင့်ဘဝ၏ အဆုံးတိုင်အောင်ပင် သင်နှင့်အတူ ရှိတော်မူ၏။ အကြောင်းမူကား၊ သင်သည် ငါ၏လူမျိုးတို့ကို၊ အကယ်စင်စစ် ဣသရေလအမျိုး ငါ၏ရွေးကောက်ထားသောသူတို့ကို ကျွန်ခံရာမှ ကယ်လွှတ်လိမ့်မည်။

၂၇ ဤသို့အားဖြင့် အချိန်တန်လာသောအခါ၊ အသံကဆက်၍ ဟောပြောလျက်ရှိစဉ်တွင်၊ မောရှေသည် မျှော်ကြည့်၍၊ မြေကြီးကို၊ အထူးသဖြင့်၊ ၎င်း၌ရှိသည့် ခပ်သိမ်းသောအရာတို့ကိုပင် မြင်၏။ သူမမြင်သည့် အရာအနည်းငယ်မျှမရှိ၊ ဘုရားသခင်၏ ဝိညာဉ်တော်အားဖြင့် ပိုင်းခြား၍ သိရ၏။

၂၈ ၎င်း၌နေထိုင်သူတို့ကိုလည်း မြင်ရ၏၊ သူမြင်ရခြင်းမရှိသည့်သူ တစ်ယောက်မျှမရှိ။ ဘုရားသခင်၏ဝိညာဉ်တော်အားဖြင့် သူတို့ကို ပိုင်းခြား၍သိရ၏။ သူတို့၏အရေအတွက်မှာလည်း များလေပြီး၊ သမုဒ္ဒရာကမ်းခြေရှိ သဲလုံးတမျှပင် မရေမတွက်နိုင်အောင်ရှိ၏။

၂၉ သူသည် များစွာသောပြည်တို့ကိုလည်း မြင်ရ၏။ ပြည်တစ်ခုချင်းစီကို မြေကြီးဟုခေါ်၏၊ ၎င်း၏မျက်နှာပြင်ပေါ်၌ နေထိုင်သူများလည်းရှိ၏။

၃၀ ဤသို့အားဖြင့်အချိန်တန်လာသောအခါ၊ မောရှေသည် ဘုရားသခင်ကို ပတ္ထနာပြု၍ ဆိုလေသည်ကား၊ ကျွန်ုပ်ကို ပြောပြတော်မူပါ၊ ကိုယ်တော်ကို ကျွန်ုပ်ဆုတောင်းပါ၏၊ ဤအရာတို့သည် အဘယ်ကြောင့် ရှိရသနည်း၊ ကိုယ်တော်သည် ဤအရာတို့ကို အဘယ်နည်းဖြင့် ဖန်ဆင်းတော်မူသနည်း။

၃၁ ရှုဦးလော့၊ ဘုရားသခင်၏ဘုန်းတော်သည် မောရှေအပေါ်၌ရှိလေ၏၊ ထို့ကြောင့် မောရှေသည် ဘုရားသခင်၏မျက်မှောက်တော်၌ ရပ်ပြီး၊ သူနှင့်မျက်နှာချင်းဆိုင်၍ စကားပြောရ၏။ ကိုယ်တော်ရှင် ဘုရားသခင်ကလည်း မောရှေကို မိန့်တော်မူလေသည်ကား၊ ငါကိုယ်တိုင်၏ ကြံရွယ်ချက်အတွက် ငါသည် ဤအရာတို့ကို ဖန်ဆင်းတော်မူခဲ့၏။ ဤအရာ၌ ဉာဏ်ပညာရှိပြီး ငါနှင့်အတူဆက်၍ရှိ၏။

၃၂ ကျေးဇူးတော်၊ သမ္မာတရားတို့နှင့် ပြည့်စုံသည့်သူတည်းဟူသော ငါ၏တစ်ပါးတည်းသောသားတော်ဖြစ်သည့် ငါ့တန်ခိုးတော်၏ နှုတ်ကပတ်တော်အားဖြင့်၊ ငါသည် ၎င်းတို့ကို ဖန်ဆင်းတော်မူခဲ့၏။

၃၃ ရေတွက်မရသည့် ကမ္ဘာတို့ကိုလည်း ငါဖန်ဆင်းတော်မူခဲ့၏။ ငါသည် ၎င်းတို့ကိုလည်း ငါကိုယ်တိုင်၏ကြံရွယ်ချက်အတွက် ဖန်ဆင်းတော်မူခဲ့၏။ ငါ၏တစ်ပါးတည်းသော သားတော်ဖြစ်သည့် သားတော်အားဖြင့် ငါသည် ၎င်းတို့ကို ဖန်ဆင်းတော်မူခဲ့၏။

၃၄ များစွာရှိလေသည့် ခပ်သိမ်းသော လူသားတို့အထဲမှ ပထမဦးဆုံးလူသားကို ငါသည်အာဒံဟုခေါ်လေပြီ။

၃၅ သို့ရာတွင်၊ ဤမြေကြီး၏မှတ်တမ်းတစ်ခုတည်းကိုသာလျှင်၊ ထို့အတူ ၎င်း၌နေထိုင်သူတို့ကို ငါသည် သင့်အားဖော်ပြ၏။ အကြောင်းမူကား၊ ရှုလော့၊ ငါ့တန်ခိုးတော်၏ နှုတ်ကပတ်တော်အားဖြင့် ကွယ်ပျောက်သွားလေပြီးဖြစ်သည့် များစွာသောကမ္ဘာများရှိ၏။ ယခုတည်ရှိသည့် အရာများစွာလည်း ရှိပြီး၊ ၎င်းတို့မှာ လူသားအဖို့ မရေတွက်နိုင်အောင်ရှိ၏။ သို့ရာတွင် ခပ်သိမ်းသောအရာတို့မှာ ငါ့အဖို့ ရေတွက်ထား၏၊ အကြောင်းမူကား၊ ၎င်းတို့သည် ငါ၏အရာများဖြစ်၍ ငါသိ၏။

၃၆ ဤသို့အားဖြင့်အချိန်တန်လာသောအခါ၊ မောရှေသည် ကိုယ်တော်ရှင်ထံ လျှောက်၍ တောင်းဆိုသည်ကား၊ ကိုယ်တော်၏ကျွန်ကို ကရုဏာကြီးတော်မူပါ၊ အို ဘုရားသခင်၊ ဤမြေကြီးနှင့်၊ ထို့အတူ ၎င်း၌ နေထိုင်သောသူတို့နှင့်၊ ထို့အတူ ကောင်းကင်တို့နှင့် စပ်လျဉ်း၍လည်း ကျွန်ုပ်ကို ပြောပြတော်မူပါ၊ ထို့နောက်တွင် ကိုယ်တော်၏ကျွန် ကျေနပ်ပါမည်။

၃၇ ကိုယ်တော်ရှင်ဘုရားသခင်ကလည်း မောရှေကို မြွက်ဆို၍၊ မိန့်တော်မူလေသည်ကား၊ ကောင်းကင်တို့သည်၊ များစွာရှိ၏၊ ၎င်းတို့သည် လူသားအဖို့ မရေတွက်နိုင်။ သို့ရာတွင် ငါ့အဖို့ရေတွက်ထား၏၊ အကြောင်းမူကား၊ ၎င်းတို့သည် ငါ၏အရာဖြစ်၏။

၃၈ မြေကြီးတစ်ခု ကွယ်ပျောက်သွား၍၊ ကောင်းကင်တို့သည်လည်း ထိုနည်းတူ ကွယ်ပျောက်သွားလျှင်၊ တခြားတစ်ခု ရောက်လာလိမ့်မည်။ ငါ၏ အမှုတော်တို့၌ အဆုံးမရှိ၊ ငါ၏ နှုတ်ကပတ်တော် တို့၌လည်း အဆုံးမရှိ။

၃၉ အကြောင်းမူကား၊ ရှုလော့၊ ဤအရာသည်—လူသား၏ သေခြင်းမရှိရာနှင့် ထာဝရအသက်ကို ဖြစ်ပေါ်စေရန်မှာ ငါ၏အမှုတော်နှင့် ငါ၏ဘုန်းတော်ဖြစ်၏။

၄၀ ယခုမူကား၊ မောရှေ၊ ငါ့သား၊ သင်ရပ်သည့် ဤမြေကြီးအကြောင်းကို သင့်အား ငါဟောပြောမည်။ သင်သည်လည်း ငါဟောပြောမည့်အရာတို့ကို ရေးရမည်။

၄၁ လူသားတို့သည် ငါ၏နှုတ်ကပတ်တော်တို့ကို တန်ဖိုးမရှိသောအရာများအဖြစ် ထင်မှတ်၍၊ သင်ရေးမည့်ကျမ်းမှ များစွာတို့ကို နုတ်ယူသည့်နေ့ ကျရောက်လာသောအခါ၊ ရှုလော့၊ ငါသည် သင်နှင့်တူသည့် တခြားသူတစ်ဦးကို ပေါ်ထွန်းစေတော်မူမည်။ ၎င်းတို့သည်လည်း လူသားတို့၌—ယုံကြည်မည့်သူမှန်သမျှတို့၌ တစ်ဖန်ရှိလိမ့်ဦးမည်။

၄၂ (ဤစကားများသည် တောင်ပေါ်၌ မောရှေကို မိန့်တော်မူခဲ့သောစကားများဖြစ်၏၊ ထိုတောင်၏ အမည်ကို လူသားတို့၌ သိရလိမ့်မည်မဟုတ်။ ယခုမူကား၊ သင့်အား ဟောပြောထား၏။ ၎င်းတို့ကို ယုံကြည်သူများမှတစ်ပါး အဘယ်သူကိုမျှ ပြခြင်းမပြုနှင့်။ ထိုကဲ့သို့ပင်တည်း။ အာမင်)

ဘာသာပြန်နေဆဲဖြစ်ပါသည်