၁ ဤသို့​အားဖြင့်​အချိန်တန်​လာသော​အခါ၊ ကိုယ်တော်ရှင်သည် မောရှေကို မြွက်ဆို၍ မိန့်တော်မူ လေသည်ကား၊ ရှုလော့၊ ငါသည် သင့်အား ဤ​ကောင်းကင်၊ ထို့အတူ ဤ​မြေကြီးတို့အကြောင်းကို ဖော်ပြတော်မူ၏။ ငါ​မြွက်ဆိုသည့်​စကားတို့ကို ရေးလော့။ ငါသည် အစနှင့် အဆုံး၊ အနန္တ​တန်ခိုးရှင် ဘုရားသခင်​ဖြစ်၏။ ငါ၏​တစ်ပါး​တည်းသော သားတော်​အားဖြင့် ငါသည် ဤ​အရာတို့ကို ဖန်ဆင်း​တော်မူ​ခဲ့၏။ ထိုမှ​တစ်ပါး၊ ရှေးဦးစွာ၌ ငါသည် ကောင်းကင်ကို ဖန်ဆင်း၏၊ ထို့နောက် သင်ရပ်သည့် မြေကြီးကို ဖန်ဆင်း၏။

၂ မြေကြီးသည် သဏ္ဌာန်​မရှိ၊ ဟင်းလင်းပြင်​ဖြစ်၏။ ငါသည် နက်ရာ​အရပ်၏ မျက်နှာပြင်​ပေါ်သို့ မှောင်မိုက်ကို ရောက်စေ၏။ ငါ၏​ဝိညာဉ်တော်သည်လည်း ရေ​မျက်နှာပြင်​ပေါ်မှာ လှုပ်ရှား​တော်မူ၏။ အကြောင်း​မူကား၊ ငါသည် ဘုရားသခင်​ဖြစ်၏။

၃ ငါ၊ ဘုရားသခင်​ကလည်း အလင်း​ဖြစ်စေဟု မိန့်တော်မူ၍ အလင်း​ဖြစ်လေ၏။

၄ ငါ၊ ဘုရားသခင်သည် အလင်းကို​မြင်၏၊ ထိုအလင်းသည် ကောင်းမြတ်၏။ ငါ၊ ဘုရားသခင်သည် အလင်းနှင့် မှောင်မိုက်ကို ပိုင်းခြားထား​တော်မူ၏။

၅ ငါ၊ ဘုရားသခင်သည် အလင်းကို နေ့ဟု ခေါ်၏။ မှောင်မိုက်ကို ညဟု ငါခေါ်၏။ ဤ​အမှုကိုလည်း ငါ့တန်ခိုးတော်၏​နှုတ်ကပတ်တော်​အားဖြင့် ငါ​ပြုတော်မူ၍၊ မိန့်တော်မူသည့်​အတိုင်း ဖြစ်လေ၏။ ညဦးနှင့် နံနက်သည် ပထမနေ့​ဖြစ်လေ၏။

၆ ထိုမှ​တစ်ဖန်၊ ငါ၊ ဘုရားသခင်က ရေ​အလယ်၌ မိုး​မျက်နှာကြက်​ဖြစ်စေဟု မိန့်တော်မူ​သဖြင့်၊ ငါ​မိန့်တော်မူသည့်​အတိုင်းပင် ဖြစ်၏။ ထို့အတူ ငါက ရေနှင့်​ရေချင်း ခြားနားစေဟု မိန့်တော်မူလျှင်၊ ထိုသို့​ဖြစ်လေ၏။

၇ တစ်ဖန် ငါ၊ ဘုရားသခင်သည် မိုး​မျက်နှာကြက်ကို ဖန်ဆင်း​တော်မူ၍၊ ရေတို့ကို၊ အထူး​သဖြင့် မိုး​မျက်နှာကြက်​အောက်မှ ကြီးစွာသော​ရေတို့ကို မိုး​မျက်နှာကြက်​ပေါ်၌​ရှိသော​ရေတို့နှင့် ပိုင်းခြား​တော်မူ၍ ငါ မိန့်တော်မူသည့်အတိုင်းပင် ဖြစ်လေ၏။

၈ တစ်ဖန် ငါ၊ ဘုရားသခင်သည် မိုး​မျက်နှာကြက်ကို ကောင်းကင်ဟု​ခေါ်၏။ ညဦးနှင့် နံနက်သည် ဒုတိယ​နေ့ရက်​ဖြစ်လေ၏။

၉ တစ်ဖန် ငါ၊ ဘုရားသခင်က ကောင်းကင်​အောက်မှ ရေတို့ကို တစ်နေရာသို့ အတူ​တကွ​စုဝေးစေဟု မိန့်တော်မူ၍၊ စုဝေး​လေ၏။ ထို့အတူ ငါ​ဘုရားသခင်က ကုန်းမြေ​ဖြစ်စေဟု မိန့်တော်မူ၍ ဖြစ်လေ၏။

၁၀ တစ်ဖန် ငါ၊ ဘုရားသခင်သည် ကုန်းမြေကို မြေကြီးဟု ခေါ်၏။ အတူ​တကွစုဝေးသော​ရေတို့ကို ငါသည် ပင်လယ်ဟု ခေါ်၏။ ငါ၊ ဘုရားသခင်သည် ငါ​ဖန်ဆင်း​တော်မူ​ခဲ့လေသည့် ခပ်သိမ်းသော​အရာတို့ ကောင်းမြတ်​သည်ကို မြင်တော်မူ၏။

၁၁ တစ်ဖန် ငါ၊ ဘုရားသခင်က၊ မြေကြီးသည် မြက်ပင်ကို လည်းကောင်း၊ အစေ့ကို ဖြစ်စေသည့် စပါးပင်ကို​လည်းကောင်း၊ မြေကြီး​ပေါ်မှာ မျိုးစေ့​ပါရမည့်၊ သူ့အမျိုး​အတိုင်း သစ်သီးကို ဖြစ်စေ၍၊ အပင်မှ သစ်သီးကိုဖြစ်စေသည့် သစ်သီးပင်ကိုလည်းကောင်း ပေါက်စေဟု မိန့်တော်မူလျှင်၊ ငါမိန့်တော်မူသည့် အတိုင်းပင် ပေါက်လေ၏။

၁၂ မြေကြီးသည်လည်း မြက်ပင်ကို လည်းကောင်း၊ သူ့အမျိုး​အတိုင်း အစေ့ကို​ဖြစ်သည့် စပါးပင်တိုင်းကို လည်းကောင်း၊ သူ့အမျိုး​အတိုင်း မျိုးစေ့​ပါရမည့်၊ သစ်သီးကို ဖြစ်စေသည့် သစ်ပင်ကို လည်းကောင်း၊ ပေါက်စေ၏။ ငါ၊ ဘုရားသခင်သည် ငါ​ဖန်ဆင်း​တော်မူ​လေသည့် ခပ်သိမ်းသော​အရာတို့ ကောင်းမြတ်သည်ကို မြင်တော်မူ၏။

၁၃ ညဦးနှင့် နံနက်သည် တတိယ​နေ့ရက်​ဖြစ်လေ၏။

၁၄ တစ်ဖန် ငါ၊ ဘုရားသခင်က၊ နေ့နှင့် ညဉ့်ကို ပိုင်းခြားရန်၊ ကောင်းကင်မိုး​မျက်နှာကြက်၌ အလင်းအိမ်​တို့ကို တည်စေ၊ ၎င်းတို့ကိုလည်း နိမိတ်​လက္ခဏာ​များအတွက်၊ ရာသီများ​အတွက်၊ နေ့ရက်များ​အတွက်၊ နှစ်များအတွက်ဖြစ်စေ၊ ဟုမိန့်တော်မူ၍၊

၁၅ ကောင်းကင်မိုး​မျက်နှာကြက်၌ တည်၍၊ မြေကြီးအား အလင်းကို ပေးရန် အလင်းအိမ်များ​ဖြစ်စေဟု မိန့်တော်မူလျှင်၊ ဖြစ်လေ၏။

၁၆ တစ်ဖန် ငါ၊ ဘုရားသခင်သည် ကြီးစွာသော အလင်းအိမ်နှစ်လုံးကို ဖန်ဆင်း​တော်မူ၏။ အလင်းအိမ်အကြီးမှာ နေ့ကို အုပ်စိုးစေရန်​ဖြစ်ပြီး၊ အလင်းအိမ်အငယ်မှာ ညဉ့်ကို အုပ်စိုးစေရန်​ဖြစ်၏၊ အလင်းအိမ်အကြီးမှာ နေဖြစ်၍၊ အလင်းအိမ်အငယ်မှာ လဖြစ်၏။ ကြယ်တို့ကိုလည်း ငါ၏ နှုတ်ကပတ်တော်အတိုင်းပင် ဖန်ဆင်း​တော်မူ​လေ၏။

၁၇ တစ်ဖန် ငါ၊ ဘုရားသခင်သည် ၎င်းတို့ကို ကောင်းကင်​မိုးမျက်နှာကြက်၌ထားသည်ကား၊ မြေကြီးအားအလင်းကို ပေးရန်၊

၁၈ နေအား နေ့ကို အုပ်စိုး​စေရန်၊ လအား ညဉ့်ကို အုပ်စိုး​စေရန်၊ အလင်းနှင့် မှောင်မိုက်ကို ပိုင်းခြားစေရန် ဖြစ်၏။ ငါ၊ ဘုရားသခင်သည် ငါ​ဖန်ဆင်း​တော်မူ​လေသည့် ခပ်သိမ်းသော​အရာတို့ ကောင်းမြတ်​သည်ကို မြင်တော်မူ၏။

၁၉ ညဦးနှင့် နံနက်သည် စတုတ္ထ​နေ့ရက် ဖြစ်လေ၏။

၂၀ တစ်ဖန်၊ ငါ၊ ဘုရားသခင်က အသက်​ရှင်၍ လှုပ်ရှား​တတ်သော သတ္တဝါတို့ကို ရေသည် မြောက်မြားစွာ​မွေးဖွားစေ၊ ငှက်တို့သည်လည်း မြေကြီး​အထက် ကောင်းကင်၏ မိုး​မျက်နှာကြက်ဝယ် ပျံစေဟု မိန့်တော်မူ၏။

၂၁ တစ်ဖန် ငါ၊ ဘုရားသခင်က ရေသည် သူတို့​အမျိုး​အတိုင်း မြောက်မြားစွာ မွေးဖွား၍၊ ကြီးစွာသော​ဝေလငါးများ၊ လှုပ်ရှား​တတ်သော သက်ရှိသတ္တဝါတိုင်းကို လည်းကောင်း၊ သူ့အမျိုးအတိုင်းရှိသည့် တောင်ပံ​ပါသော​ငှက်တိုင်းကို​လည်းကောင်း ဖန်ဆင်း​တော်မူ၏။ ငါ၊ ဘုရားသခင်သည် ငါ​ဖန်ဆင်း​တော်မူ​လေသည့် ခပ်သိမ်းသော​အရာတို့ ကောင်းမြတ်​သည်ကို မြင်တော်မူ၏။

၂၂ တစ်ဖန် ငါ၊ ဘုရားသခင်က ၎င်းတို့ကို ကောင်းချီး​ပေး၍၊ ဝပြော​ကြလော့၊ ပွားများ​ကြလော့၊ ပင်လယ်​ရေများကို ပြည့်စေလော့။ ငှက်တို့ကိုလည်း မြေကြီး၌ ပွားများ​ကြလော့ဟု မိန့်တော်မူ၏။

၂၃ ညဦးနှင့် နံနက်သည် ပဉ္စမ​နေ့ရက် ဖြစ်လေ၏။

၂၄ တစ်ဖန် ငါ၊ ဘုရားသခင်က မြေကြီးသည် သူ့အမျိုး​အတိုင်း​ရှိသည့် သက်ရှိသတ္တဝါ၊ ကျွဲနွားတိရစ္ဆာန်တို့ကို လည်းကောင်း၊ သူတို့​အမျိုး​အတိုင်း​ရှိသည့် တွားသွား​တတ်သော အကောင်များကို လည်းကောင်း၊ မြေကြီး၏သားရဲတို့ကို လည်းကောင်း မွေးဖွား​စေလော့ဟု မိန့်တော်မူလျှင်၊ မွေးဖွား​လေ၏။

၂၅ တစ်ဖန် ငါ၊ ဘုရားသခင်သည် မြေကြီး၏ သားရဲတို့ကို သူတို့​အမျိုးအတိုင်း၊ ထို့အတူ ကျွဲနွားတိရစ္ဆာန်တို့ကို သူတို့​အမျိုး​အတိုင်း၊ မြေကြီး​ပေါ်၌ တွားသွား​တတ်သည့်​အကောင်​မှန်သမျှကို သူ့အမျိုးအတိုင်း ဖန်ဆင်း​တော်မူ၏။ ငါ၊ ဘုရားသခင်သည် ခပ်သိမ်းသောဤ​အရာတို့ ကောင်းမြတ်​သည်ကို မြင်တော်မူ၏။

၂၆ တစ်ဖန် ငါ၊ ဘုရားသခင်သည် ရှေးဦးစွာ​ကတည်းက ငါနှင့် အတူ​ရှိသည့် ငါ၏ တစ်ပါး တည်းသော သားတော်အား၊ လူသားကို ငါတို့ ပုံသဏ္ဌာန်နှင့်​အညီ၊ ငါတို့​ပုံသဏ္ဌာန်အတိုင်း၊ ဖန်ဆင်း ကြကုန်အံ့ဟု မိန့်တော်မူ၍၊ ဖန်ဆင်း​လေ၏။ တစ်ဖန် ငါ၊ ဘုရားသခင်က သူတို့အား ပင်လယ်ငါးတို့ အပေါ်၊ ထို့အတူ မိုးကောင်းကင်​ငှက်တို့​အပေါ်၊ ထို့အတူ ကျွဲနွားတိရစ္ဆာန်တို့​အပေါ်၊ ထို့အတူ မြေကြီး​တစ်ခုလုံးအပေါ်၊ ထို့အတူ မြေကြီး​ပေါ်၌ တွားသွား​တတ်သည့် တွားသွား​သတ္တဝါတိုင်း​အပေါ် အစိုးရစေဟု မိန့်တော်မူ၏။

၂၇ တစ်ဖန် ငါ၊ ဘုရားသခင်သည် လူသားကို ငါကိုယ်တိုင်၏ ပုံသဏ္ဌာန်နှင့်​အညီ ဖန်ဆင်း​တော်မူ၏၊ ငါ၏​တစ်ပါး​တည်းသော သားတော်၏​ပုံသဏ္ဌာန်နှင့်​အညီ ငါသည် သူ့ကိုဖန်ဆင်း​တော်မူ၏၊ ယောက်ျားနှင့် မိန်းမကို ငါ​ဖန်ဆင်း​တော်မူ၏။

၂၈ တစ်ဖန် ငါ၊ ဘုရားသခင်သည် သူတို့ကို ကောင်းချီး​ပေး၍၊ မိန့်တော်မူ​သည်ကား၊ ဝပြော ကြလော့၊ ထို့အတူ ပွားများကြလော့၊ ထို့အတူ မြေကြီးကိုပြည့်စေ၍ နိုင်ကြလော့၊ ပင်လယ် ငါးတို့အပေါ်၊ ထို့အတူ မိုးကောင်းကင် ငှက်တို့အပေါ်၊ ထို့အတူ မြေကြီးပေါ်၌ လှုပ်ရှားသည့် အသက်ရှင်သော အရာတိုင်းအပေါ် အစိုးရကြလော့။

၂၉ တစ်ဖန် ငါ၊ ဘုရားသခင်က၊ လူသားကို၊ ရှုလော့၊ ငါသည် သင့်အား မြေကြီးမျက်နှာပြင်တစ်ခုလုံးပေါ်၌ အစေ့ကို ဖြစ်စေသည့် စပါးပင်တိုင်းကို လည်းကောင်း၊ အစေ့ကို ဖြစ်စေသည့် အသီးရှိမည့် သစ်ပင်တိုင်းကို လည်းကောင်းပေး၏။ သင့်အဖို့ ထိုအရာသည် စားစရာဖြစ်လိမ့်မည်ဟု မိန့်တော်မူ၏။

၃၀ မြေကြီးပေါ်ရှိ သားရဲတိုင်း​အဖို့၊ ထို့အတူ မိုးကောင်းကင်​ငှက်တိုင်း​အဖို့၊ ထို့အတူ မြေကြီး​ပေါ်၌ တွားသွား​တတ်သည့် အကောင်တိုင်း​အဖို့၊ ထိုကဲ့သို့​အားဖြင့် ငါသည် အသက်ကို ပေး၍၊ စားစရာ​အဖြစ် သန့်ရှင်းသော​စပါးတိုင်းကို ပေးလိမ့်မည်ဟု ငါ​မိန့်တော်မူ​လေသည့်​အတိုင်းပင် ပေးလေ၏။

၃၁ တစ်ဖန် ငါ၊ ဘုရားသခင်သည် ငါ​ဖန်ဆင်း​တော်မူ​ခဲ့လေသည့် အရာတိုင်းကို မြင်၍၊ ထို့အတူ၊ ရှုလော့၊ ငါ ဖန်ဆင်း​တော်မူခဲ့လေသည့် ခပ်သိမ်းသောအရာတို့ အလွန် ကောင်းမြတ်​သည်ကို မြင်တော်မူ၏။ ညဦးနှင့် နံနက်သည် ဆဋ္ဌမနေ့ ဖြစ်လေ၏။