အခန်းကြီး ၃
အာဗြဟံသည် နေ၊ လနှင့် ကြယ်တို့အကြောင်းကို ဥရိမ်နှင့် သုမိမ်တို့အားဖြင့် သင်ယူ၏—ကိုယ်တော်ရှင်သည် သူ့အား စိတ်ဝိညာဉ်တို့၏ ထာဝရသဘောကို ဖော်ပြ၏—သူသည် ကမ္ဘာမြေကြီး မတိုင်မီဘဝ၊ ကြိုတင်ခန့်ထားတော်မူခြင်း၊ ဖန်ဆင်းခြင်း၊ ရွေးနုတ်ရှင်ကို ရွေးချယ်ခြင်းနှင့် လူသား၏ ဒုတိယအရိပ်အရာတို့အကြောင်းကို သင်ယူ၏။
၁ ငါ၊ အာဗြဟံ၌၊ ခါလဒဲအမျိုးသားတို့၏ ဥရမြို့တွင် ငါ၏ ဘုရားသခင်ကိုယ်တော်ရှင် ပေးထားတော်မူခဲ့လေသည့် ဥရိမ်နှင့် သုမိမ်ရှိ၏။
၂ ငါသည် ကြယ်တို့ကို မြင်၏၊ ၎င်းတို့မှာ အလွန်များ၏၊ ၎င်းတို့အထဲမှ တစ်လုံးမှာ ဘုရားသခင်၏ ပလ္လင်အနီး၌ ရှိ၏။ ထိုကြယ်အနီး၌ ကြီးစွာသောကြယ်များစွာလည်း ရှိလေ၏။
၃ ကိုယ်တော်ရှင်ကလည်း ငါ့ကို မိန့်တော်မူလေသည်ကား၊ ဤအရာတို့သည် ထိန်းချုပ်သော ကြယ်များ ဖြစ်ကြ၏။ ကြီးသောကြယ်သည်ကား ငါနှင့်နီးသောကြောင့်၊ အမည်မှာ ကော်လောဘ ဖြစ်၏၊ အကြောင်းမူကား၊ ငါသည် သင်၏ ဘုရားသခင်ကိုယ်တော်ရှင်ဖြစ်၏။ ငါသည် ဤကြယ်ကို သင်ရပ်သည့် နေရာနည်းတူရှိသည့် ခပ်သိမ်းသောအရာတို့ကို ထိန်းချုပ်စေရန် ထားတော်မူလေပြီ။
၄ ကိုယ်တော်ရှင်သည် ဥရိမ်နှင့် သုမိမ်တို့အားဖြင့်၊ ငါ့ကို မိန့်တော်မူလေသည်ကား၊ ကော်လောဘသည် ကိုယ်တော်ရှင်၏ နည်းအတိုင်း၊ ၎င်း၏ လည်ပတ်ခြင်း အချိန်နှင့်ရာသီတို့အတိုင်းရှိလေ၏။ လည်ပတ်ခြင်းတစ်ခုမှာ ကိုယ်တော်ရှင်အဖို့ သူ၏ရေတွက်ခြင်းနည်းအတိုင်း တစ်နေ့ ဖြစ်၏၊ ထိုလည်ပတ်ခြင်းမှာ သင်ရပ်သည့်နေရာအဖို့ စီရင်ထားသည့်အချိန်အတိုင်းဆိုလျှင်၊ နှစ်တစ်ထောင် ဖြစ်၏။ ဤအရာမှာ ကော်လောဘ၏ ရေတွက်ခြင်းအတိုင်း ကိုယ်တော်ရှင်၏ အချိန်ရေတွက်ခြင်းပေတည်း။
၅ ကိုယ်တော်ရှင်က ငါ့ကို မိန့်တော်မူလေသည်ကား၊ အလင်းအိမ် အငယ်၊ နေ့ကို အုပ်စိုးသည့် အလင်းအိမ်ထက် ငယ်သည့်၊ ညဉ့်ကို အုပ်စိုးသည့် ဂြိုဟ်သည် ရေတွက်ခြင်းအတွက် သင်ရပ်သည့် နေရာအထက်၌ ရှိ၏ သို့မဟုတ် သာ၍ကြီး၏၊ အကြောင်းမူကား ပို၍ နှေးကွေးစွာရွေ့၏။ သင်ရပ်သည့် နေရာ၏ အထက်၌ ရှိသောကြောင့်၊ ဤအရာမှာ အစီအစဉ်တကျရှိ၏၊ ထို့ကြောင့် အချိန်ရေတွက်ခြင်း၌ ထိုအရာ၏ နေ့၊ လ၊ နှစ်တို့မှာ အလွန်မများလှ။
၆ ကိုယ်တော်ရှင်က ငါ့ကို မိန့်တော်မူလေသည်ကား၊ ယခုတွင်၊ အာဗြဟံ၊ ဤအချက်အလက်နှစ်ခု ရှိ၏၊ ရှုလော့၊ သင်၏ မျက်စိများမြင်၏။ ရေတွက်ရာ အချိန်များကို အထူးသဖြင့်၊ သင်ရပ်သည့် မြေကြီးအတွက် သတ်မှတ်ထားသော အချိန်ကို၊ ထို့အတူ နေ့ကို အုပ်စိုးစေရန် ထားသည့် အလင်းအိမ် အကြီးအတွက် သတ်မှတ်ထားသော အချိန်ကို၊ ထို့အတူ ညဉ့်ကို အုပ်စိုးစေရန် ထားသည့် အလင်းအိမ် အငယ်အတွက် သတ်မှတ်ထားသော အချိန်ကို သိရန် သင့်အားပေးထား၏။
၇ ယခုတွင် အလင်းအိမ် အငယ်အတွက် ရေတွက်ခြင်းနှင့်စပ်လျဉ်း၍ သတ်မှတ်ထားသော အချိန်မှာ သင်ရပ်သည့် မြေကြီးအတွက် ရေတွက်ခြင်း အချိန်ထက် သာ၍ကြာ၏။
၈ ဤအချက်အလက်နှစ်ခု တည်ရှိရာနေရာ၌၊ ၎င်တို့အထက်တွင် တခြားအချက်အလက် တစ်ခု ရှိလိမ့်မည်၊ ဆိုလိုသည်ကား၊ အချိန်ရေတွက်ခြင်း၌ သာ၍ပင်ကြာမည့် တခြားဂြိုဟ်တစ်ခု ရှိလိမ့်မည်။
၉ ထိုကဲ့သို့အားဖြင့်၊ ကော်လောဘသို့ နီးလာသည်အထိ၊ အချိန် ရေတွက်ခြင်း၌ ဂြိုဟ်တစ်လုံး အထက်၌ တစ်လုံးရှိလိမ့်မည်၊ ထိုကော်လောဘသည် ကိုယ်တော်ရှင်၏ အချိန်ရေတွက်ခြင်း အတိုင်း ရှိ၏။ ထိုကော်လောဘကို ဘုရားသခင်၏ပလ္လင်အနီး၌ ထား၏၊ သင်ရပ်သည့်နေရာနှင့် အဆင့်တူရာ၌ရှိသည့် ထိုဂြိုဟ်ခပ်သိမ်းတို့ကို အုပ်စိုးခြင်းငှာပေတည်း။
၁၀ အလင်းကို ပေးရန်ထားသည့် ခပ်သိမ်းသော ကြယ်တို့၏ သတ်မှတ်ထားသောအချိန်ကို သိရန် သင့်ကို ပေးထားသည်ကား၊ ဘုရားသခင်၏ ပလ္လင်အနီးသို့ ရောက်လာသည်အထိပင်ဖြစ်၏။
၁၁ ထိုကဲ့သို့အားဖြင့်၊ ငါအာဗြဟံသည် လူတစ်ဦးက တခြားတစ်ဦးနှင့် ပြောသကဲ့သို့ပင်၊ ကိုယ်တော်ရှင်နှင့် မျက်နှာချင်းဆိုင် ပြောခဲ့၏။ သူ့လက်ဖြင့် ဖန်ဆင်းထားလေသည့် အရာများအကြောင်းကိုလည်း ငါ့ကို သူပြောပြတော်မူခဲ့၏။
၁၂ ငါ့ကို မိန့်တော်မူလေသည်ကား၊ ငါ့သား၊ ငါ့သား (သူ့လက်ကိုဆန့်၍) ရှုလော့၊ ငါသည် သင့်အား ခပ်သိမ်းသောဤအရာတို့ကို ပြတော်မူမည်။ သူ့လက်ကို ငါ့မျက်စိများပေါ်မှာတင်သဖြင့်၊ ငါသည်လည်း သူ့လက်ဖြင့် ဖန်ဆင်းထားလေသည့်၊ များစွာရှိလေသည့် ထိုအရာတို့ကို မြင်ရ၏။ ငါ့မျက်စိများရှေ့၌ များစွာပွားများသဖြင့်၊ ထိုအရာတို့၏အဆုံးကို ငါမမြင်နိုင်ခဲ့။
၁၃ ဤအရာမှာ နေဖြစ်သည့် ရှိနေဟ ဖြစ်၏ဟု ငါ့ကို မိန့်တော်မူ၏။ ကြယ်ဖြစ်သည့် ကော်ကောဘ ဟု ငါ့ကို မိန့်တော်မူ၏။ လ ဖြစ်သည့် ဩလေဟု ငါ့ကို မိန့်တော်မူ၏။ ကြယ်တို့ကို ပုံဆောင်သည့် ကော်ကူဘေးမ၊ သို့မဟုတ်၊ မိုးမျက်နှာကြက်၌ ရှိလေသည့် ကြီးစွာသော အလင်းအိမ် ခပ်သိမ်းတို့ ဖြစ်သည်ဟု ငါ့ကို မိန့်တော်မူ၏။
၁၄ ကိုယ်တော်ရှင်က ငါ့အား ဤစကားတို့ကို မိန့်တော်မူလေသော အချိန်မှာ ညဉ့်အချိန်ဖြစ်လေ၏၊ ငါသည် သင့်ကို ပွားများစေမည်၊ သင်၏နောက်မှ သင့်အမျိုးအနွယ်တို့ကိုလည်း ဤအရာများကဲ့သို့ ဖြစ်စေမည်။ သင်သည် သဲလုံးတို့ကို ရေတွက်နိုင်လျှင်၊ သင့်အမျိုးအနွယ်တို့၏အရေအတွက်ကိုလည်း ထိုနည်းတူ ရေတွက်နိုင်လိမ့်မည်။
၁၅ ကိုယ်တော်ရှင်က ငါ့ကိုမိန့်တော်မူလေသည်ကား၊ အာဗြဟံ၊ အဲဂုတ္တုပြည်ထဲသို့ သင်မသွားမီ ဤအရာတို့ကို ငါပြ၏၊ ခပ်သိမ်းသော ဤစကားတို့ကို သင်ဟောကြားနိုင်စေခြင်းငှာပေတည်း။
၁၆ အရာနှစ်ခုရှိလျှင်၊ တစ်ခုသည် အခြားတစ်ခု၏ အထက်၌ ရှိလိမ့်မည်၊ ၎င်းတို့အထက်၌ သာ၍ ကြီးသောအရာများ ရှိလိမ့်မည်။ ထို့ကြောင့် ကော်လောဘသည် ငါနှင့်အနီးဆုံး ဖြစ်သောကြောင့်၊ သင်မြင်လေသည့် ကော်ကူဘေးမတစ်ခုလုံး၌ အကြီးဆုံးဖြစ်၏။
၁၇ ယခုတွင်၊ အရာနှစ်ခုရှိလျှင်၊ တစ်ခုသည် အခြားတစ်ခု အထက်၌ ရှိ၏၊ လသည် မြေကြီး အထက်၌ ရှိ၏၊ ထိုသို့ဆိုလျှင်၊ အထက်၌ ဂြိုဟ်တစ်လုံး သို့မဟုတ် ကြယ်တစ်လုံး တည်ရှိနိုင်၏။ သင်၏ ဘုရားသခင် ကိုယ်တော်ရှင်သည် လုပ်ဆောင်ရန် သူ၏စိတ်နှလုံး၌ ကြံစည်လျှင်၊ မလုပ်ဆောင်မည့် အရာတစ်ခုမျှမရှိ။
၁၈ သို့သော်လည်း သူသည် သာ၍ ကြီးသောကြယ်ကို ဖန်ဆင်းတော်မူခဲ့၏။ ထိုနည်းတူစွာပင်၊ ဝိညာဉ်နှစ်ခု ရှိလျှင်လည်း၊ တစ်ခုသည် အခြားတစ်ခုထက် ပို၍ဉာဏ်စွမ်း ရှိလိမ့်မည်၊ သို့သော်လည်း ဤဝိညာဉ် နှစ်ခုတို့သည် တစ်ခုမှာ အခြားတစ်ခုထက် ပို၍ဉာဏ်စွမ်းရှိသော်ငြားလည်း အစမရှိ။ ၎င်းတို့သည် ယခင်ကတည်ရှိ၏၊ အဆုံးမရှိရ၊ နောက်၌လည်း တည်ရှိလိမ့်မည်၊ အကြောင်းမူကား၊ ၎င်းတို့သည် နိုလောင်၊ သို့မဟုတ် ထာဝရဖြစ်၏။
၁၉ ကိုယ်တော်ရှင်က ငါ့ကို မိန့်တော်မူလေသည်ကား၊ ဤအချက်အလက် နှစ်ခုအမှန် တည်ရှိ၏၊ ဝိညာဉ်နှစ်ခုရှိ၍၊ တစ်ခုသည် အခြားတစ်ခုထက် ပို၍ ဉာဏ်စွမ်းရှိ၏။ ၎င်းတို့ထက်ပို၍ ဉာဏ်စွမ်းရှိသည့် တခြားတစ်ခုရှိလိမ့်မည်။ ငါသည် သင်၏ ဘုရားသခင်ကိုယ်တော်ရှင်ဖြစ်၏၊ ငါသည် ၎င်းတို့ အားလုံးထက် ပို၍ဉာဏ်စွမ်းရှိ၏။
၂၀ သင်၏ ဘုရားသခင်ကိုယ်တော်ရှင်သည် သူ၏ ကောင်းကင်တမန်အား သင့်ကို ဧလကာန၏ ယဇ်ပုရောဟိတ်၏ လက်မှ ကယ်လွှတ်ရန်စေလွှတ်ခဲ့၏။
၂၁ ငါသည် သူတို့အားလုံး၏အလယ်၌ နေထိုင်၏။ ထို့ကြောင့်၊ ယခုတွင်၊ ငါသည် သင့်အား ငါ့လက်ဖြင့် ဖန်ဆင်းခဲ့လေသည့်အရာများကို ဟောကြားရန် သင့်ဆီကို ဆင်းလာတော်မူလေပြီ၊ ထိုဖန်ဆင်းခြင်း၌ ငါ၏ဉာဏ်ပညာသည် သူတို့အားလုံးထက် သာလွန်၏၊ အကြောင်းမူကား၊ ငါသည် အထက်ကောင်းကင်၌၊ ထို့အတူ အောက်အရပ်မြေကြီး၌၊ ရှေးဦးစွာကတည်းက သင်၏မျက်စိများ မြင်လေသည့် ခပ်သိမ်းသော ဝိညာဉ်သားသမီးတို့အပေါ် ခပ်သိမ်းသောဉာဏ်ပညာနှင့် ပညာသတိ ရှိခြင်းတို့ဖြင့် အုပ်စိုးတော်မူ၏။ ငါသည် ရှေးဦးစွာ၌ သင်မြင်လေသည့် ခပ်သိမ်းသော ဝိညာဉ်သားသမီးတို့ အလယ်၌ ဆင်းလာတော်မူခဲ့၏။
၂၂ ယခုတွင်၊ ကိုယ်တော်ရှင်သည်၊ ငါ၊ အာဗြဟံအား၊ ကမ္ဘာမတည်ရှိမီက ဖွဲ့စည်းထားလေသည့် ဝိညာဉ်သားသမီးတို့ကို ပြ၏။ ဤခပ်သိမ်းသောသူတို့၌ ဆွေကြီးမျိုးကြီးများနှင့် ကြီးမြတ်သောသူ များစွာရှိလေ၏။
၂၃ ဘုရားသခင်သည် ဤဝိညာဉ်များ ကောင်းမြတ်ကြောင်း မြင်၏၊ သူတို့အလယ်၌ ရပ်၍၊ ဤသူတို့ကို ငါ၏အုပ်စိုးသူများ ဖြစ်စေမည်ဟု မိန့်တော်မူ၏။ အကြောင်းမူကား၊ သူသည် ဝိညာဉ်ဖြစ်လေသော ထိုသူတို့အလယ်၌ ရပ်၏၊ ထိုသူတို့ကောင်းမြတ်ကြောင်းကိုလည်း မြင်၏။ အာဗြဟံ၊ သင်သည် သူတို့အထဲမှ တစ်ဦးဖြစ်၏။ သင်မမွေးဖွားမီကတည်းက သင်ရွေးကောက်ခံရ၏ဟု ငါ့ကို မိန့်တော်မူ၏။
၂၄ ထိုသူတို့အထဲ၌ ဘုရားသခင်နှင့်တူသောသူတစ်ဦးသည် ရပ်၍၊ အတူရှိလေသူတို့ကို ဆိုလေသည်ကား၊ ငါတို့ ဆင်းသွားကြမည်၊ အကြောင်းမူကား၊ နေရာရှိ၏၊ ဤပစ္စည်းများကိုလည်း ယူသွားကြမည်၊ ဤသူတို့နေထိုင်နိုင်ရန် မြေကြီးကိုလည်း ငါတို့ ဖန်ဆင်းကြမည်။
၂၅ သူတို့၏ဘုရားသခင်ကိုယ်တော်ရှင် မိန့်မှာလေသည့် ခပ်သိမ်းသောအရာမှန်သမျှကို သူတို့လုပ်ဆောင်ခြင်းရှိမရှိ ဤနည်းအားဖြင့် ငါတို့စမ်းသပ်ကြမည်။
၂၆ မိမိတို့၏ ပထမအရိပ်အရာကို စောင့်ထိန်းသည့် သူတို့အပေါ် ထပ်လောင်း၍ ပေးလိမ့်မည်။ မိမိတို့၏ ပထမအရိပ်အရာကို စောင့်ထိန်းခြင်းမရှိသူတို့သည် မိမိတို့၏ ပထမအရိပ်အရာကို စောင့်ထိန်းသူတို့နှင့်အတူ တူသည့်နိုင်ငံ၌ ဘုန်းတော်ကို မရကြလတ္တံ့။ မိမိတို့၏ ဒုတိယအရိပ်အရာကို စောင့်ထိန်းသူတို့သည် ဘုန်းတော်ကို ဦးခေါင်းများပေါ်၌ ထပ်လောင်း၍ ကာလအစဉ်အဆက် အမြဲ ရရှိကြလိမ့်မည်။
၂၇ အဘယ်သူကို ငါစေလွှတ်ရမည်နည်းဟု ကိုယ်တော်ရှင်မေးတော်မူလျှင်၊ လူသားတော်နှင့် တူသောသူက အကျွန်ုပ် ရှိပါ၏။ အကျွန်ုပ်ကို စေလွှတ်တော်မူပါဟု လျှောက်၏။ တခြားတစ်ဦးကလည်း၊ အကျွန်ုပ်ရှိပါ၏၊ အကျွန်ုပ်ကို စေလွှတ်တော်မူပါဟု လျှောက်လျှင်၊ ကိုယ်တော်ရှင်က ငါသည် ပထမပြောသူကို စေလွှတ်မည်ဟု မိန့်တော်မူ၏။
၂၈ ဒုတိယပြောသူသည်လည်း အမျက်ထွက်၍၊ သူ၏ပထမအရိပ်အရာကို စောင့်ထိန်းခြင်းမရှိ။ ထိုနေ့၌၊ များစွာသောသူတို့သည် သူ့နောက်ကလိုက်သွားကြ၏။