အာဗြဟံကျမ်း
ဂျိုးဇက်စမစ် ရှေးစက္ကူများမှ ဘာသာပြန်ထားသောကျမ်း
ဤကျမ်းသည်ကား၊ အဲဂုတ္တုလှိုင်ဂူများဆီမှ ကျွန်ုပ်တို့လက်များထဲသို့ ကျရောက်လာသည့် ရှေးမှတ်တမ်းများကို ဘာသာပြန်ခြင်း ဖြစ်၏။ အာဗြဟံ အဲဂုတ္တုပြည်၌ရှိစဉ် ရှေးစက္ကူများပေါ်၌ အာဗြဟံကိုယ်တိုင်၏ လက်ဖြင့်ရေးထားသည့်၊ အာဗြဟံကျမ်းဟုခေါ်သည့်၊ အာဗြဟံ၏ စာများလည်းဖြစ်၏။
အခန်းကြီး ၁
အာဗြဟံသည် မျိုးနွယ်စုအဘအစီအစဉ်၏ ကောင်းချီးမင်္ဂလာများကို ရှာ၏—သူသည် ခါလဒဲပြည်၌ ယဇ်ပုရောဟိတ် အတုအယောင်တို့အားဖြင့် ညှဉ်းဆဲခံရ၏—ယေဟောဝါက သူ့ကို ကယ်တင်ခဲ့၏—အဲဂုတ္တု၏ မူရင်းဇစ်မြစ်နှင့် အစိုးရကို ရှင်းပြထား၏။
၁ ခါလဒဲလူတို့၏ ပြည်ထဲ၌၊ ငါ၏ဘိုးဘေးတို့နေထိုင်ရာ၌၊ ငါ၊ အာဗြဟံသည်၊ ငါ့အဖို့ တခြားနေထိုင်ရာ နေရာတစ်နေရာ ရရှိရန်လိုအပ်ကြောင်း သိမြင်၏။
၂ ထို့အတူ၊ ငါ့အတွက် သာ၍ကြီးစွာသော ပျော်ရွှင်ခြင်း၊ ငြိမ်းချမ်းခြင်းနှင့် အနားရခြင်းတို့ကို တွေ့မြင်ရလျက်၊ ငါသည် ဘိုးဘေးတို့၏ ကောင်းချီးမင်္ဂလာများကိုလည်းကောင်း၊ ထိုအရာတို့ကို စီမံဆောင်ရွက်ရန် ငါခန့်ထားခံရမည့်အခွင့်အရေးကို လည်းကောင်း ရှာ၏။ ငါကိုယ်တိုင်သည် ဖြောင့်မတ်ခြင်းကို လိုက်လျှောက်သူတစ်ဦးလည်းဖြစ်လျက်၊ ကြီးစွာသော အသိပညာကို ပိုင်ဆိုင်သော သူတစ်ဦး ဖြစ်ရန်၊ ထို့အတူ ဖြောင့်မတ်ခြင်းကို လိုက်လျှောက်သည့် သာ၍ ကြီးစွာသောသူ တစ်ဦး ဖြစ်ရန်၊ ထို့အတူ သာ၍ကြီးစွာသော အသိပညာကို ပိုင်ဆိုင်ရန်၊ ထို့အတူ များစွာသော ပြည်သားတို့၏ အဘတစ်ဦး၊ ငြိမ်းချမ်းခြင်း၏ အရှင်တစ်ဦးဖြစ်ရန် အလိုရှိလျက်၊ ထို့အတူ သွန်သင်ခြင်းတို့ကို ရရှိရန်နှင့် ဘုရားသခင်၏ ပညတ်တော်တို့ကို စောင့်ထိန်းရန် အလိုရှိလျက်၊ ငါသည် ဘိုးဘေးတို့ပိုင်ဆိုင်သည့် အခွင့်အရေးကို ကိုင်ဆောင်လျက်၊ အမွေခံအခွင့်အရေးရှိသောသူတစ်ဦး၊ ယဇ်ပုရောဟိတ်မင်းတစ်ဦး ဖြစ်လာခဲ့၏။
၃ ထိုအခွင့်အရေးမှာ ဘိုးဘေးတို့ဆီမှ ငါ့ထံအပ်နှင်းထား၏။ ဘိုးဘေးတို့ဆီမှ၊ ရှေးဦးစွာ အချိန်ကတည်းက၊ ထိုမှတစ်ပါး၊ ရှေးဦးစွာ ကတည်းကပင်၊ သို့မဟုတ် မြေကြီးအုတ်မြစ်မတိုင်မီမှ၊ မျက်မှောက်ကာလအထိ တိုင်အောင်၊ သားဦး သို့မဟုတ် အာဒံဖြစ်သည့် ပထမဦးဆုံးလူသား၊ သို့မဟုတ် ပထမဦးဆုံးအဘ၏ အခွင့်အရေးပင်ဖြစ်သည့် ထိုအခွင့်အရေးသည် ဘိုးဘေးတို့မှတစ်ဆင့် ငါ့ထံသို့ ကျလာခဲ့၏။
၄ ငါသည် အမျိုးအနွယ်နှင့် စပ်လျဉ်း၍ ဘိုးဘေးတို့ထံ ဘုရားသခင်၏ ခန့်အပ်ခြင်းအတိုင်း ယဇ်ပုရောဟိတ်အခွင့်သို့ ငါ၏ခန့်အပ်ခြင်းကို ရှာ၏။
၅ ငါ၏ဘိုးဘေးတို့သည် ဖြောင့်မတ်ခြင်းမှနေ၍၊ ထို့အတူ သူတို့၏ ဘုရားသခင် ကိုယ်တော်ရှင် ပေးတော်မူလေသည့် သန့်ရှင်းသောပညတ်တော်များမှ နေ၍၊ သာသနာပလူတို့၏ ဘုရားများကို ကိုးကွယ်ခြင်းသို့လှည့်ကြပြီး၊ ငါ၏အသံကို စေ့စေ့နားထောင်ရန် ရှင်းရှင်းငြင်းပယ်ကြ၏။
၆ အကြောင်းမူကား၊ သူတို့၏ စိတ်နှလုံးကို မကောင်းမှုပြုရန် ထား၍၊ ဧလကာန၏ ဘုရားဆီသို့၊ ထို့အတူ လိဗန၏ ဘုရားဆီသို့၊ ထို့အတူ မာမက်ခရ၏ ဘုရားဆီသို့၊ ထို့အတူ ခေါ်ရတ်၏ ဘုရားဆီသို့၊ ထို့အတူ အဲဂုတ္တုဘုရင်၊ ဖာရော၏ဘုရားဆီသို့ လုံးလုံးလှည့်ကြ၏။
၇ ထို့ကြောင့်၊ သူတို့သည် မိမိတို့စိတ်နှလုံးကို သာသနာပလူတို့သားသမီးများအား ဤစကားမပြောနိုင်သည့် ရုပ်တုတို့ကို ပူဇော်သည့်ယဇ်ဆီသို့ လှည့်၍၊ ငါ၏အသံကို စေ့စေ့နားထောင်ခြင်းမရှိကြ၊ ဧလကာန၏ ယဇ်ပုရောဟိတ်၏ လက်အားဖြင့် ငါ့အသက်ကို နုတ်ယူရန်သာ ကြိုးစားအားထုတ်ကြ၏။ ဧလကာန၏ ယဇ်ပုရောဟိတ်သည် ဖာရော၏ ယဇ်ပုရောဟိတ်လည်းဖြစ်၏။
၈ ယခုတွင်၊ ဤအချိန်မှာ ခါလဒဲပြည်၌ တည်ဆောက်ထားလေသည့် ယဇ်ပလ္လင်၌ ပူဇော်ရန်၊ ဤထူးဆန်းသော ဘုရားတို့အား ယောက်ျား၊ မိန်းမနှင့် ကလေးများကို ပူဇော်ခြင်းအတွက်၊ အဲဂုတ္တုဘုရင်၊ ဖာရော၏ယဇ်ပုရောဟိတ်၏ ထုံးစံဖြစ်လေ၏။
၉ ဤသို့အားဖြင့်အချိန်တန်လာသောအခါ၊ ယဇ်ပုရောဟိတ်သည် ဖာရော၏ ဘုရားအား၊ ထို့အတူ ရှာဂရေလ၏ ဘုရားအား၊ အဲဂုတ္တုလူတို့၏ နည်းအတိုင်းပင် ပူဇော်သက္ကာပြု၏။ ယခုတွင်၊ ရှာဂရေလ၏ ဘုရားမှာ နေဖြစ်၏။
၁၀ အကယ်စင်စစ်၊ ကျေးဇူးတော်ဝန်ခံရာပူဇော်သက္ကာအဖြစ် ကလေးတစ်ယောက်ကို ဖာရော၏ ယဇ်ပုရောဟိတ်က၊ အိုလီရှမ်လွင်ပြင်ထိပ်ရှိ၊ ပေါတိဖာ၏တောင်ကုန်းဟု ခေါ်သည့် တောင်ကုန်းပေါ်၌ တည်ရှိသည့် ယဇ်ပလ္လင်ပေါ်၌ ပူဇော်၏။
၁၁ ယခုတွင်၊ ဤယဇ်ပုရောဟိတ်သည် ဤယဇ်ပလ္လင်ပေါ်၌ တစ်ကြိမ်တွင် အပျိုကညာ သုံးဦးကို ပူဇော်၏၊ ထိုသူတို့သည်ကား ဟာမ၏ ရင်သွေးတို့အထဲမှ တော်ဝင်မျိုးရိုး အရင်းအချာ တစ်ဦးဖြစ်သူ၊ ဩနိတ၏ သမီးများဖြစ်လေ၏။ ဤအပျိုကညာတို့သည် သူတို့၏ ကိုယ်ကျင့်သီလကြောင့် ပူဇော်ခံရကြ၏။ သူတို့သည် သစ်သား၊ သို့မဟုတ် ကျောက်ဘုရားတို့ကို ကိုးကွယ်ရန် ဦးမညွှတ်လိုကြ၊ ထို့ကြောင့် ဤယဇ်ပလ္လင်ပေါ်၌ အသတ်ခံကြရ၏၊ ထိုအမှုကိုလည်း အဲဂုတ္တုလူတို့၏ နည်းအတိုင်း ပြုလေ၏။
၁၂ ဤသို့အားဖြင့် အချိန်တန်လာသောအခါ၊ ယဇ်ပုရောဟိတ်တို့သည် ဤယဇ်ပလ္လင်ပေါ်၌ ထိုအပျိုကညာတို့ကို ပြုခဲ့ကြသည့်အတိုင်း၊ ငါ့ကိုလည်း ကွပ်မျက်နိုင်ခြင်းငှာ၊ အဓမ္မ ဖမ်းဆီးကြ၏။ ဤယဇ်ပလ္လင်အကြောင်းကို သင်တို့သိနိုင်ကြစေခြင်းငှာလည်း၊ ငါသည် ဤမှတ်တမ်း၏ အစ၌ရှိသည့် အမှတ်လက္ခဏာကို သင်တို့အား ရည်ညွှန်းမည်။
၁၃ ခါလဒဲလူတို့၌ ရှိခဲ့လေသည့်၊ ခုတင်ပုံစံမျိုးဖြင့် ပြုလုပ်ထား၏၊ ဧလကာန၊ လိဗန၊ မာမက်ခရ၊ ခေါ်ရတ်တို့၏ဘုရားများ၊ ထို့အတူ အဲဂုတ္တုဘုရင်၊ ဖာရော၏ဘုရားကဲ့သို့သော ဘုရား၏ရှေ့၌ ရှိ၏။
၁၄ ဤဘုရားတို့အကြောင်းကို သင်တို့နားလည်ခြင်း ရှိနိုင်စေခြင်းငှာ၊ ငါသည် အစ၌ အရုပ်များထဲတွင် ၎င်းတို့၏ပုံကိုကို ဖော်ပြခဲ့လေပြီ၊ ထိုကဲ့သို့သောအရုပ်များကို ခါလဒဲလူ ရာလေနုတ်များဟု ခေါ်၏၊ အရုပ်စာများကို ပုံဆောင်၏။
၁၅ သူတို့သည် ငါ့ကို ပူဇော်၍ ငါ၏အသက်ကို နုတ်ယူနိုင်ခြင်းငှာ ငါ့အပေါ် သူတို့လက်ကို ချီကြစဉ်တွင်၊ ရှုလော့၊ ငါသည် ငါ၏ ဘုရားသခင်ကိုယ်တော်ရှင်ထံသို့ ကြွေးကြော်လျှင်၊ ကိုယ်တော်ရှင်သည် စေ့စေ့နားထောင်၍ ကြားတော်မူ၏၊ ငါ့ကို အနန္တတန်ခိုးရှင်၏ ရူပါရုံနှင့်လည်း ပြည့်စေ၏၊ သူ့မျက်မှောက်မှ ကောင်းကင်တမန်သည်လည်း ငါ့ဘေးမှာရပ်၍၊ ငါ၏ကြိုးများကို ချက်ချင်း ဖြေလွှတ်၏။
၁၆ သူ၏အသံကလည်း ငါ့ကို မိန့်တော်မူလေသည်ကား၊ အာဗြဟံ၊ အာဗြဟံ၊ ရှုလော့၊ ငါ၏ နာမတော်မှာ ယေဟောဝါဖြစ်၏၊ ငါသည် သင့်ကိုကြား၍၊ ကယ်လွှတ်ရန်၊ သင့်အဘ၏ အိမ်မှ၊ ထို့အတူ သင်၏ ခပ်သိမ်းသော ဆွေမျိုးသားချင်းတို့ထံမှ နုတ်ယူ၍၊ အကြောင်းကို သင်သိခြင်းမရှိသည့် အကျွမ်းမဝင်သော ပြည်ထဲသို့ ပို့ဆောင်ရန် ဆင်းလာတော်မူလေပြီ။
၁၇ ဤအမှုမှာလည်း သူတို့သည် ဧလကာန၏ဘုရား၊ ထို့အတူ လိဗန၏ဘုရား၊ ထို့အတူ မာမက်ခရ၏ ဘုရား၊ ထို့အတူ ခေါ်ရတ်၏ ဘုရား၊ ထို့အတူ အဲဂုတ္တုဘုရင်၊ ဖာရော၏ ဘုရားကို ကိုးကွယ်ရန် စိတ်နှလုံးကို ငါ့ထံမှဝေးရာသို့ လှည့်ကြလေသောကြောင့်ပေတည်း။ ထို့ကြောင့်၊ ငါသည် သူတို့ကို ဆုံးမရန်၊ ထို့အတူ သင်၏အသက်ကို နုတ်ယူခြင်းငှာ သင်၊ အာဗြဟံ၊ ငါ့သား၏ တစ်ဖက်၌ လက်ကိုချီလေသူအား ဖျက်ဆီးရန် ဆင်းလာတော်မူလေပြီ။
၁၈ ရှုလော့၊ ငါသည် သင့်ကို ငါ့လက်ဖြင့် ပို့ဆောင်တော်မူမည်၊ ထို့အတူ သင့်အပေါ်၌ ငါ၏ နာမတော်၊ ခမည်းတော်၏ ယဇ်ပုရောဟိတ်အခွင့်ကိုပင် ထားရန် ငါသည် သင့်ကို ဆောင်ယူတော်မူမည်၊ ငါ၏ တန်ခိုးတော်သည်လည်း သင့်အပေါ်မှာ ရှိလိမ့်မည်။
၁၉ နောဧနှင့် အတူရှိလေသကဲ့သို့ပင် သင်နှင့်လည်း အတူရှိလိမ့်မည်။ သို့ရာတွင်၊ သင်၏ အမှုတော်ဆောင်ခြင်းအားဖြင့်၊ ငါ၏ နာမတော်သည် မြေကြီး၌ ကာလအစဉ်အဆက် ထင်ရှားလိမ့်မည်၊ အကြောင်းမူကား၊ ငါသည် သင်၏ ဘုရားသခင်ဖြစ်၏။
၂၀ ရှုလော့၊ ပေါတိဖာ၏တောင်ကုန်းသည် ခါလဒဲပြည်၊ ဥရမြို့၌ ရှိလေ၏။ ကိုယ်တော်ရှင်သည် ထိုပြည်ရှိဘုရားတို့၏ ဧလကာနယဇ်ပလ္လင်ကို ဖြိုချ၏၊ ထိုဘုရားတို့ကိုလည်း ရှင်းရှင်းဖျက်ဆီး၏၊ ယဇ်ပုရောဟိတ်ကိုလည်း ပြင်းစွာရိုက်၍ သေ၏။ ခါလဒဲပြည်၌၊ ထို့အတူ ဖာရော၏အခန်း၌လည်း ကြီးစွာသော ငိုကြွေးမြည်တမ်းခြင်းရှိလေ၏။ ထိုဖာရောသည်ကား တော်ဝင်အသွေးအားဖြင့် ရှင်ဘုရင်ကို ပုံဆောင်၏။
၂၁ ယခုတွင် ဤအဲဂုတ္တုဘုရင်သည် ဟာမ၏ရင်သွေးမှ အမျိုးအနွယ်တစ်ဦးဖြစ်၏၊ ခါနာန်အမျိုးသားဇာတိသွေးကို ခံယူသူတစ်ဦးလည်းဖြစ်၏။
၂၂ ဤမျိုးရိုးမှနေ၍၊ ခပ်သိမ်းသော အဲဂုတ္တုလူတို့ ပေါက်ဖွားလာကြ၏၊ ထိုကဲ့သို့အားဖြင့် ခါနာန်အမျိုးသားတို့၏အသွေးကို ထိုပြည်ထဲ၌ ထိန်းသိမ်းစောင့်ရှောက်ထားခဲ့၏။
၂၃ အဲဂုတ္တုပြည်ကို မိန်းမတစ်ဦးကရှာဖွေတွေ့ရှိခဲ့ပြီး၊ ထိုမိန်းမမှာ ဟာမ၏သမီး၊ ခါလဒဲ၌ အဲဂုတ္တုကို ပုံဆောင်သည့်၊ တားမြစ်ထားသောအရာကို ပုံဆောင်သည့် အဲဂုတ္တပ်၏သမီးလည်းဖြစ်၏။
၂၄ ဤမိန်းမက ထိုပြည်ကိုတွေ့သောအချိန်တွင်၊ ထိုပြည်သည် ရေအောက်မှာရှိလေ၏၊ ထို့နောက်တွင် သူမ၏သားတို့ကို ထိုပြည်ထဲ၌ နေရာချခဲ့၏။ ထိုကဲ့သို့အားဖြင့်၊ ဟာမမှနေ၍၊ ထိုပြည်ထဲ၌ ကျိန်ခြင်းကို ထိန်းသိမ်းသည့် မျိုးနွယ်ကို ပေါက်ဖွားခဲ့၏။
၂၅ ယခုတွင် အဲဂုတ္တု၏ပထမဦးဆုံးအစိုးရကို ဖာရော၊ ဟာမသမီး အဲဂုတ္တပ်၏အကြီးဆုံးသားက တည်ထောင်ခဲ့၏၊ မျိုးနွယ်စုအဘနှင့် ဆိုင်လေသည့် ဟာမ၏ အစိုးရအတိုင်းဖြစ်လေ၏။
၂၆ ဖာရောသည်၊ ဖြောင့်မတ်သောသူတစ်ဦးဖြစ်၍၊ သူ့နိုင်ငံကို တည်ထောင်ပြီးလျှင်၊ သူ့လက်ထက် တစ်လျှောက်လုံး၌ သူ၏လူမျိုးတို့ကို ဉာဏ်ပညာရှိစွာနှင့် မျှတစွာတရားစီရင်၍၊ ပထမဦးဆုံး မျိုးဆက်၌၊ မျိုးနွယ်စုအဘနှင့်ဆိုင်သော ပထမဦးဆုံး အုပ်စိုးခြင်း၌၊ အာဒံ၏၊ ထို့အတူ မြေကြီးနှင့် ဆိုင်သော ကောင်းချီးမင်္ဂလာတို့နှင့် လည်းကောင်း၊ ဉာဏ်ပညာနှင့်ဆိုင်သော ကောင်းချီးမင်္ဂလာတို့နှင့် လည်းကောင်း သူ့ကိုကောင်းချီးပေးခဲ့သူ၊ သို့ရာတွင် ယဇ်ပုရောဟိတ်အခွင့်နှင့်စပ်ဆိုင်၍ သူ့ကို ကျိန်ခဲ့သူ အဘနောဧ၏ လက်ထက်၌ပင်၊ ဘိုးဘေးတို့အားဖြင့် တည်ထောင်ခဲ့သည့် ထိုစနစ်ကို အတုယူရန် အလေးအနက် ကြိုးစားအားထုတ်ခဲ့၏။
၂၇ ယခုတွင်၊ ဖာရောတို့သည် ယဇ်ပုရောဟိတ်အခွင့်၏အခွင့်အရေးကို ဟာမအားဖြင့်၊ နောဧထံမှ တောင်းဆိုချင်မတတ်ရှိသော်ငြားလည်း၊ ဖာရောမှာ ထိုအခွင့်အရေးကို မရရှိနိုင်ရာ မျိုးရိုးမှဖြစ်၍၊ ထို့ကြောင့် ငါ၏အဘသည် သူတို့၏ ရုပ်တုကိုးကွယ်ခြင်းဖြင့် လှည့်ဖြားခေါ်ဆောင်သွားခံခဲ့ရ၏။
၂၈ သို့ရာတွင်၊ ငါကိုယ်တိုင်မှစ၍ ဖန်ဆင်းခြင်း၏အစအထိ ဖြစ်ပျက်ချိန် မှတ်တမ်းကို နောက်သို့ပြန်၍ရေးဆွဲပြရန်၊ နောင်ကာလ၌၊ ငါကြိုးစားအားထုတ်မည်၊ အကြောင်းမူကား၊ ယခု မျက်မှောက် ကာလအထိ ငါကိုင်ဆောင်ထားသည့် မှတ်တမ်းများသည် ငါ၏လက်များထဲသို့ ရောက်လာလေပြီ။
၂၉ ယခုတွင်၊ ဧလကာန၏ ယဇ်ပုရောဟိတ် ပြင်းစွာအရိုက်ခံရ၍ သေပြီးနောက်၊ ခါလဒဲပြည်၌ ငတ်မွတ်ခေါင်းပါးခြင်းဘေး ရှိလိမ့်မည့်အကြောင်း၊ ထိုပြည်နှင့် စပ်လျဉ်း၍ ငါ့ကို မိန့်တော်မူခဲ့သည့် အရာများ၏ပြီးပြည့်စုံစေခြင်း ရောက်လာ၏။
၃၀ ထိုအတိုင်းပင် ငတ်မွတ်ခေါင်းပါးခြင်းဘေးသည် ခါလဒဲပြည်တစ်လျှောက် ပျံ့နှံ့၏၊ ငါ၏ အဘသည်လည်း ငတ်မွတ်ခေါင်းပါးခြင်း ဘေးကြောင့်၊ ပြင်းစွာ စိတ်ဆင်းရဲကိုယ်ဆင်းရဲဖြစ်လေ၏၊ ငါ၏ အသက်ကို နုတ်ယူရန် ငါ့တစ်ဖက်၌ သူသန္နိဋ္ဌာန်ချခဲ့လေသည့် မကောင်းမှုမှလည်း နောင်တရ လေ၏။
၃၁ သို့ရာတွင် ယဇ်ပုရောဟိတ်အခွင့်၏ အခွင့်အရေးနှင့် စပ်လျဉ်းသည့် ဘိုးဘေးတို့၊ အကယ်စင်စစ် မျိုးနွယ်စုအဘတို့၏ မှတ်တမ်းများကို ငါ၏ ဘုရားသခင်ကိုယ်တော်ရှင်သည် ငါကိုယ်တိုင်၏ လက်များထဲ၌ ကာကွယ် စောင့်မထား၏။ ထို့ကြောင့်၊ ဖန်ဆင်းခြင်း၏ အစအကြောင်း ထို့အတူ ဂြိုဟ်များအကြောင်း၊ ထို့အတူ ကြယ်များအကြောင်း သိခြင်းတို့ကို၊ ဘိုးဘေးတို့အား ဖော်ပြ လေသည့်အတိုင်း၊ ငါသည် ဤနေ့အထိပင် သိမ်းဆည်းထား၏၊ ဤအရာတို့အထဲမှ အချို့ကို ဤမှတ်တမ်း၌ ရေးရန်လည်း ကြိုးစားအားထုတ်မည်၊ ငါ့နောက်မှလာမည့် ငါ၏ သားစဉ်မြေးဆက်တို့၏ အကျိုးအတွက်ပေတည်း။