1 Áko Bóhólníihii Diyin God éí kéyah Urdi yéego dichin aghą́ hólǫ́ǫgo áyiilaa, éí biniinaa Haran, shitsilí, bizééʼ hazlį́į́ʼ; tʼáá ákótʼée ndi shizhéʼé, Terah, Ur kéyahgi tʼáá bighan, Chaldee dineʼé bikéyahdi.

2 Áádóó baa hoolzhiizh Shí, Abraham, Sarai sheʼasdzą́ą́ dooleełgo séyeh, áádóó shikʼis, Nahor, Milcah yizyeh, éí Haran bichʼéʼé nilį́.

3 Áko Diyin Bóhólníihii áshíłní: Abraham, nikéyah hahoodzoh, dóó nikʼéí danilínígíí bitsʼą́ą́dóó dah diinááh, áádóó nizhéʼé kééhatʼínídóó ałdóʼ, áko kéyah díínééłgóóígíí nił ííshją́ą́ ádeeshłííł.

4 Éí bąą Ur kéyahdę́ę́ʼ dah diiyá, Chaldee dineʼé kéédahatʼį́į́dóó, éí Canaan kéyahgóó; shitsilí biyeʼ, dóó beʼasdzą́ą́, dóó sheʼasdzą́ą́ Sarai ákǫ́ǫ́ bił níkai; áádóó shizhéʼé ałdóʼ shikééʼ níná, éí kéyah Haran deiyíníjííjįʼ.

5 Áádóó dichin aghą́née tʼáá yaa ádzaa; áádóó shizhéʼé tʼáá Harangi naaghá dóó ákwéʼé kééhatʼį́, háálá Harangi dibé dóó tłʼízí tʼáá ląʼígo dahólǫ́; áádóó shizhéʼé tʼóó bedaʼelyaaii yichʼįʼ ninááháłáago yaa nídiidzá, éí bąą tʼáá Harangi kééhatʼį́.

6 Ákondi Shí, Abraham, dóó Lot, shidaʼí bił, Diyin Bóhólníihii bichʼįʼ sodadiilzin, áádóó Diyin Bóhólníihii shaa níyá, dóó kóshíłní: Ńdiidááh, dóó Lot bił yíʼash; Harandę́ę́ʼ chʼídíínéełgo ná nahoséʼą́, dóó nílástsiiʼ díí kéyahgi hoolʼáágóó bee bídahólnííh doo éí shízhiʼ ákʼididíítʼáałgo naʼnítin doo, díí éí shiinééʼ yikʼeh dahółʼį́ daazlį́įʼgo kótʼée doo.

7 Háálá Shí éí nihiDiyin God Bóhólníihii nishłį́; yáʼąąshdi kééhashtʼį́; nahasdzáán éí bikááʼ dah dínísʼeezii átʼé; Tónteel bikʼi díníshniiʼ, dóó shiinééʼ yikʼeh hółʼį́; níyol dóó kǫʼ éí shitsinaabąąs naaki bijádígíí íínísin; Dził kóbidideeshniił—Yíwohjįʼ yínááł—áádóó áko shooh, niyol tsoh, tʼáá hooshchʼiʼ, tsxį́įłgo yábidooghas.

8 Shí éí Jehovah yinishyé, hahoolzhiizh dóó nihoolzhiizhjįʼígíí shił bééhózin; éí bąą shílaʼ bee naaʼáháshyą́ą dooleeł.

9 Áádóó Shí éí ayóó átʼáo dah wohkahgo ánhideeshłííł, dóó tsʼídá tʼáadoo bináłtʼehígo nihikʼihojideeshdliił, áádóó dah daʼíldééhgóó nihízhiʼ ayóó átʼéego bééhoʼdílzingo ádeeshłííł, áádóó nikééʼdóó nílástsiiʼ dahodooleełígíí éí ni ninahjįʼ bikʼidahojidoodliił, éí tʼáá ałtso nihokááʼ dineʼé dah deíkááhgóó díí diyingo naʼnitinígíí dóó Diyin Bibeʼadziilii yaa dahalneʼ doo;

10 Áádóó nízhiʼ binahjįʼ bikʼidahozhdeeshdliił; háálá tʼáá hashį́į́ néilą́ą́ʼ díí Haneʼ Bee Yisdáʼiildéehii deiyoosdląądígíí éí nízhiʼ baa dahidoolyééł, dóó nílástsiiʼ danilį́į doogo béédahoʼdílzin doo, bizhéʼé nilį́įgo, ná dahodísingo hadadoodzih;

11 Áádóó nikʼidajidlíii éí bikʼijiinishdlíi doo, hóyéeʼgo ná hadahadziihígíí hóyéeʼgo bá hahasdziih doo; áádóó ni ninahjįʼ (áko éí, Diyin Bibeʼadziilii binahjįʼ) dóó nílástsiiʼ (áko éí, Diyin Bibeʼadziilii), háálá díí bee ná ahóótʼiʼ doogo bee nił ahaʼdinishtʼaah, dóó nílástsiiʼ tʼáá náás bił yitʼih doo (ábidishnínígíí éí, nitsʼą́ą́dóó yikahígíí, éí doodago nitsʼą́ą́dóó nílástsiiʼ dahodooleełígíí) áádóó nahasdzáán bikáaʼgi ałʼąą dineʼé tʼáá ałtso ninahjįʼ bikʼihojidlíi doo, éí Haneʼ Bee Yisdáʼiildéehii bee ałdóʼ, éí yisdánáʼadooldah bee bikʼihojidlíi doo, éí ahoolʼáágóó iiná bee ałdóʼ.

12 Áko, Diyin Bóhólníihii ałtso shichʼįʼ haadzíiʼgo, dóó shichʼįʼ ííshją́ą́ íʼdiilyaago dah nídiidzá, shijéí biyiʼdi ádíshní: Ná naalʼaʼí yéego níká átʼį́į́ ńtʼę́ę́ʼ; áko kʼad éí haninítą́ą́ʼ;

13 Diyingo ná naalʼaʼí éí Elkenah bidiyin bitsʼą́ą́dóó yisdáshíílóóz, áádóó niinééʼ bikʼeh honishʼį́į doogo shá yáʼátʼééh doo, éí bąą ná naalʼaʼí éí yiidoozįįł dóó ahodiilzeeʼ yinahjįʼ dah didoogááł.

14 Áko shí, Abraham, Diyin Bóhólníihii yee shichʼįʼ haadzíʼígíí bikʼehgo dah diiyá, dóó Lot bił yishʼash; áádóó shí, Abraham, hastą́diin dóó biʼaan naaki shinááhaigo Harandóó dah diiyá.

15 Áádóó Sarai éí, Ur, Chaldeadi naasháago, sheʼasdzą́ą́ dooleełgo séyeh éí shił dahdiiʼáázh, áádóó Lot, shitsilí biyeʼ, dóó tʼáá ałtso nihinaadeełii ałhąʼ íilyaaígíí ałdóʼ, áádóó Harandi idahidiikaiígíí, Canaan bikéyahjįʼ bił níná, áádóó kodę́ę́ʼ yinéełgo níbaal ninádeiniłgo biyiʼ nídanihiilkááh ńtʼę́ę́ʼ;

16 Éí bąą, Diyin bibeʼadziil éí hoolʼáágóó nihikʼéstiʼ dóó bee yisdádiikahgo danihidziil, éí Harandę́ę́ʼ yiikahgo éí Jershon biyiʼ chʼíniikai, áko Canaan bikéyahjįʼ niiʼná.

17 Áko Shí, Abraham kʼad, Jershon bikéyahgi bikááʼ nááʼiiniihii íishłaa, áádóó Diyin Bóhólníihii bichʼįʼ nááʼiiséłniiʼ, dóó shizhéʼé bighan bitsʼą́ą́jigo dichin nahjįʼ kódoolnííł dishníigo sodeeszin, áko doo dadínóonééł da biniyé.

18 Áádóó Jershon góneʼ chʼíniikaigo Sechem hazʼą́ągi niikai; éí Moreh halgaigi bił hazʼą́, áko Canaan bidineʼé tʼáá íídą́ą́ʼ bił hahoodzogi niiʼná, áádóó Moreh halgaigi nááʼiisiyéłniiʼ, dóó Diyin Bóhólníihii yéego bá hodíínísingo bichʼįʼ sodeeszin, háálá díí bidaʼalyaii deidósinii bikéyahgi tʼáá íídą́ą́ʼ niikaiígíí biniinaa.

19 Áádóó Diyin Bóhólníihii bichʼįʼ sodiszinígíí binahjįʼ shaa níyá, dóó kóshidííniid: Díí kéyah nilástsiiʼ bí dooleełgo baa dideeshʼááł.

20 Áádóó Shí, Abraham, díí nááʼiiniih Diyin Bóhólníihii bichʼįʼ nááʼiishnii doo biniyé hadiishlaaígíí bíighahdóó yiizįʼ, áádóó Bethel dóó haʼaʼaahjigo dził siʼą́ąjįʼ niiʼná, dóó ákwéʼé nihiníbaal ndasiiʼnil, Bethel éí eʼeʼaahjigo siʼą́, áádóó Hai haʼaʼaahjigo siʼą́; áádóó ákweʼé Diyin Bóhólníihii bichʼįʼ nááʼiiniihii łaʼ hanáádiishdlaa, dóó Diyin Bóhólníihii bízhiʼ binahjįʼ nááʼiisékan.

21 Áádóó Shí, Abraham, shádiʼáahjigo, tʼáá yishááł; áádóó kéyah bikááʼgóó tʼáhdii dichin aghą́ hólǫ́; áádóó shí, Abraham, Egypt góyaa deeshááł niizį́į́ʼ, áajįʼ niiʼná, háálá tʼáá íiyisíí dichin aghą́ biih yiikai.

22 Áádóó baa hoolzhiizh Egyptgi kʼadę́ę bíighahjįʼ niikááhgo, Diyin Bóhólníihii kóshidííniid: Áko shooh, Sarai, neʼesdzą́ą́, tsʼídá baa dzólníigo nélʼį́;

23 Éí bąą baa hodoolzhish, Egypt dineʼé dabiiłtsą́ągo, kódadidooniił—Ei beʼesdzą́ą́ nilį́; dóó danidiyoołhééł, ákondi bí éí doo atídeidoolííł da; éí bąą díí bikʼehgo íʼdíílííł:

24 Egypt dineʼé kwíididooniił, shí éí díí bideezhí nishłį́, áko ni éí tʼáá hinínáa doo.

25 Áádóó baa hoolzhiizh Shí, Abraham, sheʼasdzą́ą́, Sarai, Diyin Bóhólníihii tʼáá ałtso yee shichʼįʼ haadzííʼ yę́ę bee bił hweeshneʼ—Éí bąą kóbididííniił, tʼáá shǫǫdí, shideezhí nílį́ bididíínííł, áko éí shí bee shá yáʼátʼéeh doo, áádóó ni biniinaa éí shí tʼáá hinishnáa doo.