Abraham biNaaltsoos

1 Chaldea dine’é bikéyahdi, dashizhé’éyę́ę kéédahat’į́įdi, Shí, Abraham, nááná łahgi kééhasht’į́ dooleełgo baa ákoniizį́į́’ dóó hanishtá;

2 Áádóó, ayóó át’áo ił hózhǫ́ dóó ił hodéezyéél dóó háá’íyį́į́h bik’íníyáhígíí bee, dashizhé’éyę́ę bee bik’idahojisdli’ígíí hádínísh’į́į́’, dóó éí binahjį’ shí ałdó’ t’áá bí ádaat’éhígi át’áo shidi’doolzį́į́ł; háálá shí ndi t’áá Diyin bikéé’ yishááł, áádóó ałdó’ shí éí ayóó átʼáo shił ééhózin doo nisin, áádóó ts’ídá Diyin bik’ehgo yishááł doo, áádóó ayóó átʼáo shił ééhózin doo, áádóó ląʼígo ałʼąą dineʼé bizhé’é nishłį́į doo, hózhǫ́ǫgo binantʼaʼí nishłį́į doo, áádóó bik’ehgo í’deeshłíłígíí shił bééhodoozįįł nisin, áádóó Diyin God bibee haz’áanii bik’eh honish’į́į doo, áádóó Shí éí t’áá ákót’áo bee ánísht’ée doo, Hódahgo Náá’iiłniihii deeshłeeł, háálá dashizhé’é bibe’adziilyę́ę t’áá ákót’áo dahyishłééł dooleeł.

3 Shizhéʼé danilíinii bitsʼą́ą́dę́ę́ʼ bee shikʼi hodiiniiʼ; shizhéʼé danilíinii bitsʼą́ą́dę́ę́ʼ, hodeeyáádę́ę́ʼ yílyá, aooʼ, azhą́ hodeeyáádą́ą́’ ndi, éí doodago tʼah doo nahasdzáán bitłʼááh siléí álnééhyę́ędą́ą́ʼ, díí kojįʼ hoolzhishjįʼ, áłtsé yizhchį́įjįʼ bá hooʼaʼjįʼ ndi, éí doodago áłtsé hastiinjįʼ, éí éiyá Adam, éí doodago áłtsé nihizhéʼé, nihizhéʼé danilínéedę́ę́ʼ dóó shíjįʼ.

4 Diyin Bibe’adziilii shaa doolyéłígíí biká ásht’į́ éí Diyin God nihizhé’é yeiníláhę́ęgi át’áo shaa doolyééł éí náásgóó shílástsii’ bídadéét’i’.

5 Shizhéʼé danilíinii, diyingo iiná dóó beehazʼáanii dadílzinii yits’ą́ąjigo dahdadiikai, éí Bóhólníihii biDiyin God baa yiizlá, éí doo da’oodláanii bidiyin yichʼįʼ ndahałá daazlį́į́ʼ, shí shizaad tsʼídá doo yik’eh dahół’į́į da daazlį́į́ʼ;

6 Háálá doo yáʼáshóonii ádeidoolíiłgo bijéí biyiʼ naazʼą́ daazlį́į́ʼ, dóó Elkenah bidiyin, dóó Libnah bidiyin, dóó Mahmackrah bidiyin, dóó Korash bidiyin, dóó Pharaoh bidiyin, éí Egypt aláahdi binaatʼáanii nilį́ díí tʼáá áłtso yaa ádadeestʼą́;

7 Éí bąą doo da’oodlą́ągo nááda’ííłniihii ałtso yich’į’ dah diikai tʼóó bedaʼályaii doo yádaałti’ígíí éí ba’áłchíní yich’į’ náádeiyiisnii’, áádóó shiinéé’ doo yik’eh dahół’į́į da, ákondi she’iina’ yíká ádaat’į́įgo Elkenah bipriest yílák’ee dashíílóóz. Elkenah bipriest ałdó’ Pharaoh bipriest nilį́.

8 Áko, éí íídą́ą́’ Pharaoh bipriest éí Egypt aláahdi binaat’áanii nilį́, díí yik’eh áda’ooł’įįł ńt’ę́ę́’, éí Chaldea bikéyahdi naa’iiniih ályaaígíí, dabidiyin doo béédahózinígíí, hastóí, dóó sáanii, dóó áłchíní yázhí yich’į’ náádeiyííłniihgo ádeiyiilaa.

9 Áádóó baa hoolzhiizh éí priest Pharaoh bidiyin yich’į’ náá’íísnii’, áádóó Shagreel bidyin ałdó’, éí Egypt dine’é áda’ał’ínígíí bik’ehgo. Áko Shagreel bidiyin éí jóhonaa’éí át’į́.

10 Áádoo Pharaoh bipriest ahéhee’ daaníigo áłchíní ła’ yee náádeiyíísnii’ éí dahyiskid Potiphar biDahyiisk’id wolyéego náá’iiniih si’ánígíí bikáa’gi, éí Olishem dadzígaidi bee hahool’á.

11 Áko, díí priest éí tált’éego chʼikę́ę́h tʼah doo diné bee dahaleehii díí náá’iiniihii bikáá’ nááyiisnii’, éí Onitah bitsi’ké danilį́į ńt’ę́ę́’, ła’ éí Ham naat’áanii danilíinii yits’ą́ą́dóó yigááł ńt’ę́ę́’. Díí tált’éego ch’íkę́ę́h náádabi’diisnii’ háálá ts’ídá yá’át’éehgo dahinánígíí biniinaa; bidadiyin tsin dóó tsé bee ádaalyaaígíí doo yich’į’ nitsídadigeehgóó, éí bąą díí náá’iiniihii bik’áajį’ nabi’diztseed, áádóó Egypt dine’é áda’ał’ínígíí bik’ehgo.

12 Áádóó baa hoolzhiizh nááda’ííłniihii atídashił’į́įgo dashisił, áko dashidiyoołhééł biniyé, díí náá’iiniihii bikáá’ chʼikę́ę́h tʼah doo diné bee dahaleehii nideistseedyę́ęgi át’áo dashidiyoołheeł; dóó áko díí bikáá’ náá’iiniihii baa nił bééhózin dooleeł, áko díí nda’íísdzoh bee hahoolzhiizhígíí biyi’ nda’ashch’ąą’ígíí bee nił hodeeshnih.

13 Tsésk’eh nahalingo béé’ályaa, éí Chaldea dine’é bee dahólónígi át’áo, éí Elkenah dóó Libnah dóó Mahmackrah dóó Korash dabidiyin bidááhgi si’ą́ą ńt’ę́ę́’, áádóó Egypt bi’aláahdi naat’áanii, Pharaoh bidiyin nahalin.

14 Áko díí diyin danilínígíí baa nihił béédahózin dooleeł, díí ná’íísdzoh bee hahoolzhiizhgi ndaashch’ąą’ígíí ádanoolningo nihich’į’ kwíishłaa, éí ndaashch’ąą’ígíí Chaldeans Rahleenos yee deiyíízhi’, éí na’ashch’ąą’go bee na’adzooígíí yaa halne’.

15 Áádóó shich’į’ dah dadiilnii’go, áádóó she’iina’ ndeidoołtihgo náádashidiyoołnihgo, áko shooh, Bóhólníihii shiDiyin God bich’į’ yéego sodi’niszin, áádóó Diyin Bóhólníihii bee bich’į’ ná’ooshkąąhyę́ę yidiizts’ą́ą́’, áádóó Ayóó Ábóodziilii t’áá át’é shich’į’ ąą áyiilaa, áádóó diyin yá naal’a’í shííghahgi yiizį’, dóó bee she’astł’ónée tsxį́įłgo néíyooz’ah;

16 Áádóó biinéé’ yee shich’į’ kódííniid: Abraham, Abraham, shooh, Jehovah yinishyé, dóó nisidéts’ą́ą́’, dóó yisdánideeshtééł biniyé níyá, áádóó nizhé’é bighandóó, dóó t’áá ałtso nik’éí bits’ą́ą́dóó, kéyah doo ééhonísingóó bich’į’ dahnidideeshłóós;

17 Áádóó díí bijéí yee shits’ą́ąjigo dah diikaiígíí biniinaa, éí Elkenah bidiyin yich’į’ ndahałáah doo biniyé, dóó Libnah bidyin, dóó Mahmackrah bidiyin, dóó Korash bidiyin, dóó Egypt aláahdi binaat’áanii, Pharaoh bidiyin; éí bąą baa deeshááł biniyé ákóyaa bich’į’ níyá, dóó Abraham, shiye’, t’áá háíshį́į́ nidiyoołhééł biniyé nich’į’ dahdiilnii’ígíí, yidiyeeshééł.

18 Áko shooh, shíla’ bee neesłóós doo, dóó shikéé’ yínááł doo, shízhi’ binahjį’ nanil’a’ doo, azhą́ nizhé’é danilínée Diyin Bibe’adziilii bee ndi, áádóó she’adziilii nik’i hólǫ́ǫ dooleeł.

19 Noah bił hólónéegi át’áo ni dó’ nił hólǫ́ǫ doo; ákondi shinaanish áníł’ínígíí binahjį’ nahasdzáán bikáá’ hool’áágóó shízhį’ bééhózin doo, háálá Shí niDiyin God nishłį́.

20 Áko shooh, Ur kéyahdi Potiphar biDahyiisk’id si’ą́, Chaldea dine’é bitahgi. Áádóó Diyin Bóhólníihii éí Elkenah bikáá’ náá’iiniihyę́ę yidiiłtaa’, dóó kéyah bikáá’góó bidiyin ádeił’ínée ałdó’, éí ts’ídá t’áá ałtso yidiiłtaa’, dóó priest nilínée atíyiilaago daaztsą́; áádóó Chaldeadi t’óó báhádzidgo yínííł hazl’į́į́’, áádóó Pharaoh bił haz’ą́ądi ałdó’; éí Pharaoh ałkéé’ da’achííhígíí bik’ehgo aláahdi naat’áanii óolyé.

21 Áko Egypt bi’aláahdi naat’áanii éí Ham yits’ą́ą́dóó yigááł, éí Canaan dine’é yits’ą́ą́dóó bi’dizhchį́.

22 Áko díí bits’ą́ą́dóó t’áá ałtso Egypt dine’é dahazlį́į́’, áádóó kót’áo Canaan dine’é kéyah bikáá’góó ch’éédzíí’.

23 Asdzání léí’ kéyah Egypt áłtsé yik’íníyá, éí Ham bich’é’é nilį́įgo, dóó Egyptus bich’é’é nilį́, éí Chaldean dine’éjígo Egypt óolyé, éí baa dahasti’ígíí óolyé;

24 Áko díí asdzání kéyah yik’íníyáago kéyahígíí tó bił diilkǫ’ lá, éí bikéé’dóó ákwe’é biyáázhké kéédahat’į́įgo áyiilaa; áádóó áko, Ham bits’ą́ą́dóó, éí diné dayikahígíí bik’jį’ ha’oodzi’ę́ę t’áá kéyah bikáá’ bił dahólǫ́ silį́į́’.

25 Egypt tsʼídá áłtsé biwáásindoon Pharaoh haidiilaa, éí Egyptus alą́ąjį biyeʼ, éí Ham bitsiʼ, dóó Ham biwááshindoonígíí bikʼehgo ályaa, éí hastóí danilínígíí bikʼehgo hadadilneʼ ńtʼę́ę́ʼ.

26 Pharaoh, éí diné yá’át’éehii nilį́, bił hazʼánígíí haidiilaa dóó bidineʼé hódzą́ dóó tʼáá ákogi átʼáo yá nahwiiʼaahgo biiníłką́, dabizhéʼé áłtsé ałkééʼ ndabiʼdiizhchínée bi’ádaʼoolʼįįł hadeidiilaayę́ę yéego yíká ádaat’į́įgo yedaʼałʼį́į́ ńtʼę́ę́ʼ, éí tʼóó áłtsé bizhéʼé danilíinii akʼi bídahólnííhyę́ędą́ą́ʼ, Adam akʼi nahaʼáyę́ędą́ą́ʼ, áádóó Noah, bizhéʼé ałdóʼ, éí nahasdzáán bee bikʼihojisdliʼígíí yee hakʼijisdliʼ, hódzą́ yee hakʼijisdliʼ, ákondi Diyin Bibeʼadziilii bídadéétʼiʼígíí éí hóyééʼgo yee hakʼijįʼ há haadzííʼ.

27 Áko, Pharaoh bizhéʼé ałkééʼ daazhchį́į́dę́ę́ʼ Diyin Bibeʼadziilii doo baa dahalyéégóó bá ahóótʼiʼ ńtʼę́ę́, azhą́ Pharaoh Ham yinahjįʼ, Noah yitsʼą́ą́dóó neididoolééł ńtʼę́ę́ʼ, éí bąą shizhéʼé tʼóó bedaʼalyaii yóó adabinííʼaaʼ;

28 Ákondi díí biká áshtʼį́į doo, kodóó, ndaʼasdzo shí sézį́į́dóó dóó hodeeyą́ąjįʼ ałkééʼ ádahóótʼįįdígíí ałkééʼ nideeshnił, háálá ndaʼadzooígíí shilákʼeníídeeʼ, éí dííjį́įjįʼ dah yishjih.

29 Áko k’ad, Elkenah bipriest atíbi’diilyaa dóó yits’ą́ą́dóó daaztsą́, Chaldea bikéyahgi ádahodoonííł bee shił hóone’ę́ę ałtso bidahoolyaa, áko kéyah bikááʼgóó dichin aghą́ hodooleeł.

30 Ákohgo Chaldea bikéyah t’áá ałtso bitahgóó dichin aghą́ hazlį́į́’, áádóó shizhéʼé yéego dichin aghą́ bee bichʼįʼ nahwiisnááʼ, áádóó atíshíléhę́ę yaa naʼoozkan, éí she’iina’ yíká ádaat’į́į́ ńt’ę́ę́’.

31 Ákondi danihizhéʼé baa ndaʼíísdzoyę́ę, nihahastóí Diyin Bibeʼadziilii dah deiyóléłígíí, éí Diyin Bibeʼadziilii dah yilyééłgo bee bá adahazt’iʼígíí bídadéétʼiʼ, Shi Diyin God Bóhólníihii tʼáá shí dah yishlééłgo hashtʼe yiilaa; éí bąą tʼáá ałtso adaalyaii háátʼi’ bééhózingo, dóó nahasdzáángi ádaatʼeii, dóó sǫʼ, éí danihizhé´é bił ííshją́ą́ ádaalyaa, éí dííjį́įdi tʼahdii naashjaah, áádóó díí haneʼ biyiʼjįʼ łaʼ náhideesoh, háálá éí náásgóó shaʼáłchíní yíkáʼ adoolwoł.