¶ 1 BEA nae fai be e Elihu a ene lea, o ne behe,

2 Ae kau tagata boto, mou fanogo ki he eku gaahi lea; bea tokaga kiate au akimoutolu kuo ma‘u ae ilo.

3 He oku ahiahi‘i e he teliga ae gaahi lea, o hage oku kamata e he gutu ae kai.

4 Ke tau fili kiate kitautolu ae fakamāu; ke tau ilo iate kitautolu aia oku lelei.

5 He nae behe e Jobe, Oku ou maonioni: bea kuo too atu e he Otua hoku fakamāu.

6 He teu lohiaki‘i a eku totonu? oku tae faa fakamoui o hoku lavea i he tae talagataa.

7 Kohai ha tagata oku tatau mo Jobe, oku ne inumia ae manuki o hage koe vai?

8 Aia oku ne alu fakataha moe kau gaue kovi, bea eveeva moe kau tagata agahala.

9 He nae behe eia, Oku ikai hano aoga jii ki ha tagata ke ne fakafiefia‘i ia i he Otua.

10 Koia, fanogo mai kiate au, akimoutolu ae kau tagata faa ilo: koe kovi, ke mamao ia mei he Otua, bea moe agahala mei he Mafimafi.

11 He koe gaue ae tagata te ne totogi kiate ia, bea fakailo ki he tagata kotoabe o fakatatau ki hono gaahi hala.

12 Io, koe mooni e ikai fai kovi ae Otua, bea e ikai fakahala‘i ae fakamāu e he Mafimafi.

13 Kohai naa ne fakanofo ia ke bule ki mamani? bea kohai kuo ne gaohi a mamani kotoabe?

14 Kabau te ne fakatokaga‘i hono finagalo ki he tagata, te ne tanaki kiate ia hono laumalie mo ene mānava;

15 E mate fakataha ae kakano kotoabe, bea e toe liliu ae tagata koe efu.

16 Kabau oku ke ma‘u ae faa ilo, fanogo eni: fakafanogo ki he le‘o o eku gaahi lea.

17 Te ne faa bule aia oku fehia ki he totonu? bea te ke faa fakahalaia‘i aia oku matuaki agatonu?

18 He oku gali ke behe ki ha tu‘i, Oku ke kovi? be ki he houeiki, Oku mou fai kovi?

19 Ka e fefe kiate ia aia oku ikai te ne filifilimanako ki he kakai houeiki, bea oku ikai lahi hake ene tokaga ki he koloaia i he majiva? he koe gaue a hono nima akinautolu kotoabe.

20 Te nau mate fakafokifa be, bea e mamahi ae kakai i he tuuabo malie, bea nau mole atu: bea e fetuku atu ae kau malohi tae ha nima.

21 He oku i he gaahi fale oe tagata a hono fofoga, bea oku ne afio‘i a hono aluga kotoabe.

22 Oku ikai ha bouli, be ha malumalu oe mate, e faa fakafufu ai e he kau fa kovi akinautolu.

23 Koeuhi e ikai te ne hilifaki ki he tagata ke lahi hake  i he mea oku totonu; koeuhi ke ne fie fakamāu ai moe Otua.

24 Te ne lailaiki ae kau tagata malohi toko lahi taefaalaua, bea fokotuu ae niihi mo ono totogi.

25 Koia oku ne ilo e nau gaahi gaue, bea oku ne fulihi akinautolu i he bo, bea oku nau auha ai.

26 Oku ne ta‘i akinautolu o hage koe kau tagata fai kovi i he ao oe kakai.

27 Koeuhi naa nau tafoki kimui meiate ia, bea ikai fie tokaga ki hono gaahi hala:

28 Koia oku nau fakahoko ae tagi ae majiva ke a‘u atu kiate ia, bea oku ne ogo‘i ae tagi ae mahaki.

29 Oku foaki eia ae fiemalie, kohai te ne faa fakamamahi? bea ka fufu eia hono fofoga, kohai e faa mamata kiate ia? o kabau te ne fai ki ha buleaga, be ki ha tagata be toko taha:

30 Koeuhi ke oua naa bule ae malualoi, telia naa fajia‘i ae kakai.

31 Oku tāu mooni moe Otua ae lea behe ki ai, Kuou kataki, e ikai teu fakamamahi.

32 Koia oku ikai teu ilo ke ke ako ia kiate au: kabau kuou fai agahala, e ikai teu toe fai ia.

33 E fakatatau ia koa mo ho loto? te ne totogi ia, o kabau te ke oua, be te ke loto ki ai; kae ikai ko au: koia ke ke tala aia oku ke ilo.

34 Ke tala kiate au e he kau tagata faa ilo, bea ke fanogo kiate au e ha tagata boto.

35 Kuo lea a Jobe i he tae ilo, bea oku tae boto a ene gaahi lea.

36 Ko hoku loto ke fakamāu‘a Jobe o a‘u ki he gataaga, koeuhi ko ene gaahi tali o hage koe kau tagata agahala.

37 He oku ne fakahoko ae talagataa ki he agahala, oku ne bajibaji hono nima iate kitautolu, o fakalahi ene gaahi lea ki he Otua.