Koe Tohi a Jobe
Vahe 1
1 Koe maonioni, moe koloaia a Jobe, mo ene tauhi lelei ki he ene fānau. 6 Oku ha‘u a Setani ki he ao oe Otua, bea i he ene lauikovi‘i a Jobe, nae tuku ke ne ahiahi‘i ia. 13 Bea i he ilo e Jobe kuo mole a ene gaahi mea mo ene fānau, naa ne fakamalo ki he Otua i he ene mamahi.
¶ 1 NAE ai ae tagata i he fonua ko Usa, nae higoa ko Jobe; bea nae haohaoa mo agatonu ae tagata koia, bea ne manavahe ia ki he Otua, bea afe mei he kovi.
2 Bea nae fanau‘i kiate ia ae foha e toko fitu moe ofefine e toko tolu.
3 Ko ene koloa koe sibi e fitu afe, moe kameli e tolu afe, moe taulua faga bulu e nimageau, moe asi fefine e nimageau, moe fuu abi toko lahi aubito; bea nae lahi taha ai ae tagata ni i he kakai kotoabe oe botu hahake.
4 Bea nae faa fai e hono gaahi foha ae katoaga kai i ho nau gaahi fale, o taki taha i hono aho; bea nae tala ki ho nau tuofefine e toko tolu ke kai mo inu mo kinautolu.
5 Bea kuo oji ae gaahi aho oe nau fai katoaga, nae fekau e Jobe ke fekatabu‘i akinautolu, bea ne tuu hegihegi hake, o atu ae gaahi feilaulau tutu o fakatatau ki ho nau toko lahi kotoabe: he nae behe e Jobe, Naa kuo agahala a hoku gaahi foha, o lea kovi ki he Otua i ho nau loto. Nae fai behe be a Jobe i he aho kotoabe.
¶ 6 Ka nae ai ae aho nae fakataha ai ae gaahi foha oe Otua ke fakaha akinautolu i he ao a Jihova, bea nae ha‘u ai foki a Setani mo kinautolu.
7 Bea nae behe e Jihova kia Setani, Ko hoo ha‘u mei fe? Bea tali e Setani kia Jihova, o behe, Mei he eku fakatakamilo a mamani mo eku fealuaki fano i ai.
8 Bea nae behe e Jihova kia Setani, Kuo ke tokaga‘i a eku tamaioeiki ko Jobe, he oku ikai hano tatau i mamani, koe tagata haohaoa mo agatonu, oku manavahe ia ki he Otua, bea afe mei he kovi?
9 Bea nae tali ai e Setani kia Jihova, o behe, He kuo manavahe a Jobe ki he Otua tae ha totogi?
10 Ikai kuo ke takatakai aki ia ae a, mo hono fale, mo ene mea kotoabe mei he botu kotoabe? bea kuo ke fakamonuia‘i ae gaue a hono nima, bea oku tubulekina ene koloa i he fonua.
11 Kae mafao atu eni ho nima, o ta‘i aia kotoabe oku aana, bea te ne laui kovi‘i koe i ho fofoga.
12 Bea nae behe e Jihova kia Setani, Vakai, oku i ho nima ae mea kotoabe oku aana; kae oua naa ke hilifaki ho nima kiate ia. Bea nae alu atu a Setani mei he ao o Jihova.
¶ 13 Bea nae ai ae aho nae kai mo inu uaine e hono gaahi foha mo hono gaahi ofefine i he fale o ho nau taokete lahi:
14 Bea nae ha‘u ai ae talafekau kia Jobe, o ne behe, Nae fai ae keli e he faga bulu, bea kai ae faga asi i he botu ofi ki ai:
15 Bea nae oho mai ae kakai Siba o ave akinautolu; bea kuo nau tamate‘i ae kau tamaioeiki aki ae mata oe heleta; bea ko au be kuo hao ke tala ia kiate koe.
16 Bea lolotoga ene lea mo ene ha‘u foki ae toko taha, o ne behe, Kuo to mai mei he lagi ae afi ae Otua, bea kuo vela ai ae faga sibi, moe kau tamaioeiki, o fakaauha akinautolu; bea ko au be kuo hao ke tala ia kiate koe.
17 Bea lolotoga ene lea mo ene ha‘u foki ae toko taha, o ne behe, Nae vahe tolu ae kogakau Kalitia, o nau oho mai ki he faga kameli, bea ave ia, bea kuo nau tamate‘i ae kau tamaioeiki aki ae mata oe heleta; bea ko au be kuo hao ke tala ia kiate koe.
18 Bea lolotoga ene lea mo ene ha‘u foki ae toko taha, o ne behe, Nae kai mo inu uaine a ho gaahi foha mo ho gaahi ofefine i he fale o ho nau taokete lahi:
19 Bea iloage, kuo ba mai ae fuu matagi lahi mei he toafa, o ta‘i hono tuliki e fa oe fale, bea nae holo ia ki he kau talavou, bea kuo nau mate; bea ko au be kuo hao ke tala ia kiate koe.
20 Bea nae toki tuu hake a Jobe, o ne haehae hono bulubulu, o fakatekefua ia, bea fakafoohifo ki he kelekele, o hu.
21 O ne behe, Naaku ha‘u telefua be mei he manāva o eku fa‘e, bea teu toe alu telefua atu be: nae foaki e Jihova, bea kuo too atu e Jihova; fakafetai be ki he huafa o Jihova.
22 I he gaahi mea ni kotoabe nae ikai agahala a Jobe, be tuku ha kovi ki he Otua.