ປຈສ, ລູກາ 3:4–11. ປຽບທຽບໃສ່ກັບ ລູກາ 3:4–6
ພຣະຄຣິດຈະສະເດັດມາຕາມຄຳທຳນາຍ ເພື່ອນຳຄວາມລອດມາສູ່ຊາວອິດສະຣາເອນ ແລະ ຄົນຕ່າງຊາດ. ໃນຄວາມສົມບູນແຫ່ງເວລາ, ພຣະອົງຈະສະເດັດມາອີກ ເພື່ອພິພາກສາໂລກ.
4 ຕາມທີ່ມີຂຽນໄວ້ໃນໜັງສືຂອງສາດສະດາເອຊາອັດ; ແລະ ນີ້ຄືຖ້ອຍຄຳ ກ່າວວ່າ, ສຽງຂອງຄົນຮ້ອງປະກາດຢູ່ໃນຖິ່ນແຫ້ງແລ້ງກັນດານວ່າ ຈົ່ງຕຽມທາງຂອງພຣະຜູ້ເປັນເຈົ້າ, ແລະ ເຮັດໃຫ້ທາງຂອງພຣະອົງຊື່ຕົງ.
5 ເພາະຈົ່ງເບິ່ງ, ແລະ ແລ້ວ, ພຣະອົງຈະສະເດັດມາ, ດັ່ງທີ່ມີຂຽນໄວ້ໃນໜັງສືຂອງສາດສະດາ, ເພື່ອຍົກເອົາບາບຂອງໂລກໄປ, ແລະ ເພື່ອນຳຄວາມລອດມາສູ່ປະຊາຊາດນອກສາດສະໜາ, ເພື່ອເຕົ້າໂຮມຄົນທີ່ຫາຍສາບສູນໄປ, ຜູ້ທີ່ເປັນຂອງຝູງແກະຂອງອິດສະຣາເອນ;
6 ແທ້ຈິງແລ້ວ, ແມ່ນແຕ່ຜູ້ທີ່ໄດ້ກະຈັດຈະກາຍໄປ ແລະ ຜູ້ເປັນທຸກ; ແລະ ເພື່ອຕຽມທາງ, ແລະ ເຮັດໃຫ້ການສິດສອນພຣະກິດຕິຄຸນຕໍ່ຄົນຕ່າງຊາດເປັນໄປໄດ້;
7 ແລະ ເພື່ອເປັນຄວາມສະຫວ່າງຕໍ່ຄົນທັງປວງທີ່ນັ່ງຢູ່ໃນຄວາມມືດ, ໄປສູ່ບ່ອນທີ່ໄກສຸດຂອງແຜ່ນດິນໂລກ; ເພື່ອເຮັດໃຫ້ເກີດການຟື້ນຄືນຊີວິດຈາກບັນດາຄົນຕາຍ, ແລະ ເພື່ອຂຶ້ນໄປເບື້ອງບົນ, ເພື່ອຢູ່ທາງເບື້ອງຂວາພຣະຫັດຂອງພຣະບິດາ,
8 ຈົນກວ່າຄວາມສົມບູນແຫ່ງເວລາ, ແລະ ກົດ ແລະ ປະຈັກພະຍານຈະໄດ້ຮັບການຜະນຶກ, ແລະ ຂໍກະແຈຂອງອານາຈັກ ຈະຖືກຖວາຍແດ່ພຣະບິດາອີກເທື່ອໜຶ່ງ;
9 ເພື່ອປະຕິບັດຄວາມຍຸດຕິທຳຕໍ່ຜູ້ຄົນທັງປວງ; ເພື່ອສະເດັດລົງມາໃນການພິພາກສາຜູ້ຄົນທັງປວງ, ແລະ ເພື່ອໃຫ້ຜູ້ຄົນທັງປວງຍອມຮັບການກະທຳທີ່ອະທຳທັງໝົດຂອງພວກເຂົາ, ຊຶ່ງພວກເຂົາໄດ້ເຮັດ; ແລະ ທັງໝົດນີ້ ໃນວັນທີ່ພຣະອົງຈະສະເດັດມາ;
10 ເພາະມັນເປັນວັນແຫ່ງອຳນາດ; ແທ້ຈິງແລ້ວ, ຫ່ອມພູທຸກບ່ອນຈະເຕັມ, ພູ ແລະ ຄ້ອຍພູທຸກໜ່ວຍຈະຖືກເຮັດໃຫ້ຕ່ຳລົງ; ຫົນທາງທີ່ຄົດລ້ຽວຈະຖືກເຮັດໃຫ້ຊື່, ແລະ ທາງທີ່ມີຕໍແຂງຈະຖືກເຮັດໃຫ້ກ້ຽງດີ;
11 ແລະ ຜູ້ຄົນທັງປວງຈະເຫັນຄວາມລອດຂອງພຣະເຈົ້າ.
ປຈສ, ລູກາ 3:19–20. ປຽບທຽບໃສ່ກັບ ລູກາ 3:10–13
ຄົນຍາກຈົນຕ້ອງໄດ້ຮັບການດູແຈຈາກກົມການຄັງທີ່ມີຢ່າງອຸດົມສົມບູນ. ຄົນເກັບພາສີ ບໍ່ຄວນເກັບພາສີເກີນອັດຕາ.
19 ເພາະມັນເປັນທີ່ຮູ້ຈັກກັນດີແກ່ພວກເຈົ້າວ່າ, ທ່ານເທໂອຟີເລ, ຕາມລະບຽບຂອງຊາວຢິວ, ແລະ ຕາມຮີດຄອງຂອງກົດຂອງພວກເຂົາ ເລື່ອງການຮັບເງິນເຂົ້າໄວ້ໃນຄັງ, ວ່າຕາມຄວາມອຸດົມສົມບູນທີ່ພວກເຂົາໄດ້ຮັບ, ຄວນຖືກກຳນົດໃຫ້ຄົນຍາກຈົນ, ທຸກຄົນຕາມທີ່ເຂົາຄວນໄດ້ຮັບ;
20 ແລະ ຄົນເກັບພາສີກໍຄວນເຮັດເຊັ່ນນີ້ເໝືອນກັນ, ດັ່ງນັ້ນ ໂຢຮັນຈຶ່ງໄດ້ກ່າວກັບພວກເຂົາວ່າ, ຢ່າໄດ້ເກັບພາສີເກີນອັດຕາ.