Lipuisano tsa Tumello ea Ho Kena Tempeleng

1. Na u na le tumelo le bopaki ho Molimo, Ntate oa Bosafeleng, Mor’a hae, Jesu Kreste; le ho Moea o Halalelang?

2. Na u na le bopaki ka Topollo ea Jesu Kreste le ka karolo ea hae e le Mopholosi le Molopolli oa hau?

3. Na u na le bopaki ka Tsosoloso ea evangeli ea Jesu Kreste?

4. Na u ts’ehetsa Mookameli oa Kereke ea Jesu Kreste ea Bahalaleli ba Mehla ea Kajeno e le moporofeta, senohe le mosenoli, ‘me e le eena feela motho lefats’eng ea nang le tokelo ea ho sebelisa linotlolo tsohle tsa boprista?

   Na u ts’ehetsa litho tsa Boetapele ba Kereke le Lekhotla la Baapostola ba Leshome le Metso e ‘Meli e le baporofeta, linohe le basenoli?

   Na u ts’ehetsa Bahlomphehi ba bang ba Akaretsang le baetapele ba lehae ba Kereke?

5. Morena o boletse hore lintho tsohle li lokela hore li “etsoe ka bohloeki” ka pele ho eena (Lithuto tsa Tumelo le Lilekane 42:41).

   Na u pheella bohloeki ba mekhoa menahanong le boits’oarong ba hau?

   Na u boloka molao oa bohloeki?

6. Na u latela lithuto tsa Kereke ea Jesu Kreste boits’oarong ba hau lekunutung le sechabeng le ho litho tsa lelapa la hau le ba bang?

7. Na u ts’ehetsa kapa u khothaletsa lithuto, litloaelo, le lithuto tsa tumelo tse khahlanong le tsa Kereke ea Jesu Kreste ea Bahalaleli ba Mehla ea Kajeno?

8. Na u pheella ho boloka letsatsi la Sabatha le halalela, hae le kerekeng; ho kena likopano tsa hau; ho itokisetsa bakeng sa ho nka selallo u lokeleha; le ho phela bophelo ba hau ka ho latela melao le litaelo tsa evangeli?

9. Na u pheella ho ts’epahala ho tsohle tseo u li etsang?

10. Na u molefi oa boshome bo feletseng?

    Bakeng sa litho tse ncha tse batlang tumello ea ho etsa likolobetso le litiiselletso tsa boemeli: Na u ikemiselitse ho mamela taelo ea ho lefa boshome?

11. Na u utloisisa le ho boloka Lentsoe la Bohlale?

12. (Potso ena e tlohelloa ha ho buisanoa le ngoana kapa mocha.) Na u na le boikarabello ba chelete kapa bo bong ho molekane oa mehleng kapa ho bana?

    Haeba ee, na u nakong ka ho fihlela boikarabello boo?

13. (Potso ena e tlohelloa ha ho buisanoa le setho se senang tlhohonolofatso ea tempele.) Na u boloka lilekane tseo u li entseng ka tempeleng?

14. (Potso ena e tlohelloa ha ho buisanoa le setho se senang tlhohonolofatso ea tempele.) Na u hlonepha monyetla oa hau o halalelang oa ho apara seaparo joaloka ha ho laetsoe ka ts’ebeletsong e qalang? (Bala polelo ka “Ho Apara Seaparo sa Tempele” e kenyelelitsoeng ka tlase ho setho ka seng.)

15. Na ho na le libe tse boima bophelong ba hau tse hlokang ho rarolloa le bahlomphehi ba boprista e le karolo ea pako ea hau?

16. Na u inka u lokeleha ho kena tlung ea Morena le ho nka karolo lits’ebeletsong tsa tempele?

Boetapele ba Pele ho fane ka tataiso e latelang ka ho apara seaparo sa tempele:

“Seaparo sa boprista bo halalelang se re hopotsa ka lesira ka tempeleng, ’me lesira leno le ts’oants’isa Jesu Kreste. Ha u apara seaparo sa hau, u apara ts’oants’iso e halalelang ea Jesu Kreste. Ho se apara ke ponahatso ea ka ntle ea boikemisetso ba hau bo ka hare ba ho mo latela. Seaparo seo hape ke sehopotso sa lilekane tsa hau tsa tempele. U tlameha ho apara seaparo seo mots’eare le bosiu bophelo bohle ba hau. Ha se tlameha ho hloboloa bakeng sa liketsahalo tseo ka mabaka a utloahalang li ka sitang ho etsahala ho ntse ho aperoe seaparo seo, batla ho se khutlisetsa kapele joaloka ha ho khoneha. Joaloka ha u boloka lilekane tsa hau, ho kenyeletsa le tokelo e halalelang ea ho apara seaparo joaloka ha u laetsoe lits’ebeletsong tse qalang, u tla fumana phihlello e kholoanyane ho lereko la Mopholosi, ts’ireletso, matlafalo, le matla.”

Moetapele oa boprista o hlakisisa ho setho tlhoko ea ho ts’ireletsa tumello ea sona ea ho kena tempeleng. E lokela ho se hlole e kalingoanoa ‘me e lokela ho tlalehoa hanghang ho mofani haeba e lahlehile kapa e utsoitsoe.