۱ مُجھ، ضینِف، کو نِیفیوں کی ساری زُبان سِکھائی گئی تھی۔ اور نِیفیوں کے مُلک کا یا ہمارے باپ دادا کی پہلی وراثتی سرزمِین کا عِلم تھا، اور جاسُوس کی حیثیت سے لامنوں میں بھیجا گیا کہ مَیں اِن کی فَوجوں کی جاسُوسی کرُوں تاکہ ہماری فَوج پھر اُن پر چڑھائی کرے اور اُنھیں تباہ کرے—بلکہ جب مَیں نے اُن کے درمیان میں اُس نیکی کو دیکھا تو مَیں نے چاہا کہ اُنھیں تباہ و برباد نہ کیا جائے۔

۲ پَس، مَیں نے بیابان میں اپنے بھائیوں سے تکرار کی، کیوں کہ مَیں چاہتا تھا کہ ہمارا حاکم اُن سے ایک مُعاہدہ کرے؛ لیکن کیوں کہ وہ دُرشت اور خُون کا پیاسا آدمی تھا، اُس نے حُکم دِیا کہ مُجھے قتل کر دِیا جائے؛ لیکن بُہتوں کے خُون بہنے کی بدولت مَیں بچایا گیا؛ پَس باپ باپ کے خِلاف لڑا اور بھائی بھائی کے خِلاف یہاں تک کہ ہماری فَوج کی بیش تر تعداد بیابان میں ہلاک ہُوئی اور ہم میں سے جو بچ سکے اپنی بیویوں اور اپنے بچّوں کو یہ واقعات بتانے کے لِیے ضریملہ کے مُلک کو واپس لوٹے۔

۳ اور پھر بھی، مَیں، جو اپنے باپ دادا کے مُلک کا وارث ہونے کے لِیے نہایت مُضطرب تھا، اُن سب کو اِکٹھا کِیا جو جا کر مُلک کی ملکیت پانے کے خواہش مند تھے، اور اُس مُلک میں جانے کے لِیے دوبارہ بیابان میں سفر شُروع کِیا؛ لیکن ہمیں قحط اور شدید مُصیبتوں سے مارا گیا کیوں کہ ہم خُداوند اپنے خُدا کو یاد کرنے میں سُست تھے۔

۴ تاہم بیابان میں کئی دِن بھٹکنے کے بعد ہم نے اِس جگہ اپنے خیمے لگائے جہاں ہمارے بھائی قتل ہُوئے تھے جو کہ ہمارے باپ دادا کے مُلک کے قریب تھی۔

۵ اور اَیسا ہُوا کہ مَیں اپنے چار آدمیوں کے ساتھ دوبارہ بادِشاہ کے پاس شہر میں گیا تاکہ مَیں بادِشاہ کا مزاج جانُوں اور یہ بھی جانُوں کہ آیا مَیں اپنے لوگوں کے ساتھ جا کر صُلح سے مُلک پر قبضہ کر سکتا ہُوں۔

۶ اور مَیں بادِشاہ کے پاس گیا اور اُس نے میرے ساتھ عہد کیا کہ مَیں لحی-نِیفی کا مُلک اور شلوم کا مُلک اپنی ملکیت میں لے سکتا ہُوں۔

۷ اور اُس نے اپنے لوگوں کو اُس مُلک سے نِکل جانے کا حُکم بھی دِیا اور مَیں اور میرے لوگ مُلک میں گئے کہ اُسے اپنی ملکیت میں لے لِیا۔

۸ اور ہم عِمارتیں بنانے لگے اور شہر کی فصیلیں، ہاں یعنی لحی-نِیفی کے شہر اور شلوم کے شہر کی فصیلیں مرمت کرنے لگے۔

۹ اور ہم نے زمِین کاشت کرنا شُروع کی، ہاں، بلکہ تمام قسم کے بِیج، مکئی کے اور گندم کے اور جَو کے اور چنے کے اور سیوم کے بِیج اور پھلوں کی تمام اَقسام کے بِیج؛ اور ہم اِس مُلک میں بڑھنے اور خُوش حال ہونے لگے۔

۱۰ اب یہ لامن بادِشاہ کی مکاری اور عیاری تھی کہ اُس نے یہ مُلک ملکیت کے لِیے ہمارے حوالے کِیا تاکہ وہ میرے لوگوں کو غُلامی میں لائے۔

۱۱ پَس اَیسا ہُوا کہ ہمارے اُس مُلک میں قیام کے بارہ سال کے عرصے کے بعد لامن بادِشاہ بےچین ہونے لگا، مَبادا کسی طرح میرے لوگ مُلک میں اِتنے مضبُوط ہو جائیں کہ وہ اُن پر غالِب اور اُنھیں اسِیری میں نہ لا سکیں۔

۱۲ اب وہ کاہل اور بُت پرست لوگ تھے؛ پَس وہ ہمیں غُلامی میں رکھنے کے خواہش مند تھے، تاکہ وہ ہمارے ہاتھوں کی محنت سے خُود کو سَیر کریں، ہاں، تاکہ ہمارے کھیت کے گلّوں سے خُود کو کِھلائیں۔

۱۳ پَس اَیسا ہُوا کہ لامن بادِشاہ اپنے لوگوں کو میرے لوگوں کے ساتھ جھگڑوں کے لِیے اُبھارنے لگا؛ چُناں چہ مُلک میں جنگیں اور جھگڑے شُروع ہو گئے۔

۱۴ پَس نِیفی کے مُلک میں میرے عہدِ حُکُومت کے تیرھویں سال شلوم کے مُلک کے جنُوب کے پرے، جب میرے لوگ اپنے گلّوں کو پانی پلا اور چرا رہے تھے، اور زمِین میں ہل چلا رہے تھے تو لامنوں کا ایک بڑا لشکر اُن پر چڑھ آیا اور اُنھیں قتل کرنے اور اُن کے گلّے اور کھیتوں کی مکئی لُوٹنے لگا۔

۱۵ ہاں، اور اَیسا ہُوا کہ وہ بھاگے، وہ سب جو پکڑے نہ گئے، یعنی نِیفی کے شہر میں آئے اور مُجھے تحفُظ کے لِیے پُکارا۔

۱۶ اور اَیسا ہُوا کہ مَیں نے اُنھیں کمانوں کے ساتھ، اور تِیروں کے ساتھ، تلواروں کے ساتھ اور بُغدوں کے ساتھ اور لٹھوں کے ساتھ اور فلاخنوں کے ساتھ اور ہر قسم کے ہتھیاروں کے ساتھ جو ہم ایجاد کر سکتے تھے، اُنھیں مسلح کِیا اور مَیں اور میرے لوگ لامنوں کے خِلاف لڑنے نِکل پڑے۔

۱۷ ہاں، خُداوند کے زور میں ہم لامنوں کے خِلاف لڑنے نِکلے؛ پَس مَیں اور میرے لوگوں نے جوش سے خُداوند سے فریاد کی کہ وہ ہمیں ہمارے دُشمنوں کے ہاتھوں سے چُھڑائے، کیوں کہ ہم اپنے باپ دادا کی رہائی یاد کر کے بیدار ہو چُکے تھے۔

۱۸ اور خُدا نے ہماری فریاد سُنی اور ہماری دُعاؤں کا جواب دِیا؛ اور اُس کے زور میں ہم آگے بڑھے؛ ہاں، ہم لامنوں کے مقابلے میں آگے بڑھے اور ایک دِن اور ایک رات میں ہم نے تین ہزار تینتالیس کو مارا؛ ہم اُنھیں اپنے مُلک سے نِکالنے تک مارتے رہے۔

۱۹ اور مَیں نے خُود اپنے ہاتھوں سے اُن کی لاشیں دفنانے میں مدد کی۔ اور دیکھو، ہمارا نہایت اَفسوس اور نوحہ کہ ہمارے دو سو اُناسی بھائی قتل ہُوئے۔