1 Issa Alma, kien ġie mwissi mill‑Mulej li l‑armati tas‑sultan Noè kienu se jaħbtu għalihom, u huwa għarraf lin‑nies tiegħu b’dan, għalhekk huma ġabru flimkien il‑merħliet tagħhom, u ħadu ftit mill‑qamħ li kellhom, u rħewlha lejn ix‑xagħri qabel ma jfeġġu l‑armati tas‑sultan Noè.

2 U l‑Mulej qawwihom tant li n‑nies tas‑sultan Noè ma setgħux jilħquhom biex jeqirduhom.

3 U huma għaddew tmint ijiem jivvjaġġaw bil‑moħbi fix‑xagħri.

4 U waslu f’art, iva, sewwasew f’art mill‑isbaħ u li tgħaxxaq, art mimlija ilma safi.

5 U huma waqqfu l‑kampijiet tagħhom, u bdew jaħdmu l‑art, u bdew jibnu l‑bini; iva, huma kienu nies ħabrieka, u bdew jaħdmu bil‑kbir.

6 U n‑nies kellhom ix‑xewqa li Alma jkun is‑sultan tagħhom, għax hu kien mill‑aktar maħbub min‑nies.

7 Iżda hu qalilhom: Araw, ma jaqbilx li jkollna sultan; għax dan jgħid il‑Mulej: La tistmax bniedem aktar minn ieħor, jew l‑ebda bniedem m’għandu jaħseb li hu aħjar minn ħaddieħor; għalhekk jiena ngħidilkom li ma jaqbilx li intom ikollkom sultan.

8 Madankollu, jekk hu possibbli li dejjem ikollkom nies ġusti sabiex ikunu s‑slaten tagħkom ikun tajjeb għalikom li jkollkom sultan.

9 Iżda ftakru fil‑ħażen tas‑sultan Noè u l‑qassisin tiegħu; u jiena stess inqbadt f’nassa, u għamilt bosta ħwejjeġ li kienu mistmerra f’għajnejn il‑Mulej, li wassluni għal indiema mill‑aktar severa.

10 Madankollu, wara daqstant taħbit, il‑Mulej sama’ l‑għajjat tiegħi, u wieġeb talbi, u għamilni strument f’idejh biex iwassal lil ħafna u ħafna minnkom lejn l‑għarfien tal‑verità tiegħu.

11 Madankollu, jiena m’iniex se noqgħod niftaħar b’dan, għax jien m’iniex den li niftaħar bija nnifsi.

12 U issa jiena ngħidilkom, intom ġejtu maħqurin mis‑sultan Noè, u kontu qed tinżammu fil‑jasar minnu u mill‑qassisin tiegħu, u lilkom wasslukom biex taqgħu fil‑ħażen; għalhekk intom kontu marbutin bl‑irbit tal‑ħażen.

13 U issa hekk kif intom ġejtu meħlusin minn dan il‑jasar bil‑qawwa ta’ Alla; iva, sewwasew minn idejn is‑sultan Noè u n‑nies tiegħu, kif ukoll mill‑jasar tal‑ħażen, hekk ukoll nixtieq li intom iżżommu sħiħ f’dan il‑ħelsien li permezz tiegħu ġejtu ħielsa, u li ma tafdaw lil ebda bniedem biex isaltan fuqkom.

14 Kif ukoll tafdaw lil ħadd biex ikun l‑għalliem tagħkom jew il‑ministru tagħkom, ħlief lil dak li hu bniedem ta’ Alla, li jimxi fi triqatu u jħares il‑kmandamenti tiegħu.

15 B’dan il‑mod Alma għallem lin‑nies tiegħu, li kull bniedem għandu jħobb lil għajru bħalu nnifsu, li m’għandu jkun hemm l‑ebda tilwim bejniethom.

16 U issa, Alma kien il‑qassis il‑kbir tagħhom, hu li kien il‑fundatur tal‑knisja tagħhom.

17 U ġara li ħliefu ħadd ma kiseb l‑awtorità minn Alla li jxandar jew li jgħallem. Għalhekk huwa kkonsagra lill‑qassisin kollha tagħhom u l‑għalliema kollha tagħhom; u ġew ikkonsagrati biss dawk l‑irġiel li kienu ġusti.

18 Għalhekk huma ħadu ħsieb lin‑nies tagħhom, u sostnewhom b’dak kollu li għandu x’jaqsam mas‑sewwa.

19 U ġara li huma beda jkollhom risq kbir f’dik l‑art; u huma semmewha l‑art Ħelam.

20 U ġara li huma tkattru u beda jkollhom risq kbir fl‑art ta’ Ħelam; u bnew belt, li semmewha l‑belt ta’ Ħelam.

21 Madankollu l‑Mulej ra li kellu jwiddeb lill‑poplu tiegħu; iva, huwa pprova s‑sabar tagħhom u l‑fidi tagħhom.

22 Madankollu—kull min jittama fih għad jintrefa’ ’l fuq fl‑aħħar jum. Iva, u hekk ġara minn dan il‑poplu.

23 Għax araw, jiena se nurikom li huma nġiebu fil‑jasar, u ħadd ma seta’ jeħlishom ħlief il‑Mulej Alla tagħhom, iva, sewwasew l‑Alla ta’ Abraham u Iżakk u ta’ Ġakobb.

24 U ġara li huwa ħelishom, u wriehom il‑qawwa kbira tiegħu, u kbir kien il‑ferħ tagħhom.

25 Għax araw, ġara li waqt li huma kienu fl‑art ta’ Ħelam, iva, fil‑belt ta’ Ħelam, waqt li kienu qed jaħdmu l‑art tal‑madwar, araw kien hemm l‑armata tal‑Lamaniti fil‑fruntieri tal‑pajjiż.

26 Issa ġara li ħut Alma ħarbu mill‑għelieqi tagħhom, u nġabru flimkien fil‑belt ta’ Ħelam; u huma kienu mill‑aktar beżgħana minħabba d‑dehra tal‑Lamaniti.

27 Iżda Alma mar u waqaf fosthom, u ħeġġiġhom sabiex ma jibżgħux, iżda li għandhom jiftakru fil‑Mulej Alla tagħhom u huwa jeħlishom.

28 Għalhekk huma sikktu l‑biżgħat tagħhom, u bdew jgħajtu lill‑Mulej biex huwa jrattab il‑qlub tal‑Lamaniti, ħalli huma jħennu għalihom, u għal marthom, u għal uliedhom.

29 U ġara li l‑Mulej rattab il‑qlub tal‑Lamaniti. U Alma u ħutu marru u taw lilhom infushom f’idejhom; u l‑Lamaniti ħadu f’idejhom l‑art ta’ Ħelam.

30 Issa l‑armati tal‑Lamaniti, li kienu mxew wara n‑nies tas‑sultan Limħi, spiċċaw intilfu fix‑xagħri għal bosta jiem.

31 U araw, huma sabu lil dawk il‑qassisin tas‑sultan Noè, f’post li sejħulu Amulon; u huma bdew jieħdu f’idejhom l‑art ta’ Amulon u bdew jaħdmu r‑raba’.

32 Issa l‑isem tal‑mexxej ta’ dawk il‑qassisin kien Amulon.

33 U ġara li Amulon talab b’ħerqa lil‑Lamaniti; kif ukoll bagħat lin‑nisa tagħhom, li kienu wlied il‑Lamaniti, biex jitolbu b’ħerqa lil ħuthom, biex huma ma joqtlux lil żwieġhom.

34 U l‑Lamaniti ħennew għal Amulon u għal ħutu, u ma qatluhomx, minħabba marthom.

35 U Amulon u ħutu ngħaqdu mal‑Lamaniti, u huma kienu għaddejjin mix‑xagħri biex jaraw isibux l‑art ta’ Nefi meta huma skoprew l‑art ta’ Ħelam, li kienet tinsab f’idejn Alma u ħutu.

36 U ġara li l‑Lamaniti wiegħdu lil Alma u lil ħutu, li jekk huma juruhom it‑triq li kienet twassal għall‑art ta’ Nefi huma kienu lesti jagħtuhom lura ħajjithom u l‑ħelsien tagħhom.

37 Iżda wara li Alma wriehom it‑triq li kienet twassal għall‑art ta’ Nefi l‑Lamaniti ma żammewx il‑wegħda tagħhom; iżda huma poġġew l‑għassiesa madwar l‑art ta’ Ħelam, biex jgħassu lil Alma u lil ħutu.

38 U dawk li kien għad baqa’ fosthom marru fl‑art ta’ Nefi; u wħud minnhom reġgħu lura fl‑art ta’ Ħelam, u magħhom ġabu wkoll lin‑nisa u lit‑tfal tal‑għassiesa li kien għad baqa’ f’dik l‑art.

39 U s‑sultan tal‑Lamaniti ħalla lil Amulon ikun sultan u mexxej fuq in‑nies tiegħu, li kienu fl‑art ta’ Ħelam; madankollu hu ma seta’ jkollu l‑ebda setgħa li jagħmel xi ħaġa li tmur kontra r‑rieda tas‑sultan tal‑Lamaniti.