1 U ġara li Limħi u n‑nies tiegħu reġgħu lura fil‑belt ta’ Nefi, u reġgħu bdew jgħammru fis‑sliem fil‑pajjiż.

2 U ġara li wara bosta jiem il‑Lamaniti bdew għal darb’oħra jimtlew bil‑korla kontra n‑Nefiti, u bdew jersqu fil‑fruntieri tal‑art tal‑madwar.

3 Issa huma ma ażżardawx joqtluhom, minħabba l‑ġurament li s‑sultan tagħhom kien għamel ma’ Limħi; iżda bdew jagħtuhom bil‑ħarta fuq ħaddejhom, u jħaddmu s‑setgħa tagħhom fuqhom; u bdew jgħabbulhom tagħbija kbira fuq daharhom, u jsuquhom bħal ħmar tat‑tagħbija bla kliem—

4 Iva, u dan kollu ġara biex tkun tista’ tiġi fis‑seħħ il‑kelma tal‑Mulej.

5 U issa t‑tbatija tan‑Nefiti kienet waħda kbira, u ma kien hemm ebda mod kif huma setgħu jeħilsuha minn taħt idejhom, għax il‑Lamaniti kienu dawwruhom minn kull naħa.

6 U ġara li n‑nies bdew jilmentaw mas‑sultan minħabba tbatijiethom; u huma bdew juru x‑xewqa li jmorru għall‑battalja kontrihom. U lis‑sultan spiċċaw dejquh bil‑kbir bl‑ilmenti tagħhom; għalhekk huwa ħallihom jagħmlu kif jixtiequ.

7 U huma nġabru flimkien għal darb’oħra, u libsu fuqhom l‑armatura tagħhom, u marru jeħduha kontra l‑Lamaniti biex ikeċċuhom ’il barra minn arthom.

8 U ġara li l‑Lamaniti spiċċaw biex għelbuhom, u ġegħluhom jirtiraw, u qatlu ħafna minnhom.

9 U issa kien hemm bosta biki u tnehid fost in‑nies ta’ Limħi, l‑armla tibki lil żewġha, l‑iben u l‑bint jibku lil missierhom, u l‑aħwa jibku lill‑aħwa.

10 Issa kien hemm bosta romol fil‑pajjiż, u huma bdew jgħajtu b’qawwa minn jum għal jum, għax spiċċaw inħakmu minn biża’ kbira mil‑Lamaniti.

11 U ġara li l‑għajjat kontinwu tagħhom wassal biex il‑kumplament tan‑nies ta’ Limħi imtlew kollhom għadab għal‑Lamaniti; u huma reġgħu marru għall‑ġlied, iżda reġgħu ġew imġiegħla jirtiraw, u sofrew bosta telfien.

12 Iva, huma reġgħu marru għat‑tielet darba, u sofrew l‑istess destin; u dawk li ma ġewx maqtula reġgħu lura fil‑belt ta’ Nefi.

13 U huma umiljaw ruħhom sat‑trab, u ssottomettew ruħhom għall‑madmad tal‑jasar, fejn issottomettew ruħhom li jiġu msawwta, u jinġarru ’l hemm u ’l hawn, u jġorru t‑tagħbija, skont ix‑xewqat tal‑għedewwa tagħhom.

14 U huma umiljaw ruħhom sewwasew b’umiltà mill‑aktar profonda; u bdew jgħajtu b’qawwa lil Alla; iva, sewwasew għaddew il‑jum kollu jgħajtu lil Alla tagħhom biex huwa jeħlishom minn tbatijiethom.

15 U issa l‑Mulej dam ma sema’ l‑għajjat tagħhom minħabba ħżunithom; madankollu l‑Mulej sema’ l‑għajjat tagħhom, u beda jrattab qlub il‑Lamaniti fejn huma bdew iħaffu t‑tagħbija tagħhom; madankollu l‑Mulej ma rax li kellu jeħlishom mill‑jasar.

16 U ġara li ftit ftit huma beda jkollkom ir‑risq fil‑pajjiż, u bdew ikabbru l‑qamħ bil‑kotra, u bdew irabbu l‑merħliet u l‑baqar, ħalli ma jbatux il‑ġuħ.

17 Issa kien hemm għadd kbir ta’ nisa, aktar milli kien hemm irġiel; għalhekk is‑sultan Limħi ordna li kull raġel kellu jaqsam ġidu biex jgħin lir‑romol u lil uliedhom, li ma jmorrux imutu bil‑ġuħ; u dan huma għamlu minħabba l‑għadd kbir fosthom li sfaw maqtula.

18 Issa n‑nies ta’ Limħi baqgħu flimkien bħala grupp kemm jista’ jkun, u pproteġew il‑qamħ tagħhom u l‑merħliet tagħhom.

19 U s‑sultan stess ma azzardax li jkun barra l‑ħitan tal‑belt, sakemm ma jieħux miegħu l‑għassiesa, għax beża’ li seta’ b’xi mod jaqa’ f’idejn il‑Lamaniti.

20 U hu ordna biex in‑nies tiegħu jgħassu l‑art kollha tal‑madwar, biex b’xi mod forsi jkunu jistgħu jaqbdu lil dawk il‑qassisin li ħarbu fix‑xagħri, li ħatfu l‑ulied bniet tal‑Lamaniti, u li wasslu biex huma jintlaqtu minn qerda daqstant kbira.

21 Għax huma kellhom ix‑xewqa li jaqbduhom ħalli jkunu jistgħu jikkastigawhom; għax huma daħlu fl‑art ta’ Nefi mal‑lejl, u ġarrew magħhom il‑qamħ tagħhom u ħafna mill‑ħwejjeġ prezzjużi tagħhom; għalhekk baqgħu hemm għassa għalihom.

22 U ġara li ma kienx hemm aktar diżgwid bejn il‑Lamaniti u n‑nies ta’ Limħi, sewwasew saż‑żmien li fih Għammon u ħutu waslu fil‑pajjiż.

23 U s‑sultan li kien jinsab barra l‑bibien tal‑belt flimkien mal‑għassies tiegħu, intebaħ b’Għammon u ħutu; u peress li ħasibhom li kienu l‑qassisin ta’ Noè huwa ordna li jaqbduhom, jorbtuhom, u jixħtuhom fil‑ħabs. U li kieku kienu l‑qassisin ta’ Noè kien lest jordna li jingħataw il‑mewt.

24 Iżda meta sab li ma kinux, iżda li kienu ħutu, u li kienu ġew mill‑art ta’ Żaraħemla, huwa mtela b’ferħ kbir immens.

25 Issa, qabel il‑miġja ta’ Għammon, is‑sultan Limħi bagħat grupp żgħir ta’ rġiel ifittxu l‑art ta’ Żaraħemla; iżda huma ma setgħux isibuha, u spiċċaw biex intilfu fix‑xagħri.

26 Madankollu, huma rnexxielhom isibu art li fiha kienu jgħammru n‑nies; iva, art li kienet miksija għadam niexef; iva, art li kienu jgħammru n‑nies fiha u li kienu ġew meqruda; u huma, għax ħasbu li kienet l‑art ta’ Żaraħemla, reġgħu lura fl‑art ta’ Nefi, fejn waslu fil‑fruntieri tal‑pajjiż ftit jiem biss qabel il‑miġja ta’ Għammon.

27 U huma ġabu magħhom kitba, sewwasew storja tan‑nies li tagħhom kien l‑għadam li huma sabu; u kienet imnaqqxa fuq pjanċi tal‑metall.

28 U issa Limħi reġa’ mtela bil‑ferħ meta sar jaf minn fomm Għammon li s‑sultan Mosija kien ġie mogħti don minn Alla, li permezz tiegħu seta’ jinterpreta dawn l‑inċiżjonijiet; iva, u Għammon ukoll feraħ.

29 Madankollu Għammon u ħutu mtlew bin‑niket peress li bosta minn ħuthom kienu sfaw maqtula;

30 Kif ukoll peress li s‑sultan Noè u l‑qassisin tiegħu kienu wasslu lin‑nies biex iwettqu bosta dnubiet u ħażen kontra Alla; u huma ħassewhom imnikktin ukoll minħabba l‑mewt ta’ Abinadi; kif ukoll minħabba t‑tluq ta’ Alma u n‑nies tiegħu li telqu miegħu, li kienu ffurmaw knisja ta’ Alla permezz tal‑qawwa u l‑ħila ta’ Alla, u permezz tal‑fidi tagħhom fil‑kliem li kien intqal minn Abinadi.

31 Iva, huma ħassewhom imnikktin għax telqu minn ħdejhom, peress li ma kinux jafu ’l fejn kienu ħarbu. Issa huma xtaqu li kieku ngħaqdu magħhom, għax huma stess daħlu f’patt ma’ Alla li jaqduh u jħarsu l‑kmandamenti tiegħu.

32 U issa mill‑miġja ta’ Għammon, anke s‑sultan Limħi daħal f’patt ma’ Alla, kif ukoll ħafna min‑nies tiegħu, li jservuh u jħarsu l‑kmandamenti tiegħu.

33 U ġara li s‑sultan Limħi u ħafna min‑nies tiegħu kellhom ix‑xewqa li jitgħammdu; iżda ma kien hemm ħadd fil‑pajjiż li kellu l‑awtorità minn Alla. U Għammon irrifjuta li jagħmel dan, għax kien iqis lilu nnifsu bħala qaddej indenju.

34 Għalhekk f’dak iż‑żmien huma ma ffurmawx knisja, iżda baqgħu jistennew l‑Ispirtu tal‑Mulej. Issa huma kellhom ix‑xewqa li jsiru sewwasew bħal Alma u ħutu, li ħarbu lejn ix‑xagħri.

35 Huma kellhom ix‑xewqa li jitgħammdu bħala xhieda u testimonjanza li kienu lesti jaqdu lil Alla b’qalbhom kollha; madankollu huma pposponew dan; u rakkont tal‑magħmudija tagħhom se jingħata aktar tard.

36 U issa kull sforz li bdew jagħmlu Għammon u n‑nies tiegħu, u s‑sultan Limħi u n‑nies tiegħu, kien biex huma jeħilsu lilhom infushom minn idejn il‑Lamaniti u mill‑jasar.