1 Na afei Abinadi see hɔn dɛ: Mepɛ dɛ hom tse ase dɛ ^aNyankopɔn nankasa besian aba adasamba mu, na ^bɔabɔpon no nkorɔfo.

2 Na osiandɛ ^aɔtse honam mu ntsi wɔbɛfrɛ no Nyankopɔn ne Ba, na ɔbɛbrɛ no ho adze wɔ honam mu dze ama ^bEgya no ne pɛ, dɛ ɔyɛ Egya na Ɔba—

3 Egya, ^aosiandɛ ^bwonyinseen no wɔ Nyame no tum mu; nna Ɔba, osian honam no ntsi; dɛm na ɔma ɔbɛyɛ Egya na Ɔba no—

4 Na wɔyɛ ^aNyame kor, nyew, sor nye asaase ^bOnnyiewiei ^cEgya noara.

5 Dɛm na honam no bɛhyɛ Sunsum no ase, anaadɛ Ɔba no hyɛ Egya no ase, ma wɔayɛ Nyame kor, ^ansɔhwɛ too no, na oenngyaa no ho amma nsɔhwɛ no, na mbom ɔmaa kwan ma wosii no atwetwe, na ^bwɔkãa no mpire, na wɔtoow no kyenee, na no nkorɔfo ^cpoow no.

6 Na iyi nyinara ekyir no, ɔayɛ anwanwadze akɛse wɔ adasamba mu ewie no, wɔnye no bɔkɔ, nyew, dɛ ^ambrɛ Isaiah mpo kãe dɛ, ɔtse dɛ oguan a ɔatɔ mmum wɔ ne nhwitwitwafo enyim no, ntsi ^boemmbue n’ano.

7 Nyew, dɛmara so mpo na wɔnye no bɔkɔ ^aakɔbɔ no mbeamudua mu, na woeku no, na no honam no abɛhyɛ owu ase, na ^bƆba no ne pɛ akɔ akɛhyɛ Egya no ne pɛ mu.

8 Na dɛm na Nyankopɔn bobubu ^aowu no mpokyerɛ mu, ber a oedzi ^bkonyim wɔ owu do; ɔama Ɔba no tum ma ^cɔayɛ ntamugyinafo ama adasamba—

9 Na ɔbɔfow akɔ sor, na ehumbɔbɔr ahyɛ n’abadaa mu; ayamuhyehye ahyɛ no mã wɔ adasamba ho, oegyina hɔ nye pɛrpɛr ntamu; ber a oebubu owu no mpokyerɛ mu, na ^aɔafa hɔn emumuyɛ nye mbrato ato no do, na ɔapon hɔn, na ^bɔayɛ pɛrpɛr n’ahyɛdze ama no.

10 Na afei mese hom dɛ, Woana na ɔbɛda n’ebusuasantsen edzi? Hwɛ, mese hom dɛ, ber a wɔdze ne kra abɔ afɔr ama bɔn yi, obohu ^an’asefo. Na afei hom ka dɛn? Na woananom na wɔbɛyɛ n’asefo?

11 Hwɛ mese hom dɛ, obiara a ɔatse nkɔnhyɛfo no hɔn nsɛm, nyew, ^ankɔnhyɛfo krɔnkrɔn a wɔahyɛ nkɔm a ɔfa Ewuradze ne mbaa ho—Mese hom dɛ, hɔn a woetsie hɔn nsɛm, na wɔagye edzi dɛ Ewuradze bɔpon no nkorɔfo, na wɔhwɛɛ dɛm da no kwan a wobenya hɔn bɔnfakyɛ no, mese hom dɛ, woyinom nye n’asefo, anaadɛ wɔyɛ Nyankopɔn ^bn’ahenman no adzedzifo.

12 Na woyinom nye hɔn a ^aɔsoaa hɔn bɔn; woyinom nye hɔn a owui maa hɔn, ama ɔaapon hɔn eefi hɔn mbrato mu. Na afei, ana wɔnnyɛ n’asefo?

13 Nyew, ana nnyɛ nkɔnhyɛfo no a, obiara a oebue n’ano ahyɛ nkɔm no, na ɔnnhwee mbrato mu, mekyerɛ dɛ nkɔnhyɛfo krɔnkrɔn nyinara a wɔaba fitsi wiadze ahyɛse? Mese hom dɛ hɔn nyinara yɛ n’asefo.

14 Na woyinom nye hɔn a ^awɔdze asomdwee apetse, hɔn a wɔdze nsɛmpa aba, hɔn a wɔdze nkwagye aba; na wɔsee Zion dɛ: wo Nyame dzi hen!

15 Na O mbrɛ hɔn anan ho dua yɛ fɛw wɔ mbepɔw no do a!

16 Na bio mbrɛ hɔn a wogu do rekã asomdwee nsɛm no, hɔn anan ho dua yɛ fɛw wɔ mbepɔw no do a!

17 Na bio, mbrɛ hɔn a ekyir yi so wɔbɛkã asomdwee nsɛm no, hɔn anan ho dua yɛ fɛw wɔ mbepɔw no do a, nyew, fitsi aber yi na afebɔɔ!

18 Na hwɛ, mese hom dɛ, nnyɛ ne nyinara nye yi. Na O mbrɛ nyia ɔdze nsɛmpa ba no ^an’anan ho dua yɛ fɛw wɔ mbepɔw no do a, ɔno nye ^basomdwee ne farbaa, nyew, Ewuradze mpo a; ɔno na ɔapon no nkorɔfo; ɔno nye nyia ɔdze nkwagye ama no nkorɔfo;

19 Na sɛ nnyɛ ɔpon a ɔdze too hɔ maa no nkorɔfo, dza wosiesiee too hɔ fitsi wiadze ne ^afapem no, mese hom dɛ, sɛ nnyɛ iyi a, nkyɛ adasamba nyinara ^bbɛhera.

20 Mbom hwɛ, wobobubu owu no mpokyerɛ mu na Ɔba no edzi hen, na ɔwɔ tum wɔ owu do; dɛm ntsi ɔdze owusoɛr abɔbɔadze.

21 Na owusoɛr bɛba, ^aowusoɛr a odzi kan no mpo; nyew, owusoɛr mpo ma hɔn a wɔaba dada, nye hɔn a wɔwɔ ha sesei, nye hɔn a wɔbɛba no, kesi Christ no wusoɛr mpo—na dɛm na wɔbɛfrɛ no.

22 Na afei, nkɔnhyɛfo nyinara hɔn wusoɛr, nye hɔn a wɔgyee hɔn nsɛm dzii no, anaadɛ hɔn a wodzii Nyankopɔn ne mbrasɛm do no, wobopue aba wɔ owusoɛr a odzi kan no mu; dɛm ntsi, hɔn nye owusoɛr edzikamfo.

23 Woenyan hɔn ma wɔnye Nyankopɔn a ɔapon hɔn no ^aatsena; dɛm ntsi wɔwɔ onnyiewiei nkwa wɔ Christ mu, nyia ^boebubu owu mpokyerɛ mu.

24 Na iyinom nye hɔn a wɔwɔ kyɛfa wɔ owusoɛr a odzi kan no mu; na iyinom nye hɔn a wɔannkã ^ankwagyesɛm no annkyerɛ hɔn na wowui ansaana Christ reba. Na dɛm na Ewuradze dze nkenyan bɛma iyinom ma woenya kyɛfa wɔ owusoɛr a odzi kan no mu, anaadɛ Ewuradze apon hɔn ma woenya onnyiewiei nkwa.

25 Na ^ambofra nkakraba so wɔ onnyiewiei nkwa.

26 Mbom hwɛ, na ^asuro, na ma woho mpopo wɔ Nyame enyim, na ɔsɛ dɛ woho popo; osiandɛ Ewuradze rommpon obiara a ^bɔtsew etua wɔ no do na ^cowu wɔ no bɔn mu; nyew, dɛm nkorɔfo yi nyinara ahera wɔ hɔn bɔn ntsi fitsi aber a wɔhyɛɛ wiadze ase, hɔn a wosii nketse tseew etua wɔ Nyankopɔn do, hɔn a wonyim Nyame ne mbrasɛm na wonndzi do; ^dwoyinom na wonnyi ^ekyɛfa wɔ owusoɛr a odzi kan no mu.

27 Dɛm ntsi ɔnnsɛ dɛ woho popo? Osiandɛ nkwagye remmba obiara a ɔtse dɛm hɔ; na Ewuradze mmpon obiara a ɔtse dɛm; nyew, Ewuradze runntum mmpon obiara a ɔtse dɛm; osiandɛ orunntum mmpa no ho; osiandɛ orunntum nnsiw ^apɛrpɛrdzi kwan.

28 Na afei mese hom dɛ mber bɛba ma wɔabɔ Ewuradze no nkwagye ho ^adawur akyerɛ ɔman biara, ebusuafo, kasa horow, nye nyimpakuw nyinara.

29 Nyew, Ewuradze, ^aw’aweɔmfo bɛma hɔn ndze do; wɔdze ndze bɔbɔmu na wɔatow ndwom; na wobohu no enyim na enyim ber a Ewuradze dze Zion bɛba bio.

30 Hom ndzi dɛw; hom mbɔmu ntow ndwom, Jerusalem mbea a etwee; na Ewuradze akyekye no nkorɔfo hɔn werɛ, ɔapon Jerusalem.

31 Ewuradze eyi n’abasa krɔnkrɔn no ho wɔ amanaman nyinara enyim; na asaase n’ano n’ano nyinara bohu hɛn Nyankopɔn no nkwagye.