Kyerɛwsɛm
Mosiah 19


Tsir 19

Gideon per dɛ oboku ɔhen Noah—Lamanfo kyer nsera wɔ asaase no do—Ɔhen Noah wu wɔ ogya mu—Limhi dzi hen a otua tow. Bɛyɛ mfe 145–121 Ansaana wɔbɔwo Christ.

1 Na ɔbaa dɛ ɔhen no ne nsordaafo no kyinii hwehwɛɛ Ewuradze ne dɔm no, na woennhu hɔn ntsi wɔsanee.

2 Na afei hwɛ, ɔhen no ne dɔm no do huanee ma ɔkaa kakraabi na mpaapaamu hyɛɛ ase baa hɔn a wɔaka no mu.

3 Na afã no a wosuar no hyɛɛ ase hwinhwiin ɔhen no, na wentwiwentwi hyɛɛ ase baa hɔn mu.

4 Na afei ɔbarimba bi wɔ hɔn mu a ne dzin dze Gideon, na ɔyɛ ɔbarimba a no ho yɛ dzen na ɔyɛ ɔhen no ne tamfo, dɛm ntsi ɔtwee ne nkrantsee, na ɔkãa ntam wɔ n’ebufuhyew mu dɛ oboku ɔhen no.

5 Na ɔbaa dɛ ɔnye ɔhen no kõe; na aber a ɔhen no hun dɛ oribedzi no do konyim no, oguanee na ɔkɛhyɛɛ aabantsentsen bi a ɔwɔ temple no ne nkyɛn no do.

6 Na Gideon taa no do dɛ nkyɛ ɔrokɔ abantsentsen no do ekoku ɔhen no, na ɔhen no dze n’enyiwa kɔr aprɔw dze hwɛɛ Shemlon asaase do, na hwɛ, ohun Laman nsordaafo dɛ wɔatra asaase no n’ahe aba mu.

7 Na afei ɔhen no dze ne kra mu ahohyehye tseatseaa mu dzendzenndzen see dɛ: Gideon, mma nnku me na Lamanfo no etu hɛn do sa, na wɔrebɛsɛɛ hɛn; nyew, wɔrebɛsɛɛ mo nkorɔfo.

8 Na afei nna nnyɛ dɛ no nkorɔfo no ho hia no pii dɛ nankasa no nkwa; naaso Gideon dze no nkwa kyɛɛ no.

9 Na ɔhen no hyɛɛ no nkorɔfo no dɛ wonguan Lamanfo no, na nankasa dzii hɔn enyim ma woguanee kɔr sar no do, wɔnye hɔn mbasiafo nye hɔn mba nyinara.

10 Na ɔbaa dɛ Lamanfo no taa hɔn do, na wɔtõo hɔn, na wɔhyɛɛ ase kunkum hɔn.

11 Afei ɔbaa dɛ ɔhen no see mbarimba no dɛ wongyaa hɔn yernom nye hɔn mba no na wonguan Lamanfo no.

12 Afei nna hɔn mu dodowara mmpɛ dɛ wogyaa hɔn, na mbom wɔpɛɛ dɛ wɔbɛka hɔ na wɔnye hɔn ewu. Na nkaafo no gyaa hɔn yernom nye hɔn mba ma woguanee.

13 Na ɔbaa dɛ hɔn a wɔnye hɔn yernom nye hɔn mba kaa hɔ no maa hɔn mbabaa ahoɔfɛfo no soɛree gyinaa hɔn enyim na wɔpaa Lamanfo no kyɛw dɛ mma wonnku hɔn.

14 Na ɔbaa dɛ Lamanfo no nyaa ayamuhyehye maa hɔn osiandɛ hɔn mbasiafo hɔn ahoɔfɛw no hyɛɛ hɔn do dodow.

15 Dɛm ntsi Lamanfo no dze hɔn nkwa kyɛɛ hɔn, na wɔfaa hɔn ndɔmmum na wɔdze hɔn sanee kɔr Nephi asaase do, na wɔmaa hɔn kwan dɛ wɔmfa asaase no, na mbom wɔnhyɛ bɔ dɛ wɔbɛkyer ɔhen Noah dze no ama hɔn, na wɔmfa hɔn ahodze mma hɔn; wɔnkyɛ hɔn sika nye dwetɛ nye hɔn ndzɛmba a ɔsom bo nyinara mu ebien mfa nyɛ tow ntua mma Lamanfo hɔn hen afe biara.

16 Na afei hɔn a wɔfaa hɔn ndɔmmum no hɔn mu kor yɛ ɔhen no ne babanyin; ne dzin dze aLimhi.

17 Na afei Limhi ammpɛ dɛ wɔsɛɛ n’egya; naaso, Limhi nyim n’egya n’emumuyɛdze nyinara, na nankasa dze odzi pɛrpɛr.

18 Na ɔbaa dɛ Gideon somaa nyimpa wɔ nsumaamu dɛ wɔnkɔ sar no do nkɔhwehwɛ ɔhen no nye hɔn a wɔkã no ho no. Na ɔbaa dɛ wohyiaa nkorɔfo no nyinara wɔ sar no do, kã ɔhen no nye n’asɔfoe no.

19 Afei wɔkãa ntam wɔ hɔn akoma mu dɛ wɔbɛsan hɔn ekyir akɔ Nephi asaase do, na sɛ woekuku hɔn yernom na hɔn mba nye hɔn so a wɔnye hɔn kae no a, ɔnodze wɔbɛyɛ hɔn bi ahyɛ ananmu, na wɔnye hɔn nyinara so ahwer hɔn nkwa.

20 Na ɔhen no hyɛɛ hɔn dɛ mma wɔnnsan hɔn ekyir; na hɔn bo fuuw ɔhen no, na wɔmaa ohun amandze, ma aowui wɔ ogya mu mpo.

21 Na nkyɛ wɔrefa asɔfo no so na woeku hɔn, na woguanee fii hɔn enyim.

22 Na ɔbaa dɛ nkyɛ wɔresan hɔn ekyir akɔ Nephi asaase do no, wohyiaa Gideon no nkorɔfo no. Na Gideon no nkorɔfo no kãa dza osii hɔn yernom na hɔn mba do; na dɛ Lamanfo no ama hɔn kwan dɛ wɔmfa asaase no na wɔmfa hɔn ahodze mu fã ntua tow mma Lamanfo.

23 Na nkorɔfo no kãa kyerɛɛ Gideon no nkorɔfo no dɛ woeku ɔhen no, na n’asɔfoe no eguan kɔ ekyirekyir wɔ sar no do.

24 Na ɔbaa dɛ wowiee ehyiadzi no, wɔdze enyigye saan hɔn ekyir kɔr Nephi asaase do, osiandɛ woennku hɔn yernom na hɔn mba; na wɔkãa dza wɔdze yɛɛ ɔhen no kyerɛɛ Gideon.

25 Na ɔbaa dɛ Lamanfo hɔn hen no dzii ansew kyerɛɛ hɔn, dɛ mma no nkorɔfo no nnku hɔn.

26 Na Limhi so osiandɛ ɔyɛ ɔhen no ne ba ntsi, no adɔm no hyɛɛ no ɔhen na ɔno so dzii nsew kyerɛɛ Lamanfo hɔn hen no dɛ no nkorɔfo no dze hɔn ahodze mu fã botua tow ama no.

27 Na ɔbaa dɛ Limhi hyɛɛ ase kyekyeer ahenman no na ɔmaa asomdwee baa dɔm no mu.

28 Na Lamanfo hɔn ɔhen no dze aweɔmfo bɔɔ asaase no ho aprɔw ama Limhi no dɔm no aatsena asaase no nko do amma woemmfi hɔ annkɔ sar no do; na tow a onyaa fii Nephifo hɔ no nna ɔdze hwɛɛ aweɔmfo no.

29 Na afei ɔhen Limhi nyaa asomdwee wɔ n’ahenman no mu bɛyɛ mfe ebien ntamu, na Lamanfo no anntseetsee hɔn anaadɛ wɔammper dɛ wɔbɛsɛɛ hɔn.