1 Afei ɔbaa dɛ ber a ^aMosiah ne mbabanyin no yɛɛ dɛm ndzɛmba yi nyinara ekyir no, wɔfaa dɔm kakra kãa hɔnho na wɔsaan hɔn ekyir kɔr hɔn egya ɔhen no nkyɛn, na wɔserɛɛ no dɛ ɔmma hɔn kwan ma wɔnye dɔm a wɔasan mu eyi hɔn no nkɔ ^bNephi asaase do nkɛkã Nyame n’asɛm a wɔatse no nkyerɛ hɔn nuanom Lamanfo no.

2 Dɛ wobotum dze Ewuradze hɔn Nyankopɔn ho nsɛm ama hɔn na wɔama woehu hɔn egyanom hɔn emumuyɛdze; dɛ wobotum edua hɔn nsɛnkã do eyi ^aokyir a Nephifo dze kyir hɔn no efi hɔ, ama hɔn so woeebenya enyigye wɔ Ewuradze hɔn Nyankopɔn mu, ama woeetum adodɔ hɔnho nkorkor, amma wentwiwentwi ammba hɔn mu bio wɔ asaase nyinara a Ewuradze hɔn Nyankopɔn dze ama hɔn no do.

3 Afei wɔpɛɛ dɛ wɔbɔbɔ nkwagye ho dawur akyerɛ abɔdze biara, na wɔammpɛ dɛ ^awɔbɔhwɛ ma nyimpa biara ne ^bkra yew; nyew, adwen bi mpo dɛ ɔkra bi bɔkɔ akɛtsena ^cahohyehye a onnyi ewiei mu no maa hɔn ho wosowee na ɔpopoe.

4 Na dɛm na Ewuradze no Sunsum dzii dwuma wɔ hɔn do, osiandɛ nna wɔyɛ ^aabɔn mu abɔn. Na Ewuradze nam ^bn’ehumbɔbɔr a ɔmmbɔadze da no do hun dɛ oye dɛ ɔgye hɔn; naaso wɔsɔɔw abɛbrɛsɛ pii wɔ hɔn kra mu osian hɔn emumuyɛ ntsi, wohun ɔhaw pii na wosuroo dɛ wobotwa hɔn akyen afebɔɔ.

5 Na ɔbaa dɛ wɔtotɔe serɛɛ hɔn egya nda pii dɛ ɔmma hɔn kwan ma wɔnkɔ Nephi asaase do.

6 Na ɔhen Mosiah kɔree kebisaa Ewuradze hwɛɛ dɛ ɔsɛ dɛ ɔma ne mbabanyin no kwan ma wɔkɔ Lamanfo mu kɛka nsɛmpa no.

7 Na Ewuradze see Mosiah dɛ: Ma hɔn kwan ma wɔnkɔ na dodowara bɛgye hɔn nsɛm no edzi, na wobenya onnyiewiei nkwa; na ^aMebɛgye wo mbabanyin no efi Lamanfo nsa.

8 Na ɔbaa dɛ Mosiah maa hɔn kwan dɛ wɔnkɔ na wɔnkɛyɛ dza wɔrohwehwɛ no.

9 Na ^awotuu hɔn kwan dze faa sar no do dɛ wɔrokɔ akɛkã asɛmpa no wɔ Lamanfo mu; na mebɛkã hɔn ^bakwantu no mu nsɛm ekyir yi.

10 Afei nna ɔhen Mosiah nnya obiara mmfa n’ahendzi no mma no, osiandɛ ne mbabanyin mu biara mmpɛ ahendzi no.

11 Dɛm ntsi ɔfaa abakɔsɛm no a woekrukye wɔ ^aayewa mprɛtse do no, nye Nephi ne mprɛtse no so, nye ndzɛmba nyinara a Nyame maa no ho mbrasɛm dɛ ɔmfa nsie na ɔnhwɛ do yie no, wɔ aber a owiee abakɔsɛm a ɔwɔ ^bsika mprɛtse do no ne nkyerɛase na ɔmaa wɔkyerɛwee too hɔ no, dɛm sika mprɛtse no a Limhi no nkorɔfo hunii a ofi Limhi nsamu baa no hɔ no;

12 Na ɔyɛɛ iyi osiandɛ nna no nkorɔfo no reper dɛ wobohu biribi a ɔfa dɛm nkorɔfo no a wɔasɛɛ hɔn no ho.

13 Na afei ɔnam ^aabo ebien no a wɔdze akyekyer egyen n’asowa ebien no do kyerɛɛ ase.

14 Afei dɛm ndzɛmba yi ahyɛse no na wɔyɛe ama wɔdze aakyerɛ kasa biara ase, na wɔdze efi ebusuasantsen kesi ebusuasantsen.

15 Na Ewuradze ne nsa na ɔakora dɛm ndzɛmba yi do, ama ɔada no nkorɔfo hɔn emumuyɛ nye hɔn ebusudze edzi akyerɛ abɔdze biara a ɔbɛtsena asaase no do;

16 Na obiara a ɔwɔ dɛm ndzɛmba yi no wɔfrɛ no ^aadzehunyi, dɛ mbrɛ ɔtse wɔ tsetseber do no.

17 Afei aber a Mosiah wiee nkyerɛwee no ase kyerɛ no; hwɛ, ɔkã nkorɔfo a ^awɔasɛɛ hɔn no hɔn ho nsɛm, fi ber a wɔsɛɛ hɔn no dze fitsi aber a wosii ^babantsentsen kɛse no, dɛm aber no na Ewuradze ^ctõtõo dɔm no hɔn kasaa na wɔbɔɔ hɔn petsee asaase nyinara enyi no, nyew, fitsi aber a wɔbɔɔ Adam mpo.

18 Na dɛm nsɛm yi maa Mosiah no nkorɔfo no sũu mbordo; nyew, awerɛhow hyɛɛ hɔn mã dze, naaso, iyi dze nyimdzee kɛse brɛɛ hɔn na wodzii mu dɛw.

19 Na dɛm nsɛm yi wɔbɛkyerɛw no ekyir yi; na hwɛ ohia dɛ nyimpa nyinara bohu dza wɔakyerɛw wɔ dɛm nsɛm yi mu.

20 Na afei, dɛ mbrɛ mekãa kyerɛɛ hom no, aber a ɔhen Mosiah yɛɛ dɛm ndzɛmba yi wiei no, ɔfaa ^aayewa mprɛtse no, nye ndzɛmba a ɔdze esie nyinara na ɔdze maa Alma, nyia ɔyɛ Alma Panyin ne babanyin no; nyew, nkyerɛwee no nyinara, nye ^basekyerɛdze no so na ɔdze maa no, na ɔhyɛɛ no dɛ ɔmfa nsie na ^cɔnkora do yie, na ɔnkyerɛw dɔm no hɔn ho nsɛm so na ɔmfa nto hɔ mma ebusuasantsen kor nkɛpem kor so, dɛ mbrɛ wɔdze ato hɔ fitsi aber a Lehi fii Jerusalem no.