1 Na ɔbaa dɛ yɛhyɛɛ ase kyekyeer hɛn ahenman na yɛtsenaa ase asomdwee mu bio. Na memaa wɔyɛɛ akõ ho akodze ahorow pii, ama meenya akodze dze ama mo nkorɔfo aber biara a Lamanfo no bɔsoɛr mo nkorɔfo do bio dɛ wɔnye hɔn robɔkõ.

2 Na medze aweɔmfo bɔɔ asaase no ho aprɔw, amma Lamanfo no ammba hɛn do awerɛfir mu bio ammbɛsɛɛ hɛn; na dɛm na meyɛe dze bɔɔ mo nkorɔfo nye mo nguankuw ho ban amma wɔannkɔtɔ hɛn atamfo nsamu.

3 Na ɔbaa dɛ yɛtsenaa hɛn egyanom asaase no do mfe pii, nyew bɛyɛ mfe eduonu ebien.

4 Na memaa mbarimba no dɔɔw asaase no do, na woduaa ^aewifua nye nduadzewa ahorow pii.

5 Na memaa mbaa no so toow asaaba na wɔdze yɛɛ ahoma, na wɔbrɛe, na wɔyɛɛ edwuma, na wɔyɛɛ ^aatam a ɔyɛ fɛw ahorow pii, nyew, nye atam asorɔtow pii, ama yɛdze aakata hɛn adagyaw do; na dɛm na ɔmaa yɛyɛɛ prɔmprɔm wɔ asaase no do—dɛm na ɔmaa yenyaa asomdwee ntoado wɔ asaase no do bɛyɛ mfe eduonu ebien.

6 Na ɔbaa dɛ, ɔhen ^aLaman wui, na ne babanyin bɛhyɛɛ n’ananmu dzii hen. Na ɔhyɛɛ ase nunuu no dɔm no ma wɔtseew etua wɔ mo nkorɔfo do; dɛm ntsi wɔhyɛɛ ase siesiee hɔnho dɛ wɔbɛba nye mo nkorɔfo abɔkõ.

7 Mbom nna masoma mo nkorɔfo atsɛwfo ma wɔabɔ ^aShemlon asaase ho aprɔw, ama meehu hɔn ahoboaboa no, ama meesiw hɔn kwan, amma wɔammba mo nkorɔfo do na wɔammbɛsɛɛ hɔn.

8 Na ɔbaa dɛ wɔfaa Shilom asaase n’etsifi afamu hɔ bae, wɔdze hɔn dɔmtutuw a wɔdze ^aakodze ahyehyɛ hɔnho, wɔdze ^begyen nye egyen-menaba nye nkrantsee nye asekan, nye abo nye totowabo; na wɔaprapra hɔn tsir ho; na wɔdze abowa nwoma esisi hɔn asen.

9 Na ɔbaa dɛ mehyɛɛ mo nkorɔfo no dɛ wɔmfa mbaa nye mbofraba no nkosuma wɔ sar no do; na mehyɛɛ mbra so dɛ mo nkɔdaa nyinara a wobotum esuo akodze mu nye mberantsɛ nyinara so a wobotum esuo akodze mu no mboa hɔn ano nye Lamanfo no nkɔkõ; na mehyehyɛɛ hɔn esiado dɛ mbrɛ hɔn mfe tsetsee.

10 Na ɔbaa dɛ yɛkɔree nye Lamanfo no kɔkõe; na emi, emi mpo a mowɔ mo nkɔdaaber mu no kɔree nye Lamanfo no kɔkõe. Na ɔbaa dɛ Ewuradze ^an’ahoɔdzen mu na yɛdze kɔkõe.

11 Afei, Lamanfo yi nnyim biribiara a ɔfa Ewuradze ho, anaadɛ Ewuradze n’ahoɔdzen ho, dɛm ntsi wɔtweer hɔnankasa hɔn ahoɔdzen. Naaso sɛ ehwɛ no wɔ mbarimba ahoɔdzen mu a nna wɔyɛ nkorɔfo a wɔyɛ dzen.

12 Wɔyɛ ^aabɔyafo, na womuo, na wɔyɛ nkorɔfo a wɔpɛ bɔgya, wɔgye hɔn egyanom ^bamambra dzi, ɔno nye dɛ—wɔgye dzi dɛ wɔpaam hɔn fii Jerusalem asaase do osian hɔn egyanom hɔn emumuyɛ ntsi, na hɔn enuanom yɛɛ hɔn bɔn wɔ sar no do, na wɔyɛɛ hɔn bɔn so ber a worutwa po no;

13 Na bio, dɛ wɔyɛɛ hɔn bɔn ekyir no a wotwaa po no, wɔ hɔn ^aegyapadze asaase a odzi kan no do, wotwaa po ekyir no, na ne nyina ne siantsir nye dɛ Nephi yɛɛ obi a odzii Ewuradze ne mbrasɛm do—dɛm ntsi Ewuradze ^bn’enyi sɔɔ no, na Ewuradze tsiee ne mpaabɔ, na obuaa hɔn na ɔno na odzii hɔn kan wɔ hɔn akwantu mu wɔ sar no do.

14 Na no nuanom no bo fuuw no osiandɛ ^awɔanntse Ewuradze ne nyɛe ase; Hɔn ^bbo so fuuw no wɔ esu no do osiandɛ wopiriim hɔn akoma dze tsiaa Ewuradze.

15 Na hɔn bo fuuw no bio ber a wodur asaase a wɔdze bɔɔ hɔn anohoba no do, osiandɛ wɔkãa dɛ wɔagye dɔm no hɔn do ^anhwɛe no efi hɔn nsamu; na wɔpeer dɛ woboku no.

16 Na hɔn bo fuuw no bio osiandɛ ofii hɔn mu kɔr sar no do dɛ mbrɛ Ewuradze hyɛɛ no no, na ɔfaa ^akyerɛwsɛm no a woekrukye wɔ ayewa mprɛtse do no, na wɔkãa dɛ ^boetwa hɔn edwoo.

17 Na dɛm na wɔdze akyerɛkyerɛ hɔn mba dɛ wonkyir hɔn, na dɛ wonkuku hɔn, na dɛ wontwa hɔn edwoo na wɔmbɔ hɔn epoo, na wɔnyɛ adze nyinara a wobotum mfa nsɛɛ hɔn; dɛm ntsi wɔwɔ ɔtan a onnyiewiei bi dze ma Nephi mba.

18 Na osian iyiara ntsi na ɔhen Laman, nam ndabraba na akɔhwi kwan do nye anohoba do daadaa me, ma medze mo nkorɔfo yi baa asaase yi do, ama ɔasɛɛ hɔn; nyew, yɛahaw dɛm mfe pii yi mu wɔ asaase no do.

19 Na afei emi, Zeniff, mekãa dɛm nsɛm yinom nyinara a ɔfa Lamanfo ho ekyir no, mehyɛɛ hɔn nkuran dɛ wɔmfa hɔn ahoɔdzen nkɔ ɔkõ a wɔdze hɔn werɛ ahyɛ Ewuradze mu wɔ ho no; dɛm ntsi yɛnye hɔn hyiaa enyim na enyim.

20 Na ɔbaa dɛ yɛpaam hɔn bio fii hɛn asaase do; na yekum hɔn ara yie, ma yenntum mpo annkan hɔn.

21 Na ɔbaa dɛ yɛsaan hɛn ekyir bio kɔr hɛnankasa hɛn asaase do, na mo nkorɔfo no hyɛɛ ase bio dɛ wɔrenyɛn hɔn nguankuw, na wɔyɛɛ ekuadwuma wɔ asaase no do.

22 Na afei emi, mayɛ akɔdaa ntsi, medze ahendzi no maa me mba mbanyin no mu kor; dɛm ntsi, merennkasa bio. Na Ewuradze nhyira mo nkorɔfo. Amen.