Kyerɛwsɛm
Mosiah 8


Tsir 8

Ammon kyerɛkyerɛ Limhifo no—Osũa nsɛm a ɔwɔ Jaredfo mprɛtse eduonu anan do no—Adzehufo na wotum kyerɛ nsɛm a ɔwɔ tsetse mprɛtse do ase—Akyɛdze biara nnyi hɔ a ɔso sen nyia ɔyɛ adzehufo. Bɛyɛ mfe 121 Ansaana wɔbɔwo Christ.

1 Na ɔbaa dɛ ɔhen Limhi kasaa kyerɛ no nkorɔfo no, na ɔkãa nsɛm pii kyerɛɛ hɔn, na no mu kakraabi na makyerɛw wɔ nwoma yi mu, na ɔkãa nsɛm pii a ɔfa hɔn enuanom a wɔwɔ Zarahemla asaase do no ho kyerɛɛ hɔn.

2 Na ɔsee Ammon dɛ ɔnsoɛr ngyina dɔmtutuw no enyim na ɔnka ndzɛmba a ɔbaa hɔn enuanom no do fitsi mber a Zeniff fii asaase no do kesi mber a ɔnoara ankasa fii asaase no do no nkyerɛ hɔn.

3 Na ɔkãa nsɛm a odzi ewiei so a ɔhen Benjamin dze kyerɛkyerɛɛ hɔn no, na ɔkyerɛkyerɛɛ mu kyerɛɛ ɔhen Limhi no nkorɔfo no, ama wɔaatse nsɛm a ɔakã no ase yie.

4 Na ɔbaa dɛ ɔyɛɛ iyinom nyinara ekyir no, ɔhen Limhi maa dɔmtutuw no kwan dɛ obiara nkɔ nankasa ne fie.

5 Na ɔbaa dɛ ɔhyɛɛ ma wɔdze mprɛtse no a no nkorɔfo hɔn ankyerɛwee wɔ do fitsi ber a wofii Zarahemla asaase do bae no bɔtoo Ammon n’enyim ma ɔkenkanee.

6 Afei, ber a Ammon wiee nsɛm no kenkan no, ɔhen no bisaa no dɛ obotum akyerɛ kasa no ase, na Ammon kãa kyerɛɛ no dɛ onnkotum.

7 Na ɔhen no see no dɛ: Osiandɛ nna mo werɛ ahow wɔ mo nkorɔfo hɔn amandzehu ho ntsi, memaa mo nkorɔfo no mu eduanan ebiasa tuu kwan kɔr sar no do dɛ gyangyanbiara sɛ wobohu Zarahemla asaase no, ama yɛaatotɔ aserɛ hɛn nuanom no ma woebeyi hɛn efi nkowaasom mu.

8 Na wɔyewee wɔ sar no do bɛyɛ nda pii mu, wɔbɔɔ mbɔdzen ara yie, naaso woennhu Zarahemla asaase no ntsi wɔsaan hɔn ekyir baa asaase yi do, nna woetu kwan akɔ asaase bi a esu pii wɔ do, na wohun asaase bi a nyimpa na mbowa hɔn mbiew ahyɛ do mã, na adan ahorow pii a ebubu so wɔ do, na wokohun asaase bi a no do mba hɔn dodow tse dɛ Israel dɔm.

9 Mbrɛ ɔbɛyɛ ma wɔagye hɔn edzi dɛ ndzɛmba a wohunii no yɛ nokwar ntsi wɔdze amprɛtse eduonu anan a woekrukye nsɛm wɔ do bae, na ɔyɛ sika mapã dze.

10 Na hwɛ, wɔdze aakatabo akɛse bi so bae, na ɔyɛ bayewa nye kɔɔber dze na odzi mu ara yie.

11 Na wɔdze nkrantsee so bae, na no dua no nyinara asɛɛ, na n’ano adɔ nkandar; na obiara nnyi asaase no do hɔ a obotum akyerɛ kasa a woekrukye no wɔ mprɛtse no do no ase. Dɛm ntsi na mesee wo bio dɛ: Ana ibotum akyerɛ ase?

12 Na mese wo bio dɛ: Ana inyim obi a obotum akyerɛ ase? Na mepɛ dɛ dɛm nsɛm yi wɔkyerɛ ase wɔ hɛn kasaa mu; osiandɛ bɛyɛ na yenya nyimdzee bi a ɔfa hɛn nkorɔfo a wɔasɛɛ hɔn no hɔn asefo ho, bea a dɛm nkyerɛwsɛm yi fi, anaadɛ bɛyɛ na yenya nyimdzee bi a ɔfa dɛm nkorɔfo yi ara a wɔasɛɛ hɔn yi ho; na mepɛ dɛ muhu siantsir a ɔmaa wɔsɛɛ hɔn.

13 Afei Ammon see no dɛ: Mobotum esi no pi akã akyerɛ wo, O ɔhen, ɔbarimba bi a obotum aakyerɛ nkyerɛwee yi ase; na ɔwɔ biribi a otum hwɛ, na ɔdze kyerɛ tsetse nkyerɛwee nyinara ase; na ɔyɛ akyɛdze a ofir Nyame. Na dɛm ndzɛmba no, wɔfrɛ no basekyerɛdze, na obiara runntum nnhwɛ mu gyedɛ wɔahyɛ no, annyɛ dɛm a obohu dza onnyi dɛ ohu na ɔahwer no nkwa. Na obiara a wɔama no ho kwan dɛ ɔnhwɛ mu no, dɛm nyimpa no wɔfrɛ no cadzehunyi.

14 Na hwɛ, ɔhen a ɔhwɛ dɔm a wɔwɔ Zarahemla asaase do no nye dɛm ɔbarimba no a wɔama no ho kwan ma ɔyɛ dɛm ndzɛmba yi no, ɔno na ɔwɔ dɛm akyɛdze a ɔkrɔn yi a ofi Nyame hɔ no.

15 Na ɔhen no see dɛ adzehunyi sõ kyɛn nkɔnhyɛnyi.

16 Na Ammon see dɛ adzehunyi yɛ oyikyerɛfo na nkɔnhyɛnyi so; na nyimpa biara rinnya akyɛdze a ɔsõ, gyedɛ ɔwɔ Nyame no tum, na dasanyi biara runntum nnya, naaso nyimpa botum enya tum kɛse efi Nyame hɔ.

17 Mbom adzehunyi botum ehu ndzɛmba a etwa mu kɔ, na ndzɛmba so a ɔreba, na wɔnam hɔn do bɛda ndzɛmba nyinara edzi, anaadɛ nsumaamu ndzɛmba bɛda edzi, na esumadze bopue kan mu, na eso ndzɛmba a wonnyim no wɔbɛma woehu, na ndzɛmba bɛda edzi ama hɔn a nkyɛ worunnhu.

18 Dɛm na Nyankopɔn ahyehyɛ ato hɔ ama nyimpa, dɛ ɔnam gyedzi do bɛyɛ etumdzendwuma akɛse; dɛm ntsi no ho bɛba mfaso kɛse ama ne mfɛfo.

19 Na afei, ber a Ammon dze dɛm nsɛm a ɔrekã yi baa ewiei no, ɔhen no nyaa enyigye mbordo na ɔdze ndaase maa Nyankopɔn see dɛ: Ekyingye biara nnyi hɔ dɛ aesumasɛm kɛse na ɔwɔ mprɛtse yi do, na asekyerɛdze yinom so ekyingye biara nnyi ho dɛ wɔyɛe dɛ wɔmfa nda esumasɛm edzi nkyerɛ adasamba.

20 O mbrɛ Ewuradze no ndwuma dua yɛ nwanwa a, na aber bɛn na ɔnye no nkorɔfo bohu amandze; nyew, mbrɛ adasamba hɔn ntseasee na hɔn adwen mu si yɛ dzen a, osiandɛ wɔronnhwehwɛ nyansa bi, nna wɔmmpɛ so dɛ aodzi hɔn do hen!

21 Nyew, wɔtse dɛ kwaa mu nguankuw bi a woguan fi oguanhwɛfo no nkyɛn, na wɔbɔ apetse, na wɔkã hɔn gu, ma haban mu mbowa abɔyafo bi kyekyer hɔn.