1 Iva, mhux anke Isaija qal: Min kien jemmen dak li smajna, u lil min intwera driegħ il‑Mulej?

2 Għax bħal xitla tenera jikber quddiemu, u bħal għerq minn art niexfa; ebda sura jew ġmiel ma għandu; u meta se narawh m’aħna se naraw l‑ebda ġmiel li nitgħaxxqu bih.

3 Huwa mżeblaħ u mwarrab mill‑bnedmin; bniedem li bata u jaf x’inhu n‑niket; u wieħed li aħna ħbejna wiċċna minnu; ġie mżeblaħ, u aħna xejn ma qisnieh.

4 Huwa żgur li hu rafa’ fuqu n‑niket tagħna, u tgħabba bit‑tbatija tagħna; madankollu aħna ħsibnieh bħal wieħed magħkus, midrub minn Alla u mnikket.

5 Iżda hu kien miġruħ minħabba fi ħtijietna, misħuq minħabba fi ħżunitna; għas‑sliem tagħna waqa’ l‑kastig fuqu; u bis‑swat tiegħu sibna l‑fejqan tagħna.

6 Aħna lkoll bħal nagħaġ intlifna; kull wieħed minna qabad triq għal rasu; u l‑Mulej xeħet fuqu l‑ħażen tagħna lkoll.

7 Ħaqruh, u sawwtuh, u madankollu ma fetaħx fommu; ġabuh bħal ħaruf meħud għall‑qatla, u bħal nagħġa mbikkma f’id min iġiżżha, u baqa’ ma fetaħx fommu.

8 Minn qiegħ il‑ħabs u mill‑ħaqq neħħewh; u min se jitkellem dwar nislu? Għax lilu qaċċtuh mill‑art tal‑ħajjin; minħabba ħtijiet il‑poplu tiegħi spiċċa midrub.

9 U tawh qabar mal‑ħżiena, u mal‑għonja difnuh; għalkemm ma għamel ebda deni, u minn fommu ma ħareġ ebda qerq.

10 Iżda l‑Mulej għoġbu jgħakksu; hu jħallih jgħaddi min‑niket; meta toffru ruħu bħala offerta għad‑dnub huwa jara nislu u jtawwal jiemu, u r‑rieda tal‑Mulej isseħħ permezz tiegħu.

11 Hu jara t‑tbatija ta’ ruħu, u jħossu sodisfatt; permezz tal‑għarfien tiegħu l‑qaddej ġust tiegħi jiġġustifika lill‑kotra; għax bil‑ħażen tagħhom huwa jitgħabba.

12 Għalhekk mas‑setgħana jien nagħtih sehmu, u hu jkollu sehem fil‑priża mal‑qalbenin; għaliex hu offra ruħu għall‑mewt; u kien magħdud mal‑ħatjin; u hu ġarr id‑dnubiet tal‑kotra, u daħal għall‑ħatjin.