ဟေလမန် ၁၂

အခန်းကြီး ၁၂

လူသားတို့သည် မတည်ကြည်၊ မိုက်မဲ၍၊ မကောင်းမှုကိုပြုရန် လျင်မြန်ကြ၏—ကိုယ်တော်ရှင်သည် သူ၏လူမျိုးတို့ကို ဆုံးမတော်မူ၏—လူသား၏အရေးမပါခြင်းကို ဘုရားသခင်၏တန်ခိုးတော်နှင့် နှိုင်းယှဉ်ထား၏—တရားစီရင်တော်မူရာနေ့၌၊ လူသားတို့သည် ထာဝရတည်မြဲသောအသက်တာ၊ သို့မဟုတ် ထာဝရတည်မြဲသောအပြစ်ဒဏ်ရောက်ခြင်းကို ရရှိကြမည်။ ဘီစီ ၆ ခန့်။

၁ ထိုကဲ့သို့အားဖြင့်၊ ငါတို့သည် လူသားတို့၏စိတ်နှလုံးအဘယ်မျှလောက် မှားယွင်းခြင်းနှင့်၊ မတည်ငြိမ်ခြင်းတို့ရှိကြောင်းကို နားလည်နိုင်ကြ၏။ ထိုမှတစ်ပါး၊ ကိုယ်တော်ရှင်သည် သူ့အား ကိုးစားသောသူတို့ကို သူ၏ကြီးစွာသော အတိုင်းမသိသော ကောင်းမြတ်ခြင်းဖြင့်၊ ကောင်းချီးပေး၍၊ အောင်မြင်စေတော်မူကြောင်း ငါတို့သိနိုင်ကြ၏။

၂ ထိုမှတစ်ပါး၊ သူ၏လူမျိုးတို့ကို၊ အောင်မြင်စေသည့်အချိန်၌ ငါတို့သိနိုင်ကြသည်မှာ၊ အထူးသဖြင့်၊ သူတို့၏လယ်ကွင်းများ၊ သူတို့၏သိုးစုများနှင့် သူတို့၏နွားစုများ၊ ရွှေ၊ ငွေနှင့် အမျိုးမျိုးသော အဖိုးထိုက်သည့်အရာ အမျိုးအစားမှန်သမျှတို့၌ တိုးပွားခြင်း၊ သူတို့၏အသက်ကို ချမ်းသာပေး၍၊ သူတို့ကို သူတို့ရန်သူများ၏လက်မှ ကယ်လွှတ်ခြင်း၊ သူတို့ကိုဆန့်ကျင်၍ စစ်မကြေညာစေခြင်းငှာ၊ သူတို့ရန်သူများ၏စိတ်နှလုံးကို ပျော့ပျောင်းစေခြင်း၊ ထိုမှတစ်ပါး၊ အချုပ်အားဖြင့်၊ သူ့လူမျိုးတို့၏ကောင်းကျိုးနှင့် ပျော်ရွှင်ခြင်းအတွက် ခပ်သိမ်းသောအမှုတို့ကိုပြုခြင်းတို့၏အချိန်၌၊ ထိုမှတစ်ပါး၊ ယင်းနောက်တွင်ကား၊ သူတို့သည် စိတ်နှလုံးကို မာကျောစေ၍၊ သူတို့၏ဘုရားသခင်ကိုယ်တော်ရှင်ကို မေ့လျော့၍၊ သန့်ရှင်းတော်မူသောဘုရားကို ခြေဖြင့်နင်းကြ၏—ထိုမှတစ်ပါး၊ ဤအမှုသည်ကား၊ သူတို့၏ သက်သာခြင်းနှင့် အလွန်ကြီးစွာသော အောင်မြင်ခြင်းတို့ကြောင့်ပင်တည်း။

၃ ထိုကဲ့သို့အားဖြင့်၊ ငါတို့သိမြင်ကြသည်မှာ ကိုယ်တော်ရှင်က သူ၏လူမျိုးတို့ကို များစွာသော ဆင်းရဲဒုက္ခများနှင့် မဆုံးမလျှင်၊ အထူးသဖြင့်၊ သေခြင်းနှင့် ကြောက်မက်ဖွယ်သောအရာတို့ဖြင့်လည်းကောင်း၊ ငတ်မွတ်ခေါင်းပါးခြင်းဘေးဖြင့်လည်းကောင်း၊ အမျိုးမျိုးသော ကာလနာဘေးတို့ဖြင့်လည်းကောင်း ပြစ်ဒဏ်ပေးမဆုံးမလျှင်၊ သူတို့ သူ့ကို အောက်မေ့ကြမည်မဟုတ်ကြောင်းပေတည်း။

၄ အို လူသားတို့သည် မိုက်မဲလှပေစွတကား၊ အချည်းနှီးဖြစ်ပေစွတကား၊ ဆိုး၍ နတ်ဆိုးကဲ့သို့ဖြစ်ပေစွတကား၊ ဒုစရိုက်ကိုပြုရန် လျင်မြန်၍၊ ကောင်းမြတ်သည်ကို ပြုရန် နှေးကွေးလှပေစွတကား။ ထိုမှတစ်ပါး၊ မာရ်နတ်၏စကားများကို စေ့စေ့နားထောင်ရန်နှင့် သူတို့စိတ်နှလုံးကို လောက၏အချည်းနှီးသောအရာတို့အပေါ်၌ထားရန် လျင်မြန်လှပေစွတကား။

၅ ထိုမှတစ်ပါး၊ မာနဖြင့် ဘဝင်မြင့်ရန် လျင်မြန်လှပေစွတကား။ ထိုမှတစ်ပါး၊ ဝါကြွား၍၊ ဒုစရိုက်ဖြစ်သည့် အမျိုးမျိုးသောအရာတို့ကိုပြုရန် လျင်မြန်လှပေစွတကား။ ထို့အတူ၊ သူတို့သည် သူတို့၏ဘုရားသခင်ကိုယ်တော်ရှင်ကို အောက်မေ့ရန်နှင့် သူ၏အကြံများကို နားညောင်းရန် နှေးကွေးလှပေစွတကား။ ထိုမှတစ်ပါး၊ ဉာဏ်ပညာ၏လမ်းကြောင်းများသို့ လိုက်ရန် နှေးကွေးလှပေစွတကား။

၆ ရှုလော့၊ သူတို့ကို ဖန်ဆင်းတော်မူလေသည့် သူတို့၏ဘုရားသခင်ကိုယ်တော်ရှင်အား သူတို့အပေါ် အစိုးရ၍ အုပ်စိုးမည်ကို အလိုမရှိကြ။ သူတို့အပေါ်သို့ သူ၏ကြီးစွာသော ကောင်းမြတ်ခြင်းနှင့် ကရုဏာတော်တို့ ရှိသော်ငြားလည်း သူ၏အကြံကို အလေးမထားဘဲလျစ်လျူရှုလျက်၊ သူ့ကို သူတို့၏ ဦးဆောင်လမ်းပြ မဖြစ်စေလိုကြ။

၇ အို လူသားတို့၏အရေးမပါခြင်းသည်ကား၊ ကြီးပေစွတကား။ ထိုမှတစ်ပါး၊ သူတို့သည် မြေမှုန့်ထက်ပင် နိမ့်ကျ၏။

၈ အကြောင်းမူကား၊ ရှုလော့၊ ငါတို့၏ကြီးမြတ်သည့် ထာဝရတည်မြဲသောဘုရားသခင်၏ အမိန့်ဖြင့် မြေမှုန့်သည် အရပ်ရပ်သို့ လွင့်၍၊ အစိတ်စိတ်ကွဲ၏။

၉ ထိုမှတစ်ပါး၊ ရှုလော့၊ သူ၏အသံအားဖြင့် တောင်ကုန်းနှင့် တောင်များတုန်၍၊ လှုပ်၏။

၁၀ သူ့အသံ၏တန်ခိုးအားဖြင့်လည်း ၎င်းတို့သည် ကွဲပြတ်၍၊ ညီညာလာသဖြင့်၊ အမှန်စင်စစ်၊ ချိုင့်ဝှမ်းကဲ့သို့ပင်ဖြစ်၏။

၁၁ ထိုမှတစ်ပါး၊ သူ့အသံ၏တန်းခိုးအားဖြင့် မြေကြီးတစ်ခုလုံး လှုပ်၏။

၁၂ ထိုမှတစ်ပါး၊ သူ့အသံ၏တန်ခိုးအားဖြင့် အုတ်မြစ်သည် အလယ်ဗဟိုထိတိုင်အောင်ပင် သိမ့်သိမ့်တုန်၏။

၁၃ ထိုမှတစ်ပါး၊ သူက မြေကြီးကို—ရွေ့လော့—ဟု ဆိုလျှင်၊ ရွေ့၏။

၁၄ ထိုမှတစ်ပါး၊ သူက မြေကြီးကို—နောက်သို့ ပြန်လည်၍၊ နေ့ကို နာရီပေါင်းများစွာ ဆန့်စေလော့—ဟု ဆိုလျှင် ထိုအမှုဖြစ်၏။

၁၅ ထိုကဲ့သို့အားဖြင့်၊ သူ၏စကားအတိုင်း မြေကြီးသည် နောက်သို့လည်၍၊ လူသားအနေဖြင့် နေသည် ငြိမ်၍ရပ်နေဟန်ရှိ၏။ ထိုမှတစ်ပါး၊ ရှုဦးလော့၊ ဤကဲ့သို့ပင်ဖြစ်၏။ အကြောင်းမူကား၊ ရွေ့လျားသည်မှာ မြေကြီးဧကန်အမှန်ဖြစ်၏၊ နေမဟုတ်။

၁၆ ရှုဦးလော့၊ သူက မဟာသမုဒ္ဒရာရေကို—သင် ခန်းခြောက်လော့—ဟု ဆိုလျှင်လည်း၊ ထိုအမှု ဖြစ်၏။

၁၇ ရှုလော့၊ သူသည် ဤတောင်ကို—သင် ထလာ၍၊ ထိုမြို့ကို ဖုံးလွှမ်းစေခြင်းငှာ အပေါ်သို့ ကျလော့—ဟု ဆိုလျှင်၊ ရှုလော့၊ ထိုအမှု ဖြစ်၏။

၁၈ ရှုဦးလော့၊ အကြင်လူသည် မြေကြီးထဲ၌ ဘဏ္ဍာကို ဝှက်ထားလျှင်၊ ကိုယ်တော်ရှင် မိန့်တော်မူလိမ့်မည်မှာ—ဝှက်ထားသူ၏ဒုစရိုက်ကြောင့်၊ ထိုအရာသည် ကျိန်ခြင်းကို ခံစေဟုဖြစ်သတည်း—ရှုလော့၊ ထိုအရာသည် ကျိန်ခြင်းကို ခံရလိမ့်မည်။

၁၉ ထို့အတူ၊ ကိုယ်တော်ရှင်က—သင်သည် ကျိန်ခြင်းကို ခံရသဖြင့်၊ ဤအချိန် ယခုမှစ၍၊ ကာလအစဉ်အဆက် အဘယ်သူမျှ သင့်ကို ရှာမတွေ့ဘဲရှိလိမ့်မည်—ဟု မိန့်တော်မူလျှင်၊ ရှုလော့၊ ယခုမှစ၍၊ ကာလအစဉ်အဆက် ၎င်းကို အဘယ်သူမျှ မတွေ့လတ္တံ့။

၂၀ ရှုဦးလော့၊ ကိုယ်တော်ရှင်က လူတစ်ဦးကို—သင်၏ဒုစရိုက်များကြောင့်၊ သင်သည် ကာလအစဉ်အဆက် ကျိန်ခြင်းခံရမည်—ဟု မိန့်တော်မူလျှင်၊ ထိုအမှုဖြစ်လိမ့်မည်။

၂၁ ကိုယ်တော်ရှင်က—သင်၏ဒုစရိုက်များကြောင့်၊ သင်သည် ငါ၏မျက်မှောက်မှ ပယ်ရှင်းခံရမည်—ဟု မိန့်တော်မူလျှင်၊ ထိုအမှုကိုလည်း ဖြစ်စေတော်မူလိမ့်မည်။

၂၂ ထို့အတူ၊ သူက ဤသို့မိန့်တော်မူမည့်သူသို့ အမင်္ဂလာရောက်ပေ၏။ အကြောင်းမူကား၊ ဒုစရိုက်ကိုပြုမည့်သူသို့ ထိုအမှုရောက်လိမ့်မည်။ ထိုသူသည်လည်း ကယ်တင်ခြင်းသို့ မရောက်နိုင်။ ထို့ကြောင့်၊ လူသားတို့ကို ကယ်တင်ခြင်းသို့ ရောက်နိုင်စေခြင်းငှာဟူသော ဤအကြောင်းရင်းကြောင့်၊ နောင်တရခြင်းကို ဟောကြားလေ၏။

၂၃ ထို့ကြောင့်၊ နောင်တရ၍၊ သူတို့၏ဘုရားသခင်ကိုယ်တော်ရှင်၏အသံကို စေ့စေ့နားထောင်မည့်သူတို့သည် မင်္ဂလာရှိကြ၏။ အကြောင်းမူကား၊ ဤသူတို့သည် ကယ်တင်ခြင်းသို့ ရောက်မည့်သူများပေတည်း။

၂၄ လူသားတို့အား နောင်တရခြင်းနှင့် ကောင်းမြတ်သောအကျင့်များသို့ ဆောင်ယူခြင်းကို ခံရနိုင်မည့်အကြောင်းနှင့် သူတို့၏အကျင့်များအတိုင်း၊ ကျေးဇူးအတွက် ကျေးဇူးသို့ ပြန်လည်ဆောင်ယူခြင်းကို ခံရနိုင်မည့်အကြောင်း ဘုရားသခင်သည် သူ၏ကြီးစွာသော ပြည့်စုံခြင်းဖြင့် အခွင့်ပေးတော်မူပါစေ။

၂၅ ငါသည်လည်း လူသားခပ်သိမ်းတို့ကို ကယ်တင်ခြင်းသို့ ရောက်စေနိုင်ရန် အလိုရှိ၏။ သို့ရာတွင်၊ ထိုကြီးစွာသော နောက်ဆုံးနေ့၌ နှင်ထုတ်ခံရမည့်သူအချို့၊ အထူးသဖြင့်၊ ကိုယ်တော်ရှင်၏မျက်မှောက်မှ စွန့်ပစ်ခံရမည့်သူအချို့ ရှိ၏။

၂၆ အထူးသဖြင့်၊ ကောင်းသောအမှုကို ပြုသောသူတို့သည် ထာဝရတည်မြဲသောအသက်တာကို ရကြမည်။ မကောင်းမှုကို ပြုသောသူတို့သည် ထာဝရတည်မြဲသောအပြစ်ဒဏ်ရောက်ခြင်းကို ရရှိလိမ့်မည်ဟုဆိုသော စကားများကို ပြီးပြည့်စုံစေလျက်၊ အဆုံးမရှိသည့် ဝမ်းနည်းပူဆွေးခြင်းအခြေအနေသို့ လွှဲအပ်ခြင်းကို ခံရမည့်သူတို့ ရှိ၏။ ဤမျှအထိပေတည်း။ အာမင်။