1 Na afei, me babanyin, mowɔ biribi kã kyerɛ wo wɔ nsanananmu no a wɔakã ho asɛm no ho; na hwɛ, binom ^aadandan kyerɛwsɛm no na ^bwɔaman efi ho koraa osian dɛm adze yi ho ntsi. Na muhu dɛ wo so w’adwen ahaw wo wɔ dɛm adze yi ho. Mbom hwɛ, merebɛkyerɛ mu akyerɛ wo.

2 Mekã kyerɛ wo, me babanyin, dɛ nsanananmu ho nhyehyɛɛ yi hia Nyankopɔn ne pɛrpɛrdzi; osiandɛ ohia dɛ ndzɛmba nyina wɔdze sananan mu dze sisi hɔn sibew. Hwɛ, ohia na ɔtsen dɛ mbrɛ Christ no tum nye no wusoɛr no kyerɛ, dɛ ɔsɛ dɛ wɔdze nyimpa ne kra san ma ne nyimpadua no, na wɔdze nyimpadua ne ^amfafakuwa biara san ma no.

3 Na ɔyɛ adzehia wɔ Nyankopɔn ^apɛrpɛrdzi do dɛ ^bwobu nyimpa atsɛn dɛ mbrɛ hɔn ^cndwuma tse; na sɛ hɔn nkwa nda yi mu ndwuma ye, na hɔn akoma mu so ye a, ^dwɔbɛsan so ama hɔn wɔ da a odzi ewiei no mu no, dza oye.

4 Na sɛ hɔn ndwuma muo a ^awɔbɛsan ama hɔn dza omuo. Dɛm ntsi, ndzɛmba nyina wɔdze sananan mu dze esisi hɔn sibew, adze biara besi ne sibew dɛ mbrɛ ɔtse dada no—dza ^bɔnnkye bo bɔsoɛr ayɛ bɛkyebo, dza ^cɔprɔw akɔ dza ɔmmprɔw bio—wobenyan hɔn akɔ ^denyigye a onnyi ewiei mu ma wɔaakɛtsena Nyankopɔn n’ahenman mu, anaa wɔbɔkɔ awerɛhow a onnyi ewiei mu akɛtsena abɔnsam n’ahenman mu, kor bɔkɔ afã, na kor so akɔ afã—

5 Kor bɔsoɛr akɔ enyigye mu dɛ mbrɛ ne pɛ ɔwɔ wɔ enyigye ho tse no, anaa ɔbɔkɔ bea a oye dɛ mbrɛ ne pɛ a ɔwɔ no wɔ papa ne yɛ ho tse; na kor no so bɔkɔ bea a omuo dɛ mbrɛ ne pɛ a ɔwɔ bɔn ho tse no, na dɛ mbrɛ ɔpɛɛ dɛ ɔbɛyɛ dza omuo daa nyina no, dɛmara so mpo na sɛ adzesaa no ba a obenya n’akatua a omuo.

6 Na dɛm na ɔtse wɔ afã so. Sɛ onuu noho wɔ no bɔn ho, na ɔpɛɛ dɛ ɔbɛyɛ dza ɔtsen dze ekesi no nkwa nda ewiei a, dɛmara so na wɔdze tsenenee botua no kaw.

7 ^aWoyinom nye hɔn a Ewuradze apon hɔn no; nyew, woyinom nye hɔn a oeyi hɔn efi mu epuei, oeyi hɔn efi dɛm sum adzesaa a onnyi ewiei no mu; na dɛm na wobegyina anaa wɔbɔhwe ase; na hwɛ, wɔyɛ hɔnara hɔn ^batsɛmbuafo, dɛ wɔbɛyɛ papa anaa bɔn.

8 Afei, Nyankopɔn ne ɔmom no dze ^aɔnnsakyer da; dɛm ntsi, oesiesie kwan no ato hɔ dɛ obiara a ɔbɛfa do no benya nkwagye.

9 Na afei hwɛ, me babanyin, mma nnyɛ ^abɔn kor mpo bio mmfa nntsia Nyankopɔn wɔ nkyerɛkyerɛ ho botae yinom ho, dɛm bɔn a ayɛ pɛn no.

10 Mma nndwen dɛ osiandɛ wɔakã biribi a ɔfa nsanananmu ho ntsi, dɛm no bɛma bɔn asan akɔ enyigye mu. Hwɛ, mese wo dɛ, ^aemumuyɛdze nnyɛ enyigyedze ara da.

11 Na afei, me babanyin, adasa nyina wɔ ^ahonam tsebew mu, anaa mebɛkã dɛ, wɔwɔ ^bhonam su asetsena mu no, wɔtse bɔnwen wenwen mu nye emumuyɛ mpokyerɛ mu; ^cwonnyi Nyame wɔ wiadze yi mu, na wɔaman efi Nyame no su ho; dɛm ntsi, hɔn tsebew nye enyigye gyinabew bɔ ebira.

12 Na afei hwɛ; ana kasafua nsanananmu n’asekyerɛ nye dɛ wɔbɛsesa adze bi no su ayɛ no fofor, anaa wobeyi adze bi efi ne sibew ekesi bea fofor bi do?

13 O, me babanyin, ɔnntse dɛm; mbom kasafua nsanananmu no n’ase nye dɛ wɔbɛma bɔn abɛyɛ bɔn bio; anaa honam su abɛyɛ honam su; anaa mbɔnsamdze abɛyɛ mbɔnsamdze; papayɛ abɛyɛ papayɛ; tseneneeyɛ abɛyɛ tseneneeyɛ; pɛrpɛrdzi abɛyɛ pɛrpɛrdzi; mbɔbɔrhu abɛyɛ mbɔbɔrhu bio.

14 Dɛm ntsi, me babanyin, hwɛ na hu w’enuanom mbɔbɔr; dzi ^apɛrpɛr, ^bbu atsɛntsenenee, na yɛ ^cpapa daa nyina; na sɛ eyɛ iyinom nyina a nna wo nsa bɛkã w’akatua; nyew, na wɔdze ^dehumbɔbɔr bɛsan ama wo bio; wɔdze pɛrpɛrdzi bɛsan ama wo bio; na wɔdze tsenenee atsɛmbu bɛsan ama wo bio; na wɔdze papa botua wo kaw.

15 Na dza edze ma no bɛsan aba wo hɔ bio, na wɔdze asananan mu; dɛm ntsi, kasa nsanananmu no bu dzebɔnyɛnyi fɔ, na ommbu no bem bi.