Tsir 23
Wɔbɔ nyamesom ho fahodzi ho dawur—Lamanfo a wɔwɔ nsaase esuon nye nkurow mu sakyer—Wɔfrɛ hɔnho Anti-Nephi-Lehifo na woyi hɔn fi ndom ase—Amalekifo nye Amulonfo pow nokwar no. Bɛyɛ mfe 90–77 Ansaana wɔbɔwo Christ.
1 Hwɛ, afei ɔbaa dɛ Lamanfo hɔn hen no maa awɔbɔɔ dawur wɔ no nkorɔfo nyinara mu, dɛ mma wɔmmfa hɔn nsa nnka Ammon, anaa Aaron, anaa Omner, anaa Himni, anaa hɔn enuanom no a wɔbɔkɔ akɛkã Nyame n’asɛm wɔ asaase n’afã beebiara no.
2 Nyew, ɔdze ɔmom maa hɔn, dɛ mma wɔmmfa hɔn nsa nkã hɔn nkyekyer hɔn, anaa wɔmmfa hɔn nngu efiadze; anaa wonnhimahima hɔn ntafi, anaa wɔnnhwe hɔn, anaa wonnyi hɔn edzi mmfi hɔn nhyiamudan mu, anaa wonnsi hɔn mpire anaa wɔnntow abo mmbɔ hɔn, na mbom wɔmma hɔn kwan mma wɔmbra hɔn efiefi, nye hɔn temple mu, nye hɔn nhyiamudan so do.
3 Na dɛm bɛma woeetum akɔ beebiara a wɔpɛ akɛkã asɛm no, osiandɛ ɔhen no asakyer aba Ewuradze hɔ, ɔnye ne fifo nyina; dɛm ntsi ɔmaa wɔbɔɔ dawur wɔ no nkorɔfo no mu wɔ asaase no do nyina, amma fintsidua biara ennsiw Nyame n’asɛm kwan, na mbom apetse asaase nyina do, ama no nkorɔfo eetum ehu dza ɔfa hɔn egyanom hɔn emumuyɛdze aamambra, na wɔama woehu dɛ hɔn nyina yɛ enuanom, na dɛ onnyi dɛ wodzi ewu, anaa wɔbɔ epoo, anaa wowia adze, anaa wɔto awar, anaa wɔyɛ emumuyɛdze biara.
4 Na afei ɔbaa dɛ ber a ɔhen no maa wɔbɔɔ dɛm dawur yi no, Aaron nye n’enuanom no fii kurow kor mu kɔr kor so mu, fii asɔrfi kor mu kɔr kor so mu, kyekyeer asɔrasɔr, na wɔhyɛɛ asɔfo na woyiyii akyerɛkyerɛfo fii Lamanfo no mu wɔ asaase no do hɔ nyina dɛ wɔnkã Nyame n’asɛm no na wɔnkyerɛkyerɛ hɔn; na dɛm maa hɔn edwuma kɔr do yie.
5 Na wɔtwee mpempem baa Ewuradze ho nyimdzee ho, nyew, wɔmaa mpempem nyaa gyedzi wɔ Nephifo hɔn aamambra ho; na wɔkyerɛkyerɛɛ hɔn bkyerɛwsɛm nye nkɔnhyɛ a wɔdze egyaa hɔn fi tsetse dze besi dɛm aber no mu.
6 Na nokwar dɛ Ewuradze tse ase yi, dodowara a wɔgyee dzii no, anaadɛ dodowara a ɔnam Ammon nye n’enuanom no hɔn nsɛmpa a wɔrekã no do nyaa nokwar no ho nyimdzee, wɔ ɔfa no nyikyerɛ sunsum nye nkɔnhyɛ, nye Nyankopɔn no tum a ɔreyɛ anwanwadze wɔ hɔn mu no—nyew, mese hom dɛ, dɛ Ewuradze tse ase yi, Lamanfo dodowara a wɔgyee hɔn nsɛm no dzii no na awɔsakyeree baa Ewuradze hɔ no, bannkɔ asehwe mu ara da.
7 Na wɔbɛyɛɛ atseneneefo; na wɔdze hɔn akodze a wɔdze tsew etua guu famu dɛ wɔronnkõ nntsia Nyankopɔn anaa hɔn enuanom bio.
8 Afei, iyinom nye ahɔn a wɔsakyeree na wɔbaa Ewuradze hɔ:
9 Lamanfo no a wɔwɔ Ishmael asaase do;
10 Nye Lamanfo no so a wɔwɔ Middoni asaase do.
11 Nye Lamanfo so a wɔwɔ Nephi kuropɔn mu;
12 Nye Lamanfo so a wɔwɔ aShilom asaase do, nye hɔn a wɔwɔ Shemlon, nye Lemuel kuropɔn mu, nye Shimnilom.
13 Na woyinom nye Lamanfo no a awɔsakyeree na wɔbaa Ewuradze hɔ no hɔn nkurow edzin; woyinom so na wɔdze hɔn etuatsew ho akodze guu famu, nyew, hɔn ɔkõ ho akodze; na hɔn nyinara wɔyɛ Lamanfo.
14 Na Amalekifo no aannsakyer, gyedɛ nyimpa kor pɛr; na bAmulonfo no so annsakyer; na mbom wopiriim hɔn akoma na Lamanfo no a wɔtse asaase ne mbea a wɔtse no so dɛmara, nyew, hɔn a wɔtsetse hɔn nkuraase nyina nye hɔn nkurow nyina mu.
15 Dɛm ntsi na yɛabobɔ nkurow a Lamanfo a woenu hɔnho na woehu nokwar no na wɔasakyer no edzin no.
16 Na afei ɔbaa dɛ ɔhen no nye hɔn a wɔasakyer pɛɛ dɛ wonya dzin ama soronko aabɛda hɔn nye hɔn enuanom no ntamu; dɛm ntsi ɔhen no nye Aaron nye hɔn asɔfoe mu pii dwendween dzin a wɔmfa nto hɔn do, ama wɔaabɛyɛ soronko.
17 Na ɔbaa dɛ wɔfrɛɛ hɔnho aAnti-Nephi-Lehifo; na dɛm na wɔdze frɛɛ hɔn na wɔammfrɛ hɔn Lamanfo bio.
18 Na wɔhyɛɛ ase dɛ wɔreyɛ edwuma papanara; nyew, na wɔfaa Nephifo no anyɛnkofo; dɛm ntsi, wɔnye hɔn dzii nkitaho, na Nyankopɔn ne andom no enndzi hɔn ekyir bio.