1 Mo nao i bin hapen se ol pipol blong Ol Man blong Nifae oli gobak, olgeta evriwan, long ol graon blong olgeta long nambatwante mo sikis yia, evri man, wetem famli blong hem, ol grup blong animol blong hem mo ol grup blong buluk blong hem, ol hos blong hem mo ol buluk blong hem, mo evri samting we i bin stap blong olgeta.

2 Mo i bin hapen se oli no kakae flatem evri kaekae blong olgeta; from hemia, oli tekem wetem olgeta evri samting we oli no kakae flatem, evri sid blong olgeta blong evri kaen, mo ol gol blong olgeta, mo ol silva blong olgeta, mo evri gudgudfala samting blong olgeta, mo oli gobak long ol graon blong olgeta mo ol samting blong olgeta, long Not tugeta wetem long Saot, long graon long Not tugeta wetem long graon long Saot.

3 Mo oli givim long ol stilman we oli bin mekem kavenan blong holemtaet pis blong graon, we oli wantem blong stap olsem Ol Man blong Leman, oli givim ol graon, folem ol namba blong olgeta, blong maet oli save gat, wetem ol wok blong olgeta, wanem we oli nidim blong stap laef long hem; mo olsem ia nao oli stanemap pis long medel blong ful graon.

4 Mo oli stat bakegen blong kam antap gud mo blong kam strong; mo ol nambatwante mo sikis mo seven yia i bin pas i go, mo i gat strong oda long graon, mo oli mekem ol loa blong olgeta folem fasin we i stret mo folem jastis.

5 Mo nao i no bin gat eni samting long ful graon blong blokem ol pipol blong kam antap gud oltaem, hemia nomo sapos oli no foldaon long fasin blong brekem loa.

6 Mo nao hem i Gidgidonae, mo jaj, Lakonius, mo olgeta we oli jusum olgeta olsem ol lida, we i stanemap bigfala pis ia long graon.

7 Mo i bin hapen se i gat plante bigtaon we oli bildim i niu, mo i gat plante olfala bigtaon we oli mekem i kam gud.

8 Mo i bin gat plante bigfala rod we ol pipol oli mekem, mo plante rod oli mekem we i go long wan bigtaon i go long narafala bigtaon, mo long wan graon i go long narafala graon, mo long ples i go long narafala ples.

9 Mo olsem ia nao nambatwante mo eit yia i pas i go, mo ol pipol oli gohed blong gat pis.

10 Be i bin hapen long nambatwante mo naen yia we, i stat blong gat sam rao long medel blong ol pipol; mo sam oli kam antap wetem ^ahae tingting mo ol flas toktok from ol bigfala rij samting blong olgeta we i tumas, yes, i go kasem ol bigfala fasin blong givim hadtaem;

11 From i bin gat plante bisnisman long graon, mo tu, plante loya, mo plante ofisa.

12 Mo ol pipol oli stat blong seraot long ol defren grup, folem ol ^arij samting blong olgeta mo ol janis blong olgeta blong lanem samting; yes, sam oli no save samting from oli pua, mo sam narafala oli stap lanem plante samting from oli gat plante rij samting.

13 Sam oli kam antap long hae tingting, mo sam narafala oli putum tingting blong olgeta i stap daon tumas; sam oli givimbak nogud toktok folem ol nogud toktok we oli kasem, long semtaem sam narafala oli kasem ol nogud toktok, mo ^ahadtaem we oli givim long olgeta, mo evri kaen hadtaem, be oli no tanem raon mo ^bgivimbak ol nogud samting ia, be oli bin putum tingting blong olgeta i stap daon mo oli wantem sakem sin long fored long God.

14 Mo olsem ia nao i bin gat wan bigfala fasin blong ol pipol oli no stap semmak long ful graon, inaf blong mekem se jos i stat blong brokbrok; yes, inaf blong mekem se long nambateti yia, jos i brokbrok long ful graon, be long medel blong wan smol namba nomo blong Ol Man blong Leman we oli bin jenisim laef long tru fet, oli no brokbrok; mo oli no bin save kamaot long hem, from oli strong, mo oli stanap strong, mo oli no save muvmuv, oli glad blong ^awok wetem strong tingting blong stap obei long ol komanmen blong Lod.

15 Nao stamba blong nogud fasin blong ol pipol ia i hemia—Setan i bin gat bigfala paoa, blong tantanem tingting blong ol pipol blong oli mekem evri kaen fasin we i nogud, mo blong mekem olgeta oli solap wetem hae tingting, hem i temtem olgeta blong lukaotem paoa, mo atoriti, mo ol rij samting, mo ol samting nating blong wol.

16 Mo olsem ia nao Setan i bin lidim hat blong ol pipol i gowe, blong mekem evri kaen fasin we i nogud; from hemia, oli harem gud long pis be blong smol namba blong yia nomo.

17 Mo olsem ia nao, long stat blong nambateti yia—ol pipol, afta we oli bin letem olgeta blong spes blong wan longtaem blong ol ^atemtesen blong devel i karem olgeta long eni ples we hem i wantem blong tekem olgeta, mo blong mekem eni nogud fasin hem i wantem se oli mas mekem—mo olsem ia nao long stat blong hemia, nambateti yia ia, oli stap long wan ples we i gat fasin nogud we i rabis stret.

18 Nao oli no sin from se oli ^ano save, from oli bin save wanem tingting blong God long saed blong olgeta, from oli bin tijim ol samting ia long olgeta; from hemia, oli minim blong ^bgo agensem God.

19 Mo nao hemia i bin long ol dei blong Lakonius, pikinini boe blong Lakonius, from Lakonius i tekem jea blong papa blong hem mo hem i rulum ol pipol long yia ia.

20 Mo i bin stat blong gat ol man we ^aGod i toktok long olgeta aot long heven mo i sendem olgeta, oli stanap long medel blong ol pipol long ful graon, blong prij mo testifae long klia fasin long saed blong ol sin mo ol rabis fasin blong ol pipol, mo testifae long olgeta long saed blong fasin blong pemaot man we Lod bae i mekem blong ol pipol blong hem, o long ol narafala toktok, laef bakegen long ded blong Kraes; mo oli bin testifae long klia fasin long saed blong ^bded mo ol safaring blong hem.

21 Nao i bin gat plante long ol pipol we oli bin kros tumas from olgeta we oli testifae long saed blong ol samting ia; mo olgeta we oli kros, plante long olgeta oli ol jif jaj, mo olgeta we oli ^abin stap olsem ol hae pris mo ol loya; yes, olgeta evriwan we oli bin loya oli kros long olgeta we oli testifae long saed blong ol samting ia.

22 Nao i no bin gat wan loya o jaj o hae pris we i save gat paoa blong panisim eniwan blong ded, be nomo sapos jajmen ia, gavna blong graon i saenem.

23 Nao i gat plante long olgeta we oli testifae long ol samting long saed blong Kraes, we oli testifae long klia fasin, we ol jaj oli tekem olgeta mo oli kilimded olgeta long sikret, blong mekem se nius blong ded blong olgeta i no kasem gavna blong graon, be kasem afta long ded blong olgeta nomo.

24 Nao luk, samting ia i bin agensem ol loa blong graon, se eni man, ol jaj oli no save kilimded sapos oli no kasem paoa long gavna blong graon—

25 From hemia, wan komplen i bin go antap long graon blong Sarahemla, long gavna blong graon, agensem ol jaj ia we oli bin panisim ol profet blong Lod blong oli ded, se hemia i no bin folem loa.

26 Nao i bin hapen se oli tekem olgeta mo putum olgeta long fored blong jaj, blong kasem jajmen folem ol fasin blong brekem loa we oli bin mekem, folem ^aloa we ol pipol oli bin putum.

27 Nao i bin hapen se ol jaj ia, oli gat plante fren mo famli; mo olgeta we oli stap, yes, we i kolosap evri loya mo ol hae pris, oli kam tugeta, mo joen tugeta wetem ol famli blong ol jaj ia we bae oli jajem olgeta folem loa.

28 Mo oli mekem wan ^akavenan wan wetem narawan, yes, we long kavenan ia we oli bin kasem long olgeta blong bifo, we kavenan ia, ^bdevel i bin givim mo yusum, blong joen tugeta agensem evri stret mo gud fasin.

29 From hemia, oli bin joen tugeta agensem ol pipol blong Lod, mo mekem wan kavenan blong prapa spolem gud olgeta, mo blong mekem olgeta we oli rong long fasin blong kilim man i ded, oli go fri blong jastis i no holemtaet olgeta, we jastis ia i rere blong foldaon long olgeta folem loa.

30 Mo oli no wantem folem loa mo ol raet blong kantri blong olgeta; mo oli mekem kavenan wan wetem narawan blong kilimded gavna, mo blong stanemap wan ^aking ova long graon, blong mekem se graon bae i nomo stap long fridom, be i mas stap andanit long kontrol blong ol king.