1 Mo i bin hapen se hem i givim oda long grup blong pipol ia se oli mas stop blong prea, mo tu, ol disaepol blong hem. Mo hem i givim oda long olgeta se oli no mas stop blong ^aprea insaed long hat blong olgeta.

2 Mo hem i bin givim oda long olgeta se oli mas girap mo stanap long ol leg blong olgeta. Mo oli girap mo oli stanap long ol leg blong olgeta.

3 Mo i bin hapen se hem i brekem bred bakegen mo blesem, mo i givim long ol disaepol blong kakae.

4 Mo afta we oli kakae, hem i givim oda long olgeta se oli mas brekem bred, mo givim long grup blong pipol ia.

5 Mo afta we oli givim long grup blong pipol ia, hem i givim waen tu long olgeta blong dring, mo i givim oda long olgeta se oli mas givim long grup blong pipol ia.

6 Nao, i no bin gat eni ^abred, o waen, we ol disaepol oli bin karem i kam, o grup blong pipol ia i karem i kam;

7 Be i tru we hem i ^agivim long olgeta bred blong kakae, mo tu, waen blong dring.

8 Mo hem i talem long olgeta: “Hem we i ^akakae bred ia, i kakae long bodi blong mi from sol blong hem; mo hem we i dring long waen ia, i dring long blad blong mi from sol blong hem; mo sol blong hem bae i neva hanggri o tosta, be bae i kam fulap.”

9 Nao, afta we evriwan long grup blong pipol ia i kakae mo i dring, luk, oli kam fulap wetem Tabu Spirit; mo oli singaot wetem wan voes, mo oli givim glori long Jisas, we oli bin luk mo oli bin harem.

10 Mo i bin hapen se taem we olgeta evriwan i givim glori long Jisas, hem i talem long olgeta: “Luk naoia mi finisim komanmen we Papa i bin givim long mi long saed blong ol pipol ia, we oli wan smol haf blong laen blong Isrel.

11 Yufala i tingbaot se mi bin toktok long yufala, mo mi bin talem se taem we ol ^atoktok blong ^bAesea bae i hapen—luk oli bin raetem olgeta, yufala i holem olgeta long fored blong yufala, taswe, stadi long olgeta—

12 Mo i tru, i tru, mi talem long yufala, taem we bae oli hapen, hemia i ^akavenan ia we Papa i bin mekem wetem ol pipol blong hem i stap hapen, O laen blong Isrel.

13 Mo afta, bae ol ^asmol haf, we bae oli go ^bseraot olbaot long fes blong wol, bae oli ^dkarem olgeta i kam tugeta aot long Is mo long Wes, mo aot long Saot mo aot long Not; mo bae oli kam blong kasem ^esave long saed blong Lod, God blong olgeta, we i bin pemaot olgeta.

14 Mo Papa i bin givim oda long mi se, mi mas givim long yufala ^agraon ia, olsem graon we i kam long ol papa.

15 Mo mi talem long yufala, se sapos Ol Jentael oli no ^asakem sin afta long blesing we bae oli kasem, afta we oli bin seraotem ol pipol blong mi—

16 Long taem ia bae yufala, we i wan smol haf blong laen blong Jekob we i stap yet, i go long medel blong olgeta; mo bae yufala i stap long medel blong olgeta we bae oli plante; mo bae yufala i stap long medel blong olgeta olsem wan laeon long medel blong ol animol blong bus; mo olsem wan yang ^alaeon long medel blong ol grup blong ol sipsip, we, sapos hem i go tru, bae i ^bpurumbut antap mo terem olgeta long ol pisis, mo i no gat wan we i save mekem olgeta oli go fri.

17 Bae yufala i leftemap han blong yufala agensem ol enemi blong yu, mo evri enemi blong yufala, bae yufala i katemaot.

18 Mo bae mi karem ol pipol blong mi oli ^akam tugeta, olsem wan man i karem ol bandel wit blong hem i go insaed long haos.

19 From bae mi mekem ol pipol blong mi wetem olgeta we Papa i bin mekem kavenan wetem olgeta, yes, bae mi mekem ^ahon blong yu i kam aean, mo bae mi mekem ol leg blong yufala i kam bras. Mo bae yufala i brekem long pisis, plante pipol; mo bae mi konsekretem mane blong olgeta i go long Lod, mo ol samting blong olgeta long Lod blong ful wol. Mo luk, mi mi hem we i mekem samting ia.

20 Mo bae i kam blong hapen, Papa i talem, se ^anaef blong faet blong jastis blong mi bae i hang ova long olgeta long dei ia; mo sapos oli no sakem sin, bae naef i foldaon long olgeta, Papa i talem, yes, semmak long evri kantri blong Ol Jentael.

21 Mo bae i kam blong hapen se bae mi stanemap ol ^apipol blong mi, O laen blong Isrel.

22 Mo luk, ol pipol ia bae mi stanemap long graon ia, go kasem taem we ^akavenan ia i hapen we mi bin mekem wetem papa blong yufala Jekob; mo bae i stap olsem wan ^bNiu Jerusalem. Mo ol paoa blong heven bae i stap long medel blong ol pipol ia; yes, mo tu, bae ^dmi stap long medel blong yufala.

23 Luk, mi mi hem we Moses i bin tokbaot, se: ‘^aWan profet bae Lod, God blong yufala i resemap long yufala aot long ol brata blong yufala, we i olsem mi; hem, bae yufala i lisin long hem long saed blong evri samting, mo eni samting we bae hem i talem long yufala. Mo bae i kam blong hapen se evri sol we bae i no lisin long profet ia, bae oli katemaot hem, i aot long medel blong ol pipol.’

24 I tru mi talem long yufala, yes, mo ^aevri profet stat long Samuel mo olgeta we bae oli kam afta, olgeta plante we oli bin toktok, oli bin testifae long saed blong mi.

25 Mo luk, yufala i ol pikinini blong ol profet; mo yufala i blong laen blong Isrel; mo yufala i blong ^akavenan we Papa i bin mekem wetem ol papa blong yufala, we hem i talem long Ebraham: ‘^bTru long laen blong yu bae evri famli blong wol i kasem blesing.’

26 Papa i bin resemap mi fastaem blong yufala, mo i bin sendem mi blong blesem yufala blong mi ^atanem evriwan long yufala i go longwe long ol rabis fasin blong yufala wanwan; mo hemia, from yufala i ol pikinini blong kavenan—

27 Mo afta we yufala i kasem blesing, ale Papa i mekem i hapen, kavenan we hem i bin mekem wetem Ebraham, we hem i talem: ‘^aTru long laen blong yu bae evri famli blong wol i kasem blesing’—i mekem se hem i kapsaetem Tabu Spirit tru long mi i go long Ol Jentael, we blesing ia long Ol ^bJentael bae i mekem olgeta oli moa strong bitim evriwan, mekem se bae oli seraotem ol pipol blong mi olbaot, O laen blong Isrel.

28 Mo bae oli stap olsem wan ^awip long ol pipol blong graon ia. Be, taem we bae oli kasem gospel blong mi we i fulwan, afta sapos bae oli mekem hat long olgeta i kam strong agensem mi, bae mi putumbak ol rabis fasin blong olgeta i go antap long hed blong olgeta bakegen, Papa i talem.

29 Mo bae mi ^atingbaot kavenan we mi bin mekem wetem ol pipol blong mi; mo mi bin kavenan wetem olgeta se bae mi karem olgeta oli ^bkam tugeta long taem we mi jusum, blong bae mi givim long olgeta bakegen ^dgraon blong ol papa blong olgeta olsem graon blong olgeta, we i graon blong ^eJerusalem, we i graon we oli promes long olgeta long hem blong oltaem, Papa i talem.

30 Mo bae i kam blong hapen se taem i stap kam, we gospel blong mi we i fulwan, bae oli prijim long olgeta;

31 Mo bae oli ^abiliv long mi, se mi mi Jisas Kraes, Pikinini blong God, mo bae oli prea long Papa long nem blong mi.

32 Afta bae ol ^agadman blong olgeta oli leftemap ol voes blong olgeta, mo wetem voes tugeta bae oli singsing; from bae oli luk wetem ae blong olgeta.

33 Afta bae Papa i karem olgeta oli kam tugeta bakegen, mo i givim long olgeta, Jerusalem blong kam olsem graon ia we i kam long ol papa.

34 Afta, bae oli singaot strong wetem glad—^aSingsing tugeta, yufala ol emti ples blong Jerusalem; from we Papa i bin leftemap tingting blong ol pipol blong hem, hem i bin pemaot Jerusalem.

35 Papa i bin soemaot tabu han blong hem long ol ae blong evri kantri; mo evri en blong wol bae i luk fasin blong sevem man blong Papa; mo Papa mo mi, mitufala i wan nomo.

36 Mo afta, bae i kam blong hapen ol toktok we profet Aesea i bin raetem: ‘^aWekap, wekap bakegen, mo putum paoa blong yu, O Saeon; putum ol naes klos blong yu, O Jerusalem, tabu bigtaon, from stat long taem ia bae i no gat wan we i kam long yu, olgeta we oli no sakomsaes mo oli no klin.

37 Seksekemaot das long yuwan; girap, sidaon, O Jerusalem; tektekemaot yuwan long ol rop we oli fasem nek blong yu, O gel prisena blong Saeon.’

38 From olsem ia nao Lod i talem: ‘Yufala i bin salem yufala bakegen blong nating, mo bae mi pemaot yufala be i no wetem mane.’

39 I tru, i tru, mi talem long yufala, se ol pipol blong mi bae oli save nem blong mi; yes, long dei ia, bae oli save se mi mi hem we i stap toktok.

40 Mo long taem ia bae oli talem se: ‘O i naes ^atumas long ol bigfala hil, ol leg ia blong hem we i karem ol gud nius oli kam long olgeta, we i ^btalemaot pis; ol leg ia we oli tekem gud nius i go long olgeta we oli stret o gud, we oli talemaot fasin blong sevem man; olgeta ia we oli stap talem long Saeon; !God blong yu i rul!’

41 Mo long taem ia bae wan krae i go aot: ‘Yufala i ^ago, yufala i go, yufala i go, i aot long ples ia, no tajem wanem we i ^bno klin; yufala i kamaot long medel blong hem; yufala i mas stap ^dklin, yufala we i stap tekem ol samting blong Lod.

42 From bae yufala i ^ano go aot kwiktaem o ronwe long trabol; from Lod bae i go long fored blong yufala, mo God blong Isrel bae i stap biaen long yufala.

43 Luk, wokman blong mi bae i wok wetem waes; bae ol pipol oli leftemap, mo onarem hem mo bae hem i hae tumas.

44 Olsem olgeta we oli bin sapraes long yu—fes blong hem i bin nogud tumas, i moa bitim eni man, mo bodi blong hem i moa bitim ol boe blong ol man—

45 Olsem ia bae hem i ^adropem olbaot plante kantri; ol king bae oli sarem maot blong olgeta long hem, from ol samting we man i no bin talem long olgeta bae oli luk; mo ol samting we oli no bin harem, bae oli tingting long olgeta.’

46 I tru, i tru, mi talem long yufala, evri samting ia bae oli mas kam olsem we Papa i bin givim oda long mi. Afta bae kavenan ia we Papa i bin kavenan wetem ol pipol blong hem, i hapen; mo afta, bae ol pipol blong mi oli stap bakegen long ^aJerusalem, mo bae hem i graon blong olgeta we i kam long ol papa blong olgeta.”