1 Mo i bin hapen se taem we Jisas i talem ol toktok ia, hem i toktok long ol disaepol blong hem, wan afta long narawan, i talem long olgeta: “?Yufala i wantem se mi givim wanem long yufala, afta we mi mi go long Papa?”

2 Mo olgeta evriwan oli bin toktok, be trifala nomo oli no bin toktok, oli talem: “Mifala i wantem se afta we mifala i laef kasem yia blong man i finis, se seves blong mifala, we yu bin singaotem mifala long hem, i save gat wan en, blong mifala i save kam long yu kwiktaem insaed long kingdom blong yu.”

3 Mo hem i bin talem long olgeta: “Yufala i kasem blesing from we yufala i bin wantem samting ia long mi; from hemia, afta we yufala i kasem seventi mo tu yia, bae yufala i kam long mi long kingdom blong mi; mo wetem mi, bae yufala i faenem ^apis.”

4 Mo afta we hem i toktok long olgeta, hem i tanem hem i go long olgeta trifala ia, mo i talem long olgeta: “?Yufala i wantem se bae mi mekem wanem long yufala afta we mi mi go long Papa?”

5 Mo oli bin harem nogud long hat blong olgeta, from oli fraet blong talem long hem samting we oli wantem.

6 Mo hem i talem long olgeta: “Luk, mi ^asave ol tingting blong yufala, mo yufala i wantem samting ia we ^bJon, we mi lavem tumas, we hem i bin stap wetem mi long seves blong mi, bifo we Ol Jiu oli leftemap mi, i wantem long mi.

7 From hemia, yufala i kasem moa blesing, from bae yufala i ^aneva testem ^bded; be bae yufala i stap laef blong luk evri wok blong Papa long ol pikinini blong ol man, go kasem taem we evri samting bae i hapen folem tingting blong Papa, i go kasem taem we bae mi kam long glori blong mi wetem ol ^dpaoa blong heven.

8 Mo bae yufala i neva gotru long ol soa blong ded; be taem we bae mi kam long glori blong mi, bae yufala i jenis i kam niu i kwik olsem taem man i sarem wan ae, yufala i aot long ^afasin blong save ded i go long ^bfasin blong nomo save ded; mo afta, bae yufala i kasem blesing insaed long kingdom blong Papa blong mi.

9 Mo bakegen, bae yufala i no gat eni soa blong bodi taem we yufala i stap long bodi blong mit mo bun, o harem nogud, be from ol sin blong ol man long wol nomo; mo evri samting ia bae mi mekem from samting ia we yufala i wantem long mi, from yufala i wantem se bae yufala i save ^akarem sol blong ol man oli kam long mi, long taem we wol i stanap yet.

10 Mo from stamba tingting ia, bae yufala i kasem glad we i ^afulwan; mo bae yufala i sidaon long kingdom blong Papa blong mi; yes, glad blong yufala bae i kam fulap gud, i semmak olsem we Papa i bin givim long mi glad we i fulap gud; mo bae yufala i kam olsem mi mi stap, mo mi mi semmak olsem Papa; mo Papa mo mi, mitufala i ^bwan;

11 Mo ^aTabu Spirit i stap witnes long saed blong Papa mo mi; mo Papa i givim Tabu Spirit long ol pikinini blong ol man, from mi.”

12 Mo i bin hapen se afta we Jisas i talem ol toktok ia, hem i tajem evriwan long olgeta wetem fingga blong hem, be i no ol trifala we bae oli stap laef, mo afta hem i aot.

13 Mo luk, ol heven oli open, mo oli ^ago antap long heven, mo oli luk mo oli harem ol samting we oli no save talemaot.

14 Mo oli ^ablokem olgeta blong talemaot ol samting ia; mo tu, oli no givim long olgeta paoa blong oli save talemaot ol samting we oli bin luk mo oli bin harem;

15 Mo sapos oli bin stap long bodi o aot long bodi, oli no bin save luksave; from i luk olsem long olgeta olsem se, oli ^ajenis oli kam niu, se oli jenis aot long bodi ia blong mit mo bun i go long wan bodi we i nomo save ded, blong oli save luk ol samting blong God.

16 Be i bin hapen se, bakegen, oli bin tij long fes blong graon; be oli no tijim ol samting we oli bin harem mo luk, from komanmen we oli bin givim olgeta long heven.

17 Mo nao, sapos oli save ded o oli nomo save ded, stat long dei ia we oli bin jenis oli kam niu, mi mi no save;

18 Be hemia mi save, folem histri we oli bin givim—oli bin go long fes blong graon, mo givhan long evri pipol, mo hamas we oli biliv long prijing blong olgeta, oli joenem olgeta oli kam long jos; oli baptaesem olgeta, mo olgeta we oli kasem baptaes, oli kasem Tabu Spirit.

19 Mo olgeta we oli no blong jos, oli sakem olgeta ia long kalabus. Mo ol ^akalabus oli no bin save holemtaet olgeta, from oli brokbrok long tu.

20 Mo oli bin sakem olgeta daon insaed long graon; be oli kilim graon wetem toktok blong God, inaf blong mekem se tru long ^apaoa blong hem, oli kamaot oli fri long ol dip ples blong graon; mo from hemia, oli no save digim ol hol we oli naf blong holemtaet olgeta.

21 Mo tri taem oli bin sakem olgeta insaed long ^aoven blong faea mo oli no kasem wan kil.

22 Mo tu, taem oli bin sakem olgeta insaed long wan ^ahol blong ol wael animol; mo luk oli pleiplei wetem ol animol ia olsem wan pikinini wetem wan smol sipsip we hem i stap titi yet, mo oli no kasem kil.

23 Mo i bin hapen se olsem ia nao oli go aot long medel blong evri pipol blong Nifae, mo oli prijim ^agospel blong Kraes long evri pipol long fes blong graon; mo oli jenisim laef i go long Lod, mo oli bin kam tugeta long jos ia blong Kraes, mo olsem ia nao ol pipol blong ^bjeneresen ia oli kasem blesing, folem toktok blong Jisas.

24 Mo nao mi, Momon, mi mekem wan en blong toktok long saed blong ol samting ia blong wan smol taem.

25 Luk, mi mi bin rere blong raetem ol ^anem blong olgeta we bae oli neva testem ded, be Lod i blokem; from hemia, mi mi no raetem olgeta, from oli haedem olgeta aot long wol.

26 Be luk, mi bin luk olgeta, mo oli bin givim seves long mi.

27 Mo luk bae oli stap long medel blong Ol Jentael, mo Ol Jentael bae oli no save olgeta.

28 Bae oli stap tu long medel blong Ol Jiu, mo Ol Jiu bae oli no save olgeta.

29 Mo bae i kam blong hapen, taem we Lod i luk se i gud long waes tingting blong hem, se bae oli givhan long evri laen blong Isrel we oli bin ^aseraot olbaot, mo long evri kantri, famli, lanwis mo pipol, mo bae oli karem i kam, aot long olgeta, i go long Jisas, plante sol, blong mekem se samting we oli wantem i save hapen, mo tu, from paoa blong God blong winim tingting, we i stap long olgeta.

30 Mo oli olsem ol ^aenjel blong God, mo sapos bae oli prea long Papa long nem blong Jisas, oli save soemaot olgeta long eni man we oli luk se i gud.

31 From hemia, ol bigfala mo gudfala wok bae oli hapen tru long olgeta, bifo long ^abigfala dei we i stap kam, taem we evri pipol, i tru, we oli mas stanap long fored blong jea blong jajmen blong Kraes;

32 Yes iven long medel blong Ol Jentael bae i gat wan ^abigfala mo gudfala wok i hapen tru long olgeta, bifo long dei blong jajmen.

33 Mo sapos yufala i gat evri skripja we i givim wan histri blong evri gudfala wok blong Kraes, bae yufala, folem ol toktok blong Kraes, i save se i tru, se ol samting ia oli mas hapen.

34 Mo sore tumas long hem we bae i ^ano mekem folem ol toktok blong Jisas, mo tu, long ^bolgeta we hem i bin jusum mo i sendem i go long medel blong olgeta; from huia we i no kasem ol toktok blong Jisas mo ol toktok blong olgeta we hem i bin sendem, i no kasem hem; mo from hemia, bae hem i no kasem olgeta long las dei.

35 Mo bae i moa gud long olgeta sapos oli no bin bon. From ?yufala i ting se yufala i save ronwe long jastis blong wan God we i kros, we ol pipol oli bin ^apurumbut long hem andanit long ol leg blong olgeta, blong mekem se tru long samting ia fasin blong sevem man i save kam?

36 Mo nao luk, olsem we mi bin toktok long saed blong olgeta we Lod i bin jusum, yes, mo tu, trifala ia we oli bin go antap long ol heven, we mi no save sapos oli kam klin aot fasin blong ded i go long fasin blong no save ded—

37 Be luk, afta we mi raetem, mi bin askem long Lod, mo hem i soemaot long mi we i mas gat nid ia blong gat wan jenis i hapen long bodi blong olgeta, o sapos no, i mas gat nid ia blong oli mas testem ded;

38 From hemia, blong mekem se maet oli no testem ded, i gat wan ^ajenis we i bin hapen long bodi blong olgeta, blong oli no save harem i soa long bodi o harem nogud, be nomo from ol sin blong wol.

39 Nao jenis ia i no bigwan semmak long hemia we bae i hapen long las dei; be i bin gat wan jenis we i hapen long olgeta, inaf blong mekem se Setan i no save gat paoa ova long olgeta, blong hem i no save ^atemtem olgeta; mo oli ^bkam tabu long bodi blong mit mo bun, mekem se oli ^dholi, mo mekem se ol paoa blong wol oli no save holemtaet olgeta.

40 Mo olsem ia nao oli stap, kasem jajmen dei blong Kraes; mo long dei ia, oli mas kasem wan jenis we i moa bigwan, mo blong oli kasem olgeta insaed long kingdom blong Papa blong oli nomo go aot, be blong oli stap wetem God blong taem we i no save finis long ol heven.