1 Mo i tru mi talem long yufala, mi givim long yufala wan saen, blong mekem se yufala i save gat save ia abaot ^ataem ia we ol samting ia bae oli rere blong hapen—se bae mi karem i kam tugeta aot long taem we oli bin seraot olbaot, ol pipol blong mi, O laen blong Isrel, mo bae mi stanemap bakegen long medel blong olgeta Saeon ia blong mi;

2 Mo luk, samting ia i wanem we bae mi givim long yufala olsem wan saen—from i tru mi talem long yufala se taem we ol samting ia we mi stap talem long yufala, mo we bae miwan mi talem long yufala, mo tru long paoa blong Tabu Spirit we bae Papa i givim long yufala, bae Ol Jentael oli save long hem, blong mekem se oli save gat save ia long saed blong ol pipol ia we oli wan smol haf we i stap yet blong laen blong Jekob, mo long saed blong olgeta ia, ol pipol ia blong mi, we bae Ol Jentael oli seraotem olgeta oli go olbaot;

3 I tru, i tru, mi talem long yufala, taem we Papa bae i soemaot long olgeta, ol ^asamting ia, mo bae i kamaot tru long Papa, aot long olgeta i go long yufala;

4 From hem i waes tingting long Papa se oli mas stanap long graon ia, mo oli stanap olsem wan ^afri pipol tru long paoa blong Papa, blong mekem se ol samting ia oli save kamaot long olgeta i go long wan smol haf blong laen blong yufala, blong mekem se ^bkavenan blong Papa i save hapen we hem i bin kavenan wetem ol pipol blong hem, O laen blong Isrel;

5 From hemia, taem we ol wok ia mo ol wok we bae oli hapen long medel blong yufala afta long taem ia bae oli kamaot ^atru long Ol Jentael, i go long ol ^blaen blong yufala we bae i slak from oli bin lusum bilif from nogud fasin;

6 From olsem ia nao i gat nid long Papa se samting ia i mas kamaot long Ol ^aJentael, blong hem i save soemaot paoa blong hem long Ol Jentael, from stamba tingting ia se Ol Jentael, sapos oli no mekem hat blong olgeta i kam strong, bae oli save sakem sin mo kam long mi, mo kasem baptaes long nem blong mi, mo save long ol tru poen blong doktrin blong mi, blong oli save ^bkaontem olgeta wetem ol pipol blong mi, O laen blong Isrel;

7 Mo taem we ol samting ia oli kam blong hapen we ^alaen blong yufala bae i stat blong save ol samting ia—bae i wan saen long olgeta, blong oli save gat save se wok blong Papa i bin stat finis blong mekem i hapen kavenan ia we hem i bin mekem wetem ol pipol we oli blong laen blong Isrel.

8 Mo taem we dei ia bae i kam, bae i hapen se ol king bae oli sarem maot blong olgeta; from ol samting ia we oli no bin talemaot long olgeta, bae oli luk; mo ol samting we oli no bin harem, bae oli haremsave.

9 From long dei ia, from mi, bae Papa i wokem wan wok, we bae i wan bigfala mo wan ^agudfala wok long medel blong olgeta; mo bae i gat long medel blong olgeta, olgeta we bae oli no bilivim samting ia, i nomata we wan man i talemaot samting ia long olgeta.

10 Be luk, laef blong wokman blong mi bae i stap long han blong mi; from hemia, bae oli no spolem hem, i nomata we bae hem i ^aluk nogud from olgeta. Be stil, bae mi mekem hem i kam oraet, from bae mi soem long olgeta se waes tingting ^bblong mi i moa strong bitim ol trik blong devel.

11 From hemia, bae i kam blong hapen se eni man we bae i no biliv long ol toktok blong mi, we mi Jisas Kraes, we Papa bae i mekem se ^awokman blong hem i karem i go long Ol Jentael, mo bae i givim long hem paoa ia blong bae hem i tekem ol toktok ia i go aot long Ol Jentael, (bae i hapen olsem we Moses i bin talem) bae mi ^bkatem olgeta aot long medel blong ol pipol blong mi we oli blong kavenan.

12 Mo ol pipol blong mi we oli wan smol haf blong Jekob bae oli stap long medel blong Ol Jentael, yes, long medel blong olgeta olsem wan ^alaeon long medel blong ol animol blong bus, olsem wan yang laeon long medel blong ol grup blong sipsip, we, sapos hem i go tru, bae i ^bpurumbut antap long olgeta mo i terem olgeta long pisis, mo i no gat wan man i save mekem olgeta i go fri.

13 Bae oli leftemap han blong olgeta agensem ol enemi blong olgeta, mo evri enemi blong olgeta bae hem i katemaot.

14 Yes, sore tumas long Ol Jentael sapos oli no ^asakem sin; from bae i kam blong hapen long dei ia, Papa i talem, se bae mi katemaot ol hos blong yu aot long medel blong yu, mo bae mi smasem gud ol wilkat blong yu;

15 Mo bae mi katemaot ol bigtaon blong graon blong yu, mo brekemdaon evri strong ples blong haed blong yu;

16 Mo bae mi katemaot ol fasin blong mekem nakaemas aot long graon blong yu, mo bae yu nomo gat ol kleva long fiuja;

17 Ol ^aaedol blong yu bae mi katemaot tu, wetem ol longfala aedol blong yu we oli stanap long medel blong yu, mo bae yu nomo wosipim ol wok blong ol han blong yu;

18 Mo bae mi rutumaot ol ples blong tabu faea blong yu blong oli nomo gat long medel blong yu; mo tu, bae mi smasem gud ol bigtaon blong yu.

19 Mo bae i kam blong hapen se evri ^agiaman, mo ol trik, mo ol tingting blong wantem samting blong narafala man, mo ol rao, mo ol fasin blong giaman pris, mo ol fasin blong stap slip olbaot, bae oli stop.

20 From bae i kam blong hapen, Papa i talem, se long dei ia, huia we i no sakem sin mo kam long Pikinini blong mi we mi Lavem Tumas, olgeta ia, bae mi katemaot olgeta oli aot long ol pipol blong mi, O laen blong Isrel;

21 Mo bae mi mekem wan fasin blong pembak mo bigfala kros i go long olgeta, semmak olsem long man we i no gat respek long God, be hemia i olsem wan we oli no bin harem bifo.

22 Be sapos bae oli sakem sin mo mekem folem ol toktok blong mi, mo oli no mekem hat blong olgeta i kam strong, bae mi ^astanemap jos blong mi long medel blong olgeta, mo bae oli mekem kavenan mo bae oli ^bkaontem olgeta wetem olgeta ia we oli smol haf blong Jekob, we mi bin givim graon ia long olgeta olsem graon blong olgeta we i kam long ol papa;

23 Mo bae oli helpem ol pipol blong mi, smol haf ia blong Jekob, mo tu, olgeta evriwan blong laen blong Isrel we bae oli kam, blong oli save bildimap wan bigtaon, we bae oli singaotem, ^aNiu Jerusalem.

24 Mo afta bae oli helpem ol pipol blong mi blong oli save karem i kam tugeta, olgeta we oli bin seraot olbaot long ful fes blong graon, oli kam insaed long Niu Jerusalem.

25 Mo long taem ia, bae ^apaoa blong heven i kamdaon long olgeta; mo ^bmi tu bae mi stap long medel blong olgeta.

26 Mo afta bae wok blong Papa i stat long dei ia, stret long taem ia we bae oli prijim gospel ia long smol haf blong pipol ia. I tru mi talem long yufala, long dei ia bae wok blong Papa i ^astat long medel blong evri pipol blong mi we i bin seraot olbaot, yes, hem i ol laen we oli bin ^blus, we Papa i bin lidim oli gowe aot long Jerusalem.

27 Yes, wok ia bae i stat long medel blong evri pipol blong mi we i bin ^aseraot olbaot, wetem Papa blong mekem rere rod we, tru long hem oli save kam long mi, blong oli save prea long Papa tru long nem blong mi.

28 Yes, mo long taem ia bae wok ia i stat wetem Papa long medel blong evri kantri blong mekem rere rod we, tru long hem, ol pipol blong hem oli save ^akam tugeta long haos, long graon blong olgeta we i kam long ol papa.

29 Mo bae oli go aot long evri kantri; mo bae oli no go aot we oli ^ahariap, o ronwe long trabol, from bae mi go long fored blong olgeta, Papa i talem, mo bae mi stap biaen long olgeta.