1 Mo i bin hapen se long las pat blong namba-eitin yia ol ami ia blong ol stilman oli mekem rere blong faet, mo oli stat blong kam daon mo kwiktaem aot long ol hil, mo aot long ol bigfala hil, mo waelples, mo ol ples blong ol strong sapot blong olgeta, mo ol sikret ples blong olgeta, mo oli stat blong tekem ol graon, we oli stap long graon blong Saot tugeta wetem olgeta we oli stap long graon blong Not, mo oli stat blong tekem mo holem evri graon we Ol Man blong Nifae oli bin lego, mo ol bigtaon we oli bin livim i emti.

2 Be luk, i no gat ol wael animol o ol animol blong kakae long ol graon ia we Ol Man blong Nifae oli bin lego, mo i no bin gat ol animol blong kakae blong ol stilman, be i gat long waelples nomo.

3 Mo ol stilman oli no save stap laef, be long waelples nomo, from nid blong kaekae; from Ol Man blong Nifae oli livim ol graon blong olgeta i emti, mo oli tekem tugeta ol grup blong animol blong olgeta mo ol buluk blong olgeta, mo evri samting blong olgeta, mo oli stap long wan grup.

4 From hemia, i no bin gat eni janis blong ol stilman oli stil long taem blong faet o blong oli kasem kaekae, be oli mas kamaot nomo long open ples blong faet agensem Ol Man blong Nifae; mo from Ol Man blong Nifae oli stap long wan grup, mo oli gat wan bigfala namba tumas, mo oli holemtaet blong olgetawan, ol kaekae mo nara samting, mo ol hos mo ol buluk, mo ol grup blong animol blong evri kaen, blong oli save laef blong wan taem blong seven yia, long taem ia oli bin hop blong prapa kilimded ol stilman ia, oli aot long fes blong graon; mo olsem ia nao namba-eitin yia i pas i go.

5 Mo i bin hapen se long nambanaentin yia, Gidianhae, i faenem se i gat nid se hem i mas go antap blong faet agensem Ol Man blong Nifae, from i no gat eni wei we oli save laef sapos oli no tekem ol samting wetem fos, oli stil mo oli kilim man i ded.

6 Mo oli bin fraet blong seraotem olgeta long fes blong graon inaf blong mekem se oli save planem ol sid, from oli fraet se Ol Man blong Nifae bae oli kam long olgeta mo kilimded olgeta; from hemia, Gidianhae i bin givim oda long ol ami blong hem se, long yia ia, oli mas go antap blong faet agensem Ol Man blong Nifae.

7 Mo i bin hapen se oli kam antap blong faet; mo hemia i long nambasikis manis; mo luk, i bin wan bigfala mo strong dei we oli kam antap blong faet; mo oli putum klos folem fasin blong ol man blong stil; mo oli gat wan skin blong yang sipsip we i stap raon long Wes blong olgeta, mo oli pentem olgeta wetem blad, mo oli sevem ol hed blong olgeta, mo oli putum ol hat blong faet long olgeta; i soemaot we ol ami blong Gidianhae oli bigfala mo oli strong, from ol klos blong faet blong olgeta, mo from we oli pentem olgeta wetem blad.

8 Mo i bin hapen se ol ami blong Ol Man blong Nifae, taem we oli luk dresap blong ami blong Gidianhae, olgeta evriwan oli foldaon long graon mo oli sendem ol prea blong olgeta long Lod, God blong olgeta, blong hem i letem olgeta oli stap laef mo tekem olgeta aot long ol han blong ol enemi blong olgeta.

9 Mo i bin hapen se taem we ol ami blong Gidianhae oli luk samting ia, oli stat blong singaot wetem wan strong voes, from glad blong olgeta, from oli ting se Ol Man blong Nifae oli foldaon wetem fraet from bigfala nogud fraet we ami blong olgeta i stap soem.

10 Be long samting ia oli bin harem nogud, from Ol Man blong Nifae oli no fraet long olgeta; be oli respektem God blong olgeta mo oli askem strong hem blong protektem olgeta; from hemia, taem we ol ami blong Gidianhae oli ron from olgeta, nao oli rere blong mitim olgeta; yes, wetem paoa blong Lod oli faet agensem olgeta.

11 Mo faet i stat long hemia nambasikis manis; mo faet ia i bigwan mo nogud, yes, fasin blong kilim man i ded i bigwan mo nogud, inaf blong mekem se, i neva gat wan fasin blong kilim man i ded olsem we man i save long hem long medel blong evri pipol blong Lihae stat long taem we hem i bin aot long Jerusalem.

12 Mo i nomata long ol woning mo ol strong promes we Gidianhae i bin mekem, luk, Ol Man blong Nifae oli winim olgeta, inaf blong mekem se oli ronwe long fored blong olgeta.

13 Mo i bin hapen se Gidgidonae i givim oda se ol ami blong hem se oli mas folem olgeta kasem ol boda blong waelples, mo se oli no mas letem eniwan we i foldaon long han blong olgeta long rod, i laef i stap; mo olsem ia nao oli ronem olgeta mo oli kilimded olgeta, kasem ol boda blong waelples, mo tu, go kasem taem we oli mekem oda blong Gidgidonae i hapen.

14 Mo i bin hapen se Gidianhae, we i stanap mo i faet we i no fraet, oli ronem hem long taem we hem i stap ronwe; mo from hem i taed from we hem i faet tumas, oli kasem hem mo kilim hem i ded. Mo olsem ia nao, i en blong Gidianhae, we i stilman.

15 Mo i bin hapen se ol ami blong Ol Man blong Nifae oli gobak bakegen long sefples blong olgeta. Mo i bin hapen se naentin yia ia i pas i go, mo ol stilman oli no kam bakegen blong faet; mo tu, oli no kam bakegen long nambatwante yia.

16 Mo long nambatwante mo wan yia oli no kam antap blong faet, be oli kam antap long evri saed blong hivimap graon raonabaot long ol pipol blong Nifae; from oli ting se sapos oli blokem ol pipol blong Nifae long ol graon blong olgeta, mo mas holem gud olgeta insaed, long evri saed, mo sapos oli blokem olgeta long rod blong olgeta i go aotsaed, bae oli mekem se ol pipol blong Nifae oli save sarenda olsem we oli wantem.

17 Nao oli bin jusum wan narafala lida blong olgeta we nem blong hem i Semnaraeha; from hemia, hem i Semnaraeha ia nao we i mekem se wok ia blong raonem ples i mas hapen.

18 Be luk, samting ia i wan gudfala janis long Ol Man blong Nifae; from hem i no posibol blong ol stilman blong raonem olgeta longtaem inaf blong mekem eni samting long Ol Man blong Nifae, from plante samting blong olgeta we oli bin hivimap mo storem i stap.

19 Mo from ol samting i sot long medel blong ol stilman; from luk, oli no gat eni samting be mit nomo blong stap laef long hem, we mit ia oli kasem long waelples;

20 Mo i bin hapen se ol wael animol blong kakae i kam sot long waelples, inaf blong mekem se ol stilman oli rere blong ded from hanggri.

21 Mo Ol Man blong Nifae oli gohed blong maj i go long dei mo long naet, mo oli atakem ol ami blong ol stilman, mo oli kilimded olgeta long ol taosen mo long ol ten blong ol taosen.

22 Mo olsem ia nao tingting ia blong ol pipol blong Semnaraeha blong wantem stopem plan blong olgeta i kam, from bigfala panis we i kam long olgeta long naet mo long dei.

23 Mo i bin hapen se Semnaraeha i givim oda long ol pipol blong hem se oli mas stop long wok blong raonem ples, mo maj i go long ol pat blong graon long Not we oli stap moa longwe bitim ol narafala ples.

24 Mo nao, Gidgidonae, from hem i save plan blong olgeta, mo from hem i save se oli slak from oli nidim kaekae, mo fasin blong kilimded we i bin hapen long medel blong olgeta i bigwan, nao from hemia, hem i sendem ol ami blong hem oli aot long naet taem, mo blokem rod blong olgeta blong ronwe long hem.

25 Mo samting ia oli mekem long naet taem, mo oli maj i go bitim ol stilman, blong mekem se long nekis dei, taem we ol stilman oli statem maj blong olgeta, bae oli mitim ol ami blong Ol Man blong Nifae long fored blong olgeta tugeta wetem long biaen blong olgeta.

26 Mo ol stilman we oli stap long Saot, olgeta tu, oli blokem ol ples blong olgeta blong ronwe i go long hem. Mo evri samting ia i hapen folem oda blong Gidgidonae.

27 Mo i bin gat plante taosen we oli letem olgeta blong oli kam ol prisena long Ol Man blong Nifae, mo olgeta narawan we oli stap, oli kilimded olgeta.

28 Mo lida blong olgeta, Semnaraeha, oli tekem hem mo hangem hem long wan tri, yes, antap evriwan blong tri ia kasem taem we hem i ded. Mo taem we oli hangem hem kasem taem we hem i ded, oli mekem tri ia i foldaon long graon, mo oli singaot wetem wan voes we i laod, oli talem:

29 “Bae Lod i sevem ol pipol blong hem long stret mo gud fasin mo wetem tabu fasin blong hat, blong mekem se olgeta evriwan we bae oli lukaotem blong kilimded olgeta from paoa mo ol sikret grup, bae oli foldaon long graon, semmak olsem man ia i bin foldaon long graon.”

30 Mo oli bin hapi mo singaot bakegen wetem wan voes, oli talem se: “Bae God blong Ebraham, mo God blong Aesak, mo God blong Jekob, i protektem ol pipol ia long stret mo gud fasin, long taem we bae oli prea long nem blong God blong olgeta blong hem i protektem olgeta.”

31 Mo i bin hapen se oli stat, olgeta evriwan olsem wan, blong singsing, mo presem God blong olgeta from bigfala samting we hem i bin mekem long olgeta, blong sevem olgeta blong oli no foldaon long han blong ol enemi blong olgeta.

32 Yes, oli bin singaot: “Hosana long Hae God we I Hae Olgeta.” Mo oli bin singaot: “Blesem nem blong Lod God we I Gat Olgeta Paoa, Hae God we I Hae Olgeta.”

33 Mo hat blong olgeta i solap long glad, mekem se plante wota blong ae i ron, from bigfala gudfala fasin blong God blong tekem olgeta aot long han blong ol enemi blong olgeta; mo oli save se, hem i from fasin blong sakem sin blong olgeta mo fasin blong putum tingting i stap daon blong olgeta we i mekem se oli kamaot long panis we i no gat en.