Achil quilcashcacuna
3 Nefi 1


Quimsa Cati Nefi

Nefipaj quilcashca
Nefipaj Churi, Pimi Helamánpaj Churi Carca

Helamán Helamánpaj churi carca, pimi Almapaj churi carca, pimi Almapaj churi carca, Nefipaj cati aillu pimi Lehipaj churi carca, pimi Jerusalénmanda llujshimurca callari huatapi Sedequías, Judápaj jatun mandajpaj reinadopi.

1 Capítulo

Nefi, Helamánpaj churi, pambata saquishpaca rin, paipaj churi Nefi alichin tandachishca quilcashcacunata—Masqui señalcuna, juyailla ricurinacunapash ashtacapacha tiajpipash, na ali rurajcuna planda ruran huañuchingapa ali rurajcunata—Cristo nacirina tuta chayamun—Señal cushca can, shuj mushuj lucero ricurin—Llullaicuna, umachicunapash miran, Gadiantón shuhuacuna taucacunata huañuchin. Nara C.H. 1–4.

1 Cunan yalishca jipa iscun chunga shuj huata yalishca carca cai carca sujta patsaj huatacuna Lehi Jerusalénda llujshishca punllamanda; cai carca chai huata Laconeo ricushpa chasquichijcunapaj yali mandaj carca tucui alpapaj gobernador.

2 Nefi, Helamánpaj churi, Zarahemlapaj alpamanda rishca carca, cushpa ruranacunata paipaj churi Nefiman, pimi carca paipaj rucu churi, bronce jirru fangacunamanda, tucui tandachishca quilcashcacuna imacunata alichishca carca, tucui chai cuzascuna imata achilyachishca alichishca carca Lehi Jerusalénmanda llujshimushcamanda.

3 Shina pai chai pambamanda rirca, pipash na yachan maiman rishcata; paipaj churi Nefi alichirca tandachishca quilcashcacunata paipaj pushtupi, ari, cai llactapuracunapaj tandachishca quilcashca.

4 Yalishca jipa iscun chunga ishcai huata callaripi, riqui, achil villachijcunapaj villachishcacuna ashtahuan tucuilla pactai callarirca; tiai callarirca jatunbacha señalcuna, jatunbacha juyailla ruraita ricuchinacuna llactapuracunapi rurashca.

5 Ashtahuangari tiarca huaquinguna picuna ni callarirca, shimicuna pactashca cana punllacuna yalishca, imata Samuel, shuj Lamanita parlashca carca.

6 Paicuna asi callarirca paicunapaj huauquicunamanda, nishpa: Riqui punlla yalishca, Samuelpaj shimicuna na pactan; chaimanda, cangunapaj cushijui, cangunapaj fe cai cuzasmanda yanga cashca.

7 Yalishca jipa paicuna ninanda rimarca tucui alpacunapi; llactapuracuna maijan crijcuna ninanda llaquiri callarirca, imashpapash chai cuzascuna imata parlashca carca na yalinamanda.

8 Ashtahuangari riqui, paicuna shinlliyashpapacha shuyanajurca chai punlla, chai tuta, chai punlla ima shuj punllashna cachun tuta na tianshnalla, paicuna yachai ushangapa paicunapaj fe na yanga cashcata.

9 Cunan yalishca jipa na crijcuna shuj punllata shicanyachishca tiarca, tucui maijan chai punda ruraicunapi crijcuna huañuchinapi churashca cana imashpapash señal shamujpilla na, imata Samuel achil villachij cushca carca.

10 Cunan yalishca jipa imaura Nefi, Nefipaj churi, ricurca paipaj llactapuracunapaj cai na ali ruraicunata, paipaj shungu ninandapacha llaquirishca carca.

11 Yalishca jipa pai rirca alpacaman urai cungurirca, ninandapacha mañarca paipaj Diosta paipaj llactapuracunapaj alicanamanda, ari, maijan tucuchi tucushca cana cunamanda paicunapaj punda taitacunapaj yachachishcapi femanda.

12 Yalishca jipa pai ninandapacha mañarca Apunchijta tucui punlla; riqui, Apunchijpaj shimi paipaman shamurca, nishpa:

13 Canba umata vichai alsai ali cushijushca cai; riqui, punlla ña caipi can, cai tuta señalta cushca canga, cayapa ñuca cai pachaman shamuni, cai pachaman ricuchingapa ñuca tucuita pactachisha imata ñuca parlachishcata ñuca achil achil villachijcunapaj shimihuan.

14 Riqui, ñucapacunapaman shamuni, tucui cuzascunata pactachingapa imata ñuca yachaj chayachishcani runacunapaj huahuacunaman cai pachata rurashcamanda, munaita rurangapapash, ishcandipaj Taitapata, Churipatapash—Taitapata ñucamanda, Churipata ñuca aichamanda. Riqui, punlla ña caipi, cai tuta señalta cushca canga.

15 Yalishca jipa shimicuna imata Nefiman cushca pactashca carca, imashna parlashca laya; riqui, indi urai rijpi na yanayai tiarca; llactapuracuna manllari callarirca yanayai na tiaimanda imaura tuta shamujpi.

16 Taucacuna tiarca, maijan achil villachijcunapaj shimicunata na crijcuna, maijanguna alpaman urmarca huañushca layaman tigrarca, imashpa paicuna yacharca chai jatun tucuchina plan imata paicuna maijan achil villachijcunapaj shimicunata crishcacunapa munashca na rurai ushana carca; imashpa señal imata cushca carca ña caipi carca.

17 Paicuna yachai callarirca Diospaj Churi ñapacha ricurimuna carca; ari, tucuripi, tucui llactapuracuna tucui alpa jahuallapi indi huashajuna ladomanda indi llujshimuna ladocaman, vichai alpapi, urai alpapipash, shina ninandapacha manllarishca caimanda paicuna alpaman urmarca.

18 Paicuna yacharca achil villachijcuna testificashca cashcata cai cuzascunamanda tauca huatacunata, chai señalpash imata cushca carca ña caipi carca; paicuna manllai callarirca paicunapaj na ali ruraicunamanda, paicuna na crimanda.

19 Yalishca jipa yanayai na tiarca tucui tuta, ashtahuangari punchapamba carca chaupi punlla laya. Yalishca jipa indi ricurimurca cutin tutamandapi, paipaj propio ordenpi; paicuna yacharca cai carca punlla Apunchij nacirishca cana, señalmanda imata cushca carca.

20 Yalishca carca, ari, tucui cuzascuna, tucui uchillacunapash, achil villachijcunapaj shimimanda.

21 Yalishca jipa shuj mushuj lucero ricurirca, achil villashcacuna nishcashna.

22 Yalishca jipa chai punllamanda ñaupaman Satanás llullaicunata cachai callarirca llactapuracunaman, paicunapaj shungucunata shinlliyachingapa, munashpa paicuna ama crichun chai señalcunapi, juyailla ricurinacunapipash imata paicuna ricushca carca; ashtahuangari masqui cai llullaicuna, umachinacunapash llactapuracunapamanda tucuimanda yalishca crirca, Apunchijpaman tigrarcapash.

23 Yalishca jipa Nefi llactapuracunaman rirca, tauca cutishujcunapash, bautizashpa arrepentimientopa, caihuan tiarca shuj jatun juchacunapaj anchuchi. Shina llactapuracuna cutin callarirca sumaj causaita charishpa pambapi.

24 Na tiarca randimanda plituricuna, huaquingunalla yachachi callarirca, achil quilcashcacunahuan ricuchingapa munashpa, ñana ashtahuan minishtirishca cajta Moiséspaj catichunbacha saquishcacunata alichina. Cunan caipi pandashcacuna carca, achil quilcashcacunata na yuyaipi charimanda.

25 Ashtahuangari yalishca jipa paicuna ñapash crijman tigrarca, convencirishca carca pandaita imapi paicuna carca, paicunaman caita yachaj chayachishca carca, catichunbacha saquishcacuna nara pactashca cajta, cai pactashca canapacha carca tucui uchillacunapi; ari, paicunapaman shimi shamurca cai pactashcapacha cana; ari, ni shuj jotallapash nacashpa ni shuj tildellapash na yalingachu imaura cai tucuilla pactashca cangacaman; chaimanda cai huatapillata paicunaman yachaj chayachirca paicunapaj pandaita, paicunapaj pandashpa rurashcacunata villarcapash.

26 Shina iscun chunga ishcai huata yalirca, llactapuracunaman mushuj cushijunacunata apamushpa señalcunamanda imacuna yalirca, tucui achil villachijcunapaj achil villashca shimicunamanda.

27 Yalishca jipa iscun chunga quimsa huatapash yalirca sumaj causaipi, Gadiantón shuhuacunamandalla, picuna urcucunapi causanajurca, picuna alpata llaquichishpa causarca; imashpa shina shinlli carca paicunapaj pushtucuna, paicunapaj pacalla pushtucunapash llactapuracuna paicunata na mishai usharca; chaimanda paicuna tauca huañuchicunata rurarca, ashtaca huañuchita rurarca llactapuracunapi.

28 Yalishca jipa iscun chunga chuscu huatapi paicuna mirai callarirca ninandapacha, tiarca Nefitacunapamanda tauca shicanyarishcacuna maijanguna paicunapaman calparca, caica ashtacata llaquiyachirca Nefitacunata picuna llactapi catirca.

29 Tiarcapash imamanda llaquiyana Lamanitacunapi; riqui, paicuna charirca tauca huahuacunata picuna viñarca callarircapash shinllicunapi tigrashca huatacunapi, paicunamandallata canacaman, huaquin maijan Zoramitacunahuan apai tucurca, paicunapaj llullaicunahuan, paicunapaj uyanayai shimicunahuan, chai Gadiantón shuhuacunahuan tandanajuchun.

30 Shina carca Lamanitacunapaj llaquiyaicunapash, ashallayai callarirca paicunapaj fepi, ali ruraicunapi, viñai miraicunapaj na ali ruraicunamanda.