8 Capítulo
Ushashca tamiacuna, alpa chujchuicuna, rupaicuna, acapanacuna, alpapaj manllanayai tucuricuna villanbacha Cristopaj cruzpi chacatarinata—Tauca llactapuracuna tucuchishca canga—Quimsa punllacunata pambata tutalla quilpanga—Maijan puchushcacuna huacan paicunapaj ima canamanda. Nara C.H. 33–34.
1 Cunan yalishca jipa ñucanchi tandachishca quilcashcamanda, ñucanchi yachanchi ñucanchi tandachishca quilcashca ciertopacha can, riqui, cai carca shuj ali runa pimi alichirca tandachishca quilcashcata—pai ciertopacha rurarca tauca juyailla ruraita ricuchinacuna Jesúspaj shutipi; na tiarca maijan runapash shuj juyailla ruraita ricuchinata ushaj Jesúspaj shutipi imashpapash maillashcapacha cashca tucui uchillacunacaman paipaj na ali ruraicunamanda—
2 Cunan yalishca jipa, cai runa ñucanchi punllacunata yupanapi na pandashca cashpaca, quimsa chunga quimsa huata yalishca carca;
3 Llactapuracuna jatun munaihuan shuyai callarirca señalta imata achil villachij Samuel, shuj Lamanita cushca carca, ari, imaura quimsa punllacunata tutalla tianata alpa jahuallapi.
4 Tiai callarirca jatun na crinacuna, plituricunapash llactapuracunahuan, masqui shina tauca señalcuna ricuchishca cajpipash.
5 Yalishca jipa quimsa chunga chuscu huatapi, callari quilla, quillapaj chuscu punllapi, jatarirca shuj ninan tamia, shina nimaurapash na rijsishca tucui pambapi.
6 Tiarcapash shuj jatun, manllanayai ushashca tamia; tiarca manllanayai culun nijcuna, shinashpa chujchurca tucui alpa cai ñalla chaupirigrij laya.
7 Tiarca ninan punchapamba shitaicuna, shina nimaurapash na ricushca tucui alpapi.
8 Zarahemlapaj llacta ruparca.
9 Moronipaj llacta huashajurca jatun mama cocha ucu ucuman, chaipi causajcunapash pambai tucurca.
10 Alpa tandanajurca Moroníahpaj llacta jahuapi, llactapaj pushtupi shuj jatun urcu tigrarca.
11 Tiarca shuj jatun, manllanayai tucuchi urai pambapi.
12 Ashtahuangari riqui, tiarca ashtahuan jatun, manllanayai tucuchi vichai pambapi; riqui, tucui alpa jahualla shujman tigrashca carca, ushashca tamiamanda, acapanacuna, culun nijcuna, punchapamba shitaicuna, ninan jatun tucui alpa chujchushpa;
13 Jatun ñanguna faquirirca, ñanguna ucupi jahuapi carca, tauca pugru pushtucuna lomalla pushtucunaman tigrarca.
14 Tauca jatun, ajllashca llactacuna huashajurca, taucacuna ruparca, tauca chujchurca imaura jatun huasicuna alpaman urmangacaman, chaipi causajcuna huañurca, pushtucuna imapash illaj saquirirca.
15 Tiarca huaquin llactacuna maijan puchushca; ashtahuangari ninan jatun carca huaglicuna, chaipi taucacuna huañurca.
16 Huaquinguna acapanahuan apai tucurca; maiman rishcata pipash na yachan, ashtahuangari yachan paicuna apai tucushcata.
17 Shina tucui alpa jahualla shuj layaman tigrarca, ushashca tamiamanda, culun nijcuna, punchapamba shitaicuna, alpapaj chujchuicunapash.
18 Riqui, rumicuna chaupipi partirirca; uchilla faquirishca carca tucui alpa jahuallaman, shinashpa jamzicunapi faquirishcacunata tarishca carca, chaupirishca, faqui faquipash, tucui pamba jahuallapi.
19 Yalishca jipa imaura culun nijcuna, punchapamba shitaicunapash, huairahuan tamia, ushashca tamiapash, alpapaj chujchuicuna saquirijpi—riqui, caicuna catirca quimsa horascunatashna; huaquinguna nirca caica ashtahuanbash carca; shina cajpipash, tucui cai jatun, manllanayai cuzascuna yalirca quimsa horaspishna—shina riqui, tiarca yana yana alpa jahuallapi.
20 Yalishca jipa tiarca yanamanga tucui alpa jahuallapi, shinashpa na urmashca causajcuna sentirca yanallapaj cushni samaita;
21 Micha na tiai usharca, yanamangamanda, velallapash, antorchallapash; jamzi, ninan chaquishca caspihuanbash na ninata japichi usharca, shina nima michapash na tiai usharca;
22 Nima michapash na ricurirca, ninallapash, nacashpa punchallayachina, lunallapash, lucerocunallapash, shina ninan yanalla cushni samaimanda imami carca alpa jahuallapi.
23 Yalishca jipa quimsa horascunatashna micha na ricurirca; tiarca jatun llaquiricuna, ayayai nishpa caparicuna, huacaicunapash tucui llactapuracunapi cati cati; ari, jatun carca llactapuracunapaj quijaricuna, yanapamba, jatun tucuchimandapash imami paicunapaman shamurca.
24 Shuj pushtupi uyarirca capari, nishpa: Oh ñucanchi arrepentirishca cashpa cai jatun, manllanayai punllapa punda, shina ñucanchi huauquicuna quishpirinman carca, paicuna na rupashca canman carca chai jatun Zarahemla llactapi.
25 Cutishuj pushtupi uyarirca capari, quijaripash, nishpa: Oh ñucanchi arrepentirishca cashpaca cai jatun, manllanayai punllapa punda, na huañuchishpa, na rumihuan huañuchishpa achil villachijcunata, paicunata na calpachishpa; shina ñucanchi mamacuna, ñucanchi juyailla ushicuna, ñucanchi huahuacunapash quishpirinman carca, na pambai tucunman carca chai jatun Moroníah llactapi. Shina jatun manllanayai carca llactapuracunapaj ayayai nishca caparicuna.