25 Capítulo
Cati Shamuipi, jariyaj, na alita ruraj jupa laya rupachishca canga—Elías tigramunga chai jatun manllanayai punlla nara cajpi—Malaquías 4-huan parijashpa ricui. Nara C.H. 34.
1 Riqui, punlla shamun jornoshna rupanga; tucui jariyajcuna, ari, tucui na alita rurajcuna, jupashna canga; punlla shamun paicunata rupachingapa, Tucuita Mandaj Apunchij nin, chai na saquinga sapitapash, malquitapash.
2 Ashtahuangari cangunapa picuna ñuca shutita manllanguichi, Ali Ruranapaj Churi jataringa paipaj alascunapi jambinahuan; canguna llujshinguichi, viñachinguichipash chicugucunashna establopi.
3 Canguna sarunguichi na alicunata; paicuna canga uchufashna cangunapaj chaquicunapaj plantapi chai punlla ñuca caita rurasha, Tucuita Mandaj Apunchij nin.
4 Yarichi Moiséspaj catichunbacha saquishcacunata, ñuca sirvij runa, imata ñuca mandarcani Horebpi tucui Israelpa, pactachinacunahuan, ricushpa chasquichinacunahuanbash.
5 Riqui, ñuca cachasha Elías achil villachijta nara Apunchijpaj jatun manllanayaipash punlla shamujpillata.
6 Pai tigrachinga taitacunapaj shungucunata huahuacunapaman, huahuacunapaj shungucunata paicunapaj taitacunapaman, imashpapash ñuca shamuiman, chugrichiman shuj llaquihuan.