1 Yalishca jipa shina yalirca iscun chunga picha huatapash, llactapuracunapash cungai callarirca chai señalcuna, juyailla ricurinacunapash imata paicuna uyashca carca, asha ashalla manllari callarirca jahua pachapaj shuj señalta nacashpa shuj juyailla ricurinata, shinashpa paicuna callarirca shinlli caita paicunapaj shungucunapi, ñausachispa paicunapaj yuyaicunata, na cri callarircapash tucui imata paicuna yashca, ricushca cashcata—

2 Yuyashpa huaquin yanga cuzasta paicunapaj shungucunapi, caicuna rurashca carca runacunapaj ayapajpash ushaihuan, chingachingapa, umachingapapash llactapuracunapaj shungucunata; shina Satanás cutin mishashpa charirca llactapuracunapaj shungucunata, shinashpa paicunapaj ñavicunata ñausayachirca, paicunata aparca crichun Cristopaj yachajunaca shuj juizu illa, shuj yanga cuzas cajta.

3 Yalishca jipa llactapuracuna shinllicunaman tigrai callarirca na ali ruraicunapi, millanayaicunapipash; paicuna na crirca ashtahuan ricurinata señalcuna nacashpa juyailla ricurinacunapash; Satanás caiman chaiman rirca, chingachishpa llactapuracunapaj shungucunata, paicunata juchata rurachishpa, jatun na ali ruraicunata rurachishpa pambapi.

4 Shina yalirca iscun chunga sujta huata; iscun chunga canchis huatapash; iscun chunga pusaj huatapash; iscun chunga iscun huatapash;

5 Patsaj huatacunapash yalishca carca Mosíahpaj punllacunamanda, pimi carca jatun mandaj Nefitacunapaj llactapuracunapaj jahuapi.

6 Sujta patsaj iscun huatacuna yalishca carca Lehi Jerusalénmanda llujshimushcamanda.

7 Iscun huatacuna yalishca carca imaura señalta cushcamanda, imata parlashca carca achil villachijcuna, Cristo cai pachaman shamunata.

8 Cunan Nefitacuna paicunapaj tiempota yupai callarirca cai punllacunata imaura señalta cushca carca, nacashpa Cristo shamushcamanda; chaimanda, iscun huatacuna yalishca carca.

9 Nefi, pimi Nefipaj taita carca, pimi tandachishca quilcashcacunata ricuriajurca, na tigrarca Zarahemlapaj pambaman, tucui pambapi nimaipi na tupai tucurca.

10 Yalishca jipa llactapuracuna catircara na ali ruraicunapi, masqui ashtaca yachachishca, achil villashca imata paicunaman cachashca carca; shina yalirca chunga huatapash; chunga shujpash yalirca na ali ruraicunapi.

11 Yalishca jipa chunga quimsa huatapi tiai callarirca macanajuicuna, randimanda plituricuna tucui pambapi; Gadiantón shuhuacuna mirashcapacha caimanda, shina tauca llactapuracunata huañuchirca, tucuchirca shina tauca llactacunata, shina ashtaca huañuita caiman chaiman shitarca, huañuchishpa tucuchitapash tucui pambapi, cai minishtirishcaman tigrarca tucui llactapuracuna, ishcandi Nefitacuna, Lamanitacunapash, macanajunacunata japina paicunapaj contra.

12 Chaimanda, tucui Lamanitacuna maijan Apunchijman crij tigrashcacuna tandanajurca paicunapaj huauquicuna Nefitacunahuan, munai na munai carca, paicunapaj causaicunata quishpichingapa, paicunapaj huarmicunata, paicunapaj huahuacunatapash, macanajunacunata japina chai Gadiantón shuhuacunapaj contra, ari, charishpa catingapa paicunapaj derechocunata, paicunapaj iglesiapaj privilegiocunatapash, paicunapaj adoranata, paicunapaj librecai, paicunapaj libertadpash.

13 Yalishca jipa cai chunga quimsa huata nara yalijpi Nefitacuna amenazashca carca tucuilla tucuchinahuan cai macanajuimanda, imami ninan llaquipacha tigrashca carca.

14 Yalishca jipa chai Lamanitacuna maijan Nefitacunahuan tandanajushca carca Nefitacunapi yupai tucushca carca.

15 Paicunapaj ninan llaqui anchuchishca carca, paicunapaj aichacaracuna yurajman tigrarca Nefitacunashna;

16 Paicunapaj viñaj huambracuna, paicunapaj ushicunapash ninan juyaillagucunapachaman tigrarca, Nefitacunahuan yupashca carca, Nefitacuna shutichishcapash carca. Shina tucurirca chunga quimsa huata.

17 Yalishca jipa chunga chuscu huata callaripi, macanajui shuhuacunahuan Nefipaj llactapuracunahuan catirca ninan llaquipachamanbash tigrarca; shina cajpipash, Nefipaj llactapuracuna ashata misharca shuhuacunata, shinashpa paicuna tigrai calpachirca paicunapaj pambacunaman urcucunapi, paicunapaj pacalla pushtucunaman.

18 Shina tucurirca chunga chuscu huata. Chunga picha huatapi shamurca Nefipaj llactapuracunapaj contra; Nefipaj llactapuracunapaj na ali ruraicunamanda, paicunapaj tauca randimanda plituricunamanda, ninanda fiñarishpa rimarinacunamandapash, Gadiantón shuhuacuna paicunata ashata misharca.

19 Shina tucurirca chunga picha huata, shina carca llactapuracunapaj ashtaca llaquicunapi cana; tucuchinapaj espada paicunata shushurca, shinashpa paicuna caihuan ña chugrinalla carca, cai paicunapaj na ali ruraicunamanda.